1-3. (a) Anni nakuan i prayoridad tam maski anni i situasiottam? (b) Anni ira i kapurueba na maggigiammu tu bagu nga lengguahe, anna anni ira nga pakkiavu i luttuag? (Innan i letratu ta gafu na artikulo.)

RINIVU ta Saksi ira ni Jehova ta kaggawattam i aktibo nga makiparte ta pattuppal ta sirmata nga pangideklara ta mapia nga dumug ta “totolay na madduma-ruma i rasa, tribu, paguvovug, anna nasion.” (Nep. 14:6) Tadday ka kari ta maggigiammu tu tanakuan nga lengguahe? Massesserbi ka kari nga misionero onu ta dakal i pakawaganna nga lugar, onu namegafu ka nga magatende tu study ira ta tanakuan i lengguahena nga kongregasion ta lugarnu?

² Bilang aripan na Dios, mawag tu kuattam tu prayoridad i espiritualidad tam anna na familia tam. (Mat. 5:3) Egga ira i tiempo nga marigatattam nga pabbalinan tu produktibo i personal nga paggigiammu tam megafu ta okupadu ittam. Ngem, meparubang paga ta tanakuan nga kapurueba danuri masserbi ta tanakuan nga lengguahe.

³ Fuera paga ta paggigiammu tu bagu nga lengguahe,  kawagadda paga nga masiguradu nga regular nga ipatalatto ta futuda i matagga nga espiritual nga makan. (1 Cor. 2:10) Kunnasida makua yatun nu ariadda kuruga malippawa i lengguahe na nagalitadda nga kongregasion? Ngatta siguraduan na magana ira nga madde na Uvovug na Dios i giffutuan na ánada?

4. Anni i mamappeligro ta espiritualidad tam? Mangiyawa tu angngarigan.

⁴ Mappeligro i espiritualidad tam nu ari nga malippawa i Biblia ta tanakuan nga lengguahe. Turi meka-lima nga siglo B.C.E., navurung si Nehemias turi nammuanna nga ari ngana nga makayuvovug tu Hebreo i karuan ta abbarabbing nga Judio nga naggafu ta Babilonia. (Bibbigan i Nehemias 13:23, 24.) Kakuruganna, mawawan i panakkilaladda bilang aripan na Dios megafu ta ariadda kuruga makomprendi i kebalinan na Uvovug na Dios.—Neh. 8:2, 8.

5, 6. Anni i naobserba na karuan nga magana nga massesserbi ta tanakuan nga lengguahe, anna ngatta?

⁵ Naobserba na karuan nga magana nga massesserbi ta tanakuan nga lengguahe nga nawawan i interes na ánada ta kinakurug. Megafu ta ariadda kuruga matindian i study, ari ira mapaguyu na espiritual ira nga programa nga meyarubang ta Kingdom Hall. “Nu paguvovugan i espiritual ira nga gannug, kasali nakuan i futu anna i emosion,” kunni Pedro, ^[1] nga taga-South America nga nagali ta Australia kavulu i familiana.”—Luc. 24:32.

⁶ Nu tanakuan nga lengguahe i bibbigattam, awayyana tu ari tam kuruga meyusa i futu tam, ari tu kagittana nu i mismu nga paguvovug tam. Makofu tu sikan ta mental anna espiritual nu ariammu makayuvovug tu mapia ta tanakuan nga lengguahe. Yatutta durante nga kuruga interesadu ittam nga passerbian si Jehova ta tanakuan nga lengguahe, makasta gapa nu immugurattam i espiritualidad tam.—Mat. 4:4.

7. Kunnasi nga finuersa na Babilonio ira si Daniel nga akseptan i kultura anna relihiodda?

⁷ Turi na-aripan si Daniel pati i kakavvuluna, pinurueban na Babilonio ira nga fuersan ira nga akseptan i kulturada gukaban na panuddu nira ta “lengguahe na Caldeo ira.” Tapus, niddan ira na ofisial na korte tu Babilonio nga ngagan. (Dan. 1:3-7) Nalàda i bagu nga ngagan ni Daniel kani Bel, i primero nga Dios ta Babilonia. Posible nga kayà ni Patul Nabucodonosor nga mangurug si Daniel nga mas makapangngua i dios na Babilonia anne ta Diosna nga si Jehova.—Dan. 4:8.

