“Gitagĩra Ũũgĩ Ũrĩa Ũhũthĩkaga”
HARĨ rũgano rũmwe rũganagwo rwĩgiĩ kahĩĩ kamwe kaarĩ gathĩni gaikaraga gĩcagi-inĩ kĩmwe. Andũ maagathekagĩrĩra magĩciria atĩ kaarĩ kariitu. Kũngĩokire ageni, andũ amwe thĩinĩ wa gĩcagi kĩu magathirĩkagia mbere ya ageni acio. Makaigagĩra ciringi igĩrĩ, ĩmwe nene ya betha na ĩngĩ nini ya thahabu ĩrĩa yakoragwo ĩrĩ ya goro maita merĩ ma ĩyo ya betha. Magacoka magakeera gacagũre ĩrĩa gekwenda. Kahĩĩ kau koyaga ciringi ya betha gagacoka gakoora.
Mũthenya ũmwe mũthuri ũmwe nĩ oririe kahĩĩ kau ũũ: “Kaĩ ũtoĩ atĩ ciringi ya thahabu nĩ ya goro maita merĩ ma ĩyo ya betha?” Gathekire gakĩmwĩra, “Nĩ njũĩ.” Nake agĩkoria, “Na nĩ kĩĩ gĩtũmaga woe ĩyo ya betha? Ũngĩoya ya thahabu, ũngĩkorũo ũrĩ na mbeca nyingĩ maita merĩ!” Nako gakĩmwĩra, “Ingihĩtia njoye ya thahabu, andũ matingĩkanjigĩra rĩngĩ. Ũreciria rĩu ndĩ na ciringi cigana cia betha?” Thĩinĩ wa rũgano rũu, kahĩĩ kau kaarĩ na ngumo ĩmwe ya bata mũno andũ othe mabataire gũkorũo nayo. Ngumo ĩyo nĩ ũũgĩ ũrĩa ũhũthĩkaga.
Bibilia yugaga ũũ: “Gitagĩra ũũgĩ ũrĩa ũhũthĩkaga o hamwe na ũhoti wa gwĩciria. Na nĩ ũrĩgeraga njĩra-inĩ yaku ũtegwĩtigĩra, na gũtirĩ hĩndĩ kũgũrũ gwaku gũkaahĩngwo.” (Thim. 3:21, 23, New World Translation) Kwoguo gũtaũkĩrũo nĩ “ũũgĩ ũrĩa ũhũthĩkaga,” na kũmenya ũrĩa tũngĩwonania no gũtũgitĩre. Ũndũ ũcio nĩ ũtũteithagia tũtikaahĩngwo kĩĩroho, na tũikare twĩhandĩte.
ŨŨGĨ ŨRĨA ŨHŨTHĨKAGA NĨ KĨĨ?
Ũũgĩ ũrĩa ũhũthĩkaga nĩ ngũrani na ũmenyo na ũtaũku. Mũndũ ũrĩ na ũmenyo, akoragwo oĩ o maũndũ tu. Nake mũndũ ũrĩ na ũtaũku no ahote kuona ũrĩa ũndũ ũmwe ũkonainie na ũrĩa ũngĩ. No mũndũ ũrĩ na ũũgĩ, nĩ ahotaga kũhũthĩra ũmenyo na ũtaũku.
Kwa ngerekano, mũndũ no erute ibuku rĩa Bibilia Ĩrutanaga Atĩa Kũna? kwa ihinda inini na ataũkĩrũo. O na angĩũrio ciũria hĩndĩ ĩyo areruta, no acokie ũrĩa kwagĩrĩire. No ambĩrĩrie gũthiĩ mĩcemanio na akaruta macokio mega mũno. Maũndũ macio mothe no monanie atĩ nĩ arakũra kĩĩroho, no kũu ti kuga atĩ rĩu arĩ na ũũgĩ. No gũkorũo hihi we nĩ mũndũ ũtaũkagĩrũo nĩ maũndũ na ihenya. No angĩhũthĩra ũmenyo na ũtaũku na njĩra ĩrĩa yagĩrĩire, no ambĩrĩrie kũgĩa na ũũgĩ. Na rĩrĩa ũndũ ũrĩa eka wagaacĩra, ũndũ ũcio nĩ wonanagia atĩ nĩ ahũthĩrĩte ũũgĩ na agecũrania kabere.
