Kel yada, nkén mut wada a bat nunu mañge munlôm le: “Baa u nyi bé le tjañtjañ nu gôl a yé diye ngélé iba iloo tjañtjañ nu silba?” Mañge munlôm a bi nol, ndi a kal le: “Ñ, me nyi hala.” Nkén mut a bat nye le: “Inyuki ni u nyoñ tjañtjañ nu silba? Ibale u nyoñ tjañtjañ nu gôl, w’a bana moni mi nloo mi silba ngélé iba!” Mañge a ntimbhe le: “Ndi, ibale me mpohol gôl, bôt ba mbai ba ga tuk ha bé ni me. Baa u nyi moni wañen me ma tééda?” Nunu mañge munlôm a bi gwélél lem ilam yada, i i yé nseñ inyu minhôôlak mi bôt: A bi gwélél bañga pék.

Bibel i nkal le: “Tééda bañga pék ni pék i bagal mam. . . . Ha nyen w’a kil mu njel yoñ loñge, kôô woñ w’a baage bé.” (Bingéngén 3:21, 23) Jon, ngéda u nyi kii bañga pék i yé, ni lelaa u nla unda yo, hala a nla sôñ niñ yoñ. Hala a nla ki hôla bés le di nimis bañ makénd més inyu mam ma mbuu, ni le di tééda mbôô wés.

Bañga pék i yé mahéñha ni yi, yak ni nokna. I mut a gwé yi a ntééda ngandak mam mu ño wé. Mut nu a gwé nokna, a ntibil tehe lelaa jam jada li gwé maada ni lipe. Ndi mut nu a gwé pék, a gwé ngab i pôdna yi ni nokna, kayéle a tibil ha gwo i bisélél.

Kii héga, ngim mut i nla pala mal soñgol ini kaat le Kii Bibel i niiga bés?, i nla ki tibil nok yo. Bebeg ki le a ntimbhe mambadga loñge i ngéda yigil yé Bibel i ntagbe. I nla ki ba le a bi bôdôl lo i makoda, a timbhege ki loñge nyoo. Mana mam momasôna ma nla unda le a yé hol i pes mbuu, ndi baa hala a nkobla le a gwé pék? Bebeg le to. I nla ba le a yé ndik mut nu a mpala nok mam. Ndi, ibale a nha maliga i bisélél, a gwéélak yi ni nokna loñge loñge, ha nyen a ga bana pék. Ibale a nyoñ makidik malam, hala a’ unda le a nyoñ yihe, ni le a gwé toi bañga pék.

Kaat Matéô 7:24-27 i ntoñol ndémbél Yésu a bi ti, i bôt iba ba ba bi oñ mandap map. Bibel i nsébél wada le “mut pék.” A bi yén, a hoñol mam ma nla kwél nye, jon a bi oñ ndap yé i ngii ngok. A bé tehe mam haa, a ban-ga bañga pék. A bi hoñol bé le ibale a ñoñ ndap yé i ngii lisege, hala a ga yoñ ndik nye ndék moni, ni ndék ngéda. Ndi a bi unda le a gwé pék, a hoñol bikuu tole bisai bi nla pémél nye i mbus ngéda. Jon ngéda i bi oñ ndap yé, i bi kuuba bé. Inyu hala nyen di mbat le: Lelaa di nla bana, di tééda ki ini lem i i yé nseñ, le bañga pék?

Pog, béñge jam kaat Mika 6:9 i nkal: “Yak mut pék a’ kon jôl joñ woñi [hala wee jôl li Djob].” I  kon jôl li Yéhôva woñi i nkobla le di ti jo lipém. Hala a nkobla ki le di ndiihe mut nu a gwé jôl li, di diihege ki matiñ mé. Inyu ti mut lipém, u nlama yi lelaa a nhoñol. Ha nyen u nla bôdôl nye ñem, u kôna ki nye inyu too i niñ. Ibale di ntôñ le mam di mboñ ma ga tihba maada més ni Yéhôva i mbus ngéda, di yoñok ki makidik inoñnaga ni matiñ mé, hala wee di gwé bañga pék.

Iba, kaat Bingéngén 18:1 i nkal le: “Nu a mbagla ni bôt a nyéñ ngôñ yé nyemede, a nsagbe sagbe ikolba ndôñ pék lam yosôna.” Ibale di nyoñ bé yihe, di nla bôdôl bagla ni Yéhôva, yak ni litén jé. Inyu keñgle jam li, di nlama tégbaha ngéda ni bôt ba nkon jôl li Djob woñi, ba noñok ki matiñ mé. Ibale di nla, bésbomede di nlama ke i Ndap Ane, di ban-ga ki lem i kodba ni lôk kéé ikété likoda. Ngéda di nke makoda, di nlama yibil mahoñol ni miñem nwés, inyu nwas le biniigana bi tihba bés.

U héa hala, ibale di nyible Yéhôva miñem nwés ikété masoohe, di ga kônde kôôge nye bebee. (Bingéngén 3:5, 6) Ibale di nyible Yéhôva miñem nwés ni mahoñol més i ngéda di ñañ Bibel ni bikaat ntôñ u mpémés, hala a ga hôla bés i yimbe bikuu tole bisai bi mbem bés i dilo di nlo, kayéle di yi mambe makidik di nlama tep. Di nlama ki yibil miñem nwés inyu neebe maéba minhôôlak mi bikristen mi nti. (Bingéngén 19:20) Ha nyen di ga kônde lédés bañga yés pék, kayéle di ba bañ bôt ba ba ‘nkolba ndôñ pék lam yosôna’

