1—3. а) Бис шуптувус кичээнгейни чүүже салыр ужурлуг бис? б) Чаа дылды өөренип турар улус кандыг бергелерге таваржып турар? Аңаа хамаарыштыр кандыг айтырыглар тургустунуп кээрил? (Статьяның эгезинде чурукту көрүңер.)

 МУҢ-МУҢ Иегованың Херечилери бөгүн «янзы-бүрү дылдарлыг сөөк-язы, аймак-чон бүгүдезинге медеглээр дээни мөңге Буянныг Медээниң» дугайында өттүр билген медеглелдиң күүсеттинеринге чүткүлдүү-биле киржип турар (Ажыд. 14:6). Чаа дыл өөренип алыр деп шиитпирлеп алган чадавас силер. Чок болза миссионер бооп бараалгап азы суртаалчылар чедишпес черже көже берген чадавас силер. Азы чуртуңарда өске дылдыг чыыштарже барып турар силер бе?

² Бурганның шупту бараалгакчылары бодунуң болгаш өг-бүлезиниң Бурган-биле харылзаазынче кичээнгейни салыр ужурлуг (Мф. 5:3). Ынчалза-даа чамдыкта чай чогувустан Библияны хууда эки шинчилээри берге бооп чадавас. Ынчалзажок өске дылдыг чыышта азы бөлүкте бараалгап турар улустуң оон-даа өске бергелери бар.

³ Ындыг христианнарга чүгле чаа дылды өөренири эвес, а ханы библейжи алыс шын-биле угаанын үргүлчү долдурары  чугула (1 Кор. 2:10). А олар дылды ам-даа эки билбес болза, чүнү канчап болурул? Христиан ада-иелерге Бурганның Сөзү ажы-төлүнүң чүрээнге дээштиг болзун дээш сагыш човаары чүге чугула?

4. Чүүден бүзүреливис кошкай берип болурул? Чижектен чугаалаңар.

⁴ Бир эвес Бурганның Сөзүн өске дылга эки билбейн турар болзувусса, Бурган-биле харылзаавыс чоорту кошкай берип болур. Б. э. чедир V-ки векте чурттап чораан Неемия вавилон кулданыышкынындан эглип келген чамдык иудейлерниң ажы-төлү еврей дылга чугааланып билбес боорга, муңгарай берген. (Неемия 13:23, 24 номчувут.) Ол ажы-төл Бурганның Сөзүнде бижээн чүүлдү эки билбезинден Бурганның чонунга хамааржып турарын медеревейн турган (Неем. 8:2, 8).

5, 6. Өске дылдыг хуралда ажы-төлү-биле бараалгап турар чамдык ада-иелер кандыг бергени эскерген база ооң чылдагааны чүдел?

⁵ Өске дылдыг чыышта бараалгап турар чамдык христианнар ажы-төлүнүң алыс шынга сонуургалы кошкай бергенин эскергеннер. Хурал залында чүнү чугаалап турарын ажы-төл чедир билбеске, алыс шын оларның чүрээнге четпейн турар. Мурнуу Америкадан Австралияже бодунуң өг-бүлези-биле көже берген Педро ¹ дээр акывыс мынча дээн: «Библиядан билиглер бистиң чүрээвиске болгаш минниишкиннеривиске салдарлыг боор ужурлуг» (Лк. 24:32).

⁶ Кандыг-бир чүүлдү өске дылга номчуурувуска, бодувустуң төрээн дылывыска дег, чүрээвиске ол салдар чедирбес. Оон аңгыда өске дылга чугаалажыры биске берге болза, сагыш-сеткиливис хоозурап, Бурган-биле харылзаавыс кошкай берип болур. Өске дылдыг хуралче шилчий берген улус бараалгалынга чүткүлүн чидирбейн, Бурган-биле харылзаазы дээш сагыш човаары чугула (Мф. 4:4).

7. Вавилончулар боттарының чаңчылдарын болгаш шажынын хүлээп аар кылдыр, Даниилди канчаар албадап турган?

⁷ Даниил биле ооң өңнүктери кулданыг адаанче кире бээрге, вавилончулар оларга «халдей дылды» өөредип, ол аныяк еврей оолдарны оларның чаңчылдарын болгаш культуразын хүлээп алырынче албадап турган. Оон аңгыда дүжүметтер даргазы оларга вавилон аттарны тывыскан (Дан. 1:3—7). Даниилге берген ат Вавилоннуң дээди бурганы Белага хамааржыр турган. Ол бурган Даниилдиң Бурганын, Иегованы, тиилеп каан деп бодалды Навуходоносор хаан ооң сагыжынга киирерин күзээн (Дан. 4:8).

