1-3. (a) Anoman an aton kahimtang, ano an sadang naton magin prayoridad? (b) Ano nga mga ulang an inaatubang hadton nag-aaram hin iba nga linggwahe, ngan ano nga mga pakiana an nabangon tungod hito? (Kitaa an retrato hini nga pahina.)

YINUKOT nga Saksi ni Jehova yana an madasigon nga nakikigbahin ha katumanan han bisyon may kalabotan ha pagpasamwak han maopay nga sumat “ha tagsa nga nasud, tribo, pinulongan, ngan katawohan.” (Pah. 14:6) Usa ka ba nga nag-aaram hin iba nga linggwahe, misyonero, nag-aalagad ha lugar nga mas daku an panginahanglan, o natambong ha mga katirok ha kongregasyon nga iba an linggwahe ha iyo lugar?

² Sugad nga mga surugoon han Dios, sadang magin prayoridad naton ngan han aton pamilya an aton espirituwal nga kahimsog. (Mat. 5:3) Pero usahay bangin nakukurian kita paggahin hin panahon para ha personal nga pag-aram tungod kay sagipo kita. Pero adton nag-aalagad ha teritoryo nga iba an linggwahe may iba pa nga mga ulang nga inaatubang.

³ Labot ha pag-aram hin iba nga pinulongan, kinahanglan liwat  siguruhon hadton nag-aalagad ha teritoryo nga iba an linggwahe nga pirme nira ginpupuno an ira kasingkasing hin matig-a nga espirituwal nga pagkaon. (1 Cor. 2:10) Paonan-o nira ito mahihimo kon diri nira bug-os nga nasasabtan an linggwahe han kongregasyon? Ngan kay ano nga sadang siguruhon han Kristiano nga mga kag-anak nga makaabot ha kasingkasing han ira mga anak an Pulong han Dios?

4. Ano an mahimo magin hinungdan nga mameligro an aton espirituwalidad? Pag-unabi hin ehemplo.

⁴ Mahimo gud mameligro an aton espirituwal nga kahimsog kon diri naton nasasabtan an Pulong han Dios ha iba nga linggwahe. Han ikalima ka siglo B.C.E., nabaraka hi Nehemia han hinbaroan niya nga an pipira nga anak han mga Judio nga binalik tikang ha Babilonya diri na maaram han Hebreo nga linggwahe. (Basaha an Nehemia 13:23, 24.) Nawawara na an pangirilal-an hini nga kabataan sugad nga mga surugoon han Dios kay diri na nira bug-os nga nasasabtan an Pulong han Dios.—Neh. 8:2, 8.

5, 6. Ano an naobserbaran han pipira nga kag-anak nga nag-aalagad ha teritoryo nga iba an linggwahe, ngan kay ano?

⁵ Naobserbaran han pipira nga kag-anak nga nag-aalagad ha teritoryo nga iba an linggwahe nga an ira mga anak nawawad-an na hin interes ha kamatuoran. Tungod kay diri bug-os nga nasasabtan hini nga kabataan an mga katirok, diri nababantad an ira kasingkasing han espirituwal nga mga programa ha Kingdom Hall. Hi Pedro ^[1] nga taga-Sur Amerika nga binalhin ha Australia kaupod an iya pamilya nagsiring: “Kon naghihisgot hin espirituwal nga mga butang, kinahanglan mabantad an kasingkasing ngan mga pagbati.”—Luc. 24:32.

⁶ Kon nagbabasa kita gamit an iba nga linggwahe, diri sugad kadaku an epekto hito ha aton kasingkasing kon itanding ha aton kalugaringon nga linggwahe. Dugang pa, kon nakukurian kita ha pakiistorya gamit an iba nga pinulongan, posible nga kapuyon kita ha paghinunahuna ngan magpaluya ito han aton espirituwalidad. Salit samtang gintitipigan naton an aton hingyap nga mag-alagad kan Jehova ha teritoryo nga iba an linggwahe, maopay nga tipigan naton nga mahimsog an aton espirituwal.—Mat. 4:4.

7. Paonan-o nangalimbasog an mga Babilonyahanon nga karawaton ni Daniel an ira kultura ngan relihiyon?

⁷ Han nadistyero hi Daniel ngan an iya mga kaupod, nangalimbasog an mga Babilonyahanon nga karawaton nira an kultura han Babilonya pinaagi ha pagtutdo ha ira han “pinolongan han mga Kaldeanhon.” Gintagan pa ngani hira hin Babilonyahanon nga ngaran han opisyal han korte nga gintokahan ha pagbansay ha ira. (Dan. 1:3-7) An iginngaran kan Daniel nagtutudlok kan Bel, an nangunguna nga dios han Babilonya. Bangin karuyag ni Hadi Nabukodonosor nga patoohon hi Daniel nga mas gamhanan an dios han Babilonya kay han iya Dios nga hi Jehova.—Dan. 4:8.