8. Ngatta nemmuguran ni Daniel i espiritualidadna maski ta keggana ta tanakuan nga lugar?

⁸ Maski nu nitunnagda kani Daniel i kana-kanan na patul, “determinadu [yaya] ta futuna” nga arianna “parittan i baggina.” (Dan. 1:8) Megafu ta kanayunna nga gigiammuan “i sagradu ira nga libru” ta mismu nga lengguahena, nemmuguranna i espiritualidadna ta keggana ta tanakuan nga lugar. (Dan. 9:2, ftn.) Yari tu maski 70 dagun ngana kabalin na paddattalna ta Babilonia, ammammuda lagapa yaya ta Hebreo nga ngaganna.—Dan. 5:13.

9. Segun ta Salmo 119, anni i efekto na Uvovug na Dios ta nattura ta salmo?

⁹ Nagattam i nattura ta Salmo 119 turi ta kinontra yaya na miembro na korte na palasio. Ngem, napasikan yaya na Uvovug na Dios maski nu maperuma yaya. (Sal. 119:23, 61) Nipamavulunna nga mepappan ta futuna i Uvovug na Dios.—Bibbigan i Salmo 119:11, 46.

10, 11. (a) Durante nga gigiammuattam i Uvovug na Dios, anni nakuan i gakkag tam? (b) Kunnasi tam matuppal yatun nga gakkag? Iyilustra.

¹⁰ Maski okupadu ittam ta teokratiko anna sekular ira nga responsibilidad, mangiskediul tam nakuan tu personal study anna family worship tam. (Efe. 5:15, 16) Ari laman nakuan tu gakkag tam nga basta mabibbig i material onu tapenu laman makapakkomento ta study. Kayà tam siguraduan nga madde na Uvovug na Dios i giffutuattam anna mapaladda i pangurug tam.

¹¹ Tapenu matuppal yatun, mawag tu balanse ittam ta pannonono nu anni i kawagan na tanakuan anna nu anni i kawagattam mismu ta espiritual. (Fil. 1:9, 10) Masingattam nakuan nga nu mapprepara ittam para ta ministerio, study, onu ta pappalappa, ari kanayun nga meyaplika nittam i mabibbibbig tam. Tapenu meyilustra: Maski kawagan na kusineru nga sissiman ngamin i makan ira nga nilutuna nigena itunnag, ari yaya nga matolay nu basta puru kunnatun laman i kuanna. Nu kayàna nga kanayun nga makasta i gawa-gawayyanna, mapprepara yaya tu masustansia ira nga makan para ta baggina. Pakanattam gafu nakuan i futu tam tu espiritual ira nga makan nga mepangngo ta personal ira nga kawagattam.

12, 13. Segun ta massesserbi ira ta tanakuan nga lengguahe, ngatta nammuadda nga mabenefisiowan ira ta regular nga paggigiammu ta mismu nga lengguaheda?

¹² Nammuan danuri massesserbi ta tanakuan nga lengguahe nga mabenefisiowan ira ta regular nga paggigiammu tu Biblia ta ‘paguvovug nga neyanakadda.’ (King. 2:8) Nammuan gapa na misionero ira nga ari laman ira nga maddepende ta magigginnada ta study ira tapenu mattalupaddian nga  maladda i pangurugda, durante nga masserbi ira ta tanakuan nga lengguahe.

¹³ Kinagi ni Alain nga walu ragun ngana nga maggigiammu tu Persian: “Nu mapprepara ngà para ta study ta Persian, egga tendensià nga maffokus ta lengguahe mismu. Maruddu nga i uto ku i usu-usakku, yari tu kanayun nga ari madde i futù na espiritual ira nga ideya na mabibbibbig ku. Yatutta, egga lagapa i tiempò nga maggigiammu ta Biblia anna ta publikasion ira ta mismu nga lengguahè.”

14. Anni nakuan i siguraduan na magana ira, anna ngatta?

¹⁴ Siguraduan nakuan na magana ira nga sesenu nga madde na Uvovug na Dios i ginnonopan anna giffutuan na ánada. Kabalin na maturu tallu ragun nga passerbi ta tanakuan nga lengguahe, napansin da Serge anna na atawana nga si Muriel, nga nawawanan ngana tu ganas i 17-anios nga anada ta teokratiko ira nga aktibidad. “Ikalussona ngana i mallayyagayya ta tanakuan nga lengguahe, ngem turi, kakayàna i mallayyagayya ta nedakallanna nga lengguahe nga French,” kunni Muriel. Turi ta nasingammi nga makefugag yatun ta papprogresona ta espiritual, naddesisiokkami nga manoli ta dana nga kongregasiommi,” kunni Serge.