8. Өске чуртка быжыг бүзүрелдиг артарынга Даниилге чүү дузалааныл?

⁸ Хаанның аъш-чемин Даниил чип болур турган-даа болза, ол бодунуң чүрээнге «бодун бужартатпас деп ыяк шиитпирлеп алган» (Дан. 1:8). Хары черге чурттап тургаш, ыдыктыг номнарны бодунуң төрээн дылынга улаштыр өөренип турганының ачызында ооң Бурган-биле харылзаазы быжыг арткан (Дан. 9:2). Вавилонче көжүргениниң соонда, 70 чыл эрткенде безин, Даниилди ол-ла хевээр еврей ады-биле адап турган (Дан. 5:13).

9. Бурганның Сөзү 118-ки ырның авторунга кандыг салдар чедирген?

⁹ Хаанның өргээзинге бараалгап тургаш, 118-ки ырның автору улустуң каржы кыжырыгларын дыңнаар ужурга таваржып турган. Ол, өскелер ышкаш болбас дээш, Бурганның Сөзүнден күштү ап турган (Ыд. ыр. 118:23, 61). Бурганның сөстериниң дугайында боданырга, олар ооң чүрээнче хандыр сиңнигип турган. (Ырлар 118:11, 46 номчувут.)

10, 11. а) Бурганның Сөзүн өөренип тургаш, боттарывыска кандыг сорулганы салыр ужурлуг бис? б) Ол сорулганы канчаар чедип алыр? Чижектен чугаалаңар.

¹⁰ Хуралда хөй хүлээлгелерлиг-даа болзувусса, Библияны хууда өөрениринче болгаш өг-бүле мөгейиишкининче үени аңгылаары чугула (Эф. 5:15, 16). Бистиң сорулгавыс чүгле элээн каш арыннарны номчууру азы чыышка киржир дээш харыылар белеткээри эвес. Бүзүреливисти быжыглаар дээш, Бурганның Сөзүн чүрээвиске салдарлыг кылдыр номчууру чугула.

¹¹ Ынчангаш Библияны өөренип тургаш, чүгле өскелерниң эвес, а бодунуң хереглелдериниң дугайында бодаары база чугула (Флп. 1:9, 10). Суртаал ажылынга, чыышка азы илеткелге белеткенип тургаш, номчуп турар чүүлүвүстү боттарывыска хамаарыштырарын уттуп болур бис. Чижектен көрээлиңер: чем кылыр кижи чемни кылып тургаш, элээн каш катап амзаар, ынчалза-даа ол чем аңаа чедер деп болбас. Кадык болур дизе, ол эки чемненир ужурлуг. Ол ышкаш бистер алыс шын билиглерни эки шиңгээдип, Бурган-биле харылзаа тудар хереглеливисти хандырар ужурлуг бис.

12, 13. Өске дылдыг хуралдарда бараалгакчылар төрээн дылынга Библияны чүге үргүлчү өөренип турар?

¹² Өске дылдыг хуралдарда бараалгап турар ха-дуңма боттарының төрээн дылынга Библияны үргүлчү өөренип турар (Аж.-ч. 2:8). Миссионер бооп бараалгап турар ха-дуңма безин Бурган-биле хамаарылгазы быжыг артар кылдыр, ужуражылгаларда чүү дугайында чугаа чоруп турарын ниитизи-биле билири эвээш деп миннип турар.

 ¹³ Сес хире чыл дургузунда фарси дылды өөренип турар Ален мынчаар үлешкен: «Фарси дылга ужуражылгаларга белеткенип тургаш, колдуунда кичээнгейни дылче салыр мен. Хамыктың мурнунда угаанымны ажылдадып турар болгаш, чамдыкта Библиядан алыс шын чүрээмге четпейн баар. Ынчангаш төрээн дылымга Библияны болгаш дептерлеривисти өөренир үени аңгылап алыр-дыр мен».

14. Ада-иелер чүү чүвеге шынзыгар ужурлуг база чүге?

¹⁴ Христиан ада-иелерге Бурганның Сөзү ажы-төлүнүң угаанынга болгаш чүрээнге салдар чедирип турарынга шынзыгары чугула. Серж биле Мюрьель өске дылдыг хуралга үш чыл ажыг бараалгааш, оларның 17 харлыг оглунга Бурганга бараалгал өөрүшкү эккелбейн турарын эскергеннер. «Бодунуң төрээн француз дылынга ол күзелдии-биле суртаалдап турган, а өске дылга суртаалдаарындан ол бужурганып эгелээн» — деп, Мюрьель чугаалаан. «Бурган-биле харылзаазы кошкай бергенин эскерип кааш, бис эрги хуралывысче эглир деп шиитпирлеп алдывыс» —деп, Серж чугаалаан.