8. Paonan-o natipigan ni Daniel an iya espirituwal nga kahimsog bisan kon naukoy hiya ha iba nga nasud?

⁸ Bisan kon gintanyagan hi Daniel nga kumaon ha magrasa nga pagkaon han hadi, hi Daniel “nagtinguha ha iya kasingkasing” nga “diri hiya maghuhugaw ha iya ngahaw.” (Dan. 1:8) Tungod kay padayon niya nga gin-adman an “baraan nga [mga] kasuratan” ha iya kalugaringon nga linggwahe, natipigan niya an iya espirituwal nga kahimsog bisan kon naukoy hiya ha iba nga nasud. (Dan. 9:2, Maupay nga Sumat) Salit bisan kon mga 70 ka tuig na hiya ha Babilonya, kilala pa gihapon hiya ha iya Hebreo nga ngaran.—Dan. 5:13.

9. Sugad han iginpapakita han An Mga Salmos 119, ano an nagin epekto han Pulong han Dios ha nagsurat hito nga mga salmos?

⁹ An nagsurat han An Mga Salmos 119 nabuligan liwat han Pulong han Dios nga makapabilin nga naiiba ha kadam-an. Kinahanglan niya ilubon an pagtamay han pipira nga membro han palasyo han hadi. (Sal. 119:23, 61) Bisan pa hito, gintugotan niya an Pulong han Dios nga makaimpluwensya  gud ha iya kasingkasing.—Basaha An Mga Salmos 119:11, 46.

10, 11. (a) Kon nag-aaram kita, ano an sadang naton magin tumong? (b) Paonan-o naton makakab-ot ito nga tumong? Iilustrar.

¹⁰ Bisan kon sagipo kita ha mga buruhaton ha espirituwal ngan ha sekular nga trabaho, kinahanglan naton maggahin hin panahon para ha personal nga pag-aram ngan pagsingba han pamilya. (Efe. 5:15, 16) Pero an aton tumong diri la nga makabasa hin pipira ka pahina o makapangandam hin mga komento ha katirok. Karuyag naton nga makaabot gud ha aton kasingkasing an Pulong han Dios ngan maparig-on an aton pagtoo.

¹¹ Basi makab-ot ito, kinahanglan kita magin timbang. Kon nag-aaram kita, sadang naton hunahunaon an panginahanglan han iba ngan an aton mismo espirituwal nga panginahanglan. (Fil. 1:9, 10) Sadang naton hinumdoman nga kon nag-aandam kita para ha ministeryo, ha mga katirok, o hin pahayag, kasagaran na nga diri naton igin-uupod an aton kalugaringon ha aplikasyon han aton ginbabasa. Ha pag-ilustrar: Bisan kon kinahanglan tilawan han usa nga paragluto an iya mga ginluto antes ito igserbi, diri hiya mabubuhi ha patilaw-tilaw la. Basi magpabilin hiya nga mahimsog, kinahanglan niya mag-andam hin masustansya nga pagkaon para ha iya kalugaringon. Ha pariho nga paagi, kinahanglan kita mangalimbasog nga pun-on an aton kasingkasing han espirituwal nga pagkaon para matagbaw an aton personal nga panginahanglan.

12, 13. Kay ano nga para ha damu nga nag-aalagad ha teritoryo nga iba an linggwahe, mapulsanon gud an regular nga pag-aram ha ira kalugaringon nga linggwahe?

¹² Damu hadton nag-aalagad ha teritoryo nga iba an linggwahe an nagpapahimulos ha regular nga pag-aram ha Biblia ha ira “kalugaringon nga linggwahe.” (Buh. 2:8) Bisan an mga misyonero maaram nga basi makapabilin nga marig-on, diri  igo an espirituwal nga pagkaon nga ira napapahimulsan ha mga katirok.

¹³ Hi Alain nga mga walo ka tuig na nga nag-aaram han Persian nga linggwahe nagsiring: “Kon nag-aandam ako para ha mga katirok ha Persian, agsob nga nakapokus ako ha linggwahe mismo. Tungod kay an akon utok la an nagana, kasagaran na nga diri nababantad an akon kasingkasing han espirituwal nga butang nga akon ginbabasa. Salit regular ako nga naggagahin hin panahon basi pag-adman an Biblia ngan an iba pa nga publikasyon ha akon kalugaringon nga linggwahe.”

14. Ano an kinahanglan siguruhon han mga kag-anak, ngan kay ano?

¹⁴ Kinahanglan siguruhon han Kristiano nga mga kag-anak nga an Pulong han Dios makaabot ha kasingkasing ngan hunahuna han ira mga anak. Paglabay hin sobra tulo ka tuig nga pag-alagad ha teritoryo nga iba an yinaknan, naobserbaran han mag-asawa nga hira Serge ngan Muriel nga an ira 17 anyos nga anak nawawarayan na gana ha espirituwal nga buruhaton. Hi Muriel nagsiring: “Naaaringit na hiya pag-upod ha pagsangyaw ha iba nga linggwahe, pero hadto karuyag gud niya magsangyaw ha iya kalugaringon nga linggwahe nga Franses.” Hi Serge nagsiring: “Han nasantop namon nga ini nga sitwasyon nakakaulang ha espirituwal nga pag-uswag han amon anak, nagdesisyon kami nga bumalik ha amon daan nga kongregasyon.”

