Mao-y tɩ y tẽebã kell n tall pãnga, baa y sã n sõngda buud-gom-zẽng tiginga
“Mam bĩngda yãmb goamã m sũurẽ.”—YƖƖN. 119:11.
YƖƖLA: 142, 92
1-3. a) Bõe n segd n pak kiris-ned fãa n tɩ yɩɩda? b) Zu-loe-bʋs la koe-moondb nins sẽn teend buud-gom-zẽng tigingã tara? Rẽ kɩtame tɩ d na n leok sogs-bʋse? (Ges-y fotã sẽn be yĩngrã.)
RŨNDÃ-RŨNDÃ, a Zeova Kaset rãmb tusa n yãk yam n na n maan modgr n paas tɩ koe-noogã ta “soolem fãa, buud fãa, goam buud fãa nebã, la tẽng fãa nebã,” tɩ pidsd Wẽnnaam Gomdã sẽn da pĩnd n togsã. (Vẽn. 14:6) Wala makre, kẽer zãmsda buud-gomd a to sẽn na yɩl n moon koɛɛgã n paase. Yãmb me zãmsda buud-gomd rẽ yĩng bɩ? Sãnda yaa misioneer-dãmba, wall b tɩ sõngda koe-moondb sẽn pa waooge. Kẽer be b tẽngẽ, la b teenda tiging sẽn gomd buud-gom-zẽnga.
2 La d sẽn yaa a Zeova nin-buiidã, yaa tõnd ne d zakã rãmb tẽeb na tall pãngã n segd n pak-d n yɩɩda. (Mat. 5:3, MN) Wakat ninga, d tʋʋmã sẽn waoogã kɩtame tɩ yaa toog tɩ ned fãa paam weer n zãms Biiblã sõma, tɩ sɩd sõng-a. Rẽ toor sẽn ka be, d tẽed-n-taas nins sẽn tɩ teend tigims sẽn gomd buud-gomd a to wã maooda ne zu-loees a taaba.
3 Koe-moond sã n tɩ sõngd tiging sẽn gomd buud-gom-zẽnga, buudã gomd zãmsg sẽn yãk a toogo, rẽnda a modg me n wʋmd Wẽnnaam Gomdã yel-zulumsã sõma tɩ kẽed-a. (1 Kor. 2:10) La a sã n pa wʋmd tigingã buud-gomdã sõma, a maanda wãna? Sã n yaa zak rãmba, bõe yĩng tɩ roagdbã segd n mao tɩ Wẽnnaam goamã kẽed b kambã sũyã?
D GŨUS TƖ D TẼEBÃ RA BOOG YE
4. Bõe n tõe n koms ned tẽebo? Biiblã kiba-bʋg n wilgd rẽ?
4 Ned sã n pa wʋmd buud-gomd sõma, n yaool n kelgd Wẽnnaam goamã buud-gom-kãng pʋgẽ, a pa tõe n wʋm a võor sõma ye. Rẽ tõe n komsa a tẽebã. A Neemi sẽn wa n leb Zerizalɛm n tɩ mik tɩ zʋɩf-rãmb kẽer kamb pa gomd ebre wã, a sũur sãamame. (Karm-y Neemi 13:23, 24.) Kom-kãensã sẽn da pa wʋmd buud-gomdã kɩtame tɩ b ra ka wʋmd Gʋlsg sõamyã võor ye. B ra lebga wa bu-zẽms neba, n da pa tar zood sõma ne a Zeova ye.—Nee. 8:2, 8.
5, 6. Kiris-neb kẽer ne b zak rãmb sẽn teend buud-gom-zẽng tiging paama zu-loe-bʋgo, la bõe yĩnga?
5 Kiris-neb kẽer ne b zak rãmb sẽn tɩ sõngd tiging sẽn gomd buud-gom-zẽng wa n mikame tɩ b kambã tẽeb boogdame. B kambã sẽn pa wʋmd bũmb ning b sẽn yet tigissã zĩigẽ sõma wã, pa kẽed-b tɩ sek b na tũ ye. Amerikdisiid rao a ye yʋʋr sẽn boond t’a Pedro [1] yika ne a zak rãmb n kẽng Ostrali. A yeelame tɩ Wẽnnaam tũubã wɛɛngẽ, yaa tɩlɛ tɩ d wʋm a goamã võor sõma tɩ kẽ-do, hal tɩ d rat ne d sũur fãa n tũ.—Luk 24:32.
