1—3. а) Һарада хидмәт етмәсиндән асылы олмајараг һәр бир мәсиһи нәјә өнәм вермәлидир? б) Јени дил өјрәнәнләр һансы чәтинликләрлә үзләширләр вә бунунла бағлы һансы суаллар јараныр? (Мәгаләнин әввәлиндәки шәклә бахын.)

МИНЛӘРЛӘ Јеһованын Шаһиди мүждәни һәр халга, тајфаја, үммәтә ҹар чәкәрәк Вәһј 14:6 ајәсиндәки пејғәмбәрлији јеринә јетирир. Ола билсин, сиз әҹнәби дил өјрәнирсиниз, јахуд тәблиғчиләрә еһтијаҹ олан башга өлкәдә хүсуси тәјинатлы мүждәчи кими хидмәт едирсиниз вә ја өз өлкәниздә әҹнәбидилли јығынҹаға кечмисиниз.

² Аллаһын хидмәтчиси кими һәр биримиз үчүн өзүмүзүн вә аиләмизин руһани сағламлығы биринҹи јердә олмалыдыр (Мәт. 5:3). Ишимиз чох олдуғундан һәрдән, ола билсин, долғун мүталиә кечирмәк алынмыр. Әҹнәбидилли јығынҹагда хидмәт едәнләр исә даһа бир чәтинликлә үзләширләр.

³ Онлар јени дил өјрәнмәклә јанашы мүнтәзәм олараг мөһкәм руһани гида гәбул етмәклә руһани сағламлыгларыны горумалыдырлар (1 Кор. 2:10). Бәс әҝәр хидмәт етдикләри јығынҹағын дилини јахшы билмирләрсә, нә едә биләрләр? Нәјә ҝөрә мәсиһи валидејнләр чалышмалыдырлар ки, Аллаһын Кәламы ушагларынын үрәјинә тәсир етсин?

4. Әҹнәбидилли јығынҹагда хидмәт едән мәсиһинин руһани сағламлығы үчүн нә тәһлүкә јарада биләр? Нүмунә чәкин.

⁴ Әҝәр мәсиһи әҹнәби дилдә Мүгәддәс Китаб тәлимләрини мәнимсәјә билмирсә, бу, онун руһани сағламлығы үчүн әсил тәһлүкә ола биләр. Ерамыздан әввәл V әсрдә Нәһәмја Бабилдән гајыдан бәзи јәһуди ушагларынын ибрани дилини билмәдијини ешидәндә чох нараһат олур. (Нәһәмја 13:23, 24 ајәләрини охујун.) Аллаһын Кәламыны баша дүшмәдији үчүн бу ушагларын Јеһова илә вә онун халгы илә мүнасибәти, демәк олар ки, јох иди (Нәһ. 8:2, 8).

5, 6. Әҹнәбидилли јығынҹагда хидмәт едән бәзи валидејнләр нәји мүшаһидә етмишләр вә бу проблемин јаранмағына сәбәб нә олур?

⁵ Әҹнәбидилли јығынҹагда хидмәт едән бәзи мәсиһи валидејнләр мүшаһидә етмишләр ки, ушагларынын һәгигәтә марағы ҝет-ҝедә зәифләјирди. Јығынҹаг ҝөрүшүндә сөјләнилән фикирләри там баша дүшмәдикләри үчүн руһани гида онларын үрәјинә тәсир етмирди. Аиләси илә бирҝә Ҹәнуби Америкадан Австралијаја көчән Педро ^[1] дејир: «Руһани мөвзуларын һиссләрә вә үрәјә тәсир етмәси мүтләгдир» (Лука 24:32).

⁶ Инсан әҹнәби дилдә нә исә охујанда мәлумат онун үрәјинә өз ана дилиндәки гәдәр тәсир етмир. Үстәлик, һәмин дилдә раһат үнсијјәт едә билмәмәк инсанын бејнини јора вә ону руһани ҹәһәтдән ҝери сала биләр. Буна ҝөрә дә мәсиһи әҹнәбидилли јығынҹагда хидмәт етмәк арзусуну шөвглү сахламагла јанашы руһани сағламлығына да фикир вермәлидир (Мәт. 4:4).

