Sẹrorẹ Onyerẹnkugbe ọnọ rhẹ i Jehova ọke wa ga uvuẹn Ẹkwotọre Ọrọrọ
‘Mi sẹrorẹ ẹmro enọ rhẹ uvuẹn ọmudu mẹ.’—PS. 119:11.
IJORO: 142, 92
1-3. (a) Erhirhiẹ ọwan ọrhọ tobọ gbanhon dede, me yẹ ọwan ina ha karo? (b) Ebẹnbẹn ego yẹ ihworho re yono edjadjẹ ọkpokpọ a dẹrughwaroghwẹ, enọ ego ya na kpahenrhọ? (Mẹrẹn ifoto rọ ha uvuẹn ọtonrhọ uyono na.)
ISERI Jehova buebun a ha aruẹmẹrẹn re ne ghwoghwo iyẹnrẹn esiri na ‘harẹn egbamwa na, uvwiẹ, edjadjẹ, kugbe ihworho ephian’ te orugba inyenana. (Rev. 14:6) Wu ha usuẹn ihworho re yono edjadjẹ ọkpokpọ? Wa ga ẹrhẹ imishọnari yanghene wa ga ekete ra mai guọlọ userhumu, gbinẹ wu ha uvuẹn ukoko ra djẹ edjadjẹ ọrọrọ uvuẹn ẹkwotọre ọnọ?
2 O fori nẹ idibo Osolobrugwẹ ephian i sẹrorẹ onyerẹnkugbe aye rhẹ i Jehova. (Matt. 5:3) Ọkezẹko, ọnọ sabu bẹn re ne ru uyono omobọ fọkiẹ owian ri bunrun ọwan obọ. Ọrẹn, ihworho ra ga uvuẹn ẹkwotọre ọrọrọ a dẹrughwaroghwẹ ebẹnbẹn erọrọ.
3 Haba edjadjẹ ọkpokpọ rẹ ihworho ra ga uvuẹn ẹkwotọre ọrọrọ ine yono, o fori nẹ aye i rha ha ekwakwa ukoko na o tiobọnẹ ruiruo vuọnvuọn. (1 Cor. 2:10) Orhianẹ aye e vwẹruọ edjadjẹ ra djẹ uvuẹn ukoko aye i havwọ na-a, marhẹ aye ine ru sabu ha ekwakwa na ruiruo vuọnvuọn? Mesoriẹ o fo nẹ emiọmọ i ha userhumu rẹn emọ aye sẹrorẹ onyerẹnkugbe aye rhẹ i Jehova?
OBORẸ ỌNỌ SABU LẸRHẸ ONYERẸNKUGBE ỌWAN RHẸ I JEHOVA SERIOTỌRE
4. Me yọ nọ sabu lẹrhẹ onyerẹnkugbe ọwan rhẹ i Jehova seriotọre? Dje udje yi.
4 Na sabu yono Ẹmro Osolobrugwẹ uvuẹn edjadjẹ re vwe vwẹruọ ye, ọnọ sabu lẹrhẹ onyerẹnkugbe ọwan rhẹ i Jehova seriotọre. Ọke ahwanren, ọ da i Nehemiah omamọ ọke rọ mẹrẹnvwrurhe taghene emọ i Jew ezẹko ri ghwẹrioma nẹ Babylon rhe, i vwa sabu djẹ i Hebre-ew. (Se Nehemiah 13:23, 24.) Onyerẹnkugbe emọ i Jew na rhẹ i Jehova o seriotọre nime, aye e vwẹruọ oborẹ a ya rhẹ Ẹmro Osolobrugwẹ-ẹ.—Neh. 8:2, 8.
5, 6. Me yẹ emiọmọ ra ga uvuẹn ẹkwotọre ọrọrọ i mẹrẹnvwrurhe, mesoriẹ?
5 Emiọmọ ezẹko ra ga uvuẹn ẹkwotọre ọrọrọ, i mẹrẹnvwrurhe taghene omamerhomẹ emọ aye i vwo kpahen urhomẹmro na no seriotọre. Nime emọ na i vwe vwẹruọ oborẹ a ta uvuẹn uyono na-a, ọ vwọ rhọ lẹrhẹ ẹmro na te ẹhẹn aye-e. “Arha tẹmro kpahen uyono Ẹmro Osolobrugwẹ, o sekpahen ọmudu ọrhẹ iroro na.” Omaran Pedro [1] rọ kwa nẹ South America riẹ Australia ọ tare.—Luke 24:32.
