Dua na siga e tarogi koya e dua na vulagi, “O kila tiko ni vakaruataki na kaukaua ni ilavo koula mai na siliva? E dredre ga na cauravou qo qai kaya, “Io, au kila.” “E taroga tale na vulagi qori: “Na cava ga o dau digia kina na ilavo siliva? Ke o kauta na koula ena vakaruataki na kena levu!” E kaya lesu o cauravou: “Ia, keu kauta na ilavo koula, sa na sega ni dua e via qito vata kei au. O kila na levu ni ilavo siliva au sa kumuna tu?” Na itovo e vakaraitaka na cauravou qori era rawa ni vuli kina na uabula—oya na raiyawa.

E kaya na iVolatabu: “Mo taura matua na vuku kei na raiyawa. O na qai lako vakavinaka ena nomu sala, ena sega ni tarabe na yavamu.” (Vkai. 3:21, 23) Ena taqomaki keda na noda kila na ibalebale ni “raiyawa” kei na noda bulataka. Eda na sega kina ni tarabe vakayalo, ena dei tale ga na ‘yavada.’

Na vuku kei na kilaka erau duidui mai na raiyawa. O koya e kilaka e kila na itukutuku, se na kena dina. O koya e vuku e raica rawa na veisemati ni rua na ka. Ia o koya e raiyawa e rawa ni vakayagataka nona kilaka kei na nona vuku me cakava kina e dua na ka.

Kena ivakaraitaki, e rawa ni wilika qai kila na ibalebale ni veika e volai tu ena ivola Na Cava Mada e Kaya na iVolatabu? Gauna tale ga e vuli iVolatabu tiko kina e rawa ni sauma donu na taro. Ena rairai tiko sara ena soqoni, dau vakamacala vinaka tale ga. Na ka kece qori e rawa ni kilai kina ni sa toso tiko vakayalo, ia kena ibalebale qori ni sa tiko vua na raiyawa? Sega. De tobotobo totolo, ia ke bulataka na ka dina, sa vakayagataka sara tiko ga na kilaka kei na vuku ena sala dodonu, ena kilai kina nona dau raiyawa. Ke tini vinaka nona vakatulewa, e macala ga ni dau vakasama rawa e liu, e dau raiyawa.

Eda vulica ena Maciu 7:24-27 nona vakatauvatana o Jisu e rua na turaga rau tara vale. Dua vei rau e laurai vua na “vuku.” Nona vakasamataka eliu na veika e rawa ni yaco e tara kina nona vale ena dela ni veivatu. E dau raiyawa, e yaga na ka e cakava. E sega ni vakatulewa me tara nona vale ena dela nuku baleta ni sau rawarawa qai totolo ga. E vakasamataka vakayalomatua na leqa e rawa ni yaco ena vuku ni ka e cakava. E dei tu ga nona vale ena gauna e draki ca kina. Eda na taroga kina qo, Au na rawa vakacava ni dau raiyawa, au qai saga meu dei ena itovo qori?

Kena imatai, e tukuni ena Maika 6:9: “O ira na yalomatua era na doka na yacamuni.” E okati ena dokai ni yaca i Jiova na nona rokovi. E dusia qo  ni dodonu me dokai vakalevu na ibalebale ni yacana kei na nona ivakatagedegede. Ni o rokova e dua, ena vinakati mo kila na nona nanuma. O na qai rawa ni nuitaki koya, o vuli tale ga vua, qai vakatotomuri koya. E ivakaraitaki ni raiyawa ke da kauaitaka na veika ena vakaleqa na noda veiwekani kei Jiova, da qai yavutaka noda vakatulewa ena nona ivakatagedegede.

Kena ikarua e kaya na Vosa Vakaibalebale 18:1: “Na tamata e tawasei koya e qara ga na ka e baleti koya, e saqata na vuku kece.” Ke da sega ni qaqarauni, eda rawa ni yawaki Jiova kei ira na nona tamata. Me kua gona ni yaco qori, ena vinakati meda dau veimaliwai kei ira era doka na Kalou kei na nona ivakatagedegede. Ena bibi kina meda dau tiko ena Vale ni Soqoni, meda veimaliwai wasoma kei ira na lewe ni ivavakoso vaKarisito. Ena gauna ni soqoni e dodonu meda dolava na noda vakasama kei na lomada me uqeti keda na veika e tukuni tiko.

Kena ikuri, nida talaucaka na lomada vei Jiova ena masu, eda na volekati koya. (Vkai. 3:5, 6) Nida dolava na noda vakasama kei na lomada nida wili iVolatabu kei na ivola e vakarautaka na isoqosoqo i Jiova, eda na kila kina na ka ena rawa ni yaco ena ka eda cakava, da qai kila na ka me caka. Ena vinakati tale ga meda dolava na lomada mera vakasalataki keda na  tacida tagane matua. (Vkai. 19:20) Nida dau “raiyawa” eda sa uqeta sara tiko ga na kena bulataki.

