Ifuku dimu, ñenji wumu wamwihwili iwu kansi weyala nindi, “Komana eyi hiweluka neyi wuseya wewayawaya dawuru weneni kapampa kayedi kubadika wuseya wasilivaku, tahindi?” Iwu kansi weyala wamwemweteli nakuhosha nindi, “Eña, neluka.” Ñenji wamwihwili nindi, “Hanu dinu wanonelañadi iwayawaya dasiliva? Neyi wunona iwayawaya dawuru, wukwikala namali amavulu kubadika ewayawaya dasiliva kapampa kayedi!” Iwu kansi weyala wahosheli nindi, “Neyi ninona iwayawaya dawuru, antu akuleka kuhema nanami. Muneluki ntahi mawayawaya asiliva inidi nawu?” Iwu kansi weyala muniyi nsañu, wamwekesheli chilwilu chinateli kukwasha akulumpi kuhetela mumaana alala.

Bayibolu yahosha nawu: “Hembaku maana alala nikutoñojoka kwakashinshi, bayi yakakufuma kumesu eyuku; wakenda munjila yeyi chakadi kwakama, nimwendu weyi hiwakahukanaku.” (Yish. 3:21, 23) Dichi, kwiluka mwatalisha “maana alala” nichakuyizatisha kukutukwasha etu aweni. Kwatukwashaña kubula kuhukana kuspiritu nikutwalekahu kuhemba “mwendu” wetu chachiwahi.

Maana alala ambuka nakwiluka nikutiyishisha. Muntu weluka, wekalaña nansañu hela yikuma yayivulu. Muntu watiyishishaña, wamonaña chikuma chimu chichinadifwani nachikwawu. Muntu wukweti maana, welukaña nikutiyishisha chiwahi kulonda jimukwashi kuzata munjila yayiwahi.

Chakutalilahu, muntu nateli kutaña nikutiyishisha hakapinji kantesha mukanda waChumanyi Chacheni Chatañishaña Bayibolu? Hampinji yinakumudizishawu Bayibolu, nateli kwakula mwalala. Nateli cheñi kutachika kuya nakupompa kuchipompelu nikwakulahu munjila yayiwahi. Yuma yejimiyi yinateli kumwekesha nawu nakuyilaku hambidi kuspiritu, hanu dinu komana chinayi mukwila nawu nekali namaana? Kwakulehi. Nateli hohu kukwata nsañu swayi. Hela chochu, neyi yazatisha chalala chinakudizayi, kuzatisha chiwahi kwiluka nikashinshi kukumukwasha kwikala namaana. Neyi yuma yinafuukuliyi yinendi chiwahi, chikumwekesha hatooka to-o nawu wudi namaana alala.

Hamukanda waMatewu 7:24-27 hekala chakutalilahu chaYesu chawantu ayedi atuñili matalawu. Wumu amulumbulula nawu wadiña ‘namaana.’ Chineli watoñojokeleli chadimu yuma yikamwekana kumbidi, iwu iyala watuñili itala dindi hamalola. Welukileñahu dehi yuma yakumbidi. Watoñojokeli wanyi nindi chikwikala chapela hela wukunyakashana kutuña itala dindi hawusekulula. Chineli wadiña namaana, watoñojokeli chadimu yuma yikafumamu. Dichi chenjili dibaji, itala dindi dapulukili. Tunateli kudihula netu, Tunateli kwikala ñahi nikukiña yilwilu yayiwahi yamaana alala?

Chatachi, ilukenu nenu mukanda waMika 6:9 wahosha nawu: “Kutiya ijina [daNzambi] woma chikweti maana.” Kutiya woma ijina daYehova kwabombelamu  kumulemesha. Kwatalisha mukulemesha chikupu mwatalisha ijina dindi, kushilahu tuhu niyuma yakeñayi. Hakwila nawu mulemeshi muntu, mwatela kwiluka chatoñojokañayi. Kuhiñahu, munateli kumukuhwelela, kudizila kudi yena nikwimbujola yuma yelañayi. Neyi tunakwakama yuma yikafumamu kutalisha hawubwambu wetu naYehova muloña wayilwilu yetu nawa neyi tunakufuukula kushindamena hayuma yakeñayi, dikwila nawu tunatachiki kwikala namaana alala.