15. а) Ажы-төлүнүң эки чугаалажып билири дылдыг хуралче эглип келиринче ада-иелерни чүү деткип болур? б) Ыдыктыг хоойлуну катаптааны 6:5—7-де ада-иелерге кандыг сүмелер барыл?

¹⁵ Ада-иелерге ажы-төлүнүң чугаалажып, эки билип турары дылдыг хуралче эглип кээрин шиитпирлээринге чүү дузалаар? Бирээде, ажы-төлүн даштыкы дылга өөретпишаан, Иеговага ынакшылын өстүреринге оларның күжү болгаш үези четчир бе деп, олар эки боданыр ужурлуг. Ийиде, ада-иелер ажы-төлүнүң Бурган-биле харылзаазы кошкап, өске дылдыг хуралда бараалгалынга сонуургалын чидирипкенин эскерип болур. Ындыг таварылгада христиан ада-иелер ажы-төлүнүң эки билир дылынга бооп турар чыышка, олар алыс шынга быжыгып алырынга чедир, бараалгаарын шиитпирлеп болур. (Ыдыктыг хоойлуну катаптааны 6:5—7 номчувут.)

16, 17. Чамдык ада-иелер өске дылдыг хуралга бараалгап тургаш, ажы-төлүн алыс шынга канчаар өөредип турар?

¹⁶ Чамдык ада-иелер ажы-төлүн төрээн дылынга өөредир, ол ышкаш өске дылдыг хуралче азы бөлүкче барып болур арганы тып алганнар. 9-тан 13 харга чедир үш кыс уруглуг Шарль өг-бүлези-биле лингала дылда ужуражылгаларже барып турар. Ол мынча дээн: «Уругларывыс-биле өг-бүле мөгейиишкинин төрээн дылывыска эрттирер деп шиитпирлеп алган бис. Ол-ла өйде бис оларны лингала дылынга чугаалажырынга өөредип, хөглүг болгаш солун боор кылдыр, янзы-бүрү оюннар ойнап турар бис».

¹⁷ Кевин 5 биле 8 харлыг ийи кыс уруунуң хуралда чүнү чугаалап турарын чедир билбейн турарын эскергеш, мындыг шиитпирге келген: «Кадайым-биле уругларывысты оларның төрээн француз дылынга Библияны өөредип турар бис. Ол ышкаш айда бир катап француз дылда эртип турар хуралче, а шөлээ үезинде француз шуулганче баарын шиитпирлээн бис».

18. а) Ажы-төлге чүү эки болурун тодарадып алырынга Римчилерге 15:1, 2-де дүрүм канчаар дузалаар? б) Чамдык ада-иелер чүнү сүмелеп турарыл? (Тайылбырны көрүңер.)

¹⁸ Ажы-төлүңерниң Бурган-биле харылзаазынга чүү эки болуру силерге көскү болбайн канчаар (Гал. 6:5) ². Оглунуң библейжи алыс шынга өзүлдези дээш, ооң мурнунда чугаалап турганывыс Мюрьель ашаа-биле ынак бараалгалындан ойталаар ужурга таварышканы-биле үлешкен. (Римчилерге 15:1, 2 номчувут.) Эрткен үени сактып, олар шын шиитпирни хүлээп алганын  Серж билип турар. «Кажан француз хуралче дедир эглип келиривиске, оглувус Бурган-биле харылзаазын быжыктырып, сугга суктуруп алган. Ам ол эгелекчи кылдыр бараалгап турар. Ол өске дылдыг бөлүкче катап шилчидип алырын безин бодап турар!» — деп, ол чугаалаан.

19, 20. Бурганның Сөзүнге ынаавысты канчаар көргүзүп болур бис?

¹⁹ Иегова ынакшылы-биле сагыш човап, «бүгү улустуң камгалалды алырын база алыс шынны билип аарын күзеп турар». Ооң Сөзү чүс-чүс дылдарга билдингир боор кылдыр, Ол сагыш човаан (1 Тим. 2:4). Кижилер Иегованың дугайында билиглерни алыр дээш, Библияны чүрээнге чоок дылынга номчуур болза, олар Бурган-биле харылзаа тудар хереглелдерин хандырып шыдаар деп, Ол билип турар.

²⁰ Бис кандыг-даа байдалдарда ханы библейжи билиглерни алыр болзувусса эки. Библияны төрээн дылывыска доктаамал өөренип тургаш, боттарывыстың болгаш өг-бүлевистиң Бурган-биле харылзаазын быжыглаарынга дузалаар бис. Шак ынчаар Бурганның сөстерин чүрээвисте кадагалап чоруурувусту көргүзер бис (Ыд. ыр. 118:11).