Rawa ni taqomaka na vuvale na raiyawa. Kena ivakaraitaki, e uqeta na iVolatabu me “dokai” watina “vakalevu” o yalewa. (Efeso 5:33) Cava me cakava o tagane vakawati me dokai kina vakalevu? Ke togoraka nona lewa, ena dokai ga ena dua na gauna lekaleka. Me rau kua ni veiba, ena saga o yalewa me dokai tagane ena gauna erau tiko taurua kina. Ia vakacava ke yali o watina? Ena rairai sega ni cakava qori. Ena vakasamataka tiko o koya na veika ena yaco ena gauna e se bera mai. Ke bulataka na itovo e umani ena vua ni yalotabu, e dauloloma qai yalovinaka, ena dokai koya vakalevu o yalewa. E dodonu ga me dokai watina o yalewa lotu vaKarisito ena veigauna kece.—Kala. 5:22, 23.

E kaya na iVolatabu ni dodonu mera lomani watidra na tagane. (Efeso 5:28, 33) Ena nona nanuma me lomani koya o watina ena rairai nanuma o yalewa de vinaka me vunia vei watina eso na ka e dodonu me kila. Ia vakacava, e ivakaraitaki ni raiyawa qori? Na cava ena yaco ni sa qai kila o tagane? Ena lomani yalewa kina vakalevu? Ena dredre dina vua. Ia ke qara o yalewa e dua na gauna vinaka me vakamacalataka kina vei watina ena rairai taleitaka nona dina. Ena rawa ni lomani koya kina vakalevu.

Mera talairawarawa na gone vei ira na itubutubu, mera vakavulici tale ga ena sala i Jiova. (Efeso 6:1, 4) Kena ibalebale qo me dua na lisi balavu ni ka era rawa ni cakava kei na ka me kua? E sega ni vinakati mera kila ga na gone na lawa e biu e vale se na kedra itotogi ke ca nodra itovo. Na itubutubu dau raiyawa ena vukei gone me kila na vuna me talairawarawa kina.

Kena ivakaraitaki, ke vosa vakaviavialevu e dua na gone vua e dua na nona itubutubu. Ke ra cudruvi ena gauna ga ya se ra totogitaki, era na madua kina se vakasaurarataki ira mera galu. Ia ena rairai be toka e lomana, me lai yawaki rau sara kina nona itubutubu.

O ira na itubutubu raiyawa era na vakasamataka na sala era vakavulici ira kina na luvedra kei na kena itinitini. Mera kua ni vakatulewa totolo na itubutubu baleta ga nira maduataka na ituvaki e yaco. De dua me rau vakamacalataka vakamalua, vakavinaka tale ga vei gone, ni namaka o Jiova mera dokai ira na nodra itubutubu na gone ni na yaga tawamudu ina nodra bula. Na gauna e dokai rau kina nona itubutubu sa vakaraitaka sara tiko ga ni rokovi Jiova. (Efeso 6:2, 3) Ni rau cakava qori ena tara sara ga na lomai gone. Ena vakila na nodrau veikauaitaki dina na nona itubutubu, ena dokai rau tale ga vakalevu. Rau sa dolava kina na sala me dau kerea nodrau veivuke ena gauna e cakava kina eso na vakatulewa bibi.

So na itubutubu era sega ni dau vakadodonutaki ira na luvedra nira nanuma ni na vakamosia na lomadra. Ia vakacava ni sa qase cake o gone? Ena dokai Jiova qai kila na vinaka ni kena muri na nona ivakatagedegede? Ena dolava na lomana kei na nona vakasama vei Jiova, se sega ni kauaitaka na veika vakayalo?—Vkai. 13:1; 29:21.

O koya e dau buli ivakatakarakara ena vakasamataka vinaka na ibulibuli ni ka e via bulia tiko. Ena sega ni ceuceu se sivisivi tu ga qai nuitaka ni na rawata e dua na ivakatakarakara vinaka. O ira tale ga na itubutubu era dau raiyawa era vakayagataka e levu na gauna mera vulica ra qai bulataka na ivakatagedegede i Jiova, mera doka kina na yacana. Nira kabiti Jiova tiko ga kei na nona isoqosoqo, era raiyawa kina, ra qai qarava vinaka nodra vuvale.

Na noda vakatulewa e veisiga ena tara na noda bula ena veigauna se bera mai. Vakacava mo tu vakadua qai vakasama mai na nomu vakatulewa vakariri ena gauna ga e yaco kina e dua na ituvaki. Vakasamataka vinaka na kena itinitini. Qara na veidusimaki i Jiova qai muria na vuku vakalou. Ena taqomaki keda na raiyawa, ena vakabulai keda tale ga.—Vkai. 3:21, 22.