Thĩinĩ wa Mathayo 7:24-27, Jesu nĩ aaheanire ngerekano ya andũ erĩ maakire nyũmba. Ũmwe wao ataarĩirio atĩ aarĩ “mũũgĩ.” Nĩ ũndũ wa gũikia maitho kabere, aakire nyũmba yake igũrũ rĩa ihiga. Nĩ eecũranirie ũrĩa kũngĩekĩkire thutha-inĩ na akĩoya ikinya. Ndeĩrire atĩ aake igũrũ rĩa mũthanga nĩguo arĩkangie na ihenya kana nĩguo anyihie mahũthĩro. Aahũthĩrire ũũgĩ gwĩciria ũhoro wa moimĩrĩro ma ciĩko ciake. Nĩ ũndũ ũcio, rĩrĩa mũiyũro wokire, nyũmba yake ndĩagũire. Rĩu no twĩyũrie, Tũngĩhota atĩa kũgĩa na ũũgĩ ũrĩa ũhũthĩkaga na tũũgitĩre?
ŨRĨA TŨNGĨGĨA NA ŨŨGĨ ŨRĨA ŨHŨTHĨKAGA
Wa mbere, ririkana ciugo cia Mika 6:9: “Nake mũndũ ũrĩa mũũgĩ no etigĩre rĩĩtwa rĩaku [Ngai].” Gwĩtigĩra rĩĩtwa rĩa Jehova nĩ kuuga tũmũtĩage. Ũguo nĩ kuuga tũmũtĩage biũ nĩ ũndũ wa kĩrĩa rĩĩtwa rĩake rĩrũgamĩrĩire o hamwe na ithimi ciake. Nĩguo ũhote gũtĩa mũndũ, ũbataraga kũmenya ũrĩa onaga maũndũ. Weka ũguo, no ũhote kũmwĩhoka, wĩgerekanie nake, na ũgĩe na irathimo ta ciake. Kwoguo angĩkorũo nĩ tũrecũrania ũrĩa moimĩrĩro ma ciĩko citũ mangĩhutia ũrata witũ na Jehova, na angĩkorũo tũratua matua kũringana na ithimi ciake, nĩ tũragĩa na ũũgĩ ũrĩa ũhũthĩkaga.
Wa kerĩ, Bibilia yugaga ũũ: “Mũndũ ũrĩa ũtendaga gũtũũrania na andũ arũmagĩrĩra o merirĩria make; ningĩ areganaga na matua mothe ma ũũgĩ ũrĩa mũkinyanĩru [ũhũthĩkaga].” (Thim. 18:1, Holy Bible in Gĩkũyũ) Nĩ ũndũ ũcio tũngĩaga kwĩmenyerera, no twĩkore twĩyamũranĩtie na Jehova na andũ ake. Nĩguo tũtigeke ũguo, tũkũbatara kũhũthĩra mahinda na arĩa matĩaga rĩĩtwa rĩa Ngai o hamwe na ithimi ciake. Ningĩ nĩ twagĩrĩirũo gũthiaga mĩcemanio nĩguo tũkanyitanĩra na aarĩ na ariũ a Ithe witũ. Rĩrĩa tũrĩ mĩcemanio, nĩ twagĩrĩirũo kũhingũra ngoro na meciria nĩguo maũndũ marĩa tũraigua matũhutie.
