ქუდოსკიდით სულიერო მანგარო უცხო ტერიტორიას მსახურებაშ დროს!
„გურს განძიცალო იბჩუანქ სქან სიტყვეფს“ (ფსალმ. 119:11).
ობირეშეფი: 142, 92
1—3. ა) მუს ოკო მიაქცუან დიდ ყურადღება ღორონთიშ მსახურეფქ? ბ) მუ სირთულეეფ უღუნა თინეფს, მით შხვა ნინაშა რაგადანან ფერ ტერიტორიას მსახურენა დო მუ კითხვეფი წიმიჭკირუ? (ქოძირით სურათ თე გვერდის)
ამდღა იეჰოვაშ ანთასობით მოწმე აქტიურო მონაწილენს წინასწარმტყველურ ხილვაშ შესრულებას, ნამდა სახიოლო ამბექ ნაქადაქებუქ ოკო იჸუას „არძა რჯულშო, ტომშო, ნინაშო დო ხალხშო“ (გამოცხ. 14:6). თქვა ხოლო ხომ ვაგურაფლენთ შხვა ნინას? ვარდა მისიონერო ხომ ვამსახურენთ თექ, სოდეთ მეტ მაქადაქებელეფ რენა საჭირო? ვარდა თქვან ქიანას შხვა ნინაშა მარაგადე კრებაშა ხომ ვედიჭყით გილულა?
2 ღორონთიშ მსახურეფქ დიდ ყურადღება ოკო მივაქცუათ ჩქინ დო ჩქინ ოჯახიშ სულიერობას (მათ. 5:3). მარა მინშა დრო ვამღუნან თიშგურშენ, შილებე გამჭირდან ოჯახურ გურაფაშ მეჸუნაქ. თეს გეძინელ უცხო ტერიტორიას მსახურენან თინეფს, შხვა სირთულეეფ ხოლო უღუნა.
3 შხვა ნინაშა რაგადანან ფერ ტერიტორიას მსახურენან თინეფქ, ნინაშ გურაფაშ გარდა, თიშენ ხოლო ოკო იფიქრან, ნამდა რეგულარულო მიღან მანგარ სულიერ საზრდო (1 კორ. 2:10). მარა მუჭო შეულებენა თენა, ნინა ბოლოშა ვარჩქილენან-და? მუშენ ოკო დერწმუნან მშობლეფქ, ნამდა ღორონთიშ სიტყვა ბაღანეფიშ გურს ოხუ?
მუქ შილებე ეცილას ჩქინ სულიერობას?
4. მუქ შილებე ეცილას ჩქინ სულიერობას? ქიმიჸონით მაგალით.
4 შხვა ნინაშა ღორონთიშ სიტყვაქ ვაგმაგებუეს-და, თექ შილებე მანგარო ქეცილას ჩქინ სულიერობას. ჯვეშ წანაკოროცხუათ მახუთა საუკუნეს, მუჟამსით ნეემიაქ იერუსალიმშა დირთუნ, თიქ ქოძირ, ნამდა ბაბილონშე დორთელ ებრაელეფიშ ნამთინე სქუას ებრაულო ვარაგადედ; თე ამბექ ნეემიას გურ მანგარო დოუნჭყოლ (წეკითხით ნეემიაშ 13:23, 24). თე ბაღანეფს მუნეფიშ დუდ ღორონთიშ მსახურეფო ვემიორჩქუდეს, მუშენდა ბოლოშა ვარჩქილედეს ღორონთიშ სიტყვაშ მნიშვნელობა (ნეემ. 8:2, 8).
5, 6. მუ პრობლემა ძირ ნამთინე მშობელქ დო მუ რდუ თეშ მიზეზი?
