1, 2. Kukalanyi kunateli kumonawu atwansi makonu, nawa njilanyi jinateli kuyikwasha kushinda kukala kweniku?

MUHELA wakansi muBritain amulejeli kudi mukwawu mukashikola nindi, “Chinamwekani neyi wamukuhwelela nankashi Nzambi.” Manakwetu wakuGermany wasonekeli nindi: “Antañishi jami amonaña nsañu yakuleña yekala muBayibolu nawu hiyishimu hohu. Nawa atoñojokaña nawu akashikola atela kukuhwelela nawu yuma yadileñeli yayeni.” Muhela wakansi muFrance wahosheli nindi: “Antañishi ahashikola yetu ahayamaña kwiluka nawu kudi akashikola achidi kukuhwelela Bayibolu.”

² Chineli mudi kambuña aYehova wakansi indi kwiji munakudiza hadi Yena, komana mwatiyaña neyi kwiji munakukeña kwiteja ntañishilu yaya mpuhu yidi neyi yuma yadileñeli yayeni, chatela mukuhweleli mudi Nleñi tahindi? Neyi dimu, kudi njila jimwatela kwila kulonda mukoleshi chikuhwelelu chenu nikutwalekahu. Njila yimu hikuzatisha wuswa wenu wakutoñojoka wayinkayi Nzambi, ‘wakekala kalama keyi.’ Wukuyikwasha kubula kukuhwelela muyitoñojoka yawantu yinateli kujiyisha chikuhwelelu chenu.—Tañenu Yishimu 2:10-12.

3. Chumanyi chitukuhanjekahu muchinu chibaaba?

³ Chikuhwelelu chalala chashindamena hakwiluka kwalala hadi  Nzambi. (1 Tim. 2:4) Dichi, hampinji yimukudizaña Izu daNzambi ninyikanda yetu yawakwaKristu, bayi muyitañeña lufuchi kulonda mumanishi swayiku. Zatishenu wuswa wenu wakutoñojoka kulonda mwiluki ‘munalumbulukili’ nsañu yimunakutaña. (Mat. 13:23) Tushinshikenu kwila mwenimu chikunateli kuyikwasha kukolesha chikuhwelelu chenu mudi Nzambi hamu neyi Nleñi nikukuhwelela nyitu yansañu yamuBayibolu yikweti ‘wunsahu walala.’—Heb. 11:1.

4. Muloñadi chikuhwelelu chichakeñekelaña hakumukuhwelela Nzambi nikukuhwelela nawu yuma yadileñeli yayeni, nawa njilanyi yayiwahi yitwatela kuzatisha?

⁴ Komana antu ayilejahu dehi nawu akuhwelela nawu yuma yadileñeli yayeni muloña yashindamena hasayansi ilaña kukuhwelela mudi Nzambi kwashindamena hachikuhwelelu? Antu amavulu akuhwelela iyi yitoñojoka. Hela chochu, chalema kwiluka chumichi: Hichikweti muloña nayuma yakuhwelelayi muntu hadi Nzambi hela nindi yuma yadileñeli yayeniku, chikuhwelelu chakeñekaña. Munjilanyi? Hakachi ketu hosi muntu wamumonahu dehi Nzambi hela wamweni anakuleña chuma. (Yow. 1:18) Nawa kwosi muntu hela wumu chili hisayantisiti hela nehi, wamonahu dehi chuma chikweti wumi chinakuhimpika kwikala chuma chikwawu. Chakutalilahu, kwosi wamonahu dehi inoka hela munsulu nakubalumuka kwikala mutupa hela nzovu. (Yoba 38:1, 4) Dichi, wejima wetu twatela kushinshika chikupu wunsahu nikuzatisha wuswa wetu wakutoñojoka kulonda tukunkululi mwamaana. Kapostolu Pawulu wasonekeli kutalisha hakuleña nindi: “Kufumisha haleñeluwu mpata yamunu mwishina, yuma [yaNzambi] yakadi kumonewa yalumbulukila, muloña ayilukaña nayuma yaleñeliyi, joju ñovu jindi jahaya nyaka niwuNzambi windi; kulonda abuli mwakuleyela.”—Rom. 1:20.