6 D sã n karemd Wẽnnaam goamã ne buud-gom-zẽnga, tõeeme n pa kẽ-d sõma wa sẽn da na n yaa d buudã gomd ye. Sẽn paase, d sẽn pa tõe n sõs ne nebã buudã gomd pʋgẽ wã tõe n komsa d raoodo, t’a Zeova tũub pa le noom-d woto ye. Dẽnd ned sã n teend buud-gom-zẽng tiginga, a segd n maoome n da koms raoodo, la a mao me t’a tẽebã ra boog ye.—Mat. 4:4.
NEB SẼN TÕOG TƖ B TẼEBÃ PA BOOGE
7. Bõe la Babilon nebã maan-yã, n da rat t’a Dãniyɛll tũ bãmb minimdã la b wẽnnaam-dãmbã?
7 A Dãniyɛll ne a tũud-n-taasã sẽn wa n tɩ be yembdã, Babilon nebã baoome n na n modg-b tɩ b tũ bãmb minimdã la b wẽnnaam-dãmbã. B zãms-b-la ‘Kalde rãmbã buud goamã,’ la b pʋd-b yʋy Babilon buud-goamã pʋgẽ. (Dãn. 1:3-7) B pʋda a Dãniyɛll t’a Bɛlsatzaare, t’a Bɛll yaool n yaa Babilon wẽnnaam ning b sẽn teeg n yɩɩdã. Rẽnd tõe tɩ naab a Nebukadnezaar da ratame t’a Dãniyɛll tẽ tɩ bãmb wẽnnaamã pãng yɩɩda a Dãniyɛll Wẽnnaam a Zeova.—Dãn. 4:5.
8. Bõe n sõng a Dãniyɛll t’a tẽebã pa booge, baa ne a sẽn da be tẽn-zẽngã?
8 B ra kõta a Dãniyɛll rɩ-nood nins rĩmã sẽn dɩtã. La a Dãniyɛll “yãka yam t’a ka na n dɩ rĩmã rɩɩbã,” n wa ‘rẽgem a meng ye.’ (Dãn. 1:8) A tẽebã pa tol n booge, bala a ra ket n karemda “Gʋlsg Sõamyã” sẽn da yaa ne ebre wã. (Dãn. 9:2, Wẽnnaam sebre, 1983) Baa na maan yʋʋm 70 poore, b ra ket n boond-a-la ne a yʋʋr ning sẽn yaa ne ebre wã.—Dãn. 5:13.
9. Wãn to la Wẽnnaam Gomdã sõng Yɩɩn-sõamyã 119 gʋlsdã?
9 Wẽnnaam Gomdã sõnga Yɩɩn-sõamyã 119 gʋlsdã me. Na-yirã neb n da gomd-a wẽnga, tɩ Wẽnnaam Gomdã sõng-a t’a tall raood n kell n yɩ toore. (Yɩɩn. 119:23, 61) A bʋgsa Wẽnnaam goamã zug tɩ kẽ a sũurã sõma.—Karm-y Yɩɩn-sõamyã 119:11, 46.
MAO-Y TƖ Y TẼEBÃ KELL N TALL PÃNGA
10, 11. a) D sã n wa zãmsd Biiblã, togame tɩ d raabã yɩ bõe? b) Yɩta sõma tɩ d maan bõe? Rɩk-y makre.
10 Tigingã tʋʋmã ne d nug-tʋʋmdã tõe n dɩkda sẽk wʋsgo, la togame tɩ d yãt sẽk me n zãmsd Biiblã d yembr la ne d zakã rãmba. (Efɛ. 5:15, 16) D raabã pa d we n tõog n karem d sɛbã wʋsgo, bɩ n tõog n leokd sõma tigissã sasa ye. D sẽn dat yaa d tõog tɩ Wẽnnaam goamã kẽ d sũurã sõma, tɩ d tẽebã tall pãnga.
11 Woto yĩnga, d sã n wa zãmsd Biiblã, yɩta sõma tɩ d tags n ges bũmb ning d sẽn zãmsdã sẽn tõe n naf tõnd mengã to-to, la d ra bas n tagsd bõn-kãens sẽn na n naf d taabã to-to wã bal ye. (Fili. 1:9, 10) Naoor wʋsgo, d sã n segend bũmb d sẽn na n yeel koe-moonegã sasa, pa rẽ bɩ tigissã sasa, wall d sẽn na n togs sõsg d sẽn na n wɛgs pʋgẽ, yaa d kɛlgdbã yell la d tagsd n yɩɩda. D rɩk makr ne ned sẽn segend rɩɩb n koosdẽ. Yaa sɩd t’a na n mi n lembame. La rẽ yĩnga, a tõe n teega lembgã n vɩɩmd sɩda? A sã n dat n kell n tall keelem, rẽnda yẽ mengã rɩt sõma. Woto wilgdame tɩ tõnd me sã n dat tɩ d tẽebã tall pãnga, yaa tɩlɛ tɩ d zãmsd Biiblã tɩ kẽed-d sõma.
