1-3. 1) ¿Kunatakis chʼamachasiñasa? 2) Yaqha aru yateqasipki uka jilat kullakanakajja, ¿kunsa lurapjjañapa, ukat kuna jisktʼanakas utjaspa? (Aka janankir foto uñjjattʼam).

JICHHÜRUNAKANJJA, Jehová Diosan Testigonakapajj Diosan arunakap “taqe markanakaru, taqe casta jaqenakaru, kunayman parlani” jaqenakaruw yatiyasipki, ukhamatwa mä profecía phoqasipki (Apo. 14:6). Waljaniw yaqha arunak parlañ yateqasipki, ¿jumajj yaqha aru parlañ yateqaskaraktati? Yaqhep jilat kullakanakajj misionerotwa servisipki, jan ukajj yaqha markar sarasaw kawkhantï jukʼamp yatiyirinakajj munaski uka cheqanakan yatiyasipki. Yaqhep jilat kullakanakasti pachpa markapanwa yaqha aru parlir taman yanaptʼasipkaraki.

² Diosar serviñan jan aynachtʼañatakisa, familiapar ajay toqet yanaptʼañatakis taqe jilat kullakanakaw chʼamachasipjjañapa (Mat. 5:3). Ukampis awisajja, Bibliat sapaki sum yatjjatañatakejj janiw tiempojj utjkaspati. Yamas yaqha aru parlir taman yanaptʼapki uka jilat kullakanakatakejja, jukʼamp chʼamäspawa.

³ Yaqha aru parlir taman yanaptʼapki uka jilat kullakanakajja, uka taman parlapki uka arwa yateqapjjañapa. Ukham yateqkasajja, cheqa yatichäwinak jukʼampiw yatjjatapjjañaparaki  (1 Cor. 2:10). Ukampis kunanakatï taman yatichaski uk jan amuyapkchi ukhajja, ¿kunjamarak Diosan cheqa yatichäwinakap jukʼamp yatjjatapjjaspasti? Yaqha aru parliri tamanakan yanaptʼiri jilat kullakanakajja, ¿kunjamsa wawanakapan cheqa yatichäwinak yateqasipkatap amuyapjjaspa?

4. ¿Kunas Diosar serviñan aynachtʼayistaspa? Uk mä uñachtʼäwimp qhanañchtʼam.

⁴ Yateqktan uka aru jan sum amuyasajja, Biblian yatichäwinakap janiw sum amuyksnati, ukhamatwa Diosar serviñan aynachtʼsna. Nehemías chachajj Jerusalén markar kuttʼkäna ukhajja, israelitanakan yaqhep wawanakapajj hebreo aru jan parlañ yatipjjatapwa amuyäna (Nehemías 13:23, 24 liytʼañataki). Ukatwa wawanakajj Diosan Arup jan amuyapkänti, ni Jehová Diosampis sum apasjjapjjänti (Neh. 8:2, 8).

5, 6. 1) Yaqha aru parlir tamanakan yanaptʼiri yaqhep awk taykanakajja, ¿kunsa wawanakapat amuyapjje? 2) ¿Kunas wawanakapar aynachtʼayaspa?

⁵ Yaqha aru parlir tamanakan yanaptʼiri yaqhep awk taykanakajja, wawanakapan Diosar serviñan aynachtʼasipkatapwa amuyapjje. ¿Kunatsa wawanakajj aynachtʼapjjpacha? Kuntï tantachäwinakan yatichaski uk janiw sum amuyapkiti, ni ukarjamas lurapkiti. Pedro ^[1] jilatajj Sudamérica toqet Australia markaruw familiapamp jakasir sarjje, jupajj akham siwa: “Bibliat parlktan ukajja, chuymaruw purtʼañapa” sasa (Luc. 24:32).

⁶ Kunapachatï yaqha arut qellqatanak liytʼktan ukhajja, janiw chuymarojj purtʼkistuti. Ukhamarusa, jan yatktan uka arut mayninakampi parlañajj chʼamakïspawa. Wali qarita jikjjatasisajja, kunanaktï Diosamp sum apasiskakiñatak lurañasäki uk janiw lurjjsnati. Ukhamajj yaqha aru parlir taman yanaptʼasajja, Jehová Diosamp sum apasiskakiñatakiw chʼamachasiñasa (Mat. 4:4).