Bañga pék i nla sôñ mahaa. Kii héga, Bibel i nkal nwaa le a ti nlô wé “njôôñ lipém.” (Efésô 5:33, MN) Lelaa munlôm a nla boñ le nwaa wé a ti nye njôôñ lipém? Ibale a ngwélél bibuk gwé ni maboñog mé inyu nyégsa nwaa i ti nye lipém, a ga kôhna lipém li inyu ndék ngéda. Bebeg le inyu keñgle mindañ, nwaa wé a nla ti nye lipém ngéda a yé ha. Ndi baa a ga bana ngôñ i unda nye njôôñ lipém ngéda a ta bé ha? Libim li ngéda, a ga boñ bé hala. Nlôm a nlama yéñ i yi kii a nla boñ, kayéle a kôhna lipém inyu ntandaa ngéda. Ibale a ñunda le a gwé litam li mbuu, a undga gwéha ni loñgeñem, hala a ga tinde nwaa i ti nye njôôñ lipém. I pot maliga, nwaa nu a yé kristen a nlama ti nlô wé lipém, to a kôli, to a kôli bé kôhna jo.​—Galatia 5:22, 23.

Bibel i nkal ki le nlôm a nlama gwés nwaa. (Efésô 5:28, 33) Mu kiki a mboñ biliya inyu tééda gwéha i nlôm, muda a nla hoñol le i yé nye loñge le a sôô nlôm ngim mam, ki le nlôm a kôli yi mam ma. Ndi baa hala a ñunda le a gwé bañga pék? Ngéda nlôm a ga sôk yi mam a bé sôô, lisuk l’a ba lelaa? Baa a ga kônde gwés nye? Hala a nla ba ndutu inyu yé. Ndi ibale muda a mbem loñge ngéda, inyu toñle nye mam ma ni ñem nwee, ibabé nkaa, nlôm a ga diihe libak jé li maliga. Ha nyen gwéha yé inyu nwaa i ga kônde nañ.

Boñge ba nlama nôgôl bagwal bap, ba nlama ki niiga bo maéba ma Yéhôva. (Efésô 6:1, 4) Baa hala a nkobla le bagwal ba nlama ti bon bap kôntô i mambén, inyu kal bo mam ba nlama boñ, ni mam ba nlama bé boñ? To ibale mañge a nyi bikila bagwal bé ba ntéé i ndap, a yik ki kogse a ga kôhna ibale a ndogop, hala a nkola bé. Bagwal ba ba gwé bañga pék ba ga hôla man wap i nok inyuki a nlama nôgôl bo.

Kii héga, hégda le mañge a nti bé bagwal bé lipém ngéda a mpôdôs bo. Ibale bagwal ba nleñ nye bibuk bibe, tole ba kogse nye ikété hiun, bebeg le hala a ga wéha mañge nyuu, a nyégsa ki nye i yip nyo wé. Ndi to hala, a nla tééda hiun mu ñem wé, a ke ki haa ni bagwal bé.

Bagwal ba ba gwé bañga pék ba ga yoñ ngéda i hoñol lelaa ba nlama kodol bon bap, ni lelaa hala a nla tihba bo ngéda ba ga nañ. Bagwal ba nlama bé ba bôt ba mpala kogse bon bap inyule ba nwéha bo nyuu. Bebeg le ba nla kwélés man ngéda a yé nyetama, ba ntoñle nye le Yéhôva a mbat le a ti bagwal bé lipém kayéle a kôhna maséé ma boga. I mbus, ngéda mañge a ga ti bagwal bé lipém, a ga yi le a yé i ti Yéhôva lipém. (Efésô 6:2, 3) Ibale ba ngwélél i njel ini, hala a nla tihba miñem mi bon bap. Ba ga nôgda le bagwal bap ba ntôñ toi bo, hala a tinde ki bo i kônde ti bo lipém. Hala ki nyen u ga tek hikuu inyu man woñ, kayéle a ga bat we mahôla ngéda a ga yik boma mam ma yé toi nye nseñ mu dilo di nlo.

Ngim bagwal i nla kon woñi le bon bap ba ga unup ibale ba nkodol bo, jon ba nkodol bé bo. Ndi kii y’a tagbe ngéda mañge a ga nañ? Baa a ga kon Yéhôva woñi, a neebe ki le i noñ matiñ ma Djob jon li yé pék? Baa a ga bana ngôñ i yible Yéhôva ñem wé ni mahoñol mé, tole a ga bagla ni bôt i pes mbuu?​—Bingéngén 13:1; 29:21.

Mut nu a nyi pom bikék inyu pémés ôñgba, a nkôôba i bisu bi ngéda inyu yi umbe ntén ôñgba a nyéñ pémés. A mpom ndik bé kék tola tola, a hégdaga le hala nyen a ga ungus yom ilam mu. Bagwal ba ba gwé bañga pék, ba ntégbaha ngandak ngeñ i nigil ni gwélél matiñ ma Djob mu niñ yap, hala a ñunda le ba nkon jôl jé woñi. Kiki ba mbagla bé ni Yéhôva, yak ni ntôñ wé, hala nyen ba nkônde bana bañga pék, inyu lédés lihaa jap i pes mbuu.

Hiki kel, di nyoñ makidik ma ma nla tihba biniñ gwés inyu ntandaa ngéda. Iloole di yoñ manjel ma kôdi inyule di nyéñ bé lep ngéda yés yañga, tole di yoñ madidik bihôô bihôô, inyuki di nla bé yoñ ndék manut kayéle di tibil hek pék? Noode hek i kilô bikuu tole bisai u ga kôhna i dilo di nlo. Yéñ maéba ma Yéhôva, u gwélél ki bañga yé pék. Ha nyen u ga bana toi bañga pék, kayéle hala a sôñ niñ yoñ.​—Bingéngén 3:21, 22.