12, 13. Bõe yĩng tɩ neb wʋsg tagsdẽ tɩ b sã n zãmsd Biiblã b mengã buud-gomd pʋgẽ la nafd-b n yɩɩda?
12 Wʋsg sẽn yãk yam n teend buud-gom-zẽng tiging mikame tɩ b sã n zãmsd Biiblã b mengã buud-gomdã pʋgẽ, sõngd-b-la wʋsgo. (Tʋʋ. 2:8) Baa misioneer-dãmbã sẽn be tẽn-zẽmsã sak n deegame tɩ b sã n dat tɩ b tẽebã kell n tall pãnga, b pa tõe n teeg b sẽn wʋmd tigissã sasa wã bal ye.
13 A Alẽ yaa koe-moond sẽn zãmsd Pɛrs buud-gomdã hal na maan yʋʋm a nii. Ad a sẽn yeele: “M sã n wa segend tigissã, yaa buud-gomdã zãmsg n pak-m n yɩɩda. Sẽn paad-m zugẽ yaa goamã sẽn wʋg to-to wã. Kɩtame tɩ goam nins m sẽn karemdã pa kẽed m sũur sõma ye. Rẽ n so tɩ m baood sẽk n zãmsd Biiblã la siglgã sɛbã m mengã buud-gomdã pʋgẽ.”
MODG-Y TƖ WẼNNAAM GOAMÃ KẼ Y KAMBÃ SŨYÃ
14. Zak rãmb sã n teend buud-gom-zẽng tiginga, bõe la roagdbã segd n modg n maane, la bõe yĩnga?
14 Kiris-neb sẽn tar kamb sã n sõngd buud-gom-zẽng tiginga, b segd n modgame me tɩ Wẽnnaam goamã kẽed b kambã sũyã. A Sɛrz ne a zakã rãmb tɩ zĩnda buud-gom-zẽng tigingẽ n maan yʋʋm a tã. Yẽ ne a pag a Miriyɛll wa n mikame tɩ b bi-riblã sẽn da tar yʋʋm 17 wã pa le nong koɛɛgã mooneg la tigissã kẽnd ye. A Miriyɛll yeelame: “Koe-moonegã buud-gom-zẽng pʋgẽ wã ra pa noom-a ye. A yaool n da nonga koɛɛgã mooneg ne farendã sẽn yaa a buud-gomdã.” A Sɛrz paasame: “Tõnd sẽn wa n mik tɩ d biigã pa le wɩngd ne tũudmã yɛlã, d yãka yam n na n leb d pĩnd tigingẽ wã.”
Modg-y tɩ Wẽnnaam goamã kẽ y kambã sũyã (Ges-y sull 14, 15)
15. a) Wilg-y bũmb kẽer sẽn tõe n sõng roagdb tɩ b bãng b sã n segd n toeema tiginga? b) Sagl-bʋs la b kõ roagdbã Tõod 6:5-7 pʋgẽ?
15 Bõe n tõe n sõng roagdb tɩ b bãng b sã n segd n leba tigingẽ b sẽn gomd buud-gomd b kambã sẽn wʋmd sõma? Pipi, b sok b mens n ges b sã n paamda sẽk la pãng n tõogd n sõngd b kambã sẽn na yɩl tɩ b nong a Zeova, la b yãt sẽk me n sõngd-b tɩ b zãmsd buud-gomdã. Yɩɩb-n-soaba, b gũus n ges koɛɛgã mooneg la tigissã kẽnd sã n ket n nooma b kambã, la b sã n sɩd ket n dat n teela buud-gom-zẽng tigingã. Woto fãa tõe n sõnga roagdbã tɩ b bãng b sã n na n yãka yam n leb tigingẽ b sẽn gomd buud-gomd b kambã sẽn wʋmd sõma. Rẽ, b kambã tẽeb sã n wa bɩ, b tõe n le tɩ sõnga tiging sẽn gomd buud-gom-zẽnga.—Karm-y Tõod 6:5-7.
16, 17. Bõe la roagdb kẽer sẽn teend buud-gom-zẽng tiging maan-yã, sẽn na yɩl n zãms b kambã a Zeova raabã?