5. Hamu neyi antu jaNzambi, yitwanyi yitukweti yinateli kutukwasha kwiluka hayileñaleña?

⁵ ‘Kwiteja chikupu’ kwatalisha mukwiluka yuma yitunateli kubula kumona hanoyu mpinji. (Heb. 11:3) Dichi, antu etejaña chikupu, azatishaña yitoñojoka yawu, bayi neyi mesu nimatu awu hohuku. Kuloñesha kwaYehova kunaloñeshi yitwa yayivulu yasandujolawu chiwahi kulonda yitukwashi. Yitwa yeniyi yinateli kutukwasha ‘kumona’ Nleñi yetu namesu etu achikuhwelelu. (Heb. 11:27) Yitwa yeniyi hiyozelu yidi neyi vidiyo yaThe Wonders of Creation Reveal God’s Glory,  mabuloshuwa aWas Life Created? niThe Origin of Life—Five Questions Worth Asking, nimukanda waIs There a Creator Who Cares About You? Cheñi, twatambwilaña yakuda yayiwahi yatukwashaña muyitoñojoka kuhitila mumagazini. Kakavulu, muAwake! mwekalaña yibalu yehujolañawu asayantisiti niantu amakwawu ashimunaña yuma yayiletesheli atachiki kumukuhwelela Nzambi. Yibaaba yahoshaña hamutu wakwila nawu, “Was It Designed?” mwekalaña yakutalilahu yanyitapu nanyitapu yayileñaleña yakuhayamisha yitwamonaña. Kakavulu, asayantisiti afwilaña kwimbujola yileñaleña yamuchidiwu.

6. Yumanyi yikwawu yafumaña mukuzatisha yitwa yitukweti, nawa munahetelimu ñahi?

⁶ Manakwetu wayaaka yakusemuka 19 wakuUnited States wahosheli kutalisha hamabuloshuwa ayedi itunateni dehi nindi: “Awa mabuloshuwa ankwashaña nankashi. Nayidizi kapampa kakavulu.” Muhela wumu muFrance wasonekeli nindi: “Yibaaba yamubuloshuwa ‘yaWas It Designed?’ yanhayamishaña! Yamwekeshaña nawu ainjiniya akuluka yitembi anateli kwimbujola, ilaña hiyakutwesha kutuña chuma kwesekeja nachachileñeliwuku.” Anvwali akweti mwana wayaaka yakusemuka 15 akuSouth Africa ahosheli nawu: “Nsañu yasambilaña kutañayi mwanetu muAwake! hichibaaba ‘chaKwihujola.’” Indochu enu? Mwatañaña iyi yibaaba? Yinateli kukolesha chikuhwelelu chenu kwikala neyi mutondu weñija chikupu nyiji kwishina. Dikwila nawu chikuhwelelu chenu chikuyikwasha kuumika kukala kudi neyi mpepela yantañishilu yakutwamba.—Yere. 17:5-8.

7. Muloñadi Nzambi chakeñelañayi nindi muzatishi wuswa wenu wakutoñojoka?

⁷ Komana chatama kwihula malwihu ashikilamu kutalisha haBayibolu? Inehi mwani! Yehova wakeñaña nindi muzatisha ‘wuswa wenu wakutoñojoka’ kulonda mwiluki chalala. Hakeñaña nindi mukuhweleli muloña wakwila amakwawu anakuhweleliku. Dichi, zatishenu wuswa wenu wakutoñojoka kulonda mwiluki kwiluka kwalala. Iku kwiluka kukuyikwasha kwikala nachikuhwelelu chakola nankashi. (Tañenu aRoma 12:1, 2; 1 Timotewu 2:4.) Njila yimu yakwilukilamu hikudiza nsañu yimunakukeña kwiluka chikupu.

8, 9. (a) Kudiza kwamuchidinyi kunateli kudiluñishawu antu amakwawu? (b) Antu amakwawu anahetelimu ñahi mukutoñojoka chikupu hayuma yadizañawu?

