ИРО, гәләк Шәʹдед Йаһоwа пʹехәмбәртийе тиньн сери бь wе йәке, кö «һʹәму мьләта, бәрәка, зьмана» у щьмәʹтарʹа мьзгинийе бәла дькьн (Әʹйан. 14:6). Гәләк хушк-бьред мә зьмане тʹәзә һин дьбьн сәва мьзгинийе бәла кьн. Дьбәкә һун жи зьмане хәриб һин дьбьн, йан ча мисйонер хьзмәт дькьн, йан хьзмәт дькьн wәлате хәрибда кʹидәре кö һʹәwщәти һәйә, йан дәрбази щьвата тʹәзә бунә, кʹижан кö нә сәр зьмане wә йә.

² Һʹәму хьзмәткʹаред Хwәде, гәрәке мьqати рʹöһʹанийа хwә у малбәта хwә бьн, чьмки әw гәләк фәрз ә (Мәт. 5:3). Щара, һаqас шьхöле мә һәнә, кö мәрʹа чәтьн ә wәʹдә бьвиньн сәва һинбуна шәхси дәрбаз кьн. Ле әwед кö дәшта зьманәки дьнда хьзмәт дькьн, рʹасти чәтьнайед дьн жи тен.

³ Мәсәлә, әw хушк-бьра хенщи кö зьмане тʹәзә һин бьн, öса жи гәрәке тʹьме леколин бькьн у кʹур пебьһʹәсьн нет-мәрәмед  Хwәде (1 Корн. 2:10). Ле гәло әwана ча дькарьн әве йәке бькьн, чахе зьмане щьватеда бь тʹәмами фәʹм накьн? У чьрʹа де-бав гәрәке дина хwә бьдьн, һәла Хәбәра Хwәде дьгьһижә дьле зарʹед wан йан на?

4. Чь дькарә зийане бьдә рʹöһʹанийа мә? Мәсәле биньн.

⁴ Чахе әм сәр зьмане хәриб нькарьн Кʹьтеба Пироз кʹур фәʹм кьн, әw йәк дькарә зийане бьдә рʹöһʹанийа мә. Qьрʹна пенщада Б.Д.М., чахе Нәһәмийа һатә Оршәлиме, әwи дит wәки һьнә зарʹед Щьһу йед кö жь дилтийа Бабилоне вәгәрʹийанә, зьмане Ибрани ньзаньн у әw бәрхwә кʹәт. (Бьхунә Нәһәмийа 13:23, 24.) Әwан зарʹа нькарьбун Хәбәра Хwәде фәʹм кьн, ләма һәләqәтийа wан тʹәви Йаһоwа сьст бу (Нәһәм. 8:2, 8).

5, 6. Һьнә де-бавед кö дәшта зьмане дьнда хьзмәт дькьн чь тедәрхьстьн?

⁵ Һьнә де-бав кö Мәсиһи нә у хьзмәт дькьн ль дәшта зьмане дьн, тедәрхьстьн wәки зарʹед wан рʹöһʹанида һьнәки сьст бунә. Жь бо ве йәке кö зарʹ рʹьнд фәʹм накьн зьмане хәриб, гьлийед кö сәр щьвате тенә готьне нагьһижә дьле wан. Бьраки мә Педро ^[1], йе кö тʹәви малбәта хwә дәрбази wәлате дьн буйә, дьбежә кö чахе дәрһәqа тьштед рʹöһʹани хәбәрдьдьн, әв гәрәке бьгьһижә дьле мә у һʹьше мә (Луqа 24:32).

⁶ Чахе әм сәр зьмане хәриб дьхуньн, дьбәкә әв йәк һаqас дьле мә нәгьрә, чьqас кö мә сәр зьмане хwә бьхwанда. Хенщи ве йәке, чахе мәрʹа чәтьн ә хәбәрдьн сәр wи зьмани, әм дькарьн әʹщьз бьн у рʹöһʹанида сьст бьн. Ләма чахе әм дәшта зьманәки дьнда хьзмәт дькьн, әм гәрәке мьqати хwә бьн wәки рʹöһʹанида нәкʹәвьн у һәләqәтийа хwә тʹәви Йаһоwа öнда нәкьн (Мәт. 4:4).

