1-3. (a) Met itá sipwe akkomwa lón manawach fansoun meinisin? (b) Ikkefa ekkewe weires chókkewe mi kákkáé eú mineféén fós ra kúna, iwe menni kapas eis a ppiitá? (Ppii ewe sasing lepoputáán ei lesen.)

 LÓN ei fansoun, chómmóng Chón Pwáraatá Jiowa ra angang weires le álisatá pwénúetáán ewe oesini pwe ewe angangen afalafal epwe esilefeil “ngeni sokun mwich me ainang, kapas me mwü meinisin.” (Pwär. 14:6) En emén me lein chókkewe ra kákkáé pwal eú fósun fénúfan? Ekkóch ra wiseni ewe wis misineri are álillis lón pwal ekkóch leeni mi wor osupwangen chón afalafal ie. Ekkóch ra poputá le fiti ekkewe mwich án eú mwichefel mi eáni fósun ekis nge mi nóm lón fénúer we.

² Mi lamot ngeni meinisin néún Kot chón angang ar repwe akkomw túmúnú péchékkúlen ar lúkú me án ar famili lúkú. (Mat. 5:3) Iwe nge, fán ekkóch neman pokiten sia fókkun osukosuk ren chómmóngun ach angang, a weires ach sipwe féri ewe esin pwisin káéén Paipel mi alóllóól me mi achchúngú letipach. Nge ren chókkewe mi fiti ewe mwichefel mi eáni fósun ekis, mi pwal wor met mi áweires ngeniir.

³ Mi lamot ngeni chókkewe ra fiti ewe mwichefel mi eáni fósun ekis ar repwe káé mineféén fósun fénúfan, nge mi pwal lamot ar  repwe túmúnú pwe iteitan epwe wor ar fansoun le káé ekkewe mettóch mi alóllóól usun Kot. (1 Kor. 2:10) Nge ifa usun repwe féri ena ika rese unusen weweiti ekkewe pwóróus mi kan katowu me lón ewe mwichefel? Pwata mi lamot ngeni Chón Kraist sam me in mi fiti ewe mwichefel mi eáni fósun ekis ar repwe túmúnúfichi pwe ewe enlet a kkúú letipen néúr kewe?

4. Met a tongeni efeiengawa ach riri ngeni Jiowa, me menni pwóróus mi ánnetatá ena?

⁴ Ika sise tongeni weweiti met ewe Paipel a apasa pún a mak lón fósun ekis, iwe epwe tongeni efeiengawa ach riri ngeni Jiowa. Lupwen Nehemia a liwiniti Jerusalem, a kúna pwe ekkóch ekkewe semirit rese tongeni fós lón fósun Ipru. (Álleani Nehemia 13:23, 24.) Iwe, pokiten ekkena semirit rese weweiti án Kot Kapas, a apwangapwangoló ar riri ngeni Jiowa.​—Ne. 8:2, 8.

5, 6. Met ekkóch sam me in mi fiti eú mwichefel mi eáni fósun ekis ra kúna, me pwata a fis ena?

⁵ Ekkóch Chón Kraist sam me in mi fiti eú mwichefel mi eáni fósun ekis ra kúna pwe a apwangapwangoló án néúr kewe riri ngeni Jiowa. Pokiten néúr kewe rese unusen weweiti ekkewe pwóróus mi kan katowu atun mwich, iwe ese tongeni achchúngú letiper. Pedro ^[1] me an we famili ra mwékút seni South America ngeni Australia, nge iei met a erá: “Lupwen sia fós usun ekkewe mettóch lón pekin lúkú, mi lamot epwe kkúú letipach me meefiach.”​—Luk. 24:32.

