1-3. (a) Dahme kitail en mwohneki mahs ahnsou koaros? (b) Soangen kahpwal dah kan me lelohng irail kan me kin sukusukuhlki ehu lokaia tohrohr, oh peidek dah kan kin pwarada? (Menlau kilang tepin kilel.)

 RAHNWET, Sounkadehdehn Siohwa tohto kin soupisengkihla arail sewese kapwaiada kokohpo en kalohk ong “tohn sampah kan, wehi koaros, kadaudok koaros, lokaia koaros, oh sahpw koaros.” (Kaud. 14:6) Ke iang irail kan me kin sukusukuhlki ehu lokaia tohrohr? Ekei kin papah nin duwen misineri kan de re kin kalohk nan sahpw teikan me anahn laud mie ong sounkalohk. Ekei tepidahr iang mihting kan nan mwomwohdiso ehu me mi nan sapwarailo ahpw kin doadoahngki ehu lokaia tohrohr.

² Sapwellimen Koht ladu kan koaros anahne mwohneki mahs nanpwungmwahu me pein irail oh arail peneinei ahneki rehn Siohwa. (Mad. 5:3) Ahpw ekei pak, ele kitail kin nohnla kedirepw me kahrehda e apwal en wia pein atail onop me uhdahn pahn sewese kitail. Ahpw irail kan me kin iang mwomwohdiso me kin doadoahngki ehu lokaia tohrohr pil ahneki kahpwal teikan.

³ Irail kan me kin iang mwomwohdiso me kin doadoahngki ehu lokaia  tohrohr anahne sukuhlki lokaiao, ahpw irail pil anahne tehk mwahu me re kin kaukaule onopki soahng rir kan duwen Koht. (1 Kor. 2:10) Ia duwen arail kak wia met ma re sohte uhdahn wehwehki padahk kan de dahme meteikan ndinda nan mwomwohdiso? Oh dahme kahrehda pahpa nohno Kristian kan me kin papah nan soangen mwomwohdiso pwukat anahne tehk mwahu me padahk mehlelo kin sair mohngiong en neirail seri kan?

4. Dahme kak kahrehda atail nanpwungmwahu rehn Siohwa en mihla nan keper? Menlau kihda ehu karasaras.

⁴ Ni ahnsou me kitail sohte kak wehwehki padahk kan en Paipel ni ehu lokaia tohrohr, met kak wia keper laud ehu ong atail nanpwungmwahu rehn Siohwa. Ni Nehmaia eh pwurala Serusalem, e tehkada me ekei seri ko sohte kak lokaiahki lokaiahn Ipru. (Wadek Nehmaia 13:23, 24.) Pwehki seri ko arail sohte kak wehwehki Mahsen en Koht, arail nanpwungmwahu rehn Siohwa oh pil rehn sapwellime aramas akan luwetalahr.​—Neh. 8:2, 8.

5, 6. Dahme ekei pahpa nohno kan me kin papah nan mwomwohdiso me kin doadoahngki ehu lokaia tohrohr tehkada, oh kahpwal dahieu mwo?

⁵ Ekei pahpa nohno Kristian kan me kin papah nan mwomwohdiso me kin doadoahngki ehu lokaia tohrohr kin tehkada me nanpwungmwahu me neirail seri ko ahneki rehn Siohwa luwetalahr. Pwehki neirail seri ko sohte uhdahn wehwehki padahk kan me kin wiawi nan mihting ko, dahme re rong sohte kin kamwakid irail. Pedro, ^[1] me ih oh eh peneineio keseula Australia sang Palieir en Amerika, nda: “Ni omw kin koasoia duwen padahk mehlel kan en Paipel, omw mohngiong oh pepehm anahne mwekidkihda.”​—Luk 24:32.