7. Чь щурʹәйи Бабилонийа дьхwәстьн зоре Данийел бькьн, wәки әw әʹдәт у религийа wан qәбул кә?

⁷ Чахе Данийел у һәвалед wи Бабилонеда дил бун, Бабилонийа дьхwәстьн зоре wана бькьн кö биньн сәр әʹдәт у религийа хwә. Бабилонийа «зьмане Кьлданийа» әwана һин кьрьн. Хенщи wе йәке, сәрwере бәрдәстийа йе кö щабдар бу wәки зьман wана һин кә, наве Бабилонийа да сәр wан (Дан. 1:3-7). Наве Данийел данибун Бел, кʹижан  кö наве хöданәки сәрәкә йе Бабилонийа бу. Дьбәкә Нәбукәднәсәр пʹадша дьхwәст Данийел бьдә баwәркьрьне, wәки хöдане Бабилонийа, жь Йаһоwа һе qәwаттьр ә (Дан. 4:8).

8. Чь али Данийел кьр кö әw wәлате хәрибда рʹöһʹанида qәwи ма?

⁸ Бабилонеда Данийелрʹа изьн һәбу кö хwарьна пʹадша бьхwә. Ле әwи дьле хwәда сафи кьр кö бь wан хwарьна хwә һʹәрам нәкә (Дан. 1:8). Рʹаст ә әw wәлате хәрибда бу, ле әwи һәләqәтийа хwә тʹәви Йаһоwа qәwи хwәй кьр. Ле гәло ча? Әwи сәр зьмане Ибрани, демәк сәр зьмане хwә, «пʹьртукед» пироз дьхwәнд (Дан. 9:2). Рʹаст ә әw wәкә 70 сала Бабилоне бу, ле йәкә диса wи бь наве Ибрани нас дькьрьн (Дан. 5:13).

9. Ньвискʹаре Зәбура 119 wәʹде тәнгасийе жь кʹö qәwат дьстанд?

⁹ Ньвискʹаре Зәбура 119, рʹасти чәтьнайе һат. Һьнә әндәмед qәсьре wи беһöрмәт дькьн (Зәб. 119:23, 61). Ле гәло әwи жь кʹö qәwат дьстанд, сәва рʹöһʹанида сьст нәбә у мина wан нибә? Хәбәра Хwәде али wи дькьр, чьмки әwи гьлийед Хwәде дьле хwәда хwәй дькьр у сәр дьфькьри. (Бьхунә Зәбур 119:11, 46.)

10, 11. а) Чахе әм Хәбәра Хwәде һин дьбьн, нета мә гәрәке чь бә? б) Ча әм дькарьн бьгьһижнә нета рʹаст? Мәсәле биньн.

¹⁰ Иро дьбәкә щьватеда гәләк щабдарийед мә һәнә у öса жи шьхöле мәйи дьн, ле йәкә һәр кәс жь мә гәрәке сәва һинбуна шәхси у qöльхкьрьна тʹәви малбәте wәʹдә хwәрʹа бьвинә (Әфәс. 5:15, 16). Нета мә гәрәке әw нибә кö тʹәне гәләки бьхуньн, йан жи тʹәне щабед хwә һазьр кьн бона щьвате. Ле нета мә гәрәке әw бә, wәки Хәбәра Хwәде сәр дьле мә һʹöкöм кә, мә һин кә у баwәрийа мә qәwи кә.

¹¹ Wәки бьгьһижнә wе нете, әм гәрәке сәрwахт бьн. Чахе әм тьштәки дьхуньн, әм нә кö тʹәне гәрәке бьфькьрьн, кö әм чаwа дькарьн бь wе информасйайе али мәрьвед дьн бькьн, ле öса жи гәрәке дәрһәqа хwә бьфькьрьн, кö әw йәк чьда дькарә али мә бькә (Фили. 1:9, 10). Әм гәрәке фәʹм кьн, кö чахе әм хwә һазьр дькьн бона хьзмәтийе, щьвате, йан жи чахе готаре һазьр дькьн, әw йәк мә рʹöһʹанида тʹер накә. Wәрә мәсәләке биньн: Чахе аспеж хwарьне чедькә, әw һʹәта әwе хwарьне бәла кә, тәʹм дькә. Ле фәʹмдари йә, wәки әw бь ве йәке тʹер набә. У һәрге әw дьхwазә сьһʹәт-qәwата wи баш бә, әw гәрәке хwарьна хwә бьхwә. Әм жи гәрәке хwә бь хwарьна рʹöһʹанийа гьран тʹер кьн, кʹижан кö хут мәрʹа лазьм ә, сәва рʹöһʹанида qәwи бьминьн.