7. Бабиллиләр өз мәдәнијјәтини вә динини Дәнјала ашыламаг үчүн нә етмишдиләр?

⁷ Дәнјал вә онун достлары Бабилдә әсир оланда бабиллиләр онлара кәлданиләрин дилини өјрәтмәклә бу ҝәнҹләрә өз мәдәнијјәтләрини ашыламаға чалышырдылар. Үстәлик, баш сарај мәмуру онлара Бабил адлары вермишди (Дән. 1:3—7). Дәнјала верилән ад бабиллиләрин баш аллаһы Белин ады илә бағлы иди. Ҝөрүнүр, бунунла Навуходоносор падшаһ Дәнјала тәлгин етмәк истәјирди ки, бабиллиләрин аллаһы Јеһовадан ҝүҹлүдүр (Дән. 4:8).

8. Јад өлкәдә јашамасына бахмајараг, Дәнјала руһани сағламлығыны горумаға нә көмәк етмишди?

⁸ Дәнјала падшаһ сүфрәсиндән ән дадлы тәамларындан јемәк тәклиф олунмушду, амма о, үрәјиндә гәт етмишди ки, өзүнү мурдарламајаҹаг (Дән. 1:8). Дәнјал китаблары, јәни мүгәддәс јазылары өз ана дилиндә охудуғу үчүн јад өлкәдә руһани сағламлығыны горуја билмишди (Дән. 9:2). Һәтта Бабилә ҝәләндән 70 ил сонра да ону өз ибрани ады илә чағырырдылар (Дән. 5:13).

9. Аллаһын Кәламы 119-ҹу мәзмуру јазан мәзмурчуја неҹә тәсир етмишди?

⁹ 119-ҹу мәзмуру јазан мәзмурчу һагсызлыгла үзләшмишди, сарај адамлары онун әлејһинә данышырды. Амма о, Аллаһын Кәламындан ҝүҹ алырды вә бунун сајәсиндә дүшмәнләри кими олмады (Зәб. 119:23, 61). Чүнки о имкан верирди ки, Аллаһын Кәламы үрәјинин дәринлијинә нүфуз етсин. (Зәбур 119:11, 46 ајәләрини охујун.)

10, 11. а) Аллаһын Кәламыны арашдыранда гаршымыза һансы мәгсәди гојмалыјыг? б) Бу мәгсәдә чатмаг үчүн нә едә биләрик? Нүмунә чәкин.

¹⁰ Шәхси ишләримиз вә руһани мәсулијјәтләримиз нә гәдәр чох олса да, һәр биримиз фәрди мүталиәјә вә аиләви ибадәтә  вахт ајырмалыјыг (Ефес. 5:15, 16). Амма јадда сахламалыјыг ки, әсас мәгсәд сәһифәләри вәрәгләјиб кечмәк вә шәрһ һазырламаг дејил. Аллаһын Кәламыны бу мәгсәдлә арашдырмалыјыг: алдығымыз биликләр үрәјимизә тәсир етсин вә иманымызы мөһкәмләндирсин.

¹¹ Бу мәгсәдә чатмаг үчүн мүталиә едәндә таразлы олмалыјыг, јалныз башгаларынын руһани тәләбатыны дүшүнмәмәлијик, өз руһани еһтијаҹларымыз барәдә дә фикирләшмәлијик (Филип. 1:9, 10). Нәзәрә алмалыјыг ки, тәблиғә, ибадәт ҝөрүшүнә һазырлашанда, мәрузә вә ја тапшырыг һазырлајанда охудугларымызы, адәтән, өзүмүзә тәтбиг етмирик. Мәсәлән, ашбаз јемәји сүфрәјә гојмаздан әввәл онун дадына бахыр. Амма о, садәҹә јемәјин дадына бахмагла чох јашаја билмәз. Сағлам олмаг үчүн о, өзү үчүн дә гидалы јемәк һазырламалыдыр. Ејнән, биз дә үрәјимизи бизим еһтијаҹларымызы тәмин едән руһани гида илә гидаландырмалыјыг.