⁶ Ni atail kin wadek mehkot ni ehu lokaia tohrohr, ele kitail sohte pahn uhdahn mwekidki duwehte ma kitail wadek ni pein atail lokaia. Pil ehu, pwehki e apwal en koasoiong meteikan ni ehu lokaia tohrohr, kitail kak uhdahn pwangada oh e kak kauwe atail kaudokiong Siohwa. Eri nindoken atail kolokol atail ineng en papah nan mwomwohdiso me kin doadoahngki ehu lokaia tohrohr, kitail pil anahne pere atail nanpwungmwahu rehn Siohwa.​—Mad. 4:4.

7. Ia duwen mehn Papilon ko song en idingkihong Daniel en alehda arail tiahk kan oh arail pelien lamalam?

⁷ Ni ahnsou me Daniel oh ienge ko kalipilipala Papilon, mehn Papilon ko song en idingkihong irail en alehda arail tiahk kan oh arail pelien lamalam. Ia duwen? Re kasukuhliong irail “mahsen en Papilonia” oh kihong irail ahd kan en sahpwo. (Dan. 1:3-7) Ahd kapwo me Daniel alehdi kin dokedoke Pel, eden kohto me mehn Papilon ko kin keieu kaudokiong. Eri Nanmwarki Nepukadnesar kakete men Daniel en kamehlele me koht en Papilono kehlail sang ahn Daniel Kohto, Siohwa.​—Dan. 4:8.

8. Ia duwen Daniel eh kolokol eh nanpwungmwahu rehn Siohwa en kehlail?

⁸ Nan Papilon, nanmwarkio pil men Daniel en iang tungoale kene mwenge iou kan. Ahpw Daniel “koasoanedier nan eh mohngiong” me e sohte pahn sapeikiong sapwellimen Koht kosonned. (Dan. 1:8, NW) Pwehki e kin onohnopkihte “pwuhk sarawi kan” me mi ni lokaiahn Ipru, e kolokolte eh nanpwungmwahu rehn Siohwa en kehlail nindoken eh koukousoan nan ehu sahpw tohrohr. (Dan. 9:2) Mpen sounpar 70 mwurin eh kalipilipdo Papilon, aramas akan kin ekehkerkihte ih Daniel, edeo ni lokaiahn Ipru.​—Dan. 5:13.

9. Soangen madamadau dah me sounnting en Melkahka 119 ahneki ong Mahsen en Koht?

⁹ Sounnting en Melkahka 119 anahne dadaur ni ahnsou me tohn mwoalen kopwung en me lapalap ako uhwongada ih. Ahpw e diar eh kehl sang nan Mahsen en Koht, oh met sewese ih en weksang meteikan. (Mel. 119:23, 61) E mweidohng Mahsen en Koht en uhdahn kamwakid eh pepehm kan.​—Wadek Melkahka 119:11, 46.

10, 11. (a) Ia atail mehn akadei ni atail onopki Mahsen en Koht? (b) Ia duwen atail kak lel atail mehn akadeio? Menlau kihda ehu karasaras.

¹⁰ Mendahki kitail ele kin uhdahn kedirepwki pwukoa kan nan mwomwohdiso oh pil nan doadoahk, kitail koaros anahne kihong ahnsou pwehn wia pein atail onop oh pil kaudok en peneinei. (Ep. 5:15, 16) Atail mehn akadei iei en dehr ihte wadekala pali tohto nan pwuhk ehu de kaunopada pasapeng ehu ong mihting kan. Ahpw atail mehn akadei iei en mweidohng Mahsen en Koht en kamwakid kitail oh kakehlakahda atail pwoson.

¹¹ Pwehn lel atail mehn akadeio, kitail anahne toupahrek. Ni atail kin onop, kitail anahne medemedewe kaidehn ihte anahn en meteikan ahpw pil atail anahn kan. (Pil. 1:9, 10) Kitail anahne wehwehki me ni atail kin kaunopada ong kalohk, mihting kan, de wia padahk, ele dahme kitail wadek sohte kin uhdahn kadoadoahk ong pein kitail. Karasepe, mendahki sounkuk men kin anahne song mahs mwenge kan me e kukihada mwohn eh kihong meteikan en tungoale, e sohte kak mour ma e kin songosongete mwenge pwukat. Ma e men ahneki roson mwahu, e anahne kaukaule kukihada soangen mwenge me mwahu ong ih. Ni ahlohte, ma kitail men kakehlakahda atail nanpwungmwahu rehn Siohwa, kitail anahne kaukaule onopki Paipel. Soangen wiepen onop wet kin kaitarala atail anahn akan.

