Mulukukosha Bucibusa Bwenu na BaYawe ili Mulukupyungila Ukulabilwa Umulaka Umbi
“Ishiwi lyenu nalilifishile mu mutima wanji.”—AMASA. 119:11.
INYIMBO: 142, 92
1-3. (a) Findo fwe baKlistu fwense twelelwe ukubikako makosa akalango? (b) Ni esa amakatasho ao abalukusambilila umulaka umbi bakwata, kabili ni fisa fyakwipusha tungepusha? (Boneni icikope icili peulu.)
BAMBONI abengi balukupyungako makosa umulimo wa kutulisha icebo iciweme ‘ku mishobo yonse, na ku bena bonse, na ku milaka yonse, na ku mikoka yonse.’ (Ukufisulula 14:6) Kani na mwebo mulukusambilila umulaka umbi? Kani ni mwe bamishonali neli mulukupyungila ukulukupengelwa abakutulisha abengi? Kani mulitatikile ukubungana mwi kelesha ilipyungisha umulaka umbi?
2 Fwense fwe bapyungishi ba baLesa tulyelelwe ukubika makosa akalango kuli bucibusa bwesu na baLesa ne bwa ba mu cisoolo cesu. (Mat. 5:3) Nangabe’fyo, pakuti pa kuba ne fyakucite’fingi, shimbi impindi cingabe’cikateshe ukusanga impindi iyelelwe iya kulisambisha. Pano abapyungila ukulabilwa umulaka umbi balaba ne makatasho na ambi.
3 Ukulunda pa kusambilila umulaka umbi, abapyungila ukulabilwa umulaka umbi balyelelwe ukulukulya ifyakulya fya ku mupashi ifikosele. (1 Koli. 2:10) Pano bangacita shani ifyo kani tabomfwishapo umulaka uulabilwa mwi kelesha babunganamo? Kabili nindo abafyashi belelwe ukofwelako abana babo ukukula mu fya baLesa?
IFINGONAALA BUCIBUSA BWESU NA BAYAWE
4. Findo fingonaala bucibusa bwesu na baLesa? Labileni pa cakubwenako.
4 Ukubulo’kumfwisha Amashiwi abaLesa pakuti pa mulaka alambeelwemo kunganasha bucibusa bwesu na baLesa. Mu myaka ya ba 400 B.C.E., Neyamiya alibombomene ili abwene ati bambi abana ba baIshilaeli abalubwilwe mu Babiloni tabaishipo ukulabila umulaka wa ciEbeya. (Pendeni Neyamiya 13:23, 24.) Abo abana tabacetekelepo muli baYawe ni pakuti tabaalukumfwishapo ifi baalukusambilila mu Mashiwi abaLesa.—Neya. 8:2, 8.
5, 6. Findo abafyashi bambi abapyungila ukulabilwa umulaka umbi babwene, kabili nindo?
5 Abafyashi bambi abalukupyungila ukulabilwa umulaka umbi balibwene ati abana babo balilekele ukutemwa bucine. Pakuti tabalukumfwishapo umulaka uwalukupyungishiwa pa kubungana, ifyebo abana baalukumfwa mu Mulenda wa Bufumu tafyalukubafikapo pa mitima. Ba Pedro, [1] abakukiile ku Australia ukufuma ku South America pamo ne cisoolo cabo, balilabile ati, “Ili tulukulabila pa fya baLesa, ifyebo filyelelwe ukutufika pa mutima.”—Luku 24:32.
6 Ili tulukupenda ifyebo mu mulaka umbi, ifyo ifyebo cipale tekuti fitufikepo pa mutima koti ni fyefyo cingaba kani tulukufipenda mu mulaka wesu. Nakabili, ukubulo’kwambaala bwino mu mulaka umbi kungalengesha umuntu ukukatala ne kufilwa ukupyungila bwino baYawe. Popele, nangaba ati tulukufwaya ukupyungila baYawe mwi kelesha umu bapyungisha umulaka umbi, tulyelelwe ukulama bucibusa bwesu na baLesa.—Mat. 4:4.
BAALILAMINE BUCIBUSA BWABO NA BAYAWE
7. Kani abaBabiloni balyeseshe shani ukulengesha Danyeli ukulukwikala koti ni bo?
7 Ili Danyeli ne babyakwe babatwite mu busha ku Babiloni, baalibasambishe ‘umulaka wa baKalidaya’ ni pakuti abaBabiloni baalukufwaya ukulengesha aba abasankwa ukulukwikala koti ni bo. Nakabili, icilolo ca mfumu icapeelwe umulimo wa kubalama calibenikile amashina amu Babiloni. (Dan. 1:3-7) Ishina bamwinikile Danyeli lyalukulosha kuli lesa umukulu uwa baBabiloni, Beli. Cipale Imfumu Nebukadinesa yalukufwaya ukulengesha Danyeli ukulanguluka ati baLesa bakwe, baYawe, balikomekelwe kuli lesa wa baBabiloni.—Dan. 4:8.
