1-3. (a) To ibale mam més ma yé lelaa, kii nlama ba bés jam li bisu mu niñ yés? (b) Ba ba nigil hilémb hipe ba mboma mambe manoodana ma tôbôtôbô ni mambe mambadga hala a nlona ? (Béñge titii i bibôdle bi yigil)

I LEN ini, dikôô di Mbôgi Yéhôva di nyoñ ngaba keñi inyu yônôs yiinda i i mbat le ba añal ñañ nlam “ikété hi loñ, ni hi lihaa, ni hi hilémb, ni hi litén.” (Masoola 14:6) Baa u yé ikété ba ba nigil hilémb hipe? Baa u yé ikété ba ba nsal kiki basañal ba tôbôbôtô i biloñ bipe? Baa u ngwel nson het batéé likalô ba mbéda i loñ ipe? Baa u bi bôdôl ke i makoda ma ma ngwélél hilémb hipe nyoo loñ yoñ?

² Kiki di yé bagwélél ba Djob, bés bobasôna di nlama bii mbôô wés i pes mbuu, ni mbôô u lihaa jés kiki jam li bisu mu niñ yés. (Matéô 5:3) Ndi ngim mangéda, inyule di gwé ngandak mam i boñ, di nla tehe le i yé ndutu i léba ngéda inyu tibil tém Bitilna mu yigil yés i Bibel. Ndi, ba ba nke añal ñañ nlam i homa bôt ba mpot hilémb hipe ba mboma ki mandutu mape.

³ U héa le ba nlama nigil hilémb hipe, ba ba nke añal ñañ  nlam ikété makoda ma ma ngwélél hilémb hipe, ba nlama boñ biliya i tibil yônôs miñem nwap ni mam ma mbuu. (1 Korintô 2:10) Kii ba nla boñ ibale ba ntibil bé nok hilémb likoda jap li ngwélél? Inyuki bagwal ba ba yé bikristen ba nlama ba nkwoog nkaa le Bañga i Djob i ntibil yaga tihba miñem mi bon bap?

4. Kii i nla boñ le di nimis mbôô wés i pes i mbuu? Ti hihéga hiada.

⁴ Ibale di ntibil bé nok Bañga i Djob i ngéda di ngwel nson i homa ba ngwélél hilémb hipe, hala a nla boñ le di nimis mbôô wés i pes mbuu. I hiai hi nyônôs hitan i bisu bi ngéda yés, Néhémia a bé tôñ ngandak inyule ngim boñge i Lôk Yuda, i i bi témb i Babilôn, i bé yi bé pot hilémb hi Lôk Héber. (Añ Néhémia 13:23, 24.) I pot maliga, bana boñge ba bé nimis libak jap li bagwélél ba Djob, inyule ba bé tibil bé nok Bañga i Djob.​—Néhémia 8:2, 8.

5, 6. Kii bagwal ba ba ngwel nson i homa ba ngwélél hilémb hipe ba bi sôk léba, inyuki?

⁵ Ngim bagwal, i i yé bikristen, i gwelek nson i homa ba ngwélél hilémb hipe, i bi sôk léba le bon bap ba yé nimis maséé map inyu mam ma mbuu. Inyule ba bé tibil bé nok mam ba bé niiga i likoda, bijek bi mbuu ba bé ti i Ndap Ane bi bé tihba bé miñem nwap. Pédrô ^[1] a nkal le: “Inyu hol i pes mbuu, yi i Bibel yotama i nkola bé, ndi maliga ma nlama tibil tihba miñem nwés ni mahoñol més.”​—Lukas 24:32.

⁶ Ngéda di ñañ kaat ikété hilémb hipe, hala a ntibil bé tihba miñem nwés kiki ngéda di ñañ yo ikété hilémb hiés. U héa hala, ndutu di nla bana i kwel ikété hilémb hipe, i nla wéés bés i pes minsôn ni i pes mbuu. Jon, yak ngéda di ntééda ngôñ yés i gwélél Yéhôva i homa ba mpot hilémb hipe, i yé bés loñge le di tibil tat mbôô wés i pes mbuu.​—Matéô 4:4.

7. Lelaa bôt ba Babilôn ba bi noode tinde Daniel i neebe bilem ni base i loñ yap?

⁷ Ngéda Daniel ni mawanda mé ba bé i minkôm, bôt ba Babilôn ba bi noode tinde bo i neebe bilem bi loñ yap, jon ba bi niiga bo “i pot hop u bôt ba Kaldéa.” Yak ñane nwak nu a bé niiga bo, a bi ti bo môl ma bôt ba Babilôn. (Daniel 1:3-7) I jôl ba bi ti Daniel li bé lôl ni djob li tôbôtôbô li Babilôn, li ba bé sébél le Bel. I nene le Kiñe Nébukadnésar a bé yéñ unda Daniel le, djob li Babilôn li nlel Yéhôva.​—Daniel 4:8.

