1-3. (a) Aniaman ti kasasaadtayo, ania koma ti iyun-unatayo? (b) Ania dagiti pakarigatan dagiti agsursuro iti baro a lengguahe, ken ania dagiti tumaud a saludsod? (Kitaen ti ladawan iti rugi ti artikulo.)

RINIBU a Saksi ni Jehova ita ti naregta a makiramraman iti kaitungpalan ti padto a pannakaipakaammo ti naimbag a damag iti “tunggal nasion ken tribu ken pagsasao ken ili.” (Apoc. 14:6) Maysaka kadi kadagiti agsursuro iti sabali a lengguahe? Misioneroka kadi wenno agserserbika iti lugar a dakdakkel ti panagkasapulanna, wenno makigimgimongka iti kongregasion iti lugaryo a sabali ti pagsasaona?

² Kas ad-adipen ti Dios, masapul nga iyun-unatayo ti espiritualidadtayo ken ti espiritualidad ti pamiliatayo. (Mat. 5:3) Ngem no dadduma, mabalin a marigatantayo a maaddaan iti makagunggona a personal a panagadal gapu ta okupadotayo. Ngem adda pay sabali a pakarigatan dagiti agserserbi iti ganggannaet a teritoria wenno iti kongregasion a sabali ti lengguahena.

³ Malaksid a sursuruenda ti baro a lengguahe, masapul met a siguraduenda a kanayon a mangipaunegda iti nakired a  naespirituan a taraon. (1 Cor. 2:10) Kasano a maaramidda dayta no saanda a naan-anay a maawatan ti lengguahe nga us-usaren ti kongregasion? Ken apay a masapul a siguraduen dagiti Kristiano a nagannak a dumanon ti Sao ti Dios iti puso dagiti annakda?

4. Ania ti mabalin a mamagpeggad iti relasiontayo ken Jehova? Mangted iti pagarigan.

⁴ Mabalin a saantayo a maawatan ti Sao ti Dios no basaentayo dayta iti sabali a lengguahe. Gapuna, agpeggad ti relasiontayo ken Jehova. Idi maikalima a siglo B.C.E., napaliiw ni Nehemias a saan a makapagsao iti Hebreo ti dadduma nga annak dagiti Judio a nagsubli manipud Babilonia. (Basaen ti Nehemias 13:23, 24.) Mapukpukawen ti pakabigbiganda kas adipen ti Dios gapu ta saanda a naan-anay a maawatan ti Sao ti Dios.—Neh. 8:2, 8.

5, 6. Ania ti nadlaw ti dadduma a nagannak nga agserserbi iti ganggannaet a teritoria, ken apay?

⁵ Nadlaw ti dadduma a nagannak nga agserserbi iti ganggannaet a teritoria a kimmapuy ti interes dagiti annakda iti kinapudno. Gapu ta saan a naan-anay a maawatan dagiti annak ti maad-adalda kadagiti gimong, saan a dumanon dagiti naespirituan a programa iti pusoda. Kuna ni Pedro ^[1] a nangyakar iti pamiliana idiay Australia manipud South America: “No mapagsasaritaan dagiti naespirituan a bambanag, masapul a karaman ti puso ken emosion.”—Luc. 24:32.

⁶ No saan a ti lengguahetayo ti basaentayo, mabalin a saan a matignay ti pusotayo. Kasta met, no marigatantayo a makikomunikar iti sabali a lengguahe, mabalin a mabannog ti panunottayo ken kumapuy ti espiritualidadtayo. Gapuna, masapul a pagtalinaedentayo a natibker ti relasiontayo ken Jehova bayat nga agserserbitayo iti ganggannaet a teritoria.—Mat. 4:4.

7. Kasano a pinilit dagiti taga-Babilonia ni Daniel a mangakseptar iti kultura ken relihionda?

⁷ Idi naipan ni Daniel ken dagiti kakaduana idiay Babilonia, pinilit ida dagiti taga-Babilonia a mangakseptar iti kulturada babaen ti panangisuroda iti “pagsasao dagiti Caldeo.” Kasta met, pinanaganan ida ti opisial ti palasio kadagiti gagangay a nagan iti Babilonia. (Dan. 1:3-7) Ti naipanagan ken Daniel ket tumukoy ken Bel, ti kangrunaan a didiosen iti Babilonia. Mabalin a kayat ni Ari Nabucodonosor a panunoten ni Daniel a nabilbileg ti dios ti Babilonia ngem iti Diosna a ni Jehova.—Dan. 4:8.