15. (a) Ano an pipira nga mahimo ikonsiderar han mga kag-anak kon kinahanglan ba nira bumalik ha kongregasyon nga nagamit han linggwahe nga nasasabtan gud han ira anak? (b) Ano an sagdon han Deuteronomio 6:5-7 ha mga kag-anak?

¹⁵ Ano an pipira nga mahimo ikonsiderar han mga kag-anak kon kinahanglan ba nira bumalik ha kongregasyon nga nagamit han linggwahe nga nasasabtan gud han ira anak? Siyahan, sadang nira hibaroan kon may igo gud ba hira nga panahon ngan kusog basi tutdoan an ira anak nga higugmaon hi Jehova ngan ha pariho nga higayon tutdoan hiya han iba nga linggwahe. Ikaduha, bangin maobserbaran nira nga nawawarayan na interes an ira anak ha espirituwal nga mga buruhaton o ha pag-alagad ha teritoryo nga iba an linggwahe nga ira ginbuboluntaryohan. Ha sugad nga kahimtang, bangin magdesisyon an mga kag-anak nga bumalik ha kongregasyon nga nagamit han linggwahe nga nasasabtan gud han ira anak tubtob nga magin magrig-on na hiya ha kamatuoran.—Basaha an Deuteronomio 6:5-7.

16, 17. Paonan-o gintutdoan han pipira nga kag-anak an ira mga anak nga higugmaon an kamatuoran samtang nag-aalagad ha teritoryo nga iba an linggwahe?

¹⁶ Ha luyo nga bahin, may mga kag-anak nga nakahimo hin paagi nga matutdoan an ira anak ha iya kalugaringon nga linggwahe samtang natambong ha kongregasyon o grupo nga nagamit hin iba nga linggwahe. Hi Charles nga may tulo nga anak nga 9, 12, ngan 13 anyos natambong ha grupo han Lingala nga linggwahe. Hiya nagsiring: “Nagdesisyon kami nga magkaada mga sesyon hin pag-aram ngan pagsingba han pamilya ha amon kalugaringon nga linggwahe. Pero may-ada liwat kami mga sesyon ha pagbansay ngan nag-uuyag kami gamit an Lingala basi mahibaro hira hini nga linggwahe ngan mag-enjoy liwat.”

¹⁷ Hi Kevin nga may duha nga anak nga singko ngan otso anyos naghimo hin paagi basi maipasilsil an kamatuoran ha ira mga anak kay diri nira bug-os nga nasasabtan an mga katirok ha iba nga linggwahe. Hiya nagsiring: “Gindudumarahan namon nga mag-asawa an amon mga anak hin personal nga pag-aram ha Franses, an ira kalugaringon nga linggwahe. Nangangalimbasog liwat kami nga makatambong ha Franses nga katirok makausa kada bulan, ngan ginsasalingabot namon an amon mga bakasyon nga umatender hin mga kombensyon ha amon linggwahe.”

18. (a) Paonan-o an prinsipyo ha Roma 15:1, 2 makakabulig ha iyo ha pagdesisyon kon ano an makakaopay ha iyo mga anak? (b) Ano an mga iginsuhestyon han iba nga mga kag-anak? (Kitaa an endnote.)

¹⁸ Syempre, an tagsa nga pamilya an magdidesisyon kon ano gud an makakaopay ha espirituwalidad han ira mga anak. ^[2] (Gal. 6:5) Hi Muriel nga gin-unabi kanina nagsiring nga kinahanglan isakripisyo nira nga mag-asawa an ira karuyag para matipigan  an espirituwalidad han ira anak. (Basaha an Roma 15:1, 2.) Nasantop ni Serge nga husto an ira nagin desisyon. Hiya nagsiring: “Tikang han bumalik kami ha Franses nga kongregasyon, nag-uswag ha espirituwal an amon anak ngan nabawtismohan. Yana, regular payunir na hiya. Nagpaplano pa ngani hiya nga mag-alagad utro ha grupo nga iba an linggwahe!”

19, 20. Paonan-o naton maipapakita nga hinigugma naton an Pulong han Dios?

¹⁹ Tungod han gugma ni Jehova, ginpahinabo niya nga an iya Pulong, an Biblia, mabasa ha ginatos nga linggwahe basi “matalwas an ngatanan nga klase hin tawo ngan magkaada husto nga kahibaro ha kamatuoran.” (1 Tim. 2:4) Maaram gud hiya nga mas matatagbaw an ira espirituwal nga panginahanglan kon mababasa nira an iya Pulong ha ira kalugaringon nga linggwahe.

²⁰ Anoman an aton kahimtang, kinahanglan magin determinado kita nga pun-on an aton kasingkasing hin magtig-a nga espirituwal nga pagkaon. Pinaagi han regular nga pag-aram han Kasuratan ha aton kalugaringon nga linggwahe, matitipigan naton an aton espirituwal nga kahimsog pati na han aton pamilya ngan maipapakita naton nga ginpapabilhan gud naton an mga pulong han Dios.—Sal. 119:11.