7. Babilonia markankirinakajja, ¿kunjamsa Daniel waynarojj costumbrenakaparjama, religionapan yatichäwinakaparjama sarnaqayañ munapjjäna?

⁷ Daniel waynasa, amigonakapasa, Babiloniar apataw uñjasipjjäna. Ukanjja, Babilonia markankirinakajj costumbrenakaparjam sarnaqayañwa munapjjäna, janiw ukakïkänti, religionapan yatichäwinakaparjam sarnaqapjjañapwa munapjjarakïna. Ukatakejja, ‘caldeonakan arunakapwa’ jupanakar yatichapjjäna, ukatsti babilonio sutinakwa uchapjjarakïna (Dan. 1:3-7). Daniel waynar uchapkäna uka sutejja, Bel sat wali uñtʼat diosaparuw uñtayäna. Uka suti uchasajja Jehová Diosat sipansa, Babilonia markankir diosapas wali chʼamanïkaspa ukham amuyayañwa Nabucodonosor reyejj munpachäna (Dan. 4:8).

8. ¿Kunas Diosat jan jitheqtañatakejj Danielar yanaptʼäna?

⁸ Babilonia markanjja, Daniel waynarojj reyinkir wali suma manqʼanakwa churañ munapjjäna. Ukampis Danielajj Diosan leyinakap jan pʼakintañwa ‘chuymapan amtäna’ (Dan. 1:8). ¿Kunatsa Danielajj yaqha markankasin Jehová Diosat jan jitheqtkäna? Hebreo arupat utjkäna uka Qollan Qellqatatwa sapür yatjjatirïna, ukaw Diosat jan jitheqtañatakejj yanaptʼäna (Dan. 9:2). Paqallq tunka maranakas Babilonia markankchïnjja, hebreo sutipat uñtʼatäskakïnwa (Dan. 5:13).

9. ¿Kunjamsa Salmo 119 qellqerejj Diosan Arup uñjäna?

⁹ Mä kutejja, reyin palaciopan irnaqerinakaw Salmo 119 qellqeri contra parlapjjäna. Ukhamïpanjja, Diosan Arupampiw Salmo qellqerejj chʼamañchtʼasïna, ukaw jan mayninakjamäñatak yanaptʼäna (Sal. 119:23, 61).  Cheqas Diosan arunakapaw sum jikjjatasiñatak yanaptʼäna (Salmo 119:11, 46 liytʼañataki).

10, 11. ¿Kunatakis Bibliat yatjjatkasajj chʼamachasiñasa, ukat kun lurasas uk jikjjatsna? Uk mä uñachtʼäwimp qhanañchtʼam.

¹⁰ Tamansa, trabajosansa kunayman luräwinakaw utjistu, ukhamäkchisa sapaki jan ukajj familjam Bibliat yatjjatañatakejj tiempo apstʼasiñasapuniwa (Efe. 5:15, 16). Janiw walja qellqatanakak liyiñasäkiti ni tantachäwin arstʼañatakikis chʼamachasiñasäkiti, jan ukasti Diosan Arup sum katoqasiñatakiw chʼamachasiñasa, ukaw iyawsäwis chʼamañchistani.

¹¹ Diosan Arup sum katoqasiñatakejja, amuytʼasirïñaw wakisi. Bibliat yatjjatkasajja, janiw mayninakatak llakisiñasäkiti, jan ukasti jiwaspachpat llakisiñasarakiwa (Fili. 1:9, 10). Ak sum amuytʼañasawa: kunapachatï yatiyañatakisa, tantachäwinakatakisa, tamanakan arstʼir sarañatakis wakichtʼastan ukhajja, janiw kuntï liytʼktan ukjja jiwasatakik imasktanti. Amuytʼañataki, mä phayir jaqejja, janiw manqʼanak aleq malltʼasakejj jakkaspati. Jupatï jan usuntas sum jakasiñ munchi ukhajja, manqʼanak sum phaytʼasisaw manqtʼasiñapa. Jiwasatï Jehová Diosampi sum apasiñ munstan ukhajja, uka manqʼa phayirjamaw sum manqtʼasiñasa, mä arunjja, Bibliat sapüruw yatjjatañasa. Bibliat sum yatjjatañajja, ajay toqet suma saytʼatäñatakiw yanaptʼistani.

