1-3. (a) Go sa šetšwe gore maemo a rena ke afe, ke’ng seo re swanetšego go se etiša pele? (b) Bao ba ithutago leleme le lefsa ba kopana le mathata afe, gona se se rotoša dipotšišo dife? (Bona seswantšho se se lego ka mo godimo.)

DIKETEKETE tša Dihlatse tša Jehofa lehono di tšea karolo ka mafolofolo go phethagatšeng pono yeo moapostola Johane a e bonego ya gore ditaba tše dibotse di bolelwe “go ditšhaba tšohle, meloko yohle, maleme ohle le batho bohle.” (Kut. 14:6) Na o yo mongwe wa bao ba ithutago leleme lešele? Na mohlomongwe o hlankela o le moromiwa goba o tlhokagalong nageng e šele, goba na o ya dibokeng tša phuthego ya leleme lešele nageng ya geno?

² Ka ge re le bahlanka ba Modimo, ka moka ga rena re swanetše go itlhokomela pele moyeng le go hlokomela malapa a rena. (Mat. 5:3) Eupša ka dinako tše dingwe re ka hwetša go le thata go ba le thuto e holago ya motho ka noši ka baka la go swarega ka dilo tše dintši. Eupša bao ba hlankelago tšhemong ya leleme lešele ba na le mathata a mangwe.

³ Go tlaleletša go ithuteng leleme le lefsa, bao ba hlankelago  tšhemong ya leleme lešele ba swanetše gore gape ba kgonthišetše gore ba dula ba iphepa ka dijo tše di tiilego tša moya. (1 Bakor. 2:10) Ba ka dira seo bjang ge e ba ba sa kwešiše leleme leo le bolelwago phuthegong yeo ba kopanelago go yona? Le gona ke ka baka la’ng batswadi ba Bakriste ba swanetše go kgonthišetša gore Lentšu la Modimo le fihlelela dipelo tša bana ba bona?

4. Ke’ng seo se ka fokodišago tumelo ya rena? Nea mohlala.

⁴ Go se kwešiše Lentšu la Modimo ka leleme lešele go ka dira gore re fokole tumelong. Lekgolong la bohlano la mengwaga B.C.E., Nehemia o ile a tshwenyega ge a bona gore bana ba bangwe gare ga Bajuda bao ba bego ba boile Babilona ba be ba sa kgone go bolela Seheberu. (Bala Nehemia 13:23, 24.) Ge e le gabotse, bana bao ba be ba fetoga batho bašele gare ga bahlanka ba Modimo ka gore ba be ba sa kwešiše gabotse seo se bolelwago ka Lentšung la Modimo.​—Neh. 8:2, 8.

5, 6. Batswadi bao ba hlankelago tšhemong ya leleme lešele ba lemogile eng, gona ka baka la’ng?

⁵ Batswadi ba Bakriste bao ba hlankelago tšhemong ya leleme lešele ba lemogile gore bana ba bona ga ba sa rata therešo. Ka ge bana bao ba be ba sa kwešiše seo se bego se rutwa dibokeng, ba be ba sa holege. Pedro ^[1] yo a hudugetšego Australia le lapa la gagwe a etšwa Amerika Borwa o re: “Ge re bolela ka dilo tša Modimo, re swanetše go kgomega pelo le maikwelo.”​—Luka 24:32.

⁶ Ge re bala kgatišo ka leleme lešele, dipelo tša rena di ka no se kgomege go swana le ge re e bala ka segagabo rena. Go oketša moo, go se kgone go bolela leleme lešele gabotse go ka re fetša matla le go fokodiša tumelo ya rena. Ka gona le ge re thabela go hlankela Jehofa nageng e šele, re swanetše go itlhokomela moyeng.​—Mat. 4:4.

7. Bababilona ba ile ba leka bjang go ruta Daniele setšo sa bona le bodumedi bja bona?

⁷ Ge Daniele le bagwera ba gagwe ba be ba le bothopša, Bababilona ba ile ba leka go ba dira gore ba latele setšo sa bona ka go ba ruta “leleme la Bakaladea.” Go feta moo, mohlankedi wa kgoro yo a bego a okametše thuto yeo o ile a ba nea maina a Sebabilona. (Dan. 1:3-7) Leina leo Daniele a bego a le filwe le be le šupa go Bel, e lego modimo yo mogolo wa Babilona. Go bonala Kgoši Nebukadinetsara a be a nyaka go bontšha Daniele gore Modimo wa gagwe Jehofa, o fetwa ke modimo wa Babilona.​—Dan. 4:8.