12, 13. Чьрʹа бона әwед кö дәшта зьмане дьнда хьзмәт дькьн, дьфькьрьн кö гәләк керһати йә wәки сәр зьмане хwә һинбуна шәхси дәрбаз кьн?

¹² Гәләк жь wана кʹе кö дәшта зьмане дьнда хьзмәт дькьн, һинбуна шәхси сәр «зьмане хwә йе де» дәрбаз дькьн. Чьмки әw йәк али wан дькә рʹöһʹанида qәwи бьминьн (Кʹар. Шанд. 2:8, ИМ).  Мисйонер жи фәʹм дькьн, кö сәва wәлате хәрибда хьзмәт кьн у рʹöһʹанида qәwи бьминьн, бәс нинә тʹәне әw, чь кö әwана сәр щьвате дьбьһен.

¹³ Бьраки мә Алан, кö ида wәкә һʹәйшт сал ә һин дьбә зьмане Фарси, дьбежә: «Чахе әз сәр зьмане Фарси бона щьвате һазьр дьбьм, әз тʹәне дәрһәqа зьман дьфькьрьм. Ләма чь кö әз дьхуньм, һаqас нагьһижә дьле мьн. Сәва ве йәке, әз тʹьме хwәрʹа wәʹдә башqә дькьм, сәва Кʹьтеба Пироз у әʹдәбйәтед мә сәр зьмане хwә бьхуньм».

14. Де-бав гәрәке дина хwә бьдьн сәр чь?

¹⁴ Де-бав гәрәке тʹьме пьрсе бьдьнә хwә: «Гәло рʹасти гьһиштийә дьле зарʹед мә?» Мер у жьн Серж у Муриел, дәшта зьмане дьнда хьзмәт дькьрьн. Паши се сала зедәтьр, wана тʹәхмин кьр wәки кöрʹе wани 17 сали рʹöһʹанида сьст буйә. Муриел гьли дькә: «Әwи ида шабун нә дьстанд шьхöлед рʹöһʹанида. Әwи һʹьз дькьр сәр зьмане хwәйи Франси хьзмәт кә, ле сәр зьмане тʹәзә һʹәwаса wи тʹöнә бу». Серж зедә дькә: «Чахе мә фәʹм кьр wәки сәва ве йәке кöрʹе мә рʹöһʹанида сьст дьбә, мә сафи кьр кö диса вәгәрʹьн щьвата хwәйә бәре».

15. а) Чь мәʹни дькарьн де-бава һелан кьн, wәки диса дәрбази щьвата хwәйә бәре бьн? б) Qануна Дöщари 6:5-7-да Хwәде чь тʹәмийе дьдә де-бава?

¹⁵ Чь мәʹни дькарьн де-бава һелан кьн, wәки диса дәрбази wе щьвате бьн, кʹижан кö сәр wи зьмани дәрбаз дьбә, йе кö зарʹед wан рʹьнд фәʹм дькьн? Йа әʹwльн, де-бав гәрәке бьфькьрьн, һәла wәʹде wан һәйә, wәки зарʹа һин кьн кö Йаһоwа һʹьз бькьн, у һьм жи зьмане хәриб wана һин кьн. Йа дöда, әwана дьбәкә дьвиньн wәки зарʹед wанрʹа ида һʹәwас нинә бенә сәр щьвате йан һәрʹьнә хьзмәтийе дәшта зьмане дьнда. Wан дәрәщада де-бав дьбәкә сафи кьн, wәки дәрбази щьвата хwәйә бәре бьн, һʹәта кö зарʹед wан рʹöһʹанида qәwи бьн, чьмки зарʹед wан әwи зьмани рʹьнд фәʹм дькьн. (Бьхунә Qануна Дöщари 6:5-7.)

16, 17. Ча һьнә де-бава рʹöһʹанида али зарʹед хwә кьрьн?