12, 13. Dahme kahrehda me tohto pehm me en onopki Paipel ni pein arail lokaia kin sawas?

¹² Me tohto me papah nan mwomwohdiso me kin doadoahngki ehu lokaia tohrohr kin pehm me en kaukaule onopki Paipel ni ‘lokaiahn sapwarail’ kin sawas. (Wiewia 2:8) Pil misineri kan me kin papah nan ehu sahpw tohrohr ese me en kehkehlailte nan arail pwukoa doadoahk, re sohte kak koapworopworkihte dahme re kin rongorong nan mihting kan.

¹³ Alain, me kin sukusukuhlki lokaiahn Persia  mpen sounpar waluh, nda: “Ni ei kin kaunopada ong mihting kan ni lokaiahn Persia, I kin kalapw medemedewehte mwomwen lokaiao. Pwehki ei madamadau kin uhdahn doadoahk laud, ei mohngiong sohte kin uhdahn mwekidki ire kan sang Paipel me I wadewadek. Ihme kahrehda I kin kaukaule koasoanehdi ahnsou en onopki Paipel oh sawaspen Paipel kan ni pein ei lokaia.”

14. Dahme pahpa nohno kan anahne tehk mwahu, oh dahme kahrehda?

¹⁴ Pahpa nohno Kristian kan anahne tehk mwahu me padahk mehlel kin kamwakid madamadau oh mohngiong en neirail seri kan. Medewehla duwen Serge oh eh pwoudo, Muriel, me papah dauliher sounpar siluh nan mwomwohdiso ehu me kin doadoahngki ehu lokaia tohrohr. Ira tepida tehkada me neira pwutako, me sounpar 17, sohte kin perenki iang kalohk de mihting kan. Muriel nda: “E kin pwunodki ni eh pahn kohla iang pwihn en kalohk ehu me doadoahngki ehu lokaia tohrohr, ahpw mwoweo e kin perenki kalohk ni pein eh lokaia, lokaiahn France.” Serge pil nda: “Ni at esehda me irair wet kerempwahla nait pwutako sang eh pahn kekeirda nan eh papah Siohwa, se pilada en pwurala nan at mwomwohdiso en mwoweo.”

15. (a) Dahme kak sewese pahpa nohno kan en pilada ma re anahne keseula nan ehu mwomwohdiso? (b) Kaweid dahieu me Deuderonomi 6:5-7 kihda ong pahpa nohno kan?

¹⁵ Dahme kak sewese pahpa nohno kan en pilada ma re anahne keseula nan mwomwohdiso ehu me kin doadoahngki lokaia me neirail seri ko uhdahn wehwehki? Keieu, re anahne pilada ma re uhdahn ahneki ahnsou oh kehl me itar en padahkihong neirail seri ko en poakohng Siohwa, oh pil ni ahnsowohte padahkihong irail ehu lokaia tohrohr. Keriau, ele re tehkada me neirail seri ko sohte men kalohk, kohla mihting, de pil papah nan wasahn kalohk ehu me doadoahngki ehu lokaia tohrohr. Ong kahrepe pwukat, pahpa nohno kan kak pilada ren pwurala nan mwomwohdiso me kin doadoahngki lokaia me neirail seri ko uhdahn wehwehki. Eri, mwurin seri ko kakehlakahda arail nanpwungmwahu rehn Siohwa, pahpa nohno ko kak pilada en pwurala nan mwomwohdiso me kin doadoahngki ehu lokaia tohrohr.​—Wadek Deuderonomi 6:5-7.

