‘Immugurammu Kari i Praktikal nga Sirib’?
SEGUN ta istoria, egga i tadday nga abbing nga lalaki nga taga-barrio. Abbo na taga-diadda nga makafi i utòna yatutta igala-galoda yaya. Nguri ta egga ira nabbisita ta lugarda, pinammuyangngan yaya na kabarriona ta arubanna yatun ira nga bisita. Nangilawan ira tu dua nga sinsiliu, tadday nga dakal nga pirâ anna tadday nga baddi nga vulawan, nga doble i balorna ta pirâ. “Mappili ka nu anni i kayàmu,” kudda ta abbing. Pilian na abbing i pirâ tapus makkarela ngana.
Mittan nga aggaw, niyavu na bisita ta abbing, “Ariammu kari ammu nga doble i balor na vulawan anne ta pirâ?” Nangngizzi yaya anna kunna, “Siempre, ammù.” “Ngatta gafu ta pirâ i apa-apammu?” kunna bisita. “Nu apammu i vulawan, doble i balor na kuartum!” “Ngem,” kunna abbing, “nu apakku i vulawan nga sinsiliu, magimmang ngana ira nga makiggayang niakan. Ammum ngana kari nu piga tu sinsiliu nga pirâ i nakolektà?” Nangipasingan yatun nga abbing tu kualidad nga pakabenefisiowan na adulto ira—i praktikal nga sirib.
Kinagi na Biblia: “Immugurammu i praktikal nga sirib anna i abilidad nga mannono. Tapus memmugug nga makalakag ka, anna ari vuluvuga mesiddukal i takkim.” (Prov. 3:21, 23) I pakannammu nu anni i “praktikal nga sirib” anna nu kunnasi iyaplika yatun i magimmugug nittam. Makoffun yatun tapenu ariattam mesiddukal ta espiritual, anna patuyagganna i ‘takki’ tam.
ANNI YATUN?
Tanakuan i praktikal nga sirib ta pakannammu anna pakalippawa. Egga i pakannammu na tadday nga nakonnug tu informasion onu kinakurug. Egga i pakalippawa na tolay nga makasingan nu anni i koneksion na kinakurug ira. Egga i sirib na tadday nu mawayyana nga usan ta praktikal nga gannug i pakannammu anna pakalippawa.
Angngariganna, ababba nga tiempo laman i mawag tapenu bibbigan anna alippawatan i libru nga Anni Talaga i Ituttuddu na Biblia? Ta paggigiammuna, awayyana nga fustu i tabbagna. Magatende ngana yaya tu study ira ta kongregasion anna makasta i pakkomentona. Ipasinganna yatun ira nga mapprogreso ngana yaya ta espiritual, ngem kayàna kari kagian nga masirib ngana yaya? Ari gapa. Baka mabi laman yaya nga mangantindi. Nu iyaplikana i kinakurug, nga matunung i pangiyusana ta pakannammu anna pakalippawa, mabbalin yaya tu masirib. Nu makasta i pattuppalan na desisionna megafu ta pinannonopanna yatun, manawag nga makepasingan ngana yaya tu praktikal nga sirib.
Mabibbig ta Mateo 7:24-27 i ilustrasion meyannung ta dua nga lalaki nga nappataddag tu balay. Nekagina nga “ma-uto” i tadday tatun nga lalaki. Pinnannonopanna nu anni i mesimmu ta mappange, yari tu nipataddagna i balena ta dadda. Masirib anna praktikal yaya. Ari yaya narrason nga mas mappo onu mas mabi nga mamataddag tu balay ta kadagatan. Masirib nga nikonsiderana i resulta ira ta mappange na kukukuanna. Turi ta zimittal i badiu, ari nga nadabba i balena. Yari tu, kunnasi tam mapeggan anna memmuguran yatun nga nabalor nga kualidad nga praktikal nga sirib?
KUNNASI NGÀ MAPEGGAN TU KUNNATUN?
Ollu, ikonsidera i kagian na Mikias 6:9: “Danuri egga i praktikal nga sirib ay ikassidda i ngagan [na Dios].” Nu ikassimmu i ngagan ni Jehova, irespetom yaya. Kebalinanna nga egga i pangikakua tam ta irepresenta na ngaganna, nelagum i estandartena ira. Tapenu merespetom i tadday, kawagan nga ammuammu nu kunnasi yaya mannono. Tapus pattalakkammu yaya anna maggigiammu ka sa, nga parigan i makasta ira nga nattuppalanna. Nu mavurung ittam ta efekto ta mappange na kukukuattam ta relasiottam kani Jehova anna nu ibase tam i desisiottam ta estandartena, mapeggattam tu praktikal nga sirib.
Mekadua, kinagi na Proverbio 18:1: “Sinni laman nga isisinnana i baggina ay ala-alagenna i pakkaragana lagapa; pammanakitanna ngamin i praktikal nga sirib.” Nu ariattam magimmugug, meyarayyu tam i baggi tam kani Jehova anna ta totolena. Kawagattam nga makikavulu ta maganassing ira ta ngagan na Dios anna mangirespeto ta estandartena. Kanayuttam nakuan nga umay ta Kingdom Hall anna makilallang ta wawwaragi. Nu egga ta study, ipafutu anna ipatalatto i naginna tam tapenu mapagaram ittam.