⁶ Lupwen sia álleani och pwóróus lón pwisin ach fós, a kan kkúú letipach, nge neman esap ina usun lupwen sia álleani lón pwal eú fós. Pwal och, pokiten a weires ach eáni pwal eú fósun fénúfan, sia tongeni mélúlúló, iwe sia tongeni apwangapwangoló lón ach angang ngeni Jiowa. Ina minne, atun ach akkamwéchú péchékkúlen ach mochen álillis lón eú mwichefel mi eáni fósun ekis, mi pwal lamot sipwe túmúnú ach riri ngeni Jiowa.​—Mat. 4:4.

7. Ifa usun ekkewe chón Papilon ra sótun eriáni Taniel le eáni ar eéreni me fiti ar lamalam?

⁷ Lupwen Taniel me chienan kewe ra eoló lón Papilon, ekkewe chón Papilon ra sótun eriániir ar repwe eáni ar kewe eéreni me fiti ar lamalam. Ifa usun? Ra eita ngeniir it lón fósun Papilon me áiti ngeniir “fosun ie.” (Tan. 1:3-7) Iten Taniel we minefé a weneiti án chón Papilon we kot mi lap itan Pel. Neman King Nepukatnesar a mochen án Taniel epwe lúkú pwe ewe koten Papilon a fókkun manaman lap seni Jiowa, án Taniel we Kot.​—Tan. 4:8.

8. Met a álisi Taniel le akkamwéchú péchékkúlen an riri ngeni Jiowa?

⁸ Lón Papilon, ra amwéngééni Taniel enen ewe king mwéngé mi anné. Nge Taniel a fen “amolätä letipan” pwe esap atai án Kot allúk. (Tan. 1:8) Pokiten a kákkáé ekkewe “pukepin” lón fósun Ipru, a akkamwéchú péchékkúlen an riri ngeni Jiowa inaamwo ika a nóm lón eú fénúen ekis. (Tan. 9:2, Kapasen God) Iwe, mwirin an nónnóm 70 som ier lón Papilon, a chúen silleló ren itan we lón fósun Ipru, Taniel.​—Tan. 5:13.

9. Ifa meefien ewe soumakken Kölfel 119 usun án Kot we Kapas?

⁹ Ewe soumakken Kölfel 119 a likiitú fán án ekkóch aramasen lón ewe imwen king pwáraatá ar oput i. Nge a kúna péchékkúl seni án Kot we Kapas, me ei mettóch a álisi an epwe sókkóló seni ekkewe ekkóch. (Kölf. 119:23, 61) A mut ngeni minne Kot a apasa an epwe fókkun achchúngú letipan.​—Álleani Kölfel 119:11, 46.

10, 11. (a) Itá met sipwe achocho ngeni lupwen sia káé án Kot we Kapas? (b) Ifa usun sipwe tikeri minne sia achocho ngeni? Eáni eú kapas áwewe.

¹⁰ Inaamwo ika sia fókkun osukosuk le  féri wisach kewe lón mwichefel me lón ach angangen atufichi manawach, nge mi lamot kich meinisin sipwe awora fansoun fán iten ach pwisin káéén Paipel me famili fel. (Ef. 5:15, 16) Itá sisap chék achocho le álleani chómmóng pwóróus are ammólnatá ach memmeef fán iten mwich, nge sipwe fen achocho le mut ngeni án Kot we Kapas an epwe achchúngúkich me apéchékkúla ach lúkú.

¹¹ Ren ach sipwe tikeri minne sia achocho ngeni, mi lamot sipwe itepék me rúúepek. Atun sia káé, sisap chék ekieki met mi lamot ngeni ekkewe ekkóch nge sipwe pwal ekieki met mi lamot ngenikich pwisin. (Fil. 1:9, 10) Mi lamot sipwe mirititi pwe lupwen sia ammólnatá fán iten ewe angangen afalafal, fán iten mwich, are féri ach kinikin, saminne fansoun meinisin sia kan ekieki ifa usun minne sia álleani a weneitikich. Áwewe chék, inaamwo ika mi lamot án emén chón kuk lón kafie epwe akkomw neni ekkewe mwéngé a kuku me mwen an epwe ngeni aramas, nge saminne a tongeni péchékkúl inisin ren chék an neni ekkena mwéngé. Ren an epwe péchékkúl inisin, mi lamot pwe iteitan epwe ammólnatá pwisin anan mwéngé mi wor vitamin lón. Pwal ina chék usun, ika sia mochen apéchékkúla ach riri ngeni Jiowa, mi lamot sipwe káé ewe Paipel iteitan. Ena esin káé mi alóllóól epwe ataweei minne sia pwisin osupwangan lón manawach.