5 ნამთინე მშობელქ, მით შხვა ტერიტორიას მსახურენსინ, ქოძირ, ნამდა ბაღანეფს მეუდინეს ჭეშმარიტებაშ ინტერესიქ. ბაღანეფს ბოლოშა ვარჩქილედეს თინა, მუდგას კრებეფს იჩიებუდეს, ათეშგურშენ სულიერ საკითხეფ ვახუდ თინეფიშ გურს. პედროქ [1] მუშ ჩილ დო სქუაწკუმა ართო ავსტრალიაშე სამხრეთ ამერიკაშა გეგნორთ ოცხოვრებშა. თინა იჩიებ: „მუჟამსით სულიერ საკითხეფშენ იბჩიებუთინ, მთელ შურ დო გურ ოკო ინობდვანთ თის“ (ლუკ. 24:32).
6 შხვა ნინაშა პკითხულენთინ თიქ შილებე თიშნერო ვეშეხუას გურს, მუჭოთ ჩქინ ნინაშა ნაკითხირქ. თეშ გარდა, შხვა ნინა ჯგირო ვამჩქუნან-და, შილებე თექ ძალეფ მიდამღან დო ჩქინ სულიერობას ხოლო ქეცილას. ქუმოკონა, შხვა ტერიტორიას მსახურებაშ სურვილქ ვამდინან-და, თის ხოლო ოკო ვეცადათ, ნამდა სულიერო ვედებსუსტათ (მათ. 4:4).
თინეფქ სულიერო გემანგარეს
7. მუჭო ოცადუდეს ბაბილონელეფი მუნეფიშ კულტურა დო რელიგია დანიელს ქუჸოროფესკო?
7 ბაბილონშა გინოხორაფილ დანიელს დო თიშ ამხანაგეფს, თექიან კულტურა მალას გაჩინებაფესკონ თიშენ, ქალდეველეფიშ ნინას ოგურუანდეს. მთავარ კარიშკოჩიქ, მიდგას თინეფიშ გურაფა ოვალუდუნ, დანიელს დო თიშ ამხანაგეფს ბაბილონურ სახელეფ ქიგიოდვ (დან. 1:3—7). დანიელშა გედვალირ ბაბილონურ სახელიშ პირველ ნაწილ „ბელ“ ბაბილონიშ მთავარ ღვთაებაშა მეუთითენდ. მუჭოთ იძირენ, ნაბუქოდონოსორს ოკოდ, დანიელ დარწმუნკონ, ნამდა ბაბილონიშ ღვთაებაქ თიშ ღორონთ იეჰოვა ქიდიმორჩილ (დან. 4:8).
8. მუქ მეხვარ დანიელს შხვა ქიანას სულიერო ვადასუსტებედკონ?
8 დანიელს მეფეშ სუფრაშე არზიენდეს ოჭკომალს, მარა თის გურს აფუდ გინოჭყვიდილ, „დუდ უწინდურო ვეგნუშკუმალუდკო“ (დან. 1:8). თინა სულიერო შხვა ქიანას ხოლო ვადასუსტებე, მუშენდა მუშ ნინაშა გურაფლენდ წმინდა წიგნეფს (დან. 9:2). ათეშგურშენ ბაბილონშა გინოხორაფაშე 70 წანაშ უკულ ხოლო თის მუშ ებრაულ სახელით იჩინენდეს (დან. 5:13).
9. მუჭო იმოქმედ ღორონთიშ სიტყვაქ 119 ფსალმუნიშ მაჭარალწკუმა?
9 ღორონთიშ სიტყვაქ მეხვარ 119 ფსალმუნიშ მაჭარალს, ნამდა შხვეფცალო ვამუქციებუდკო. სამეფო კარიშ ნამთინე წევრი თის არდებულო ოქცუდ (ფსალმ. 119:23, 61). მარა თიქ ღორონთიშ სიტყვას ქიმეჩ საშვალება, ქეშეხუკო თიშ გურს (წეკითხით ფსალმუნიშ 119:11, 46).
