1-3. (a) Kungakhatsaliseki kutsi timo tetfu tinjani, kufanele ube yini umgomo wetfu? (b) Ngubuphi bumatima labo labafundza lolunye lulwimi lababhekana nabo, futsi kuphakama miphi imibuto? (Buka sitfombe lesisekucaleni kwalesihloko.)

TINKHULUNGWANE taBoFakazi BaJehova lamuhla tikhutsele emsebentini wekumemetela tindzaba letimnandzi “kuto tonkhe tive, tinhlanga, tilwimi, nebantfu.” (Semb. 14:⁠6) Ungulomunye yini walabo labafundza lolunye lulwimi? Usitfunywa selivangeli yini nobe utfutsele lapho kunesidzingo lesikhulu khona nobe usebandleni lapho kukhulunywa khona lolunywe lulwimi?

² Njengetikhonti taNkulunkulu, sonkhe kufanele sinakisise tintfo letiphatselene naNkulunkulu sikanye nemindeni yetfu. (Mat. 5:3) Ngaletinye tikhatsi, singakutfola kumatima kuba nesifundvo lesitichubela sona ngenca yekutsi sihlale simatasatasa. Labo labakhonta Jehova bangekho eveni labo bahlangabetana naletinye tinselele.

³ Ngetulu kwekufundza lulwimi lolusha, labo labakhonta Jehova bangekho emaveni abo kudzingeka baciniseke kutsi bayatifundza tintfo letijulile taNkulunkulu. (1 Khor. 2:10) Bangakwenta njani loko nangabe bangaluva kahle lulwimi lwalelobandla?  Kungani batali labangemaKhristu kufanele baciniseke kutsi liVi laNkulunkulu liyatifinyelela tinhlitiyo tebantfwababo?

4. Yini lengaba yingoti ebuhlotjeni betfu naNkulunkulu? Niketa sibonelo.

⁴ Nangabe loko lesikufundza eVini laNkulunkulu ngalelinye lulwimi singakuva kahle, buhlobo betfu naJehova bungaba sengotini. Ngelikhulu lesihlanu leminyaka, kwamkhatsata Nehemiya kuva kutsi bantfwana bemaJuda labebatfunjelwe eBhabhulona bebangakwati kukhuluma siHebheru. (Fundza Nehemiya 13:23, 24.) Labantfwana bebangasakhoni kukhonta Nkulunkulu ngendlela lefanele ngoba bebangakucondzi kahle lokushiwo liVi laNkulunkulu.​—Neh. 8:2, 8.

5, 6. Batali labakhonta ensimini lakukhulunywa khona lolunye lulwimi batfole kutsini, futsi kungani?

⁵ Labanye batali labangemaKhristu labakhonta ensimini lakukhulunywa khona lolunye lulwimi, batfole kutsi lutsandvo bantfwababo labanalo ngeliciniso selunciphile. Ngesizatfu sekutsi abakuva kahle loko lokushiwoko emihlanganweni yelibandla, loluhlelo lokucocwa ngalo alubasiti kutsi batfutfukise buhlobo babo naNkulunkulu. Pedro, ^[1] lowasuka eSouth America nemndeni wakhe batfutsela e-Australia utsi: “Nawukhuluma ngetintfo letiphatselene nebuhlobo bakho naNkulunkulu, inhlitiyo nemiva yakho kufanele kutsintseke.”​—Luk. 24:32.

⁶ Nasifundza ngalolunye lulwimi, inhlitiyo yetfu ayitsintseki njengalapho sifundza ngelulwimi lwetfu. Ngetulu kwaloko, nangabe singakhoni kulukhuluma kahle lolunye lulwimi, singadzinwa engcondvweni bese nekukholwa kwetfu kuyancipha. Kufanele silondvolote buhlobo lobuhle naJehova nangabe sifuna kuchubeka simkhonta ensimini lakukhulunywa khona lolunye lulwimi.​—Mat. 4:4.

7. BaseBhabhulona betama njani kufundzisa Danyela lisiko labo kanye nenkholo yabo?

⁷ Ngesikhatsi Danyela nebangani bakhe batfunjiwe, baseBhabhulona betama kubafundzisa lisiko labo ngekutsi babafundzise “lulwimi lwaseBhabhulona.” Ngetulu kwaloko, indvuna lebeyibacecesha yabetsa emabito aseBhabhulona. (Dan. 1:3-7) Danyela bametsa ngekutsi nguBhelteshasari, lobekungunkulunkulu waseBhabhulona. Inkhosi Nebukhadnezari beyifuna kutsi Danyela acabange kutsi lonkulunkulu waseBhabhulona abemkhulu kunaJehova Nkulunkulu wakhe.​—Dan. 4:8.