⁸ Amakwawu atondahu kudiza hawuprofwetu wamuBayibolu hela kwesekeja nsañu yamuBayibolu nansañu yahoshawu antu adiza hansañu yakunyaaka, asayantisiti niakwakuvumbujola yuma. Wuprofwetu wumu wawuwahi wutwatela kushinshikahu hiwuprofwetu wekala haKutachika 3:15. Iyi vasi yashimuna nsañu yalema yamuBayibolu, dikwila nawu kuhakwilaku Wanta waNzambi nikujilika ijina dindi kuhitila muWanta. Iyi vasi yimu hohu, yamwekeshaña Yehova chakamanishayi kukala kunamoniwu antu kufuma tuhu muEdeni. Munateli kudiza ñahi Kutachika 3:15? Njila yimu hikutanjika nsañu mundonda. Hadaha kusoneka nsona jalema jamwekeshaña Nzambi chakwashileñayi antu kwiluka chalala chovu-chovu nintanjikilu yekala muniyi vasi ninsañu yamwekeshaña iwu wuprofwetu chiwakashikijewa. Chimukumonaña nsona chijinakudinuña hamu, chakadi nikujina mukukunkulula nenu atuprofwetu amuBayibolu ‘ayilombweli naspiritu yajila.’—2 Pet. 1:21.

⁹ Manakwetu muGermany wasonekeli nindi: “MuBayibolu mwekala nsañu yayivulu yahosha haWanta. Diyi nsañu yekalamu hela chakwila antu 40 diwu asonekeli Bayibolu. Nawa amavulu ashakamineña hampinji jashiyashana nawa hiyadilukili hamuntu-hamuntuku.” Muhela wakuAustralia wadizili chibaaba chadiña muKaposhi Kakutalila kakudizamu kaDecember 15, 2013, chalumbulwili mwatalisha Chipandakenu. Iku kwanakana kwalema kwanuñañana chikupu nansañu yekala haKutachika 3:15 nikwinza kwaMesiya. Iwu muhela wasonekeli nindi: “Iku kudiza  kwankwashili kwiluka nami Yehova wamuwahi. Natiyili kuwaha hakwiluka nami kudi muntu washiliku ntanjikilu yamuchidiwu kudi aIsarela yenjili nakushikijewa kuhitila mudi Yesu. Nahudikilili nakutoñojoka chikupu hawuprofwetu wakuda kwaChipandakenu chiwadiña walema.” Muloñadi iwu muhela chatiyililiyi muniyi njila? Watoñojokeli chikupu hansañu yatañiliyi nawa ‘yamulumbulukilili.’ Chumichi chamukwashili kukolesha chikuhwelelu chindi nikukundama kwakwihi naYehova.—Mat. 13:23.

10. Kashinshi kawansoneki aBayibolu katuleteshaña ñahi tukuhweleli chikupu nsañu yasonekeliwu?

¹⁰ Chuma chikwawu chakukolesha chikuhwelelu chitwatela kushinshikahu, hikuhamuka nikashinshi kadiña nawantu asonekeli Bayibolu. Ansoneki amavulu akushankulu ahamekeleña anlomboli jawu nikulemesha mawanta awu. Hela chochu, atuprofwetu aYehova mpinji yejima ahosheleña walala. Ashimwineña yiluwa yakoñeleñawu antu jawu kushilahu nianyanta jawu. (2 Kushi. 16:9, 10; 24:18-22) Nawa ashimwini hatooka yiluwa yawu niyawambuña amakwawu aNzambi. (2 Sam. 12:1-14; Maku 14:50) Manakwetu wakansi wakuBritain wahosheli nindi, “Kashinshi kamuchidiwu hiyavula kukimwekeshaku. Chumichi chinakuletesha tukuhweleli netu mwalala Bayibolu yafuma kudi Yehova.”