12, 13. ¿Kunatsa waljanitakejj pachpa arupat Biblia yatjjatañajj wali wakiskirejja?

¹² Yaqha aru parlir tamanakan yanaptʼapki uka jilat kullakanakajja, “nacïwisatpach yatit” arusat Bibliat yatjjatañajj wali askiwa sasaw sapjje (Hech. 2:8). Yaqha markanakan serviri misioneronakajja, janiw kuntï tantachäwinakan  istʼapki ukampikejj ajay toqet suma saytʼatäpkaspati, uk jupanakajj sum amuyapjje.

¹³ Alain sat mä jilatajja, persa arwa niya kimsaqallqo maranak yateqaski, jupajj akham siwa: “Tantachäwinakatak persa arut wakichtʼaskta ukhajja, kun sañsa sapa arojj muni uk yatiñarukiw uchasjjta. Diosan arunakapat kuntï liykta ukajj janiw chuymar purtʼjjetuti. Ukatwa pachpa arujat Biblia liyiñatakisa, Bibliat apstʼat qellqatanak liytʼañatakis tiempo apstʼasta” sasa.

14. ¿Kunsa awk taykanakajj sum amuytʼapjjañapa, ukat kunatsa?

¹⁴ Cristiano awk taykanakajja, cheqa yatichäwejj wawanakapan chuymanakaparut purtʼaski janicha, sumti amuyasipki janicha uk sum amuytʼapjjañapawa. Serge jilatampit Muriel esposapampit parltʼañäni, jupanakajj kimsa mara jilaw yaqha aru parlir taman yanaptʼawayapjje. Uka tamanjja, 17 marani yoqapajj yatiyir sarasasa, tantachäwinakansa janiw kusisit jikjjataskänti. Muriel kullakajj yoqapat akham siwa: “Nayrajja, francés arut wali kusisitaw yatiyir sarirïna, ukampis yaqha arut yatiyir sarasajj janiw ukham jikjjatasjjänti” sasa. Serge jilatajj akham sarakiwa: “Ukaw Diosar serviñan nayrar sartañatak jarktʼaskäna, ukatwa nayra tamajar kuttʼañ amtawayapjjta” sasa.

15. 1) Nayra tamapar kuttʼañajj wakisiti janicha uk amuytʼañatakejja, ¿kunas awk taykanakarojj yanaptʼaspa? 2) ¿Kamsasas Deuteronomio 6:5-7 qellqatajj awk taykanakar ewjjtʼi?

¹⁵ Yaqha aru parlir tamana yanaptʼkasajja, wawanakapajj sumti amuyasipki janicha, jan ukajj kawkïr artï yatipki uka tamar kuttʼapjjañapach wakisi uk sumwa awk taykanakajj amuytʼapjjañapa. Ukatakejj ¿kunas yanaptʼaspa? Nayraqatjja, Jehová Diosar munasipjjañapatak yanaptʼañatakisa, yaqha aru yatichañatakis tiemposa, chʼamasa utjaskiti janicha ukwa amuytʼapjjañapa. Ukjjarusti, wawanakapajj yaqha arut yatiyirisa, tantachäwinakarusa sarañ munapjjeti janicha, ukwa amuytʼapjjañaparaki. Ukanak amuytʼasajja, inas awk taykanakajj kawkïr aruttï wawanakapajj sum amuyapki uka tamar kuttʼañ amtapjjchispa. Ukhamatwa wawanakapajj ajay toqet chʼamañchtʼasipjjaspa. Qhepat inas awk taykanakajj yaqha aru parlir tamaru wasitat kuttʼañ amtapjjchispa (Deuteronomio 6:5-7 liytʼañataki).