16, 17. Dahme sewese ekei pahpa nohno kan en padahkihong neirail seri kan duwen Siohwa?

¹⁶ Pahpa nohno teikan diaradahr ahl en padahkihong neirail seri kan duwen Siohwa ni pein arail lokaia nindoken arail ieiang mihting kan nan mwomwohdiso de pwihn ehu me kin doadoahngki ehu lokaia tohrohr. Charles naineki serepein silimen me sounpar 9 lel 13. Re kin iang pwihn en kalohk ehu me kin lokaiahki lokaiahn Lingala. E nda: “Se pilada en wia at onop oh kaudok en peneinei rehn nait seri ko ni pein at lokaia. Ahpw se pil kin praktis at pasapeng ong mihting kan de wiepen kalohk kan oh pil wia mwadong kan ni lokaiahn Lingala pwe ren kak sukuhlki lokaiao oh ni ahnsowohte perenki.”

¹⁷ Kevin naineki serepein riemen me sounpar limau oh waluh. E kin doadoahk laud pwehn padahkihong ira padahk mehlelo pwehki serepein ko saikinte uhdahn wehwehki mihting kan me kin wiawi nan mwomwohdiso me re kin iang me kin doadoahngki ehu lokaia tohrohr. E nda: “Ngehi oh ei pwoudo kin onop rehn nait serepein ko ni pein at lokaia, me iei lokaiahn France. Se pil wiahda mehn akadei en iang mihting ni lokaiahn France pak ehu nan sounpwong ehu, oh isaneki at ahnsoun mwemweit kan en iang mihting tohrohr kan me kin wiawi ni pein at lokaia.”

18. (a) Ia duwen Rom 15:1, 2 eh kak seweseiuk wiahda pilipil mwahu ni omw sewese noumw seri kan? (b) Iren sawas dah kan me ekei pahpa nohno kihda? (Menlau kilang ire kan mwuri.)

¹⁸ Ehuehu peneinei anahne pilada dahme keieu mwahu ong neirail seri kan oh pil arail nanpwungmwahu rehn Siohwa. ^[2] (Kal. 6:5) Muriel nda me mendahki ih oh eh pwoudo uhdahn men papah nan mwomwohdiso me kin doadoahngki ehu lokaia tohrohr, ira pilada en kohkohla pwe ira en sewese  neira pwutako en kakehlakahda eh limpoak ong Siohwa. (Wadek Rom 15:1, 2.) Rahnwet, Serge ese me re wiahda pilipil pwung ehu. E nda: “Sangete ahnsou me se pwurodo nan mwomwohdiso me doadoahngki lokaiahn France, nait pwutako uhdahn kekeirda nan eh nanpwungmwahu rehn Siohwa oh papidaisla. Met e kin papah nin duwen pioneer men. E pil kin medemedewe en pwurala iang pwihn en kalohk ehu me kin doadoahngki ehu lokaia tohrohr!”

19, 20. Ia duwen atail kak kasalehda me kitail uhdahn poakohng Mahsen en Koht?

¹⁹ Siohwa kin ketin poakohng aramas koaros. E ketikihda Paipel ni soangsoangen lokaia kan pwe “aramas koaros” en kak loalokongkihla padahk mehlel. (1 Tim. 2:4) E ketin mwahngih me atail nanpwungmwahu reh pahn kehlailla ni atail wadek Paipel ni lokaia ehu me kitail uhdahn wehwehki.

²⁰ Kitail koaros anahne doadoahk laud pwehn kolokol atail nanpwungmwahu rehn Siohwa en kehlail. Kitail kak wia met ni atail kaukaule onopki Paipel ni lokaia me kitail kin uhdahn wehwehki. Kitail pil pahn kak sewese atail peneinei en kolokol arail nanpwungmwahu rehn Siohwa, oh kitail pahn kasalehda me kitail uhdahn poakohng Mahsen en Koht.​—Mel. 119:11.