8. Daniele o thušitšwe ke’ng go dula a na le tswalano e botse le Jehofa le ge a be a le nageng e šele?

⁸ Le ge Daniele a ile a newa dijo tša maemo tša kgoši, o ile “a fetša le pelo ya gagwe” gore a ka se “itšhilafatše” ka tšona. (Dan. 1:8) Ka ge a be a ithuta ‘dipuku tše kgethwa’ ka segagabo, o ile a dula a na le tswalano e botse le Jehofa le ge a be a le nageng e šele. (Dan. 9:2) Ka baka leo, ka morago ga mengwaga e ka bago e 70 a le Babilona, o be a sa dutše a tsebja ka leina la gagwe la Seheberu.​—Dan. 5:13.

9. Go etša ge go bontšhitšwe go Psalme 119, Lentšu la Modimo le thušitše mongwadi wa psalme ye bjang?

⁹ Lentšu la Modimo le ile la thuša Mongwadi wa Psalme 119 gore a se swane le batho ba bangwe. O ile a swanelwa ke go kgotlelela go tlaišwa ke ba bangwe ba bahlankedi ba kgoro. (Ps. 119:23, 61) Lega go le bjalo, o ile a dumelela dipolelo tša Modimo di nwelela ka pelong ya gagwe.​—Bala Psalme 119:11, 46.

10, 11. (a) Morero wa rena e swanetše go ba ofe ge re ithuta Lentšu la Modimo? (b) Re ka dira seo bjang? Nea mohlala.

 ¹⁰ Le ge re ka ba re swaregile kudu ka mešomo ya ka phuthegong goba ka dilo tše dingwe, ka moka ga rena re swanetše go ba le nako ya thuto ya motho ka noši le ya borapedi bja lapa. (Baef. 5:15, 16) Eupša ga se ra swanela go no kgahlwa ke go bala goba go lokišeletša diboka. Re nyaka go kgonthišetša gore Lentšu la Modimo le re kgoma dipelo le go tiiša tumelo ya rena.

¹¹ E le gore re fihlelele seo, re swanetše go tseba gore ke neng moo re swanetšego go tshwenyega ka bomoya bja ba bangwe le bja rena. (Bafil. 1:9, 10) Re swanetše go lemoga gore ge re lokišetša go ya tšhemong, re lokišeletša diboka goba polelo, go ka direga gore re se diriše seo re se balago maphelong a rena. Mohlala šo: Le ge moapei a ekwa tatso ya dijo pele a di fa batho, a ka se khorišwe ke go no di latswa. Ge e ba a nyaka go dula a phetše gabotse, o swanetše go ikapeela dijo tše di nago le phepo gomme a di je. Ka mo go swanago, re swanetše go fepa dipelo tša rena ka dijo tša moya tšeo di tiišago tswalano ya rena le Jehofa.

12, 13. Ke ka baka la’ng batho ba bantši bao ba lego tšhemong ya leleme lešele ba hwetša e le mo go holago go dula ba ithuta ka segagabo bona?

¹² Ba bantši ba bao ba hlankelago tšhemong ya leleme lešele ba hotšwe ke go ithuta Beibele ka mehla ka ‘leleme la gabo bona leo ba tswaletšwego go lona.’ (Dit. 2:8) Gaešita le baromiwa ba a dumela gore e le gore ba kgotlelele kabelong ya bona, ba swanetše go iphepa moyeng, e sego go no ithekga ka seo ba ithutago sona dibokeng.

¹³ Alain, yo a nago le mengwaga e seswai a ithuta Seperesia, o dumela ka gore: “Ge ke  lokišetša diboka ka Seperesia, ke tshwenyega kudu ka go ithuta leleme leo. Ka ge monagano o tla be o swaregile ka go ithuta Seperesia, pelo ya ka ga e kgongwe ke seo ke bago ke ithuta sona. Ke ka baka leo ke ipeetšego nako ka thoko ya go ithuta Beibele le dikgatišo tše dingwe ka segagešo.”

14. Batswadi ba swanetše go kgonthišetša eng, gona ka baka la’ng?

¹⁴ Batswadi ba Bakriste ba swanetše go kgonthišetša gore Lentšu la Modimo le kgoma dipelo le menagano ya bana ba bona ganyenyane-ganyenyane. Ka morago ga gore Serge le mosadi wa gagwe e lego Muriel ba hlankele tšhemong ya leleme lešele ka mengwaga e fetago e meraro, ba ile ba lemoga gore morwa wa bona wa mengwaga e 17 ga a sa rata dilo tša Modimo. Muriel o re: “O be a tenwa ke go šoma tšhemo ya leleme lešele, mola mathomong a be a rata go ya tšhemong ya leleme la gabo la Sefora.” Serge o hlalosa gore: “Ge re lemoga gore boemo bjo bo šitiša morwa wa rena go ba le tswalano e botse le Jehofa, re ile ra phetha ka go boela phuthegong ya Sefora.”

