1-3. (a) Namona be ita hekwarahi dahaka ita karaia totona? (b) Idau gado idia dibaia noho taudia be dahaka hekwakwanai idia davaria, bona dahaka henanadai idia vara? (Laulau ginigunana herevalaia.)

HARI Iehova ena Witnes taudia tausen momo be “bese ibounai bona iduhu ibounai, gado idauidau, bona kopi idauidau” taudia dekenai sivarai namona idia harorolaia neganai, Ioane ese ia itaia matahanaina idia hagugurua. (Apok. 14:6) Oi be gado ma ta oi dibaia noho, a? Idau tano ai oi be misinari gaukara oi karaia o pablisa momo lasi gabuna oi durua o idau gado kongrigeisen heboudia dekenai oi lao noho, a?

² Ita be Dirava ena hesiai taudia dainai, namona be ita ibounai ita hekwarahi ita bona iseda ruma bese taudia edia abidadama ita hagoadaia totona. (Mat. 5:3) Nega momo ita bisi bada dainai, ia auka sibona iseda stadi ita karaia totona. To idau tano ai idia noho tadikaka taihu be hekwakwanai ma haida idia davaria danu.

³ Idau tano ai idia noho Keristani taudia be unai tano ena gado idia dibaia sibona be hegeregere lasi, namona be Baibel ena hereva dobudia amo edia kudouna idia ubua danu. (1 Kor. 2:10) To  edena bamona unai idia karaia diba bema gado idia diba namonamo lasi? Bona dahaka dainai Keristani tama sina ese edia natudia edia kudouna ai Dirava ena Hereva idia atoa be namo?

4. Dahaka ese iseda abidadama ia hadikaia diba? Haheitalai gwauraia.

⁴ Bema idau gado Baibel oi lalopararalaia lasi, unai ese emu abidadama ia hamanokaia diba. Lagani 500 B.C.E. ai, Nehemia ia itaia, Babulonia amo idia giroa mai Iuda natudia haida be Heberu gado idia diba lasi. (Nehemia 13:23, 24 duahia.) Unai natudia be Dirava ena Hereva idia lalopararalaia lasi dainai, Iehova idia abidadama henia diba lasi.—Neh. 8:2, 8.

5, 6. Idau tano ai idia noho Keristani tama sina be dahaka idia itaia, bona dahaka dainai?

⁵ Idau tano ai idia noho Keristani tama sina idia itaia, edia natudia edia ura hereva momokani dekenai be metairametaira ia maragi ia lao. Momokani, edia natudia ese Kingdom Hall ai idia kamonai herevadia idia lalopararalaia lasi dainai, unai ese edia kudouna ia hamarerea lasi. Pedro ese ena famili be South America amo ia abia lao Australia, ia gwau: “Baibel ita herevalaia neganai, namona be ita herevalaia gaudia ese iseda lalona bona kudouna idia hamarerea, kara ta ita karaia totona.”​—Luka 24:32.

⁶ Bema gado ma ta Baibel ita duahia, ena anina do ita lalopararalaia lasi. Danu, gado ta ita diba namonamo lasi dainai, ma haida do ita hereva henia lasi, bona unai ese iseda lalona bona abidadama ia hamanokaia diba. Unai dainai idau tano ai Iehova ita hesiai henia noho totona, namona be iseda abidadama ita hagoadaia noho.—Mat. 4:4.

7. Babulonia taudia idia ura Daniela be dahaka ia karaia?

⁷ Daniela bona ena turadia be Babulonia ai idia guidia neganai, Babulonia taudia idia ura idia ese edia kastom karadia idia badinaia, unai dainai idia dekenai “Babulonia gado” idia hadibaia. Danu, king ena hesiai tauna badana ese idia ta ta dekenai Babulonia ladana ia henia. (Dan. 1:3-7) Daniela ena ladana be Bel, unai be Babulonia taudia edia dirava ta ena ladana. King Nebukanesa ia ura Daniela ena lalona ia veria bena do ia abia dae ena Dirava, Iehova, be hari Babulonia ena dirava ena siahu henunai.​—Dan. 4:8.