12, 13. Pwata chómmóng ra meefi pwe a álilliséch ngeniir ar repwe káé ewe Paipel lón pwisin ar fós?

¹² Chómmóng me lein chókkewe mi fiti eú mwichefel mi eáni fósun ekis ra meefi pwe a álilliséch ngeniir ar repwe káé ewe Paipel iteitan lón ‘kapasen fanüer kewe ra uputiu lon.’ (Föf. 2:8) Pwal mwo nge ekkewe misineri lón fénúen ekis, iir ra mirititi pwe ese naf ar repwe chék lúkúlúk wóón minne ra rongorong lón ekkewe mwich pwe epwe péppéchékkúl ar lúkú.

 ¹³ Alain a kákkáé fósun Persia úkúkún walu som ier, nge iei met a erá: “Lupwen ua ammólnatá fán iten ekkewe mwich lón fósun Persia, ua kan nefotofot wóón ewe fósun Persia. Iwe nge, pokiten ai káé a kon anganga tupwuei, ekkewe pwóróus lón pekin lúkú ua álleani ese kan achchúngú letipei. Ina popun ua kan akkóta ai fansoun pwe iteitan upwe káé Paipel me pwal ekkóch néúch kewe puk lón pwisin ai fós.”

14. Met itá ekkewe sam me in repwe túmúnúéchú, me pwata?

¹⁴ Mi lamot ngeni Chón Kraist sam me in ar repwe túmúnú pwe ewe enlet epwe achchúngú letipen me ekiekin néúr kewe. Ekieki usun pwóróusen Serge me pwúlúwan we Muriel, iir ra fiti eú mwichefel mi eáni fósun ekis ren lap seni úlúngát ier. Ra poputá le tepereni pwe néúr we át, 17 ierin, ese pwapwaiti ewe angangen afalafal me ekkewe mwich. Muriel a erá: “A chipwang le ló afalafal lón fósun ekis, nge me lóóm a pwapwaiti an epwe afalafal lón fósun France, ina pwúkún an fós.” Serge a erá: “Lupwen aua mirititi pwe ena mettóch a pinei feffeitáán néúm we át lón pekin lúkú, iwe aua filatá le liwiniti ám we mwichefel lóóm.”

15. (a) Met a tongeni álisi ekkewe sam me in lón ar kefil ika repwe mwékút ngeni pwal eú mwichefel? (b) Ifa ewe pesepes lón Tuteronomi 6:5-7 fán iten ekkewe sam me in?

¹⁵ Met a tongeni álisi ekkewe sam me in lón ar kefil ika repwe liwiniti eú mwichefel mi eáni ewe fós néúr kewe ra fókkun weweiti? Áeúin, mi lamot repwe apwúngaló ika mi wesewesen naf ar fansoun me ar péchékkúl le áiti ngeni néúr kewe ar repwe tongei Jiowa, me áiti ngeniir pwal eú fósun fénúfan. Oruuan, neman repwe kúna pwe néúr kewe rese mochen afalafal, fiti mwich, are pwal mwo nge álisatá ewe angangen afalafal ngeni aramas mi eáni pwal eú sókkun fós. Ren ekkeei popun, ekkewe sam me in ra tongeni filatá le liwiniti ewe mwichefel mi eáni ewe fós néúr kewe ra fókkun weweiti. Iwe mwirin, lupwen néúr kewe ra apéchékkúlaló ar riri ngeni Jiowa, ekkewe sam me in ra tongeni filatá le liwiniti ewe mwichefel mi eáni fósun ekis.​—Álleani Tuteronomi 6:5-7.