12, 13. Әҹнәбидилли әразидә хидмәт едәнләрин чоху нәјә ҝөрә мүталиәни өз ана дилиндә кечирир?

¹² Әҹнәбидилли әразидә хидмәт едәнләрин чоху Мүгәддәс Китабын мүталиәсини өз ана дилиндә кечирир (Һәв. 2:8). Һәтта хүсуси тәјинатлы мүждәчиләр баша дүшүрләр ки, анҹаг јығынҹагда ешитдикләри мәлуматла кифајәтләнмәк олмаз, тәјинатларында галмаг үчүн онлар мөһкәм руһани гида гәбул етмәлидирләр.

¹³ Алан сәккиз илдир ки, фарс дилини өјрәнир. О дејир: «Фарс дилиндә ҝөрүшләрә һазырлашанда фикрим дилин өзүндә галыр. Бејним анҹаг дили тәкмилләшдирмәјә ҹәмләндији үчүн орадакы руһани фикирләр үрәјимә тәсир етмир. Буна ҝөрә дә  Мүгәддәс Китабы вә нәшрләримизи өз ана дилимдә охујурам».

14. Әҹнәбидилли јығынҹагда хидмәт едән валидејнләр нә етмәјә чалышмалыдырлар вә нәјә ҝөрә?

¹⁴ Мәсиһи валидејнләр әлләриндән ҝәләни етмәлидирләр ки, Аллаһын Кәламы ушагларынын зеһнинә вә үрәјинә тәсир етсин. Серж вә һәјат јолдашы Мүрел үч илдән артыг әҹнәбидилли јығынҹагда хидмәт едәндән сонра фикир вермишләр ки, 17 јашлы оғулларынын теократик ишләрә марағы сојујур. Мүрел дејир: «Оғлумуз јерли дилдә хидмәтә ҝетмәк истәмирди, амма әввәлләр доғма франсыз дилимиздә тәблиғ етмәји чох хошлајырды». Серж исә дејир: «Баша дүшәндә ки, бу, оғлумузун руһани инкишафына әнҝәл төрәдир әввәлки јығынҹағымыза гајытмаг гәрарына ҝәлдик».

15. а) Һансы сәбәбләрә ҝөрә әҹнәбидилли јығынҹагда хидмәт едән мәсиһиләр ушагларынын даһа јахшы баша дүшдүјү дилдә кечирилән јығынҹаға гајытмаг гәрарына ҝәлә биләр? б) Ганунун тәкрары 6:5—7 ајәләриндә валидејнләр үчүн һансы мәсләһәт вар?

¹⁵ Әҹнәбидилли јығынҹагда хидмәт едән мәсиһиләр неҹә мүәјјән едә биләрләр ки, ушагларынын даһа јахшы баша дүшдүјү дилдә кечирилән јығынҹаға кечмәјә еһтијаҹ вар, јохса јох? Биринҹиси, онлар мүәјјән етмәлидирләр ки, ушагларына Јеһова Аллаһа мәһәббәт ашыламаг, ејни заманда әҹнәби дили өјрәтмәк үчүн вахтлары вә ҝүҹләри чатырмы. Икинҹи сәбәб ушағын руһани ишләрә вә әҹнәбидилли јығынҹагдакы хидмәтә марағынын сојумасы ола биләр. Бу ҹүр һаллар јаранарса, мәсиһи валидејнләр ушаглары һәгигәтдә мөһкәм дајанана гәдәр онларын даһа јахшы баша дүшдүјү дилдә кечирилән јығынҹагда хидмәт етмәк гәрарына ҝәлә биләрләр. (Ганунун тәкрары 6:5—7 ајәләрини охујун.)