11. Atwansi anateli kulemesha ñahi chikupu yishina yalema yamuBayibolu?

¹¹ Antu amavulu akuhwelela chikupu nawu Bayibolu ayoneneni kudi Nzambi muloña wayishina yekalamu yalombolaña antu. (Tañenu Masamu 19:7-11.) Muhela wakansi muJapan wasonekeli nindi: “Chisaka chami chichatachikii kulondela kufumba kamuBayibolu, twadiña namuzañalu. Twadiña mukuwunda, anuñañana nawa adikeña.” Yishina yamuBayibolu yatukiñaña kuntañishilu yakutwamba nikukupesha kuneñiji antu amavulu muwuduñu. (Mas. 115:3-8) Komana yitoñojoka yawantu yakwila nawu kwekala Nzambi wanyi yaluwañeshaña antu? Ntañishilu yamuchidiwu yakwila nawu yuma yadileñeli yayeni, kafwampi chidi neyi abalumunaña yileñaleña kwikala nzambi yawu nikuyinka ñovu yekala naYehova hohu. Antu akuhwelela nawu kwekala Nzambi wanyi ahoshaña nawu chihandilu chetu chakumbidi chashindamena hadi etu aweni. Antu amuchidiwu hiyakweti kuchiñeja kwalala kwakumbidiku.—Mas. 146:3, 4.

12, 13. Njilanyi yayiwahi yakuhanjekelamu nawakwenu akashikola, antañishi hela antu amakwawu kutalisha hakuleña hela hansañu yamuBayibolu?

¹² Munateli kuyilumbulwila ñahi chiwahi antu amakwawu neyi munakuhanjeka hayileñaleña nihaBayibolu? Chatachi, bayi munyakala kutoñojoka nenu mweluka yuma yakuhwelelawu antuku. Antu amakwawu ahoshaña nawu akuhwelela nawu yuma yadileñeli yayeni, ilaña atoñojokaña cheñi nawu Nzambi wekala kwoku. Atoñojokaña nawu Nzambi wakojejeli yuma yitachiki kudileña yayeni. Amakwawu ahoshaña nawu akuhwelela nawu yuma yadileñeli yayeni muloña atoñojokaña nawu neyi chalala yuma hiyadileñeli yayeniku, hiyadi kuyitañishaña mumashikolaku. Amakwawu alekaña kukuhwelela Nzambi muloña aneñaña nayilwilu yamunsakililu. Dichi neyi munakuhanjeka namuntu hansañu yakuleña, chalema nankashi kusambila kumwihula malwihu. Ilukenu yuma yakuhwelelayi muntu. Neyi mukwikala nakashinshi nawa mufwila kutiyilila, nateli kuyitiyilila.—Tit. 3:2.

¹³ Neyi muntu nakumwekena neyi nakuyisupisha muloña wakubula kukuhwelela nawu yuma yadileñeli yayeni, mukubabala mulejenu yena yayilumbulwili enu. Munateli kumwihula yalumbululi chatachikili wumi chakadi Nleñi. Hakwila nawu chileñaleña chawumi chatachi chitwalekihu kwikalaku, chatelela kusema kulonda chisemununi. Nkuluñaña wumu wadiza nankashi kemesitili wahosheli nindi yuma yikukeñeka hakwila nawu chileñaleña chatachi chisemununi, chiña hekala (1) ñoji mwakushakama mwana mwivumu, (2) wuswa wakwikala nañovu nikuyizatisha,  (3) ñovu yakusema chuma chadifwana nachena nawa (4) wuswa wakusemununa. Wabombelelihu nindi: “Muntu wahayamaña chatachikaña wumi kufuma kukachuma kanyanya.”

14. Munateli kwila ñahi neyi chakwila munadiloñeshi wanyi kuhanjeka hansañu yakwila nawu yuma yadileñeli yayeni hela hakuleña?