16 Roagdb kẽer sẽn teend buud-gom-zẽng tiging maoodame n baood yam buud toor-toor n zãmsd b kambã a Zeova raabã b buud-gomdã pʋgẽ. A Sagl yaa rao sẽn tar kom-pugli a tã. Kãsmã tara yʋʋm 13, sẽn pʋgd-a wã 12, yaoã yʋʋm a 9. Yẽ ne a zakã rãmb yik n tɩ teenda koe-moondb sull sẽn gomd lingala. Ad a sẽn yeele: “Maam ne m pagã yãka yam n na n zãmsd d kambã Biiblã la d maand zak pʋgẽ Biibl zãmsgã d buud-gomdã pʋgẽ. La d mi n maanda reem ne lingala, la d zãmsd d sẽn tõe n yeel tigissã sasa bɩ koɛɛgã mooneg wakate, wall d sẽn tõe n pʋʋs ned to-to, sẽn na yɩl tɩ buudã gomd zãmsg tall yamleoog ne d kambã.”
Modg-y n zãms-y buud-gom-zẽngã sõma, la y mi n leok tigissã sasa (Ges-y sull 16, 17)
17 A Kevɩn tara kom-pugli a yiib sẽn tar yʋʋm a nii la yʋʋm a nu. Bãmb me tɩ sõngda tiging sẽn gomd buud-gom-zẽnga, la b kambã sẽn pa wʋmd tigingã buud-gomdã sõma wã, a maoodame n baood sẽk n zãmsd-b a Zeova raabã. A yeelame: “Maam ne m pagã zãmsda Biiblã ne biig fãa, la yaa ne farendã sẽn yaa b buud-gomdã. D yãka yam me n kẽnd tigsg a ye ne farend kiuug fãa. D modgdame tɩ d vakãas-rãmbã zems ne farend tigis-kãsenga, tɩ d kẽng ne d kambã.”
18. a) Y kambã sõngr wɛɛngẽ, wãn to la Rom-dãmb 15:1, 2 tõe n sõng-y tɩ y bãng n yãk yam-sõngo? b) Bõe me la roagdb kẽer yet rẽ wɛɛngẽ? (Ges-y vẽnegrã.)
18 Yaa zak fãa n yãkd b sẽn na n maaneg tɩ sõng kambã tɩ b nong a Zeova. [2] (Gal. 6:5) A Miriyɛll, pag ning yell d sẽn zoe n gomã yeelame tɩ baa yẽ ne a sɩdã sẽn da rat ne b sũy fãa n teel buud-gom-zẽng tigingã, b basa bãmb daabã, sẽn na yɩl n sõng b biigã t’a tẽebã bɩ. (Karm-y Rom-dãmb 15:1, 2.) A Sɛrz sã n tẽeg rẽ yelle, a neeme tɩ b yam-yãkrã yɩɩ sõma. A yeelame yaa: “Tõnd sẽn leb d pĩnd tigingẽ wã b sẽn gomd farendã, d biigã tẽebã le paama pãnga, t’a tar sũ-noogo. A wa n deega lisgu. Rũndã-rũndã, a yaa wakat fãa so-pakda. A magdame meng n na n tɩ sõng koe-moondb sull sẽn gomd buud-gom-zẽnga!”
BƖ Y KELL N MAO TƖ WẼNNAAM GOMDÃ KẼ Y SUYÃ
19, 20. Bõe la d tõe n maane, tɩ wilg tɩ d nonga Wẽnnaam goamã?
19 A Zeova sẽn nong ãdem-biisã yĩnga, a kɩtame tɩ Biiblã be ne buud-goam wʋsgo, tɩ neb buud fãa tõe n paam n “bãng sɩdã.” (1 Tɩm. 2:4) A miime tɩ sẽn na yɩl tɩ d tẽebã tall pãnga, bũmb sẽn sõngd n yɩɩd yaa d sẽn na n karemd Biiblã ne buud-gomd ning d sẽn wʋmd sõma wã.
20 Tõnd ned kam fãa segd n maoo a pãng tɛka, n zãmsd Biiblã sõma tɩ kẽed-a, baa a yɛlã sẽn yaa to-to. Bɩ d zãmsd Biiblã buud gomd ning d sẽn wʋmd sõma wã pʋgẽ n pa vaandẽ ye. Rẽ, tõnd mengã tẽebã, la d zakã rãmb tẽebã na n talla pãnga, tɩ wilg tɩ d sɩd nonga Wẽnnaam goamã.—Yɩɩn. 119:11.