16, 17. Әҹнәбидилли јығынҹагда хидмәт едән бәзи мәсиһиләр ушагларына руһани билик вермәк үчүн нә едирләр?

¹⁶ Әҹнәбидилли јығынҹагда хидмәт едән бәзи мәсиһиләр мүхтәлиф үсулларла ушагларына өз ана дилләриндә һәгигәти ашылајырлар. Доггуз, он ики вә он үч јашларында үч гызы олан Чарлз лингала дилиндә кечирилән јығынҹагда хидмәт едир. О дејир: «Биз ушагларын Мүгәддәс Китаб дәрсини вә аиләви ибадәти өз дилимиздә кечиририк. Биз һәмчинин лингала дилиндә шәрһләр, тәгдимәләр, хидмәтлә бағлы сәһнәҹикләр һазырламаға вә ојунлар кечирмәјә чалышырыг ки, гызларымызын бу дили өјрәнмәјә һәвәсләри олсун».

¹⁷ Беш вә сәккиз јашларында ики гызы олан Кевин гызлары хидмәт етдикләри јығынҹағын дилини там баша дүшмәдикләри үчүн әлиндән ҝәләни едир ки, онлара һәгигәти ашыласын. О дејир: «Јолдашымла мән гызларымыза Мүгәддәс Китаб дәрсини өз ана дилимиз олан франсыз дилиндә кечирик. Биз һәмчинин гаршымыза мәгсәд гојмушуг ки, ајда бир дәфә франсыздилли јығынҹагда иштирак едәк вә чалышырыг мәзунијјәт ҝөтүрүб өз дилимиздә кечирилән топлантылара ҝедәк».

18. а) Ромалылара 15:1, 2 ајәләриндәки принсип әҹнәбидилли јығынҹагда хидмәт едән валидејнләрә дүзҝүн гәрар вермәјә неҹә көмәк едә биләр? б) Бәзи валидејнләр бу мәсәлә илә бағлы нә мәсләһәт ҝөрүрләр? (Һашијәјә бахын.)

¹⁸ Әлбәттә, һәр бир валидејн ушағынын руһани сағламлығыны горумаг мәсәләсиндә өзү гәрар вермәлидир ^[2] (Гал. 6:5). Јухарыда ады чәкилән Мүрел дејир ки, о вә әри оғулларынын руһани рифаһы үчүн өз шәхси истәкләрини гурбан вердиләр. (Ромалылара 15:1, 2 ајәләрини охујун.) Онун әри Серж вердикләри гәрара ҝөрә пешман олмадыгларыны сөјләјир.  О дејир: «Франсыздилли јығынҹаға гајыдандан оғлумуз руһани ҹәһәтдән инкишаф етмәјә башлады вә вәфтиз олунду. Һазырда о, өнҹүлдүр, һәтта әҹнәбидилли групда хидмәт етмәк истәјир!»

19, 20. Аллаһын Кәламыны үрәкдән севдијимизи неҹә сүбут едә биләрик?

¹⁹ Јеһова Аллаһ мәһәббәтдән ирәли ҝәләрәк Өз Кәламыны јүзләрлә дилдә әлчатан едиб ки, һәр ҹүр инсан һәгигәт барәсиндә дәгиг билијә јијәләнсин (1 Тим. 2:4). Јеһова билир ки, инсан Онун Кәламыны өз доғма дилиндә охујарса, руһани тәләбатларыны там шәкилдә өдәјә биләр.

²⁰ Һарада хидмәт етмәјимиздән асылы олмајараг, һәр биримиз үрәјимизи мөһкәм руһани гида илә гидаландырмалыјыг. Аллаһын Кәламыны өз доғма дилимиздә мүталиә етмәклә өзүмүзүн вә аиләмизин руһани сағламлығыны горуја биләрик вә бунунла сүбут етмиш оларыг ки, Аллаһын Кәламына дәјәр веририк (Зәб. 119:11).