15. (a) Anni ira nga sirkumstansia i ikonsidera na magana ira nu kayàda manoli ta kongregasion nga mangusa tu lengguahe nga mas malippawa na ánada? (b) Anni i tabarang na Deuteronomio 6:5-7 ta magana ira?

¹⁵ Anni i makoffun ta magana ira ta paddesisiodda nga manoli ta kongregasion nga mas malippawa na ánada? Ollu, innadda nu egga talaga i tiempo anna sikadda nga ipatalatto ta ánada i aya kani Jehova durante nga tuttudduadda ira tu tanakuan nga lengguahe. Mekadua, awayyana nga masingadda tu nawawanan ngana ira tu ganas ta espiritual ira nga aktibidad onu ta passerbi ta tanakuan nga lengguahe. Ta kunnatun ira nga sirkumstansia, awayya nga ikonsidera na magana ira nga manoli ta kongregasion nga mangusa tu lengguahe nga mas malippawa na ánada adde ta metaddaggadda ngana i kinakurug.—Bibbigan i Deuteronomio 6:5-7.

16, 17. Kunnasi nga sinanay na magana ira i espiritualidad na ánada durante nga masserbi ira ta tanakuan nga lengguahe?

¹⁶ Egga gapa i magana ira nga tuttudduadda i ánada ta mismu nga lengguaheda nu magatende ira tu study na kongregasion onu grupo nga mangusa tu tanakuan nga lengguahe. Magatende ta grupo na maguvovug tu Lingala si Charles, nga yama na tallu nga babbay nga magedad tu 9 adde ta 13 anios. Kunna: “Naddesisiokkami nga ikondukta i paddayarayaw na familia ta mismu nga lengguahemi. Ngem mappraktis anna maggayang kami nga usan i Lingala tapenu magigiammuda yatun nga lengguahe durante nga magaya-ayayà ira.”

¹⁷ Egga i kingngua ni Kevin, nga yama na dua nga babay nga magedad tu lima anna walu, tapenu mabalansena i pakkurangan na ánana ta pangalippawa ta study na tanakuan nga lengguahe. Kunna: “Maggigiammu kami kavulu i atawà ta mismu nga lengguahemi nga French. Pinlanomi nga magatende tu study ta French mittan ta tanga vulan, anna umay ta kombension ta mismu nga lengguahemi nu bakasion.”

18. (a) Kunnasi makoffun i prinsipio na Roma 15:1, 2 tapenu makapaddesisiokka nu anni i kapianan para ta anamu? (b) Anni ira i suhestion na magana ira? (Innan i endnote.)

¹⁸ Siempre, nakadepende ta familia ira nu anni i makabenefisio ta espiritualidad na ánada. ^[2] (Gal. 6:5) Inamin ni Muriel, nga nakagi ta gafu, nga nisakrifisioda nga  magatawa i kayàda ta pakabenefisiowan na anada. (Bibbigan i Roma 15:1, 2.) Ammu ni Serge nga fustu i desisiodda. Kunna: “Namegafu ta panolimi ta kongregasion nga French, napprogreso ta espiritual i anami nga lalaki anna nabawtisowan. Regular payunir ngana yaya anna planona ngana i manoli ta tadday nga grupo na foreign-language!”

19, 20. Kunnasi tam mepasingan nga ayatattam i Biblia?

¹⁹ Megafu ta aya ni Jehova, malà i Uvovugna, i Biblia, ta ginatu nga lengguahe tapenu “mapaliag ngamin i totolay anna kannammuad-da i kurug.” (1 Tim. 2:4) Ammuna nga mas mapaladda na totolay i espiritualidadda nu mabibbigda i Biblia ta mismu nga lengguaheda.

²⁰ Maski anni gafu i paddia-paddian, determinadu tam nakuan nga pakanan i futu tam tu matagga nga espiritual nga makan. Gukaban na regular nga paggigiammu ta Katurakan ta lengguahe na futu tam, memmuguran i espiritualidad tam anna na familia tam anna mepasingan nga talaga pinappannattam ta futu tam i uvovug na Dios.—Sal. 119:11.