8. Edena dala ai Daniela ese ena abidadama ia hagoadaia?

⁸ Ena be Daniela dekenai king ena aniani namodia idia henia ia ania totona, to “iena lalona ia hadaia” ia sibona do ia “hamiroa lasi.” (Dan. 1:8, BHḡ) Daniela ese iena gado ai “Buka Helaga” ia stadilaia noho dainai, ena be idau tano ai ia noho, to ena abidadama be ia goada. (Dan. 9:2) Daniela be Babulonia ai ia ginidae bena lagani 70 idia hanaia murinai, iena Heberu ladana idia do gaukaralaia.​—Dan. 5:13.

9. Salamo 119 ai, Dirava ena Hereva ese edena dala ai salamo torea tauna ia durua?

⁹ Salamo 119 ia torea tauna be Dirava ena Hereva ia laloa bada dainai, mai gari lasi ida ia hahedinaraia ia be idau. Ena be lohia taudia ese ia idia gwauraia dika, to ia haheauka. (Sal. 119:23, 61) Bona Dirava ena hereva be ena kudouna ai ia atoa.​—Salamo 119:11, 46 duahia.

10, 11. (a) Dirava ena Hereva ita stadilaia noho neganai, iseda tahua gauna badana be dahaka? (b) Edena dala ai iseda tahua gauna ita hagugurua diba? Haheitalai gwauraia.

¹⁰ Ena be tiokratik bona moni gaukara  dekenai ita bisi bada, to namona be nega ita atoa sibona iseda stadi bona famili stadi ita karaia totona. (Efe. 5:15, 16) Ita stadi neganai, namo lasi buka ita duahia haraga sibona o hebou dekenai do ita henia haere sibona ita makaia. To ita ura Dirava ena Hereva be iseda kudouna dekenai ia diho bona iseda abidadama ia hagoadaia.

¹¹ Unai ia vara totona, namona be ita stadi neganai, ma haida edia dabu gaudia ita laloa, bona iseda hetura karana Iehova ida ita laloa danu. (Fili. 1:9, 10) Namona be inai ita laloatao, bema haroro, hebou, o tok ta totona ita hegaegae, reana ita duahia herevadia amo goada ita abia lasi. Mani ita haheitalaia: Ena be aniani nadua tauna (chef) ese aniani ia tohoa guna gabeai ma haida dekenai ia henia, to unai ese ia hahedinaraia lasi ia be ia tohoa aniani sibona ia ania. Ia gorere lasi totona, namona be ia sibona totona aniani namodia ia nadua. Unai hegeregerena, namona be Dirava ena hereva amo iseda kudouna ita ubua, unai amo iseda abidadama ita hagoadaia diba.

12, 13. Dahaka dainai idau tano ai idia noho tadikaka taihu be edia gado ai idia stadi be namo?

¹² Idau tano ai idia noho tadikaka taihu be dina ta ta ai edia “gado ai” Baibel idia stadilaia, bona namo idia davaria. (Kara 2:8) Misinari taudia danu idia laloparara edia abidadama ia goada totona, hebou ai idia kamonai herevadia idia lalopararalaia sibona be hegeregere lasi.

¹³ Alain, ia be lagani 8 bamona lalonai Persian gado ia dibaia, ia gwau: “Persian gado ai hebou ena kahadia lau hegaegaelaia neganai, lau be unai gado sibona lau laloa. Unai gado ai gau ta hahedinaraia dalana sibona lau laloa dainai, egu hegaegae  lalonai lau duahia gaudia ese egu kudouna idia hamarerea lasi. Unai dainai nega lau atoa egu gado ai Baibel bona pablikeisen idauidau lau stadilaia totona.”

14. Tama sina be dahaka idia laloa be namo, bona dahaka dainai?

¹⁴ Namona be Keristani tama sina idia hekwarahi, edia natudia edia lalona bona kudouna ai Dirava ena Hereva idia atoa totona. Serge bona ena adavana, Muriel, be lagani toi mai kahana idau tano ai idia noho neganai, idia itaia edia natuna mero, ena mauri lagani be 17, ese tiokratik gaukara idauidau ia moalelaia lasi. Muriel ia gwau: “Ia ese idau gado ai haroro karana ia moalelaia lasi, to guna ia moale iena gado, French, ai ia haroro totona.” Serge ia gwau: “Unai ia vara dainai, ai itaia emai natuna be lo Keristani tauna ai ia lao lasi, unai dainai emai kongrigeisen gunana dekenai ai giroa lou.”