8. Findo fyaofweleko Danyeli ukulukuli icibusa ca baYawe na lyelyo ali mu calo cimbi?
8 Nangaba ati Danyeli balimupeele ifyakulya fya mfumu, ‘alilifundile mu mutima wakwe ati takalibifyapo.’ (Dan. 1:8) Pakuti alukulisambisha ifyalembelwe mu mabuuku aaswetelele mu mulaka wakwe, alipitilishe ukuba icibusa ca baYawe na lyelyo aali mu calo cimbi. (Dan. 9:2) Penka, na lyelyo papitile imyaka 70 ukufuma apa bamupintile ku Babiloni, alishibikilwe kwi shina lyakwe ilya ciEbeya.—Dan. 5:13.
9. Ukwelelwa ne filembelwe mu Amasamo 119, findo Amashiwi abaLesa alengeshe uwalembele ili isamo ukucita?
9 Amashiwi abaLesa alyofweleko uwalembele Amasamo 119 ukuba umupuseneko kuli bambi. Taalekelepo ukupyungila baLesa ili abaalukupyunga mu ng’anda ya mfumu baalukumupufya. (Amasa. 119:23, 61) Nangabe’fyo, aalilekele amashiwi abaLesa ukumufika pa mutima.—Pendeni Amasamo 119:11, 46.
MULUKUKOSHA BUCIBUSA BWENU NA BAYAWE
10, 11. (a) Findo tufwaisha ukucita ili tulukulisambisha Baibolo? (b) Tungakonsha shani ukucite’fyo? Labileni pa cakubwenako.
10 Nangaba ati tuli ne fyakucita ifingi mu kwanshika kwa baLesa na ku ncito, fwense tulyelelwe ukupaatulako impindi ya kulisambisha ne kukwata amapempelo acisoolo. (Efesa 5:15, 16) Pano, tatufwayapo lukoso ukupenda ifyebo ifingi neli ukwanshika lukoso ifyakwasukapo pa kubungana. Sombi ici tufwaisha makosa ca kweba ati Amashiwi abaLesa alukutufika pa mitima ne kukosha ukucetekela kwesu.
11 Pa kucite’fyo, tulyelelwe ukulukulanguluka na pali fyefyo bambi bapengela ili tulukulisambisha ne kukosha bucibusa bwesu na baYawe. (Filip. 1:9, 10) Tulyelelwe ukulukwanuka ati kani tulukwanshika ifya kutulisha, ukubungana, neli ilyashi, cipale ifyebo tunganshika tekuti tubonepo ifi fingatofwako fwe bene. Ku cakubwenako, nangaba ati umwipikishi alomfwapo pa fyakulya epika ili tangabapeela abantu, tekuti apitilishepo ukuba umulabi kuli twenko’tu tufyakulya. Pano, kani alukufwaya ukulukuli umulabi, alyelelwe ukulya ifyakulya ifiweme. Efi cili na kuli fwebo. Pakweba ati tulukuli ifibusa fya baLesa, tulyelelwe ukulukulya ifyakulya fya ku mupashi ifiweme ifya kutofwako fwebo.
12, 13. Nindo abapyungila ukulabilwa umulaka umbi babwenene ati ukulukulisambisha lyonse mu mulaka wa kwabo kucindeme?
12 Abengi abalukupyungila ukulabilwa umulaka umbi balisangile ati ukulisambisha Baibolo lyonse mu ‘mulaka bafyalilwemo’ kucindeme. (Ifyacit. 2:8) Bamishonali nabo balibwene ati pakweba ati balukuli abakosele mu fya baLesa, balyelelwe ukulukulya ifyakulya fya ku mupashi ifikosele ukulunda pali fyefyo basambilila pa kubungana.
13 Ba Alain, abasambilile umulaka wa ku Persia pa myaka 8, baalilabiile ati: “Kani ndukwanshika ukubungana mu mulaka wa ciPersian ndabika makosa akalango ku mulaka uwine. Pakuti akalango kanji kalatontomeka makosa pa mulaka, ifyebo nsambilila tafimfikapo pa mutima. E mulandu mpatwilako impindi ya kulisambisha Baibolo ne mabuuku ambi mu mulaka wa kwesu.”
OFWENIKO ABANA BENU UKUKULA MU FYA BALESA
14. Findo abafyashi belelwe ukubikako akalango, kabili nindo?
14 Abafyashi abaKlistu balyelelwe ukupyungisha pakweba’ti Amashiwi abaLesa afike abana babo pa mitima. Panuma ili ba Serge ne bakashi babo ba Muriel bapyungiile ku mupunda ukwalukulabilwa umulaka umbi pa myaka ukucila pali itatu, baalibwene ati umwana wabo umwalalume uwali ne myaka 17 alilekele ukulitemwesha ukupyunga imilimo ya mu kwanshika kwa baLesa. Ba Muriel balilabiile ati, “Umwana wesu talukulitemweshapo ukuya mu kutulisha ku bantu abalabila umulaka umbi, koti ni fyopele filya alukulitemwesha ukuya mu kutulisha ku bantu abalabila umulaka wakwe uwa ciFrench.” Ba Serge balibuulishishe ati, “Ili twabwene ati ifi fyalengesha umwana wesu ukuleko’kukula mu fya baLesa, twalisalulwilepo ukubwelela kwi kelesha twaliko akale.”