16, 17. Yaqhep awk taykanakarojja, ¿kunas Jehová Diosat wawanakapar yatichañatakejj yanaptʼawayi?

¹⁶ Yaqha aru parlir tamana jan ukajj mä jiskʼa taman yanaptʼkasajja, yaqhep awk taykanakajj kawkïr artï wawanakapajj yatipki uka arutwa wawanakapar Jehová Diosat yatichapjje. Lingala aru parlir mä jiskʼa taman yanaptʼir Charles jilatat parltʼañäni, jupajj kimsa imill wawanakaniwa, sullkajj llätunka maraniwa, jilïristi 13 maranirakiwa. Jilatajj akham siwa: “Parlapkta uka arutwa wawanakajampejj Bibliat yatjjatapjjta, ukjjarojj lingala arut tantachäwinakan arstʼañataki, yatiyañatakiw yateqapjjta. Ukatsti uka pachpa arutwa anatapjjarakta, ukhamat anatkasin lingala aru yateqapjjañapataki” sasa.

¹⁷ Kevin jilatajj pä imill wawanakaniwa, maynïrejj phesqa marani, maynïristi kimsaqallqo maraniraki. Cheqa yatichäwinak wawanakapar yatichañatakejja, jilatajj wal chʼamachasi, ¿kunatsa? Yaqha aru parlir tamanjja, wawanakapajj janïraw kunatï tantachäwinakan yatichaski uk sum amuyapkiti. Jilatajj akham siwa: “Esposajampi wawanakajampejja, francés arutwa Bibliat yatjjatapjjta, uka arwa taqenis sum amuyapjjta. Uka arut tantachäwinakajj utjki ukarus phajjsin may kutiw sarapjjta. Vacacionajj utjki ukhasa, francés arut apaski uka jachʼa tantachäwirus sarapjjaraktwa” sasa.

18. 1) Wawanakapar yanaptʼañataki mä suma amtar puriñatakejja, ¿kunjamsa Romanos 15:1, 2 qellqatajj awk taykanakar yanaptʼaspa? 2) ¿Kamsapjjes yaqhep awk taykanakajja?

 ¹⁸ Kunas wawanakatakejj walïspa, Jehová Diosampi taqeni sum apasipjjañapatakejj kun lurañas wakisispa ukjja, sapa familiaw amtjjañapa (Gál. 6:5). Muriel kullakajj akham siwa: “Esposojampejj yaqha aru parlir taman yanaptʼañ munasipkakiyätwa, ukampis yoqajaw Diosar serviñan aynachtʼaskäna, ukatwa yaqha tamar sarjjapta” sasa (Romanos 15:1, 2 liytʼañataki). Ukham lurapjjatapajj wali askïnwa, ¿kunatsa ukham sistanjja? Serge jilatajj akham siwa: “Francés aru parlir tamar sarjjasinjja, yoqajajj Diosar serviñan nayraruw sartawayi, ukatsti bautisasjjarakiwa. Jichhajj precursor regularjamaw serviski. Yaqha aru parlir tamar kuttʼañsa amtaskarakiwa” sasa.

19, 20. ¿Kunjamsa Bibliar munasitas uñachtʼaysna?

¹⁹ Jehová Diosajj taqeniruw munasistu. “Jupajj taqenin qhespiyatäñapwa muni, kunatejj cheqäki uk uñtʼapjjañaparaki”, ukatwa walja arunakar Biblia jaqokipayi (1 Tim. 2:4). Pachpa arusat Biblia liytʼasajja, Diosampejj sumaw apassna, uk Jupajj sum yati.

²⁰ Diosampi sum apasiñatakejj taqeniw chʼamachasiñasa. Ukatakejj sum amuyktan uka arutwa Biblia sapüru yatjjatañasa. Ukhamatwa familiasar ajay toqet yanaptʼañäni. Ukhamarus arusat Biblia yatjjatasajja, Diosan Arupar munasitaswa uñachtʼayañäni (Sal. 119:11).