6 Ọwan erhe se ẹbe uvuẹn edjadjẹ ọrọrọ, o vwo te ẹhẹn ọwan jerẹ oborẹ ọ havwọ ọwan i rhe se ẹbe uvuẹn edjadjẹ ọwa-an. Habaye, obẹnbẹn ra na sabu djẹ edjadjẹ ihworho erọrọ ọnọ sabu lẹrhẹ ẹhẹn ọwan seriotọre. Omarana, no fori na sẹrorẹ onyerẹnkugbe ọwan rhẹ i Jehova uvuẹn ẹkwotọre rẹ ọwan a ga.—Matt. 4:4.
AYE I SẸRORẸ ONYERẸNKUGBE AYE RHẸ I JEHOVA
7. Marhẹ otu i Babylon i damoma nẹ aye i sabu yono i Daniel kpahen irueru ọrhẹ ẹga aye?
7 Ọke re mwu Daniel ọrhẹ igbehian yen riẹ abọ evrẹn, otu i Babylon i damoma rẹ aye ine yono aye irueru ọrhẹ ‘edjadjẹ i Chaldean.’ Habaye, ohworho ro yono aye, no mwu edẹ i Babylon harẹn aye. (Dan. 1:3-7) Odẹ re mwu rẹn Daniel re se Belteshazzar ọ rionbọrhọ ehọ otu i Babylon re se Bel. Orodje Nebuchadnezzar ọ guọlọre nẹ i Daniel o roro taghene i Jehova o riotọre ghwẹ isolobrugwẹ i Babylon.—Dan. 4:8.
8. Me yọ ha userhumu rẹn i Daniel sẹrorẹ onyerẹnkugbe ọnẹyen rhẹ i Jehova uvuẹn ẹkwotọre ọrọrọ?
8 Dedevwo a yẹ i Daniel emaren Orodje na, o ‘brorhiẹn uvuẹn ọmudu ọnẹyen taghene ọye o ‘gbe omayen aghwa-a.’ (Dan. 1:8) Nime Daniel o yono ‘ẹbe ọfuanfon na’ uvuẹn edjadjẹ ọnẹyen, nọ sa riẹ erhumu sẹrorẹ onyerẹnkugbe ọnẹyen rhẹ i Jehova uvuẹn ẹkwotọre ọrọrọ. (Dan. 9:2, ftn.) Dedevwo o nyerẹn ẹgbukpe 70 uvuẹn i Babylon, e ji se yi Daniel ro rhiẹ odẹ i Hebrew.—Dan. 5:13.
9. Marhẹ Ẹmro Osolobrugwẹ o ru hobọte akpenyerẹn ohworho rọ ya i Psalm 119?
9 Ohworho rọ ya i Psalm 119, ọ mẹrẹnvwrurhe taghene erhe se Ẹmro Osolobrugwẹ, ọnọ sa ọwan erhumu vẹnẹ ihworho erọrọ. Ọye ọ dẹrughwaroghwu ihworho ra ha ye djechẹẹ. (Ps. 119:23, 61) Ọrẹn, ọ ha uphẹn rẹn Ẹmro Osolobrugwẹ nọ hobọte akpenyerẹn yen.—Se Psalm 119:11, 46.
SẸRORẸ ONYERẸNKUGBE ỌNỌ RHẸ I JEHOVA
10, 11. (a) Me yẹ ọwan ine firhọ ẹhẹn, erhe yono Ẹmro Osolobrugwẹ? (b) Marhẹ ọwan ine ru sabu nyamwu ẹkẹ ọwan? Dje udje yi.
10 Dedevwo ọwan i vwo ekwakwa buebun re ruẹ uvuẹn ukoko na ọrhẹ ewian erọrọ, o fori nẹ ọwan i kwaphiẹ ọke rhọ re ne ru uyono omobọ ọrhẹ ogame ekrun. (Eph. 5:15, 16) Ọrẹn, orhiẹ ọrẹ ọwan ina ghwai se ẹbe na hin ukwọgbọ-ọ, yanghene mwuegbe enọ ra na kpahenrhọ uvuẹn uyono ọvo-o. Ọwan i damoma na ha uphẹn rẹn Ẹmro Osolobrugwẹ, nọ hobọte akpenyerẹn ọwan jeghwai bọn esegburhomẹmro ọwan gbanhon.
11 Na sabu nyamwu ẹkẹ ọrana, o fori ne roro kpahen edamẹ ọwan ọrhẹ erẹ awọrọ, ọke ọwan e yono Ẹmro Osolobrugwẹ. (Phil. 1:9, 10) Ọwan ina vi mẹrẹnvwrurhe taghene ọke ọwan e mwuegbe ẹmro eghwoghwo, uyono, yanghene ẹmro rẹ ọwan ina haphia, orhiẹ ọke ephian yo no sekpahen ọwan ọvo-o. Jerẹ udje: Dedevwo ohworho ro sere emaren ọ damu emaren na vwẹre ọ ki ghaliẹ, emaren rọ damurun na ọ sabu vuọn yen evwa-an. Ọrhọ guọlọ sẹrorẹ oma ọkpokpọ ye, ọnọ re omamọ emaren. Omaran ọ ji havwọ, o fori nẹ owuowọnwan ọ ha ekwakwa ukoko na o tiobọnẹ ruiruo.