რდათ სულიერო მანგარეფი
10, 11. ა) მუ ოკო რდას ჩქინ მიზან ღორონთიშ სიტყვაშ გურაფაშ დროს? ბ) მუჭო შემლებუნა მივოჭირინუათ თე მიზანს? ქიმიჸონით მაგალით.
10 შილებე ბრელ საქმეეფი მიღუდან, მუჭოთ პირადინ თეშ თეოკრატიულ ხოლო დო ბრელ დრო ვამღუდან, მარა აუცილებერ რე დრო დობგორათ პირად გურაფაშო დო ოჯახწკუმა ართო თაყვანიშცემაშო (ეფეს. 5:15, 16). მარა ჩქინ მიზან ხვალე მუსხირენ გვერდიშ გინოკითხირ ვარდა კრებაშო კომენტარეფიშ მომზადება ოკო ვარდას. ჩქი ოკო დებრწმუნათ, ნამდა ღორონთიშ სიტყვა ოხუ ჩქინ გურს დო რწმენას მიმანგარენა.
11 თე მიზანს ქიმვოჭირინუათინ თიშენ, გურაფაშ დროს შხვეფიშ საჭიროებეფწკუმა ართო ჩქინ სულიერ მოთხოვნილებეფქ ხოლო ვაგმოჭყორდან ოკო (ფილ. 1:9, 10). მარჩქილედან ოკო, ნამდა მუჟამსით მსახურებაშო იმბზადებუთინ, ვარდა კრებაშო მოხსნებას ვორთუთინ, შილებე თე დროს პკითხულენთინ თი მასალა ჩქინ დუდს ვადუკავშირათ. მაგალთო, ოჭკუმალიშ მაკეთებელქ, სოიშა ოჭკომალს მიკიღანდასინ, შილებე გემო გუსინჯას თის, მარა თენა დასაბაღ ვეჸი მუშ ორგანიზმშო. ჯამრთელქ ქიჸუას თიშენ, თიქ მუშო ხოლო ოკო გიკეთას მარგებელ ოჭკომალ. თეშნერო, ჩქი ხოლო მოსაჭირუნა, მიბღათ თიცალ სულიერ ოჭკომალ, ნამუთ დაკმაყოფილენს ჩქინ მოთხოვნილებეფს.
12, 13. მუშენ ფიქრენს ბრელ, მით შხვა ტერიტორიას მსახურენსინ, ნამდა მნიშვნელოვან რე პირად გურაფა მუნეფიშ ნინაშა უღუდან?
12 ბრელ, მით შხვა ნინაშა რაგადანან ფერ ტერიტორიას მსახურენან, ორწყენა, ნამდა მნიშვნელოვან რე რეგულარულო გიმირკუან ბიბლია მუნეფიშ ნინაშა (საქ. 2:8). მისიონერეფს ხოლო არჩქილენა, ნამდა სულიერო ვედესუსტანინ თიშენ, ხვალე თის ოკო ვეგუჯერდან, მუდგას კრებას გებულენა.
13 ალან, ნამუთ ბრუო წანა რე სპარსულს გურაფლენსინ, იჩიებ: „მუჟამსით კრებაშო სპარსულ ნინაშა ივმზადებუქინ, ყურადღება მთლიანო ნინაშა გინომიღ. თენა უმოსო გონებაშ ვარჯიშ რე, ათეშგურშენ სულიერ აზრეფ, ნამუსით პკითხულენქინ, გურს ბრელით ვახუ. ათეშგურშენ დროს გიმოფრთუნქ თიშო, ნამდა ჩქიმ ნინაშა გეგმიბრკუე ბიბლია დო შხვა პუბლიკაციეფი“.
ქენანჭით სქუალეფიშ გურს
14. მუშა ოკო რდან დარწმუნებულ მშობლეფი დო მუშენ?