15. (a) Dahaka badina haida dainai tama sina be edia natudia ese idia lalopararalaia gado ena kongrigeisen dekenai idia giroa lou? (b) Deuteronomi 6:5-7 ese tama sina dekenai dahaka sisiba ia henia?

¹⁵ Dahaka badina haida dainai tama sina be edia natudia ese idia lalopararalaia gado ena kongrigeisen dekenai idia lao be namo? Gau ginigunana be, namona be tama sina ese sibona idia nanadaia bema idia be mai edia nega, edia natudia edia kudouna ai Iehova lalokau henia urana idia atoa, bona danu idia dekenai idau gado idia hadibaia totona. Gau iharuana be, reana idia itaia edia natudia be tiokratik gaukara idauidau o idau gado taudia edia teritori idia moalelaia lasi. Bema unai ia vara, namona be Keristani tama sina be edia natudia ese idia lalopararalaia gado ena kongrigeisen dekenai idia giroa lou, unai amo edia natudia be hereva momokani idia abia dae momokani diba.—Deuteronomi 6:5-7 duahia.

16, 17. Tama sina haida be dahaka idia karaia edia natudia idia durua totona?

¹⁶ Ena be tama sina haida be idau gado kongrigeisen o grup dekenai idia lao, to dala idia karaia edia gado ai edia natudia idia hadibaia totona. Charles, ia be mai ena natuna kekeni toi, edia mauri lagani 9, 12, bona 13. Idia ibounai be Lingala gado grup ena hebou dekenai idia lao. Ia gwau: “Emai lalona ai hadaia, emai natudia edia stadi bona ruma bese ena tomadiho be emai gado ai do ai karaia. To danu, Lingala gado ai hebou bona haroro gaudia ai hegaegaelaia, bona unai gado ai gadara haida ai karaia danu.”

¹⁷ Tama ta ladana Kevin be mai ena natuna kekeni rua. Edia mauri lagani be 5 bona 8. Idia lao henia idau gado kongrigeisen ai, edia natudia be hebou ena kahana idauidau idia lalopararalaia lasi. Ia gwau: “Lau bona egu adavana be French gado ai emai natudia ai stadi henidia, bona unai be emai gado. Danu, dala ai karaia hua ta ta ai, nega tamona French gado ena kongrigeisen heboudia dekenai ai lao, bona emai holidei negadia ai, emai gado ai idia karaia hebouheboudia dekenai ai lao.”

18. Roma 15:1, 2 ena hakaua hereva ese edena dala ai oi ia durua diba?

¹⁸ Momokani, famili ta ta ese abia hidi do idia karaia edena dala ai edia natudia edia abidadama idia hagoadaia diba. (Gal. 6:5) Muriel, matamanai ita herevalaia taihuna, ia gwau, ia bona ena adavana be sibodia edia ura idia dadaraia, badina idia  ura edia natuna mero idia durua. (Roma 15:1, 2 duahia.) Serge ia diba idia be abia hidi maorona idia karaia. Ia gwau: “French gado kongrigeisen dekenai ai giroa lou negana amo, emai natuna ena hetura karana Iehova ida ia goada matamaia bona gabeai ia bapatiso. Hari ia be regula painia gaukara ia karaia. Bona ia ura idau gado grup ta ia durua.

19, 20. Edena dala ai do ita hahedinaraia Dirava ena Hereva ita laloa bada?

¹⁹ Iehova be ita ia lalokau henia dainai, ia ese ena Hereva, Baibel, be gado handred momo ai ia halasia, unai amo “taunimanima idauidau do ia hamauria bona hereva momokani ena diba maoromaoro do idia abia.” (1 Tim. 2:4) Ia diba bema taunimanima be edia gado ai iena hereva idia duahia, ia idia tura henia diba.

²⁰ Ena be iseda noho daladia be idauidau, to namona be iseda lalona ita hadaia Baibel ena hereva dobudia amo iseda kudouna ita ubua totona. Bema nega ibounai iseda gado ai Baibel ita stadilaia, ita bona iseda famili edia abidadama be do ia goada, bona do ita hahedinaraia ita ese Dirava ena hereva ita laloa bada.—Sal. 119:11.