15. (a) Ke’ng seo se ka dirago gore batswadi ba boele phuthegong ya leleme leo bana ba bona ba le kwešišago? (b) Doiteronomio 6:5-7 e nea batswadi keletšo efe?

¹⁵ Ke’ng seo se ka dirago gore batswadi ba boele phuthegong ya leleme leo bana ba bona ba le kwešišago? Sa pele, ke ge ba lemoga gore ga ba na nako e lekanego le didirišwa tša go ruta bana ba bona go rata Jehofa ge ba dutše ba ba ruta leleme lešele. Sa bobedi, ke ge ba lemoga gore bana ba bona ga ba sa kgahlegela mediro ya ka phuthegong goba go šoma tšhemo ya leleme lešele. Maemong a bjalo, batswadi ba Bakriste ba ka nagana ka go boela phuthegong ya leleme leo bana ba bona ba le kwešišago go fihlela bana bao ba tiile therešong.​—Bala Doiteronomio 6:5-7.

16, 17. Batswadi ba bangwe ba kgonne bjang go ruta bana ba bona le ge ba le tšhemong ya leleme lešele?

¹⁶ Ka lehlakoreng le lengwe, batswadi ba bangwe ba hweditše ditsela tša go ruta bana ba bona ka segagabo bona ba dutše ba kopanela phuthegong ya leleme lešele goba sehlopheng sa leleme lešele. Charles, e lego tatago banenyana ba bararo ba mengwaga e 9 go ya go e 13, o kopanela le sehlopha sa Selingala. O re: “Re ile ra dira phetho ya go badiša bana ba rena le go swara borapedi bja lapa ka segagabo rena. Eupša re akaretša mananeo a go itlwaetša le dipapadi tša Beibele ka Selingala gore ba ithute leleme le ba dutše ba ipshina.”

¹⁷ Kevin, e lego tatago banenyana ba babedi ba mengwaga e mehlano le e seswai, o na le leano la go fepa lapa la gagwe moyeng ka ge ba se ba hlwa ba kwešiša dilo tše itšego dibokeng. O re: “Nna le mosadi wa ka re ithuta le banenyana ba rena ka Sefora e lego segagabo rena. E bile re ipeetše pakane ya go ya dibokeng tša Sefora gatee ka kgwedi, e bile ge re le maikhutšong re ya dikopanong tša selete tša segagabo rena.”

18. (a) Ke molao ofe wa motheo wo o lego go Baroma 15:1, 2 woo o ka go thušago go lemoga seo se ka holago bana ba gago moyeng? (b) Batswadi ba bangwe ba neile ditšhišinyo dife? (Bona tlhaloso.)

¹⁸ Ke therešo gore lapa le lengwe le le lengwe le swanetše go bona gore ke eng seo se ka thušago bana go tia tumelong. ^[2](Bagal. 6:5) Muriel, yo go boletšwego ka yena pejana, o dumela gore yena le monna wa gagwe ba ile ba swanelwa ke go gafa dilo tše itšego gore ngwana wa bona a holege moyeng. (Bala Baroma 15:1, 2.) Ge Serge a lebelela morago, o bona ba dirile phetho e botse. O re: “Ga e sa le re boela phuthegong ya Sefora, morwa wa rena o ile a tšwela pele gabotse ka phuthegong  gomme a kolobetšwa. Ga bjale ke mmulamadibogo wa ka mehla. E bile o nagana go boela sehlopheng sela sa leleme lešele!”

19, 20. Re ka bontšha bjang gore re rata Lentšu la Modimo?

¹⁹ Ka ge Jehofa a re rata, o dirile gore Lentšu la gagwe e lego Beibele, le hwetšagale ka maleme a makgolokgolo e le gore “mehuta yohle ya batho e fihle tsebong e nepagetšego ya therešo.” (1 Tim. 2:4) Jehofa o a tseba gore batho ba ka kgona go ba le tswalano e botse le yena ge ba bala dikgopolo tša Gagwe ka segagabo bona.

²⁰ Lega go le bjalo, go sa šetšwe gore maemo a rena ke afe, re swanetše go katanela go iphepa ka dijo tša moya tše di tiilego. Ge re ka dula re bala Mangwalo ka segagabo rena, rena le malapa a rena re tla ba le tswalano e botse le Jehofa e bile re tla bontšha gore re rata dipolelo tša Modimo.​—Ps. 119:11.