14 ქრისტიან მშობლეფქ ოკო დერწმუნან, ნამდა ღორონთიშ სიტყვა მოქმედენს ბაღანეფიშ გურს დო გონებას. ჩილ დო ქომონჯიქ სერჟ დო მიურიელქ ქიშიამჩნის, ნამდა შხვა ტერიტორიას სუმ წანაშე მეტ ხანს მსახურებაშ უკულ, მუნეფიშ 17 წანერ ბოშის თეოკრატიულ საქმეეფიშ კეთებაშ ხიოლქ მეუდინ. „თის ოხიოლუდ ფრანგულ ნინაშა მსახურება, მარა შხვა ნინაშა ქადაქებაქ გუჭირდ“, — იჩიებ მიურიელ. „მუჟამს ქიმეფხვადით, ნამდა თენა თის სულიერო უკახალე ქიკნაჸათანდუნ, გინოპჭყვიდით, დიფრთითკო ჩქინ კრებაშა“, — იჩიებ სერჟ.
დერწმუნით, ნამდა ჭეშმარიტება თქვან სქუალეფიშ გურს ოხუ (ქოძირით აბზაცეფი 14, 15)
15. ა) მუ ფაქტორეფიშ გურშენ შილებე მშობლეფქ დირთან კინ თი კრებაშა, ნამუთ მუნეფიშ სქუალეფშო გასაგებ ნინაშა იტარებუაფ? ბ) მუ მითითებას არზენს კანონიშ 6:5—7 მშობლეფს?
15 მუ ფაქტორეფიშ გურშენ შილებე მშობლეფქ დირთან კინ თი კრებაშა, ნამუთ მუნეფიშ სქუალეფშო გასაგებ ნინაშა იტარებუაფ? პირველ რიგის, თინეფქ ქიდეკვირან ოკო, ქოუღუნან დო ვარ დასაბაღ დრო დო თიშ საშუალება, მუნეფიშ სქუალეფს ქოუჸოროფუან იეჰოვა დო შხვა ნინა ხოლო ქუდაგურუან. მაჟირა თინა რე, მშობლეფ შილებე ოტყუდან, ნამდა მუნეფიშ სქუალეფს მეუდინეს სულიერ საქმეეფიშ ვარდა შხვა ტერიტორიას მსახურებაშ ინტერესიქ. თეცალ დროს თინეფქ შილებე მუნეფიშ კრებაშა დირთან, მუშენდა ბაღანეფქ ირფელ ჯგირო ქიგეგან დო ჭეშმარიტებას გემანგარან (წეკითხით კანონიშ 6:5—7).
16, 17. მუჭო ახერხენს ნამთინე მშობელი, სულიერო ქიმეხვარას სქუალეფს, თიშ უმკუჯინუო, ნამდა შხვა ნინაშა რაგადანან ფერ კრებას მსახურენა?
16 ბრელ მშობელქ დოგორ თიშ საშვალება, ოჯახის უღუდესკო თაყვანიშცემა მუნეფიშ ნინაშა დო თეწკუმა ართო ქიდესწრესკო შხვა ნინაშა რაგადანან ფერ კრებას ვარდა ჯგუფის. შარლი, ნამუსით 9-შე 13 წანაშა ასაკიშ სუმ ცირასქუა ჸუნსინ, ოსწრუ ლინგალა ნინაშა ჯგუფის. თინა იჩიებ: „ჩქი გინობჭყვიდით ოჯახურ თაყვანიშცემა დო ბაღანეფწკუმა ბიბლიაშ გურაფა ჩქინ ნინაშა მიღუდესკო, მარა კრებაშ ინსცენირებეფი — ლინგალა ნინაშა, ნამდა თე ნინაშ გურაფა სახალისო ქოჸოფედუკო“.