12, 13. Mesoriẹ ihworho buebun ra ga uvuẹn ẹkwotọre ọrọrọ a mẹrẹn erere ọke aye e se ẹbe ukoko na uvuẹn edjadjẹ aye?
12 Ihworho buebun ra ga uvuẹn ẹkwotọre ọrọrọ a mẹrẹn erere, aye e rhe yono i Baibol na uvuẹn ‘edjadjẹ’ aye. (Acts 2:8) Imishọnari buebun i mẹrẹnvwrurhe taghene nẹ aye i sabu sẹrorẹ onyerẹnkugbe aye rhẹ i Jehova, aye i hẹroso ẹmro aye e rhon uvuẹn uyono ukoko ọvo-o.
13 Alain, ro yono edjadjẹ i Persia uvwre ẹgbukpe ẹrẹnren, nọ tare: “Ọke mie mwuegbe uyono ukoko na uvuẹn edjadjẹ i Persia, mia tẹnrovi edjadjẹ na ọvo. Ra mẹriẹn taghene mie roro kpahen edjadjẹ na ọvo na, mi vwa rha dabu vwẹruọ ẹbe mie se na-a. Ọnana yọ soriẹ mia kwaphiẹ ọke rhotọre ni mi sabu yono i Baibol na ọrhẹ ẹbe erọrọ uvuẹn edjadjẹ mẹ.”
YONO EMỌ ENỌ NO TE AYE ẸHẸN
14. Me yo fori nẹ emiọmọ i ru, mesoriẹ?
14 O fori nẹ emiọmọ i yono emọ aye Ẹmro Osolobrugwẹ uvuẹn izede ro no te ẹhẹn aye. Ọke omizu Serge ọrhẹ aniẹ Muriel a ga uvuẹn ẹkwotọre ọrọrọ te ẹgbukpe esa, aye ni mẹrẹnvwrurhe taghene ọmọ aye ọhworhare ro te ẹgbukpe 17 orho vwo ẹguọlọ kpahen ẹkwaphiẹrhotọre ukoko na-a. “Vẹrhẹ bi, oma ọ merhen ọmọ ame ro no ghwoghwo rhẹ i French ro rhiẹ edjadjẹ ame, ọrẹn evwan e biomie ro no ghwoghwo rhẹ edjadjẹ ọrọrọ,” omaran i Muriel ọ tare. Serge nọ ji habaye: “Ọke ame a mẹrẹnvwrurhe taghene erhirhiẹ ọnana ọ vwọ lẹrhẹ ọmọ ame ruẹ riaro-o, ame ni ghwẹrioma riẹ ukoko ra djẹ i French rẹ ame i havwọ bi.”
Damoma ne wu yono emọ enọ uvuẹn izede ro no te aye ẹhẹn (Mẹrẹn idjaghwẹ 14, 15)
15. (a) Me yọ nọ sabu lẹrhẹ emiọmọ ghwẹrioma riẹ ukoko ra djẹ edjadjẹ rẹ emọ aye e vwẹruọ ye? (b) Urhebro ọgo yẹ Deuteronomy 6:5-7 ọ harẹn emiọmọ?
15 Me yọ nọ sabu lẹrhẹ emiọmọ ghwẹrioma riẹ ukoko ra djẹ edjadjẹ rẹ emọ aye e vwẹruọ ye? Ọrukaro, o fori nẹ emiọmọ i rhe sẹ aye ina sabu vwo ọke rẹ aye ine yono emọ aye, nẹ aye i vwo ẹguọlọ kpahen i Jehova jeghwai yono aye edjadjẹ ọrọrọ. Ọreva, aye ina sabu mẹrẹnvwrurhe taghene emọ aye i vwe rhe vwo omamerhomẹ kpahen ẹkwaphiẹrhotọre ukoko na uvuẹn ẹkwotọre aye i havwọ na-a. Uvuẹn erhirhiẹ ọrana, emiọmọ ina sabu djẹ iroro rẹ aye ina ghwẹrioma riẹ ukoko ra djẹ edjadjẹ rẹ emọ aye e vwẹruọ ye, neneyo emọ aye i sabu mevigbanhon uvuẹn ukoko na.—Se Deuteronomy 6:5-7.