Nu ivuvvu tam i giffutuattam kani Jehova ta pakimallo, mas maddukko tam sa. (Prov. 3:5, 6) Nu palawattam i nono anna ipafutu tam i mabibbig ta Biblia anna ta literatura ira nga naggafu ta organisasion ni Jehova, mezipa tam i mappange nga resulta na kukukuattam anna magguyu mekunnay tatun. Ipafutu tam gapa i tabarang na manakam ira nga brother. (Prov. 19:20) Imbes nga ‘pammanakitattam ngamin i praktikal nga sirib,’ mapaladda tam yatun nga importante nga kualidad.
KUNNASI MAKOFFUN YATUN TA FAMILIÀ?
Memmuguran na praktikal nga sirib i familia ira. Angngariganna, pagaramman na Biblia i atawa nga babay nga monag nga “ikakua” i atawana. (Efe. 5:33) Kunnasi nga malà na lalaki i monag nga pangikakua? Nu vayolente yaya nga mamuersa tatun, temporario laman i malàna tu resulta. Baka mangipasingan laman tu respeto i atawa nga babay nu egga i atawana tapenu ariadda maddama. Ngem, kunnasi nu awan i atawana? Irespetona kari paga? Siguradu nga ari. Kawagan nga ikonsiderana i permanente nga solusion. Nu pannonopanna i vunga na masanto nga espiritu, gittana, aya anna pappakasippo, malàna i monag nga pangikakua na atawana. Siempre, mangipasingan lagapa tu respeto i atawa nga babay maski ari tu kunnatun i kuan na atawana.—Gal. 5:22, 23.
Kagian paga na Biblia nga ayatan na atawa nga lalaki i atawana. (Efe. 5:28, 33) Ta ayana nga ari mawawan i pagiddu na atawana, irason na atawa nga babay nga kapianan nu ilimagna i ari makasta ira nga nesimmu nga mepangngo nga mammuan na lalaki. Pangipasingan kari yatun tu praktikal nga sirib? Anni i resultana nu mammuan gabbalaman na atawana? Mas kari nga iddukanna yaya? Marigatan yaya nga kuan yatun. Ngem nu magaleg yaya tu mepangngo nga tiempo tapenu kalmadu nga iyesplika i ari makasta ira nga nesimmu, siguradu nga maappresia na atawana i pakkagina tu kurug. Mas paga nga ayatanna yaya.
Makafekto ta komunikasionnu ta mappange i paddisiplinam ta anamu ta kabbinna
Tuttulan nakuan na abbarabbing i maganada anna madisiplina ira segun ta estandarte ni Jehova. (Efe. 6:1, 4) Kayàna kari kagian nga mangngua i magana ira tu lista na kuan anna ari kuan? Ari makalanno i pakannammu ta regulasion ira ta balay onu i kastigo ta nakaliwatan. Uffunan na magana nga egga i praktikal nga siribna i anana nga alippawatan nu ngatta mawag nga mattuppal yaya.
Angngariganna, kunnasi nu bastus i pinattabbag na abbing ta yena onu yamana? Awayyana nga mepasiranan i abbing onu mafuersa yaya nga magimammo nu porayan onu insigida mapanunnutan. Ngem, baka nattaki i nonona tapus umarayyu ngana yaya ta maganana.
Nonopan na magana ira nga napeggan tu praktikal nga sirib nu kunnasi i paddisiplinada ta ánada anna i efektona yatun nira ta mappange. Ari nakuan tu insigida nga mapporay i magana ira megafu ta nepasiranan ira. Awayyana nga ta pribado, malumamo anna meddu nga iyesplikada ta anada nga ekspektan ni Jehova nga ikakuana i maganana para ta pammakapiananna. Tapus nu mepasingan na abbing nga irespetona i maganana, malippawana nga si Jehova i dayarayawanna. (Efe. 6:2, 3) Madde i futu na abbing ta kunnatun. Matagenona i napafutuan nga pangikavurung na magana, anna mas madakal i respetona nira. Mas sigga-paran ngana i abbing nga makiyoffun sonu egga ira luttuag nga importante nga gannug.
Manaki na magana ira nga matakitan i ánada yari tu ibitada i mamanunnu. Ngem, kunnasi ngana sonu paddakalda? Maganassing kari yaya kani Jehova anna ikonsidera i kinasirib ta pattuppal ta estandarte na Dios? Kayàna kari nga vukatan i futu anna nonona para kani Jehova, onu isinnana i baggina ta espiritual?—Prov. 13:1; 29:21.
Dati nga planuan na iskultor i kayàna nga paddayan tu forma. Ari yaya nga basta ngana laman nga maggavvu tapus ekspektanna tu makasta i pabbalinanna. Dakal tu oras i usan na magana ira ta paggigiammu anna ta pangiyaplika ta estandarte ni Jehova nu egga i praktikal nga siribda, nga maganassing ta ngaganna. Gukaban na ari pangisisinna ta baggida kani Jehova anna ta organisasionna, malàda i praktikal nga sirib anna mosada yatun ta pamaladda ta familiada.
Inaggaw ittam nga maddesision nga posible nga makafekto ta pattoletam ta mappange nga daga-ragun. Imbes nga gavva-gavva magguyu anna maddesision, ngatta ari ka magimmang anna mannono? Pannonopan tu mapia i mesimmu ta mappange. Mappegiya kani Jehova, anna iyaplika i nadiosan nga siribna. Memmuguran i praktikal nga sirib tam anna mangiyawa yatun tu inango nittam.—Prov. 3:21, 22