8. Kii i bi hôla Daniel i tééda mbôô wé i pes i mbuu to hala kiki a bé niñ i loñ ipe?

⁸ To hala kiki ba bi ti Daniel bijek bi ndiba bi kiñe, a bi “ôm siñ ikété ñem wé le a ta bé le a hindis nyemede.” (Daniel 1:8) Inyule a bi ke ni bisu i nigil ‘bikaat bipubi’ ikété hilémb hié, a bi tééda mbôô wé i pes mbuu to hala kiki a bé gwel nson i loñ ipe. (Daniel 9:2.) Jon, 70 ma ñwii i mbus malo mé i Babilôn, bôt ba bé ba ngi yik jôl jé ikété hilémb hi Lôk Héber.​—Daniel 5:13.

9. Kiki kaat Tjémbi 119 i ñunda, lelaa Bañga i Djob i bi ti mut nu a bi tila hini hiémbi ngui?

⁹ Ntila Hiémbi 119, a bi kôhna ngui i ba mahéñha ni njel yigil i Bañga i Djob. A bi la hônba libak le bôt bape ikété basal i ndap kiñe, ba bé yan nye. (Tjémbi 119:23, 61) Ndi a bi nwas le lipôdôl li Djob li tibil yaga tihba ñem wé.​—Añ Tjémbi 119:11, 46.

10, 11. (a) Mu kii di nigil Bañga i Djob, njômbi yés i nlama ba le kii? (b) Lelaa di nla yônôs njômbi yés? Ti hihéga.

¹⁰ To hala kii di nla ba di pégi ngandak i homa wés bôlô tole ikété likoda, bés bobasôna di nlama yoñ ngéda i nigil Bibel bésbomede, di ban-ga ki ntjegeg ngéda i bégés Yéhôva ni lihaa jés. (Efésô 5:15, 16) Ngôñ yés i nlama ndik bé ba le di añ ngandak mapep, tole di kôôba ndik inyu ti mandimbhe i likoda. Ndi, di nlama ba nkwoog nkaa le Bañga i Djob i ntibil tihba miñem nwés, i lédhak ki hémle yés.

¹¹ Inyu boñ hala, di nlama bé nwas le i niiga bôt bape Bibel i boñ le bésbomede di bana ha bé ngéda i tibil je i pes mbuu. Pes yada i nlama bé yuu i pes ipe. (Filipi 1:9, 10) Di nlama neebe le i ngéda di nkôôba inyu likalô, inyu makoda, tole inyu ti nkwel, ngim mangéda, di ta di tehe bé le i mam di nkôôba ma mbéñge yak bésbomede. Di yoñ hihéga: Mut nu a nlémbél bôt bape bijek, a nlama noode gwo ilole a nti bo gwo. Ndi ibale a ngwés yén mbôô, a nlama ki yoñ ngéda i lémbél nyemede bañga bijek, inyule a nla ndik bé niñil mu i noode a noode bijek a nlamb inyu bôt bape. Nlélém jam inyu yés, di nlama boñ biliya bi ngui i je bañga bijek, bi bi ntibil lédés bésbomede i pes mbuu.

12, 13. Inyuki ngandak i i gwel nson i makoda ma ma ngwélél hilémb hipe, i nléba le i yé bo nseñ le ba bana lem i nigil ikété hilémb hiap?

¹² Ngandak i i ngwel nson i makoda ma ma ngwélél hilémb hipe, i nléba le i yé bo nseñ ngandak le ba nigil Bibel hiki ngéda ikété hilémb hiap. (Minson mi baôma 2:8.) Yak basañal ba tôbôtôbô i biloñ bipe ba nkal le, inyu tééda hémle i ngui i loñ ipe, ba nla ndik bé telbene  mu ndék biniigana bi mbuu ba nkôs i makoda.

¹³ Alain, nu a nigil hilémb hi Persia hala a yé 8 ñwii i len ini, a nkal le: “I ngéda me nkôôba makoda ni hilémb hi Persia, me mpala bok mis mem inyu tibil nok hilémb hi. Kiki biliya gwem gwobisôna bi yé ndik le me sélés boña wem, jon mam ma mbuu me nigil ma ntihba bé ñem wem. Inyu hala nyen me mbéna yoñ ngéda inyu nigil Bibel ni bikaat bipe ikété hilémb hiem.”

14. Kii bagwal ba nlama tibil wan, inyuki?

¹⁴ Bagwal ba ba yé bikristen ba nlama tibil wan le ndék ni ndék, Bañga i Djob i tihba miñem ni mahoñol ma bon bap. Ngéda a bi mal tégbaha ñwii maa ikété likoda li li ngwélél hilémb hipe, Serge bo nwaa le Muriel ba bi yimbe le log yap i 17 ñwii, i nimis maséé mé inyu mam ma mbuu. Muriel a nkal le: “A bé bé maséé i téé likalô ikété hilémb hipe, ki le i ngéda bisu, a bé maséé i téé likalô ikété hilémb hiés le Pulasi.” Serge a ntoñol le: “Ngéda di bi léba le mana mahéñha ma nkéñ man wés nu munlôm njel i hol i pes mbuu, di bi yoñ makidik i témb i likoda jés li bisu.”