8. Ania ti nakatulong ken Daniel tapno agtalinaed a natibker ti relasionna ken Jehova uray adda iti sabali a lugar?

⁸ Nupay naitukon ken Daniel dagiti makan a maidasdasar iti ari, ‘inkeddengna iti pusona a saanna a rugitan ti bagina.’ (Dan. 1:8) Kanayon nga inadalna dagiti sagrado a “libro” iti pagsasaona isu a nagtalinaed a natibker ti relasionna ken Jehova uray adda iti sabali a lugar. (Dan. 9:2) Gapuna, uray dandani 70 a tawenen nga adda idiay Babilonia, pagaammo pay laeng iti Hebreo a naganna.—Dan. 5:13.

9. Kas mabasa iti Salmo 119, ania ti epekto ti Sao ti Dios iti nagsurat iti dayta?

⁹ Nagtalinaed a naiduma ti mannurat ti Salmo 119 gapu iti tulong ti Sao ti Dios. Inibturanna ti naalas a panagsasao ti dadduma a miembro ti palasio ti ari. (Sal. 119:23, 61) Ngem impalubosna a dagiti sasao ti Dios ti ad-adda a nangimpluensia kenkuana.—Basaen ti Salmo 119:11, 46.

10, 11. (a) No adalentayo ti Sao ti Dios, ania koma ti panggeptayo? (b) Kasano a maaramidtayo dayta? Iyilustrarmo.

¹⁰ Uray no mabalin nga okupadotayo unay  iti responsabilidadtayo iti kongregasion ken iti trabahotayo, masapul nga iwayaantayo ti personal a panagadal ken panagdaydayaw ti pamilia. (Efe. 5:15, 16) Ngem saan laeng koma a ti panggeptayo ket tapno makabasatayo iti adu a panid wenno tapno laeng agsagana iti komento kadagiti gimong. Kayattayo a siguraduen a dumanon ti Sao ti Dios iti pusotayo ken patibkerenna ti pammatitayo.

¹¹ Tapno maaramidtayo dayta, masapul a balansetayo no panunotentayo ti naespirituan a kasapulan ti sabsabali ken no ania ti naespirituan a kasapulantayo no agad-adaltayo. (Fil. 1:9, 10) Masapul a laglagipentayo a no agsagsaganatayo para iti ministerio, gimong, wenno palawag, mabalin a saan nga agaplikar kadatayo ti amin a basbasaentayo. Kas panangyilustrar: Masapul a ramanan ti kosinero dagiti linutona sakbay a maidasar, ngem saan a mabsog ken agbiag no ramramananna laeng. No kayatna ti agtalinaed a nasalun-at, masapul nga agluto iti nasustansia para iti bagina. Kasta met, masapul nga ikagumaantayo a taraonan ti pusotayo iti naespirituan a taraon a mangbussog iti personal a kasapulantayo.

12, 13. Apay nga adu kadagiti agserserbi iti ganggannaet a teritoria ti nangibaga a makatulong ti regular a panagadal iti lengguaheda?

¹² Nakita ti adu nga agserserbi iti ganggannaet a teritoria a makatulong ti regular a panagadal iti Biblia iti ‘pagsasao a nakayanakanda.’ (Ara. 2:8) Uray dagiti misionero nabigbigda a tapno agtalinaed a natibker ti relasionda ken Jehova bayat nga agserserbida iti sabali a lugar, saanda laeng nga agpannuray kadagiti naespirituan a taraon a masursuroda kadagiti gimong.

¹³ Agarup walo a tawenen nga agsursuro ni Alain iti Persian. Inaminna: “No agsaganaak kadagiti gimong iti Persian, adda tendensiak a nakapokusak laeng iti lengguahe. Gapu ta nakasentro ti panunotko iti lengguahe, saan  unay a dumanon iti pusok dagiti naespirituan a kinapudno a basbasaek. Dayta ti gapuna a regular nga iwayaak nga adalen ti Biblia ken ti dadduma pay a publikasion iti lengguahek.”

14. Ania ti masapul a siguraduen dagiti nagannak, ken apay?

¹⁴ Masapul a siguraduen dagiti nagannak nga in-inut a dumanon ti Sao ti Dios iti panunot ken puso dagiti annakda. Kalpasan ti nasurok a tallo a tawen a panagserbi da Serge ken Muriel iti kongregasion a sabali ti lengguahena, nadlawda a saanen a naragsak kadagiti nateokratikuan nga aktibidad ti 17 ti tawenna a baroda. “Magusgustuanna idi ti mangasaba iti nakayanakanna a lengguahe a French, ngem masadut no mangasaba iti sabali a lengguahe,” kuna ni Muriel. “Idi nadlawmi a daytoy ti manglaplapped iti naespirituan a panagrang-ay ti baromi,” inlawlawag ni Serge, “inkeddengmi ti agsubli iti dati a kongregasionmi.”

15. (a) Ania dagiti mabalin a makatulong kadagiti nagannak nga agdesision no agsublida wenno saan iti kongregasion a mangus-usar iti lengguahe a mas maawatan dagiti annakda? (b) Ania ti iparegta ti Deuteronomio 6:5-7 kadagiti nagannak?