8. Ngesikhatsi Danyela ahlala kulelinye live, wasitwa yini kutsi buhlobo bakhe naNkulunkulu buhlale bucinile?

⁸ Nakuba Danyela aniketwa lilungelo lekudla etafuleni lenkhosi, “watincumela enhlitiyweni” yakhe kutsi “angatingcolisi.” (Dan. 1:8) Ngenca yekutsi bekachubeka afundza “imiBhalo” lengcwele ngelulwimi lalumunya, loko kwacinisa buhlobo bakhe naNkulunkulu ngesikhatsi ahlala eBhabhulona. (Dan. 9:2) Ngisho nobe sekwendlule iminyaka lengu-70 ahlala eBhabhulona, bantfu bebasolo bambita ngeligama lakhe lesiHebheru.​—Dan. 5:13.

9. LiVi laNkulunkulu lamsita njani umbhali weTihlabelelo 119?

⁹ Umbhali weTihlabelelo 119 watfola sibindzi eVini laNkulunkulu sekutsi achubeke ehlukile kulabanye. Kwadzingeka kutsi abeketelele kunyembenywa ngemalunga asesigodlweni. (Hla. 119:23, 61) LiVi laNkulunkulu layitsintsa kakhulu inhlitiyo yakhe.​—Fundza Tihlabelelo 119:11, 46.

10, 11. (a) Kufanele ube yini umgomo wetfu nasifundza liVi laNkulunkulu? (b) Singawufinyelela njani lomgomo wetfu? Niketa sibonelo.

¹⁰ Kungakhatsaliseki kutsi simatasa kanganani ngetintfo letiphatselene naNkulunkulu nobe ngemsebenti wekutiphilisa, kufanele sisakhe sikhatsi sesifundvo lesitichubela sona kanye nesekukhonta kwemndeni. (Ef. 5:15, 16) Kepha nasitadisha, asenteli kumane sicedze emakhasi latsite nobe kumane siphendvule emihlanganweni yelibandla. Kufanele siciniseke ngekutsi liVi laNkulunkulu liyayifinyelela inhlitiyo yetfu futsi liyakucinisa kukholwa kwetfu.

¹¹ Kute sente njalo, kufanele kutsi nasitadisha sicabange ngetidzingo talabanye kanye netetfu. (Fil. 1:9, 10) Kungenteka nasisalungiselela kuyoshumayela, kuya emihlanganweni nobe kuniketa inkhulumo, sicabange kutsi loko lesikufundzako akusebenti kitsi. Nasi sibonelo: Nanobe umpheki lonelikhono kufanele akuve kudla lakuphekile ngaphambi kwekutsi akuphakele labanye, angeke aphile ngaloko kuphela. Nangabe afuna kuhlala aphilile, kufanele atiphekele kudla lokunemsoco. Natsi kufanele silwele kutondla ngetintfo letiphatselene naNkulunkulu letitawenetisa tidzingo tetfu.

12, 13. Kungani linyenti lalabakhonta ensimini lakukhulunywa khona lolunye lulwimi, bakukhandze kulusito kufundza liBhayibheli njalo ngelulwimi lwabo?

¹² Labanyenti labakhonta ensimini lakukhulunywa khona lolunye lulwimi, bakukhandze kulusito kulifundza njalo liBhayibheli ‘ngelulwimi lwabo.’ (Imis. 2:8) Ngisho netitfunywa telivangeli letisesabelweni sakulelinye live, tiyati kutsi ngeke tigcine ngaletikufundza emihlanganweni yelibandla kuze tibe nebuhlobo lobuhle naNkulunkulu, kepha kufanele nato titondle.

¹³ Alain, losaneminyaka lesiphohlongo  afundza lulwimi lwasePheresiya utsi: “Nangilungiselela imihlangano ngelulwimi lwesiPheresiya, ngivame kunaka kakhulu lolulwimi. Njengobe kusuke kusebenta kakhulu ingcondvo yami nangifundza, inhlitiyo yami ayitsintfwa nguloko lengikufundzako. Kungako ngiyaye ngitibekele sikhatsi sekufundza liBhayibheli kanye naletinye tincwadzi letisekelwe kulo ngelulwimi lengalumunya.”

14. Yini batali lokufanele baciniseke ngayo, futsi leni?

¹⁴ Batali labangemaKhristu kufanele baciniseke kutsi liVi laNkulunkulu lifinyelela tinhlitiyo netingcondvo tebantfwababo. Serge kanye nemkakhe Muriel, besebaneminyaka lemitsatfu bakhonta ensimini lakukhulunywa khona lolunye lulwimi nabacaphela kutsi indvodzana yabo leneminyaka lengu-17 budzala beyingasakujabuleli kwenta imisebenti yebuKhristu. Muriel utsi: “Nanobe bekakujabulela kushumayela ngelulwimi lwakhe, lokusiFulentji, bekungasasinjalo nasekashumayela ngalolunye lulwimi.” Serge yena utsi: “Nasibona kutsi lesimo senta indvodzana yetfu ingasatfutfuki, sancuma kutsi sibuyele ebandleni lebesikulo kadzeni.”