Makĩria ma ũguo, twaitũrũrĩra Jehova ngoro citũ kũgerera mahoya nĩ tũrĩmũkuhagĩrĩria makĩria. (Thim. 3:5, 6) Rĩrĩa twahingũra ngoro na meciria maitũ tũgĩthoma Bibilia na mabuku ma ithondeka rĩa Jehova, nĩ tũmenyaga ciĩko citũ igũkorũo na moimĩrĩro marĩkũ na tũkahota gũtua matua marĩa magĩrĩire. Ningĩ nĩ tũrabatara kũhingũra ngoro citũ nĩguo twamũkĩre ũtaaro wa aarĩ na ariũ a Ithe witũ arĩa agimaru kĩĩroho. (Thim. 19:20) Na handũ ha ‘kũregana na ũũgĩ ũrĩa ũhũthĩkaga’ nĩ tũrĩĩrutanagĩria kũũkũria.
ŨRĨA ŨŨGĨ ŨRĨA ŨHŨTHĨKAGA ŨNGĨTEITHIA FAMĨLĨ
Ũũgĩ ũrĩa ũhũthĩkaga no ũgitĩre famĩlĩ. Kwa ngerekano, Bibilia nĩ ĩkĩraga atumia ngoro mahe athuri ao “gĩtĩo kĩnene.” (Ef. 5:33) Ĩndĩ mũthuri angĩheo gĩtĩo ta kĩu atĩa? Angĩhũthĩra gĩthũri kwĩra mũtumia wake amũtĩe-rĩ, ndangĩkorũo na moimĩrĩro mega. Mũtumia ahota gũtĩaga mũthuriwe o rĩrĩa arĩ hakuhĩ nĩguo etheme ngũĩ, no ndarĩkaga ũguo kuuma ngoro. No hihi no amũtĩe rĩrĩa atarĩ hakuhĩ? No kũhoteke ndangĩka ũguo. Kwoguo mũthuri nĩ arabatara gwĩciria ũndũ ũrĩa ũngĩrehe moimĩrĩro mega. Angĩonania maciaro ma roho ta wendo na ũtugi, mũtumia no amũhe gĩtĩo kĩnene. O na kũrĩ ũguo, mũtumia Mũkristiano nĩ agĩrĩirũo gũtĩaga mũthuri wake gũtekũmakania kana mũthuri nĩ arahũthĩra gĩthũri.—Gal. 5:22, 23.
Ningĩ Bibilia nĩ yugaga atĩ no mũhaka mũthuri endage mũtumia wake. (Ef. 5:28, 33) Mũtumia ahota kwĩĩra atĩ, nĩguo mũthuri wake athiĩ na mbere kũmwenda, no amũhithe maũndũ mamwe marĩa mangĩmũrakaria angĩmamenya. No hihi ũndũ ũcio nĩ ũronania atĩ mũtumia arĩ na ũũgĩ ũrĩa ũhũthĩkaga? Mũthuriwe angĩcoka amenye maũndũ marĩa ahithagwo-rĩ, moimĩrĩro mangĩkorũo marĩ marĩkũ? Hihi nĩrĩo ekũmwenda makĩria? Ũndũ ũcio no ũkorũo ũtarĩ mũhũthũ harĩ we. Ĩ korũo mũtumia no acarie mahinda ma gũtaarĩria mũthuriwe maũndũ macio handũ ha kũmũhitha, githĩ to kũhoteke mũthuriwe akenio nĩ wĩhokeku wake! Hĩndĩ ĩyo nĩrĩo mũthuri angĩmwenda makĩria.
Njĩra ĩrĩa ũrahũthĩra kũrũnga ciana ciaku nayo no yagĩrie kana ĩthũkie ũrata waku nacio
Ciana nĩ ciagĩrĩirũo gwathĩkagĩra aciari na ciagĩrĩire kũrerũo na njĩra cia Jehova. (Ef. 6:1, 4) No hihi ũguo nĩ kuuga atĩ aciari magĩrĩirũo kũigĩra ciana mawatho maingĩ ma kũrũmĩrĩra? Kũrĩ na maũndũ maingĩ marabatarania, to gwĩkĩrĩra mwana mawatho maingĩ kana kũmũherithia rĩrĩa ehia. Mũciari ũrĩ na ũũgĩ ateithagia mwana gũtaũkĩrũo nĩ bata wa gwathĩka.