¹⁴ Neyi chakwila munadiloñeshi wanyi kuhanjeka hansañu yakwila nawu yuma yadileñeli yayeni hela hakuleña, munateli kweseka kuzatisha njila yapela yakuhanjekelamu yazatishiliyi Pawulu. Wasonekeli nindi: “Matala ejima akweti ayituñili; hakwinza watuñili yuma yejima diyi Nzambi.” (Heb. 3:4) Kuhanjeka namuntu muniyi njila kwapela nawa kwakwashanaña. Mwalala, yuma yawumi yakuhayamisha nankashi yikweti wayitoñojokeli nawa wayileñeli. Munateli kuzatisha cheñi mukanda wunakuhosha hanoyu nsañu. Muhela wumu wazatishili mabuloshuwa ayedi itwatena hakusambila hakuhanjeka namukwenzi weyala wahosheli nindi wakuhwelela wanyi nindi Nzambi wekala kwoku nawa wakuhweleleli munsañu yakwila nawu yuma yadileñeli yayeni. Chimwahitili mulungu, mukwenzi weyala wahosheli nindi: “Ichi dinu nakuhweleli nami Nzambi wekala kwoku.” Chumichi chaletesheli yatachiki kudiza Bayibolu nawa iwu mukwenzi weyala wekalili manakwetu.

15, 16. Munateli kuhimpa ñahi njila yimwazatishaña hakuhanjeka nsañu yamuBayibolu, nawa nankeñelwinyi?

¹⁵ Munateli kuzatisha yishina yoyimu yapela neyi munakuhanjeka namuntu wajinokaña Bayibolu. Mwihulenu yashimuni yuma yakuhwelelayi ninsañu yamutiyishaña kuwaha. (Yish. 18:13) Neyi watiyaña kuwaha hansañu hasayansi, nateli kwiteja neyi muhosha hayikuma yamwekeshaña nawu nsañu yahosha Bayibolu hasayansi yoloka. Antu amakwawu anateli kwiteja neyi muyileja yakutalilahu yamwekeshaña nawa muBayibolu mwekala wuprofwetu ninsañu yalala yakunyaaka. Hela munateli kumuleja yishina yamuBayibolu yalombolaña antu yidi neyi yekala muMpanji yahaMpidi.

¹⁶ Ilukenu nenu, nkeñelu yenu yakukokola nyichima yawantu, bayi kutaadekaku. Dichi, mwatela kutiyilila nakanañachima. Ihulenu malwihu amawahi, mulejenu mukuwunda nawa nakalemesha, sweje-e dinu neyi munakuhanjeka namukulumpi. Neyi mwila mwenimu, chakadi nikujina akulemesha yuma yimunakuyileja. Akwiluka cheñi nawu mwatoñojokahu chikupu hayuma yimwakuhwelela. Ichi dichuma chabulaña kwilawu atwansi amavulu. Hela chochu, mwatela kwanuka nenu, himwatela kwakula antu anakukeña nawu mutaadeki nawu hela anakusekesha yuma yimwakuhwelelaku.—Yish. 26:4.

17, 18. (a) Chumanyi chikuyikwasha mukeñi chalala chikupu? (b) Lwihwinyi lutwakahanjekahu muchibaaba chinalondelihu?

¹⁷ Kwikala nachikuhwelelu chakola hikwashindamena hakwiluka nsañu yapela yamuBayibolu hohuku. Dichi, sandujolenu chikupu mwizu daNzambi neyi kwiji munakukeñakeña yuma yalema yaswekawu. (Yish. 2:3-6) Zatishenu chikupu yitwa yidi mwidimi denu, yidi neyi, Watchtower Library yahaDVD, Watchtower LIBRARY YAHAINTANETI, kushilahu Watch Tower Publications Index hela Chitwa Chakukwasha aYinsahu jaYehova Hakusandujola Nsañu. Cheñi, ikalenu nachikonkwanyi chakutaña Bayibolu yejima. Munateli kuyitaña hadi tukweji 12. Yuma yantesha yakoleshaña chikuhwelelu chetu chidi neyi kutañaña Izu daNzambi. Nkoñi wañinza wumu chatoñojokeliyi hampinji yadiñayi mukwenzi wahosheli nindi: “Chuma chankwashili kwiluka chikupu nami Bayibolu Hiizu daNzambi, hikuyitaña yejima. Mpanji jamuBayibolu jinadizili henohu nichidi kansi janlumbulukilili. Dihu hinatachikili kuyilaku hambidi kuspiritu.”

¹⁸ Anvwali, mukweti mudimu weneni wakukulisha anyanenu kuspiritu. Munateli kuyikwasha ñahi kukolesha chikuhwelelu chawu? Chibaaba chinalondelihu chikahosha haniyi nsañu.