¹⁶ Һьнә де-бава методәкә баш дитьн, wәки зарʹед wан щьвата зьмане дьнда рʹöһʹанида qәwи бьминьн. Әw де-бав дәрһәqа Йаһоwа зарʹа һин дькьн сәр зьмане де. Бьраки мә Чарлз кö се qизед wи һәнә, кʹижан 9, 12, у 13 сали нә, дьчьнә кʹома зьмане Лингала, кʹижан һе нәбуйә щьват. Әw гьли дькә: «Мә сафи кьр wәки һинбуна Кʹьтеба Пироз тʹәви зарʹа у qöльхкьрьна тʹәви малбәте, сәр зьмане хwә дәрбаз кьн. Ле әм öса жи тʹәви зарʹа сәр зьмане Лингла һазьр дьбьн бона щьвате у хьзмәтийе. Һьм жи, әм тʹәви wан сәр зьмане Лингала листька дьлизьн, сәва кö wанрʹа һе һʹәwас бә әwи зьмани һин бьн».

¹⁷ Кевин, кö дö qизед wи һәнә, 5 у 8 сали нә, хwәрʹа нет дани wәки рʹöһʹанида али зарʹед хwә бькә, чьмки wана зьмане щьвата тʹәзә рʹьнд фәʹм нәдькьрьн. Әw гьли дькә: «Әз у жьна мьн, зарʹед хwә сәр зьмане Франси Кʹьтеба Пироз һин дькьн, сәр зьмане wани де. Мә öса жи хwәрʹа нет дани wәки мәһе щарәке һәрʹьнә щьвата зьмане хwә Франси, у әм рʹожед һесабуне һьлдьдьн сәва һәрʹьнә щьвата мәзьн сәр зьмане хwә».

18. а) Жь Рʹомайи 15:1, 2, кʹижан принсип дькарә али wә бькә кö сафи кьн һәла бона зарʹед wә wе чь баш бә? б) Һьнә де-бава дәрһәqа зарʹа чь ширәт данә? (Бьньһерʹә әʹламәтийа зедә.)

¹⁸ Бәле, һәр малбәт гәрәке хwәха сафи кә, һәла чь һе баш ә wәки зарʹед wан рʹöһʹанида qәwи бьн ^[2] (Галт. 6:5). Муриел дәрһәqа кʹижане жоре һатә готьне, дьбежә wәки әwе у мере wе, гәләк дьхwәстьн wәки щьвата зьмане дьнда  хьзмәт кьн, ле чьмки кöрʹе wан рʹöһʹанида сьст бу, әwана дәрбази щьвата хwәйә бәре бун. (Бьхунә Рʹомайи 15:1, 2.) Мере wе, Серж, тинә бира хwә wе дәрәще, у дьбежә wәки wана сафикьрьна рʹаст кьрьн. Әw гьли дькә: «Чахе әм дәрбази щьвата зьмане хwәйи Франси бунә, кöрʹе мә рʹöһʹанида гәш бу, у ахьрийеда һатә ньхöмандьне. Ньһа әw ида пешәнг ә, у дьхwазә диса дәрбази щьвата зьмане дьн бә!»

19, 20. Әм ча дькарьн бьдьнә кʹьфше, wәки әм Хәбәра Хwәде qимәт дькьн?

¹⁹ Йаһоwа һʹәму мәрьва һʹьз дькә. Әwи Хәбәра хwә, демәк Кʹьтеба Пироз дайә мә, кʹижан кö дәст дькʹәвә бь сәда зьмана, сәва «һʹәму мәрьв хьлаз бьн у рʹастийе нас кьн» (1 Тимтʹ. 2:4). Әw занә wәки чахе әм сәр зьмане хwә Хәбәра wи дьхуньн, әw һе дьгьһижә дьле мә у әм рʹöһʹанида qәwи дьбьн.

²⁰ Һәр кәс жь мә гәрәке мьqати хwә бә, wәки һәләqәтийа хwә тʹәви Йаһоwа öнда нәкә. Чахе әм Кʹьтеба Пироз бьхуньн сәр wи зьмани кö әм фәʹм дькьн, әм у малбәта мә рʹöһʹанида qәwи бьминьн, у әме әʹйан кьн wәки әм гьлийед Хwәде чьqас qимәт дькьн! (Зәб. 119:11)