Kwa ngerekano, ta tua atĩ mwana nĩ aikĩria mũciari wake ciugo itarĩ cia gĩtĩo. Kũgũthũkĩra mwana ũcio kana kũhiũha kũmũherithia no kũmũconorithie kana gũtũme akirĩre mũciari. No aige marakara ngoro-inĩ na thutha-inĩ matũme ũrata wake na aciari ũthire.
Aciari marahũthĩra ũũgĩ nĩ meciragia njĩra ĩrĩa maraherithia ciana nayo, na mageciria moimĩrĩro megũkorũo marĩ marĩkũ harĩ ciana. Aciari matiagĩrĩirũo kũhiũha gũtua matua atĩ tondũ ciana nĩ ciamaconorithia. No maranĩrie na mwana ũcio keheri-inĩ na njĩra ya wendo, na mamũtarĩrie atĩ Jehova nĩ endaga athĩkĩre aciari nĩguo akaagunĩka tene na tene. Mwana ũcio onania gĩtĩo harĩ aciari, egwĩka ũguo akĩmenyaga atĩ nĩ Jehova aratĩa. (Ef. 6:2, 3) Kwarĩria mwana na njĩra ta ĩyo no kũmũhutie ngoro. Nĩ arĩonaga atĩ aciari nĩ maramũrũmbũyia na nĩ arĩmatĩaga makĩria. Na njĩra ĩyo mwana nĩ arĩkoragwo ahingũrĩirũo mũrango wa kwĩyaria rĩrĩa rĩothe kwoimĩra ũndũ.
Aciari amwe no maage kũrũnga mwana magĩĩtigĩra kũmũrakaria. No gũgathiĩ atĩa rĩrĩa mwana ũcio akaneneha? Hihi nĩ agetigĩra Jehova na akũũrane atĩ mũndũ agĩaga na ũũgĩ nĩ ũndũ wa gwĩtĩkĩra ithimi cia Ngai? Hihi nĩ akona bata wa kũhingũrĩra Jehova ngoro na meciria make, kana nĩ gũtĩganĩria agaatiganĩria maũndũ ma kĩĩroho?—Thim. 13:1; 29:21.
Mũndũ ũĩ gũconga indo wega ambaga gwĩcũrania kĩrĩa arenda gũthondeka. Ndangĩconga atarĩ na mũbango acoke erĩgĩrĩre kĩndũ kĩega. Aciari marĩ na ũũgĩ nĩ monanagia atĩ nĩ metigĩrĩte Jehova na njĩra ya kwĩruta na kũhũthĩra ithimi ciake ũtũũro-inĩ wao. Maga kwĩyamũrania na Jehova na ithondeka rĩake, nĩ magĩaga na ũũgĩ na makaũhũthĩra gwaka famĩlĩ ciao.
O mũthenya nĩ tũbataraga gũtua matua mangĩhutia nginya ũtũũro witũ wa thutha-inĩ. Na githĩ ti wega kwamba gwĩciria handũ ha kũhiũha gũcokia ũndũ kana gũtua itua rĩa na ihenya? Nĩ wega gwĩcũrania moimĩrĩro ma ũndũ ũrĩa tũrenda gwĩka. Rekei tũcaragie ũtongoria wa Jehova na tũkahũthĩra ũũgĩ wake. Tweka ũguo, tũrĩkoragwo tũgitĩrĩte ũũgĩ ũrĩa ũhũthĩkaga na nĩ ũgaatũma tuone muoyo.—Thim. 3:21, 22.