ქეცად, ქიდიგურუე თექიან ნინა დო მონაწილება მიღ კრებაშ შეხვალამეფს (ქოძირით აბზაცეფი 16, 17)
17 კევინ, ნამუსით ხუთ დო ბრუო წანერ ძღაბეფ ჸუნსინ, ოცად მუშ სქუალეფს აუნაზღაურას თინა, მუთ შხვა ნინაშა რაგადანან ფერ კრებაშა გილულათ ოკორდუნა. თინა იჩიებ: „მა დო ჩქიმ მეუღლეს პირად გურაფა ბაღანეფწკუმა ართო მიღუნა, ჩქინ ნინაშა, ფრანგულო. მიზანო თინა ხოლო მიღუნა, თუთაშე ართშა ჩქინ ნინაშა დევესწრათ კრებაშ შეხვალამეფს დო გეგმიბრინუათ შვებულებაშ დღალეფი, ნამდა მიდაფრთათ კონგრესშა, ნამუთ ჩქინ ნინაშა ირტარებუაფ“.
18. ა) მუ პრინციპი ინოჭარ რომაელეფიშ 15:1, 2-ს, ნამუთ მიგეხვარებუნა, გეგნოჭყვიდათ, მუ რე თქვან სქუალეფშო არძაშ უჯგუშ? ბ) მუ რჩევას ირზენს ნამთინე მშობელი? (ქოძირით შენიშვნა)
18 მუშო ოკო რაგად, თითოულ ოჯახიქ მუშით ოკო გინოჭყვიდას, მუ რე არძაშ უჯგუშ, მუნეფიშ სქუალეფ სულიერო მანგარო რდანინ თიშო [2] (გალ. 6:5). მიურიელ, ნამუთ ჟიშე მიფშინეთინ, იჩიებ, ნამდა მუქ დო მუშ ქომონჯიქ მუნეფიშ ბოშიშ სულიერობაშ გურშენ დათმეს მუთ მუნეფს ოკოდესინ თინა (წეკითხით რომაელეფიშ 15:1, 2). ულირ ამბეს იშინანსინ, სერჟ ფიქრენს, ნამდა ირფელ სწორაშე გინოჭყვიდეს. თინა იჩიებ: „თი დროშე, მუჟამს ფრანგულ ნინაშა მორაგადე კრებას დუვართითინ, ჩქინ ბოშიქ სულიერო წიმი მიდართ დო ქოთ დინათ. თინა ამდღა პიონერო მსახურენს დო შხვა ნინაშა რაგადანან ფერ ჯგუფშა დორთაშენ ხოლო ფიქრენს.
თქვან გურშა გენორთას ღორონთიშ სიტყვაქ
19, 20. მუჭო შემლებუნა ქუვოძირათ, ნამდა მიჸორა ღორონთიშ სიტყვა?
19 იეჰოვაქ დიდ ჸოროფათ შეიოლებერო გინაშკუ მუშ სიტყვა ბიბლიაქ ოშობით ნინაშა დიჭარუკო დო ხეშა მალაფარქ ქიჸუკო არძა რჯულიშ კათაშო, ქიმუღებუდესკო ზუსტ რჩქინა ჭეშმარიტებაშ გურშენ (1 ტიმ. 2:4). თის გვალო ჯგირო უჩქ, ნამდა ხალხის უჯგუშო შეულებ მუნეფიშ სულიერ მოთხოვნილებეფიშ დაკმაყოფილება, მუჟამსით ბიბლიას კითხულენა მუნეფიშ ნინაშა.
20 მუდგა სიტუაციას ვავორდათინ, ჩქი იშენით ოკო მაფუდან გინოჭყვიდილ, ნამდა ჩქინ გურს ქიმეფჩათ სულიერ საზრდოშ მიღებაშ საშვალება. რეგულარულო ჩქინ გურიშ ნინაშა ღორონთიშ სიტყვაშ გურაფა მემსახურებ ჩქინ დო ჩქინ ოჯახიშ სულიერ სიმანგარეს დო თეთ ქუვოძირანთ, ნამდა ნამდვილო ვაფასენთ ღორონთიშ ნარაგადა სიტყვეფს (ფსალმ. 119:11).