16, 17. Met a fen álisi ekkóch sam me in le áiti ngeni néúr kewe usun Jiowa?

¹⁶ Nge ren ekkóch sam me in ra kúna alen ar repwe áiti ngeni néúr kewe usun Jiowa lón pwisin ar fós atun ra pwal fiti ekkewe mwich lón eú mwichefel are kúmi mi eáni fósun ekis. Emén sam itan Charles, a wor úlúmén néún nengngin, ieriir 9 ngeni 13. Ra fiti eú kúmi mi eáni ewe fós fósun Lingala. A erá: “Aua filatá ám aupwe káé ngeni néúm kewe me féri ám famili fel lón pwúkún fósun fénúem. Nge aua pwal apachaalong lón ena fansoun ám aupwe praktis me féri urumwot lón fósun Lingala pwe repwe tongeni silei ei fós lón ewe napanap mi apwapwa.”

¹⁷ Kevin, emén sam mi wor rúúemén néún nengngin, ierin emén nimu nge emén walu. Pokiten ra fiti eú mwichefel mi eáni fósun ekis, i a angang weires le áiti ngeni néún kana ewe enlet pún resaamwo kon lien weweiti ekkewe pwóróus a katowu lón ar kewe mwich. A erá: “Ám me pwúlúwei we aua káé ngeni emén me emén néúm kewe nengngin lón fósun France, ina pwúkún ar fós. Aua pwal achocho ám aupwe fiti mwich lón fósun France fán eú iteiten maram. Aua alamota ám fansoun asésé pwe aupwe fiti ekkewe mwichelap mi fis lón fósun fénúem.”

18. (a) Ifa usun Rom 15:1, 2 epwe tongeni álisuk le féri kefil mi múrinné epwe álisi noum kewe? (b) Ikkefa ekkewe kapasen pesepes seni pwal ekkóch sam me in? (Ppii ewe sópwósópwun pwóróus.)

¹⁸ Eú me eú famili epwe pwisin filatá met mi éch fán iten néúr kewe me ar riri ngeni Jiowa. ^[2] (Kal. 6:5) Muriel a erá pwe inaamwo ika i me pwúlúwan we ra wesewesen mochen fiti ewe mwichefel mi eáni fósun ekis, nge ra filatá ar repwe ló seni pwe repwe álisi néúr  we át le apéchékkúla an tong ngeni Jiowa. (Álleani Rom 15:1, 2.) Iei, Serge a silei pwe ra eáni eú kefil mi pwúng. A erá: “Seni ewe atun aua liwiniti ewe mwichefel mi eáni fósun France, néúm we át a wesewesen feffeitá lón pekin lúkú me a papataiseló. Iei a emén regular pioneer. A pwal mwo nge ekieki an epwe fitisefáli eú kúmi mi eáni fósun ekis!”

19, 20. Ifa usun sipwe pwáraatá ach aúcheani án Kot we Kapas?

¹⁹ Jiowa a tongei aramas meinisin. A féri pwe ewe Paipel epwe kawor lón fitepúkú fósun fénúfan pwe “aramas meinisin” repwe tongeni silei ewe enlet. (1 Tim. 2:4) A silei pwe ach riri ngeni epwe péchékkúleló lupwen sia álleani ewe Paipel lón ewe fós sia fókkun weweiti.

²⁰ Mi lamot ngenikich meinisin ach sipwe achocho le akkamwéchú péchékkúlen ach riri ngeni Jiowa. Sia tongeni féri ena ika sia káé ewe Paipel iteitan lón ewe fós sia wesewesen weweiti. Iwe, sia pwal tongeni álisi ach famili pwe repwe akkamwéchú péchékkúlen ar lúkú, me sipwe pwáraatá pwe sia enletin aúcheani án Kot we Kapas.​—Kölf. 119:11.