¹⁵ Ania dagiti mabalin a makatulong kadagiti nagannak nga agdesision no agsublida wenno saan iti kongregasion a mangus-usar iti lengguahe a mas maawatan dagiti annakda? Umuna, panunotenda koma no talaga nga adda umdas a panawenda ken no kabaelanda nga isuro dagiti annakda a mangayat ken Jehova bayat a sursuruanda ida iti sabali a lengguahe. Maikadua, mabalin a madlawda a saan unayen nga interesado dagiti annakda kadagiti naespirituan nga aktibidad wenno iti kongregasion a pagserserbianda. Kadagita a kasasaad, mabalin nga ikabilangan dagiti nagannak ti agsubli iti kongregasion a mangus-usar iti lengguahe a mas maawatan dagiti annakda agingga a natibkeren ti relasionda ken Jehova.—Basaen ti Deuteronomio 6:5-7.

16, 17. Kasano nga insuro ti dadduma a nagannak iti annakda ti kinapudno bayat nga agserserbida iti kongregasion a sabali ti lengguahena?

¹⁶ Nakabirok met ti dadduma a nagannak kadagiti pamay-an tapno maisuroda dagiti annakda iti bukodda a lengguahe bayat a makigimgimongda iti kongregasion wenno grupo a mangus-usar iti sabali a lengguahe. Addaan ni Charles iti tallo nga annak a babbai nga agedad iti 9 agingga iti 13. Makigimgimongda a sangapamiliaan iti grupo a mangus-usar iti lengguahe a Lingala. Kunana: “Nagdesisionkami nga usarenmi ti bukodmi a lengguahe no iyadalanmi ida ken bayat ti panagdaydayaw ti pamiliami. Ngem usarenmi met ti Lingala bayat ti panagay-ayammi ken panagpraktismi a mangasaba, agkomento, ken agsursuro iti kablaaw tapno naragsak ti panagsursuroda iti daytoy a lengguahe.”

¹⁷ Addaan ni Kevin iti dua nga annak a babbai nga agtawen iti lima ken walo. Nangaramidda ken baketna iti pamay-an tapno maisuroda ti kinapudno kadagiti annakda gapu ta saanda pay unay a maawatan ti lengguahe a maus-usar kadagiti gimong iti kongregasion a pagserserbianda. Inlawlawagna: “Iyadalanmi iti Biblia dagiti annakmi iti lengguahe a French, ti bukodda a pagsasao. Ikagkagumaanmi met ti makigimong iti French iti maminsan iti makabulan, ken gundawayanmi ti agatender kadagiti kombension a mangus-usar iti lengguahemi bayat ti panagbakasionmi.”

18. (a) Ania a prinsipio iti Roma 15:1, 2 ti makatulong kadakayo tapno maikeddengyo no ania ti kasayaatan para kadagiti annakyo? (b) Ania dagiti insingasing ti dadduma a nagannak? (Kitaen ti endnote.)

¹⁸ Siempre, agdepende iti tunggal pamilia no ania ti makitada a kasayaatan a makatulong kadagiti annakda a maaddaan iti natibker a relasion ken Jehova. ^[2] (Gal. 6:5) Kuna ni Muriel, a nadakamat itay, nga insakripisioda  ken lakayna ti kayatda tapno mabenepisiaran iti naespirituan ti baroda. (Basaen ti Roma 15:1, 2.) No lagipen ni Serge ti inaramidda, maibagana nga umiso ti desisionda. Kunana: “Idi nagsublikamin iti kongregasion a French, rimmang-ay ti espiritualidad ti baromi ket nagpabautisar. Regular pioneer itan. Pampanunotenna payen ti agsubli iti grupo nga agus-usar iti sabali a lengguahe!”

19, 20. Kasano a maipakitatayo nga ipatpategtayo ti Sao ti Dios?

¹⁹ Gapu iti ayat ni Jehova, nangaramid iti pamay-an tapno magun-odan ti Saona, ti Biblia, iti ginasut a lengguahe, iti kasta, ‘dagiti amin a kita ti tattao ket dumteng iti umiso a pannakaammo iti kinapudno.’ (1 Tim. 2:4) Ammona a mas mapennek dagiti tattao ti naespirituan a kasapulanda no basaenda ti Saona iti bukodda a lengguahe.

²⁰ Ngem aniaman ti kasasaadtayo, masapul nga agporsegitayo a mangipauneg kadagiti nakired a naespirituan a taraon. No kanayon nga adalentayo ti Kasuratan iti bukodtayo a lengguahe, mapagtalinaedtayo a natibker ti espiritualidadtayo ken ti espiritualidad ti pamiliatayo, ken maipakitatayo a talaga nga ipatpategtayo ti Sao ti Dios.—Sal. 119:11.