15. (a) Mambe mam ma nla tinde bagwal i témb ikété likoda li li ngwélél hilémb bon bap ba ntibil nok? (b) Mambe maéba kaat Ndiimba Mbén 6:5-7 i nti bagwal?

¹⁵ Mambe mam ma nla tinde bagwal i témb i likoda li li ngwélél hilémb bon bap ba ntibil nok? Pog, ba nlama wan ibale ba gwé toi ngéda, ni bisélél bi mbéda inyu niiga bon bap i gwés Yéhôva, ndi i nlélém ngéda, ba niigaga bo hilémb hipe. Iba, ba nla léba le bon bap ba nimis maséé ba bééna inyu mam ma mbuu, tole ba ngwés ha bé ki yén mu likoda li li ngwélél hilémb hipe. Ha ngéda i, bagwal ba ba yé bikristen, ba nla tehe loñge i témb i likoda li li ngwélél hilémb bon bap ba ntibil nok, letee yaga le boñge ba hol mu i nokna yap i mam ma mbuu.​—Añ Ndiimba Mbén 6:5-7.

16, 17. Lelaa bagwal bape ba mboñ biliya i niiga bon bap i pes mbuu, to hala kiki ba yé ikété likoda li li ngwélél hilémb hipe?

¹⁶ Bagwal bape ba nléba manjel i niiga bon bap ikété hilémb hiap, ndi i nlélém ngéda, ba kenek i makoda ma ma ngwélél hilémb hipe. Charles, isañ wada nu a gwé bon bôda baa ba ba gwé ipôla ñwii 9 ni 13, a nke i likoda li li ngwélél hilémb hi Liñgala. A ntoñol le: “I ngéda di ntégbaha yigil i hiki man wés, tole di mbégés Yéhôva ni bo kiki lihaa, di bi yoñ makidik i boñ hala ikété hilémb hiés. Ndi, di nyoñ ki ngéda i kôôba bo i timbhe i makoda, i téé likalô, ni tuk ni bo ikété hilémb hi Liñgala, kayéle i nigil hilémb hi, i yila bo jam li maséé.”

¹⁷ Kévin a gwé bon bôda iba, wada a gwé ñwii mintan, nuu numpe a gwé ñwii juem. A bi yoñ bitelbene inyu hôla bon bé le ba nimis bañ mam ba ntibil bé nok i likoda li li ngwélél hilémb hipe. A ntoñol le: “Me ni nwaa wem di ntégbaha gwigil bi dingond tjés ikété hilémb hiés, le Pulasi. Di bi téé ki le di mba di nke i likoda li li ngwélél hop Pulasi, ngélé yada hiki sôñ. Di ngwélél ki ngéda yés i noi inyu ke i makoda ma ndôn, ma ma ntagbe ikété hilémb hiés.”

18. (a) Limbe litiñ, li di nléba ikété kaat Rôma 15:1, 2, li nla hôla we i yoñ makidik ma ma nla ba loñge inyu mbôô i bon boñ i pes mbuu? (b) Mambe maéba bagwal bape ba nti? (Béñge ndoñi i mamélél ma yigil.)

¹⁸ Maliga ma yé le hiki lihaa jon li nlama pohol mambe makidik ma nla ba loñge inyu mbôô i boñge i pes mbuu. ^[2]  (Galatia 6:5) Muriel nu di mbôk di sima, a nkal le nye ni nlô wé ba bi neebe i nimis mam ba bé gwés, inyu loñge i log yap i pes mbuu. (Añ Rôma 15:1, 2.) I ngéda a nwan jam li i len ini, Serge a ngi hoñlak le ba bi yoñ makidik malam. A nkal le: “I ngéda di bi témb i likoda li li bé gwélél hop Pulasi, log yés i bi hol i pes mbuu, i kôs ki sôble. Nano, a ngwel nson kiki nsañal nu ngéda yosôna. A yé yak i hoñol lelaa a ga témb ikété likoda li li ngwélél hilémb hipe!”

19, 20. Lelaa di nla unda le di ngwés Bañga i Djob?

¹⁹ Ikété gwéha yé, Yéhôva a mboñ le Bañga yé le Bibel, i tjama ikété mbôgôl dilémb, kayéle “bôt bobasôna ba tohlana, ba pam ki homa ba yé le ba yi maliga.” (1 Timôtéô 2:4) A nyi le bôt ba binam ba nla tibil yônôs ngôñ yap inyu bijek bi mbuu, i ngéda ba ñañ mahoñol mé ikété hilémb hi ñem wap.

²⁰ To ibale mam més ma yé lelaa, di nlama yoñ makidik i yônôs miñem nwés ni bañga bijek bi mbuu. Ibale di gwé lem i nigil Bitilna ikété hilémb hi ñem wés, bés ni lihaa jés di ga yén mbôô i pes mbuu. Di ga unda ki le di ntibil toi diihe Bañga i Djob.​—Tjémbi 119:11.