Ofweniko abana benu ukutemwa bucine (Boneni amapalakalafu 14 na 15)
15. (a) Findo cipale ifingalengesha abafyashi bambi ukusalululapo ukubwelela kwi kelesha ilipyungisha umulaka abana bomfwisha? (b) Ni kwisa ukufunda abafyashi bangalonda ukuli pali Ndutelonomi 6:5-7?
15 Findo cipale ifingalengesha abafyashi bambi ukusalululapo ukubwelela kwi kelesha ilipyungisha umulaka abana bomfwisha? Ica kutanga, balyelelwe ukubona kani bali ne mpindi ne fipengelwa pa kusambisha abana ukutemwa baYawe ili balukubasambisha ne mulaka umbi. Ica bubili, cipale bangabona ati abana babo baleka ukulitemwesha ukupyungila baLesa neli ukupyungila ukulabilwa umulaka umbi. Kani abafyashi babona ifya kube’fi mu bana babo, cipale bangasalululapo ukubwelela kwi kelesha ilipyungisha umulaka abana bomfwisha mpaka ili abana bakosa mu fya baLesa.—Pendeni Ndutelonomi 6:5-7.
16, 17. Kani bambi abafyashi balikonseshe shani ukusambisha abana babo ifya baLesa ili balukupyungila ukulabilwa umulaka umbi?
16 Pano, bambi abafyashi balisangile inshila sha kusambishishamo abana mu mulaka wabo ili balukupyungila ukulabilwa umulaka umbi. Ba Charles bali ne bana batatu abanakashi. Umukulu ali myaka 13 eli umwanice ali ne myaka 9. Aba bonse balabungana kwi bumba uku bapyungisha iciLingala. Ba Charles balilabiile ati: “Twalisalulwilepo ukulukupyungisha umulaka wesu pa mapempelo acisoolo na pa kusambisha abana besu Baibolo. Pano shimbi impindi twalukucita ifyakulangilila ne fyakwangala mu ciLingala pakweba ati abana balukusambilila uyu umulaka ili tulukusangalalila pamo.”
Esheni ukwishiba umulaka balabila uku mupyungila eli ne kulukwasukapo pa kubungana (Boneni amapalakalafu 16 na 17)
17 Ba Kevin abali ne bana babili abanakashi, umo ali ne myaka 5 eli umbi ali ne myaka 8, balibwene ati abana babo tabomfwishapo ifilabilwa mu mulaka umbi pa kubungana. Popele, balisangile inshila sha kubofwelamo. Balilabiile ati: “Nebo ne bakashi banji tulasambisha abana mu mulaka wabo uwa ciFrench. Nakabili, tulisalulwilepo ukulukusangwako ku kubungana kwa mu ciFrench limo mu mwenshi, eli ne kuya ku mabungano amu ciFrench ili twabwelelamo kwesu mu kufakasha.”
18. (a) Ni kwisa ukufunda ukuli pa AbaLoma 15:1, 2 ukungamofweniko ukusalululapo bwino ifingawamina abana benu? (b) Findo bambi abafyashi balabiile ifingofwako icisoolo? (Boneni tumashiwi twa pa mpelo.)
18 Ukuba, abafyashi abene balyelelwe ukusalululapo ifingawamina abana babo. [2] (Galatya 6:5) Ba Muriel, abalabilwapo peulu, balilabiile ati bo ne balume babo balilekele ukucita ifi batemenwe pakweba ati bofweko bwino abana babo. (Pendeni AbaLoma 15:1, 2.) Panuma, ba Serge balilabiile ati ifi bacitile fyali lukoso bwino. Balilabiile ati: “Ukufuma lukoso ili twabwelele kwi kelesha lya ciFrench, umwana wesu alikulile mu fya baLesa ne kubatishiwa. Ino mpindi ni painiya wa mpindi shonse. Eli alukulanguluka na pa kubwelela kwi bumba ilipyungisha umulaka umbi!”
AMASHIWI ABALESA NGA AMOFWENIKO UKUKOSHA BUCIBUSA BWENU NA BAYAWE
19, 20. Tungalangisha shani ati tulitemenwe Amashiwi abaLesa?
19 Pakuti baYawe balitutemenwe, balitupeele Amashiwi abo, Baibolo, mu milaka iingi pakweba ati ‘abantu bonse abalekenelekene bafike ku kwishibisha bucine.’ (1 Tim. 2:4) Baliishi ukweba ati abantunshi bangakosha bucibusa bwabo na baLesa kani balukupenda amashiwi abo mu mulaka wabo.
20 Popele, nangaba na kuko tuli, fwense tulyelelwe ukulukulya ifyakulya fya ku mupashi ifikosele. Lyonse kani tulukusambilila Amalembo mu mulaka wesu, tukalukukosha bucibusa bwesu na baLesa kabili tukofwako icisoolo ukuba icikosele mu fya baLesa. Penka, tukalangisha ati tulalama amashiwi abaLesa mu mitima yesu.—Amasa. 119:11.