15. (a) Yini lengenta kutsi batali bakhetse kubuyela ebandleni lelisebentisa lulwimi bantfwababo labaluva kancono? (b) UmBhalo waDutheronomi 6:5-7 ubecwayisa njani batali?

¹⁵ Yini lengenta batali kutsi bakhetse kubuyela ebandleni lelisebentisa lulwimi bantfwababo labaluva kancono? Kwekucala, kufanele bacabange kutsi banato yini tintfo letidzingekile nesikhatsi lesenele sekufundzisa bantfwababo kutsandza Jehova babe babafundzisa lolunye lulwimi. Kwesibili, kungenteka kubonakale kutsi labantfwana abakujabuleli kwenta imisebenti yebuKhristu nobe kukhonta kulensimu lakukhulunywa khona lolunye lulwimi. Etimeni letinjalo, batali labangemaKhristu bangakhetsa kubuyela ebandleni lelisebentisa lulwimi bantfwababo labaluva kancono kuze kube ngulapho sebakwati kulimelela liciniso.​—Fundza Dutheronomi 6:5-7.

16, 17. Yini labanye batali labayentile kuze bafundzise bantfwababo, nakuba basensimini yalolunye lulwimi?

¹⁶ Kodvwa labanye batali bakhonile kutfola tindlela tekufundzisa bantfwababo ngelulwimi labalumunya, nanobe bakhonta ebandleni nobe ecenjini lapho kukhulunywa khona lolunye lulwimi. Charles, longubabe wemantfombatana lamatsatfu laneminyaka lesukela ku-9 kuya ku-13 budzala, ukhonta ecenjini lelikhuluma siLingala. Watsi: “Sancuma kutsi nasitadisha nalapho senta kukhonta kwemndeni kanye nebantfwabetfu sitawusebentisa lulwimi lwetfu. Kodvwa sisebentisa siLingala nasiphrakthiza lokutsite, nalapho sinemidlalo kute bajabule nabasafundza lolulwimi.”

¹⁷ Kevin, babe wemantfombatana lamabili laneminyaka lengu-5 na-8 budzala, wente imetamo letsite kute abasite njengobe bangakuva kahle konkhe lokushiwo emihlanganweni yelibandla lechutjwa ngalolunye lulwimi. Utsi: “Mine nemkami sichubela bantfwana betfu sifundvo seliBhayibheli ngesiFulentji, lokululwimi labalumunya. Satibekela nemgomo wekuya ebandleni lesiFulentji kanye ngenyanga, futsi nasihlela kuvakasha, siya emihlanganweni yesifundza lechutjwa ngelulwimi lwetfu.”

18. (a) Ngusiphi simiso lesitfolakala kumBhalo waRoma 15:1, 2 lesingakusita wente sincumo lesitawuzuzisa bantfwabakho? (b) Ngutiphi tintfo letilusito labanye batali labakhulume ngato? (Fundza kwatiswa lokusekugcineni.)

¹⁸ Umndeni ngamunye uyatikhetsela loko lokungasita bantfwababo babe nebuhlobo lobuhle naNkulunkulu. ^[2] (Gal. 6:5) Muriel lokucocwe ngaye, uyavuma kutsi yena nendvodza yakhe kwadzingeka badzele tintfo  labatitsandzako kuze indvodzana yabo ibe nebuhlobo lobuhle naNkulunkulu. (Fundza Roma 15:1, 2.) Nakabuka emuva, Serge ucabanga kutsi benta sincumo lesihle. Utsi: “Kubuyela emuva ebandleni lesiFulentji kwasita indvodzana yetfu yaba nebuhlobo lobuhle naNkulunkulu futsi yabhatjatiswa. Manje seyilihlahlandlela lelivamile, futsi seyicabanga kubuyela ecenjini lelikhuluma lolunye lulwimi.”

19, 20. Singakhombisa njani kutsi siyalitsandza liVi laNkulunkulu?

¹⁹ Ngenca yekutsi Jehova uyasitsandza, uvumele kutsi liVi lakhe liBhayibheli litfolakale ngetilwimi letinyenti kute “tonkhe tinhlobo tebantfu titfole lwati lolungulonalona lweliciniso.” (1 Thim. 2:4) Jehova uyati kutsi bantfu bangaba nebuhlobo lobuhle naye nangabe bakufundza ngelulwimi labalumunya loko lakushilo.

²⁰ Nobe ngabe timo tetfu tinjani, kufanele sitimisele kutondla ngetintfo letiphatselene naNkulunkulu. Nangabe liBhayibheli silifundza njalo ngelulwimi lesalumunya, sitawuhlala sinebuhlobo lobuhle naNkulunkulu kanye nemindeni yetfu, futsi sitawube sikhombisa kutsi siyakwatisa loko Nkulunkulu lasifundzisa kona.​—Hla. 119:11.