16, 17. Marhẹ emiọmọ ezẹko i ru sabu yono emọ aye nẹ aye i sẹrorẹ onyerẹnkugbe aye rhẹ i Jehova uvuẹn ẹkwotọre ọrọrọ?
16 Emiọmọ ezẹko i sabu gbẹn izede rẹ aye ine yono emọ aye edjadjẹ aye, dedevwo aye riẹ uyono ra djẹ edjadjẹ ọrọrọ. Charles ro vwiẹ egbọtọ esa ri ha uvwre ẹgbukpe 9 fiẹ 13, rọ ha uvuẹn ukoko ra djẹ i Lingala, nọ tare: “Ame i brorhiẹn rẹ ame ine ru ogame ekrun uvuẹn edjadjẹ ame. Ọrẹn, ame e ruiruẹn jeghwai ru udje ẹhaphia uvuẹn edjadjẹ Lingala, neneyo emọ amẹ i sabu yono edjadjẹ na.”
Damoma ne wu yono edjadjẹ ẹkwotọre re wu havwọ na, jeghwai kpahenrhọ enọ uvuẹn uyono (Mẹrẹn idjaghwẹ 16, 17)
17 Kevin ro vwiẹ egbọtọ eva ri ha uvwre ẹgbukpe isiorin ọrhẹ ẹrẹnren, ọ damoma yono emọ na nime aye i vwa dabu rhon edjadjẹ na-a. Nọ tare: “Mẹmẹ ọrhẹ ane mẹ, i vwo ẹkwaphiẹrhotọre rẹ ame e lele emọ ame ru uyono i Baibol kugbe uvuẹn French ro rhiẹ edjadjẹ ame. Ame i ji vwo ẹkwaphiẹrhotọre rẹ ame e riẹ ukoko ra djẹ French ukwọgbọ ubiamo, ame a ji ha ọke omeronmo ame riẹ emẹvwa ra djẹ i French.”
18. (a) Marhẹ uruemru-urhi rọ ha uvuẹn Romans 15:1, 2 ono ru ha userhumu wẹn brorhiẹn oborẹ ọnọ rhua erere vwe emọ enọ? (b) Iroro ego yẹ emiọmọ erọrọ i haphia? (Se iyẹnrẹn ra habaye.)
18 Itiọrurhomẹmro, ekrun owuowu yo no brorhiẹn oborẹ ọnọ mai rhua erere harẹn emọ aye. [2] (Gal. 6:5) Muriel ra hunute bi na, nọ tare taghene ọye ọrhẹ esa ye i gbobọhiẹn oborẹ aye i guọlọre, neneyo ọmọ aye ọ sabu sẹrorẹ onyerẹnkugbe ọnẹyen rhẹ i Jehova. (Se Romans 15:1, 2.) Habaye, Serge ọ mẹrẹnvwrurhe taghene aye i brorhiẹn ro serhọ. Nọ ji ta: “Nẹ ọke ame a ghwẹrioma riẹ ukoko ra djẹ i French, ọmọ ame no ru riaro jeghwai bromarhame. Vwarana, ọ ga uvuẹn ẹrhẹ ọkobaro ọke ephian. Ọ tobọ djẹ iroro rọ nọ yọ ga uvuẹn ukoko ra djẹ edjadjẹ ọrọrọ!”
JENẸ ẸMRO OSOLOBRUGWẸ Ọ HOBỌTE ỌMUDU ỌNỌ
19, 20. Marhẹ ọwan ine ru djephia taghene ọwan i vwo ẹguọlọ kpahen Ẹmro Osolobrugwẹ?
19 Nime i Jehova o vwo ẹguọlọ kpahen ọwan, nọ yẹrẹ ọwan i Baibol na uvuẹn edjadjẹ buebun, neneyo ‘aruo ihworho ephian . . . i vwo irherhe ọgbagba ọrẹ urhomẹmro na.’ (1 Tim. 2:4) Osolobrugwẹ o rheri taghene ituakpọ ina sabu rhe kpahiẹn rhọ, aye e rhe se i Baibol na uvuẹn edjadjẹ aye.
20 Erhirhiẹ ọwan ọrhọ tobọ gbanhon dede, o fori nẹ ọwan i damoma ha ekwakwa ukoko na o tiobọnẹ ruiruo. Erhe yono i Baibol na uvuẹn edjadjẹ ọwan, ọnọ sa ọwan erhumu sẹrorẹ onyerẹnkugbe ọwan rhẹ i Jehova, jeghwai lẹrhẹ ọwan djephia taghene ọwan i sẹrorẹ Ẹmro Osolobrugwẹ rhẹ uvuẹn ọmudu ọwan.—Ps. 119:11.