Chamuchiyedi, mukanda waYishimu 18:1 wahosha nawu: “Wadambulaña hakanka windi nafwili mwakeñayi yena hohu, hakuzuwila maana alala ejima.” Neyi kubabala nehi, tunateli kudambula kudi Yehova niantu jindi. Hakwila nawu tubuleña kudambula, twatela kwikalaña hamu nawantu atiyaña woma ijina daNzambi nikulemesha yuma yakeñayi. Neyi chinatwesheki twatela kwikalaña Hetala daWanta kulonda tudikundeña nachipompelu chawakwaKristu mpinji yejima. Hampinji yitunakupompa, twatela kwenzununa yitoñojoka ninyichima yetu kulonda yuma yinakutañishawu yishikeña hanyichima yetu.

Kubombela hachumichi, neyi tumulomba Yehova chakufuma hamuchima, tukukundama kwakwihi nayena. (Yish. 3:5, 6) Neyi twenzununa yitoñojoka ninyichima yetu hampinji yitunakutaña Bayibolu ninyikanda yatusonekelañawu mukuloñesha kwaYehova, tukwilukila chadimu yuma yikufuma muyilwilu yetu nawa chikutukwasha kwiluka chakwila. Twatela cheñi kwenzununa nyichima yetu kulonda tutambwili kufumba kunakutufumbawu kudi amanakwetu apama. (Yish. 19:20) Dichi, neyi tukwila  mwenimu tukukoleshaña ichi chilwilu chalema chatela ‘tukaaneña maana alala ejima.’

Maana alala anateli kukiña yisaka. Chakutalilahu, Bayibolu yakoleshaña mumbanda ‘kulemesha chikupu’ nfumwindi. (Efwes. 5:33) Iyala anateli kumulemesha ñahi? Neyi wukukanjikija hela kukeña nindi amulemeshi, akumulemeshaña hohu hakapinji kantesha. Hakwila nawu yakañesheña yikonkojola, mumbanda wasumbuka neyala wamuchidiwu wukumwekeshaña kalemesha chiña neyi nfumwindi wudi hohu. Hela chochu, komana wukumulemeshaña neyi nfumwindi hosiyi? Chakadi nikujina kwila chimwekana nehi. Watela kwiluka yuma yikuletesha amulemesheña mpinji yejima. Neyi wukumwekesha nyikabu yaspiritu yidi neyi kukeña niluwi, ñodindi wukumulemesha chikupu. Hela chochu, mumbanda mukwaKristu watela kumwekesha kalemesha kudi nfumwindi hela chakwila watelela kumulemesha hela nehi.—Ŋal. 5:22, 23.

Bayibolu yahosha cheñi nawu iyala watela kukeña ñodindi. (Efwes. 5:28, 33) Hakufwila nindi atwalekihu kumukeña kudi nfumwindi, mumbanda nateli kutoñojoka nindi watela kuswekaku nsañu yatama yinateli kumuneñesha nfumwindi hela chakwila watelela kuyiluka. Mwalala yitoñojoka yamuchidiwu yamwekeshaña maana alala? Mukuhita kwampinji, nfumwindi wukwila ñahi neyi yeluka nsañu yaswekeliyi ñodindi? Komana wukuswejelaku kumukeña tahindi? Chumichi chikumukalila. Ilaña neyi mumbanda yawanaku mpinji yakumulumbulwila mukuwunda nsañu yatama yamwekeni, nfumwindi wukutiya kuwaha nakashinshi kakumwekeshayi ñodindi. Dichi wukumukeña nankashi.

Anyana atela kwovwahila anvwali jawu nikuyifumba munjila yakeñayi Yehova. (Efwes. 6:1, 4) Komana chumichi chinayi mukwila nawu anvwali atela kusoneka ndandanda yanshimbi jatela kulondelayi mwana nijatela kubula kulondelayi? Kwakeñekaña yuma yayivulu kubadika kwiluka hohu nshimbi jahetala hela kubabesha kunateli kutambulayi muloña wakuluwañesha. Nvwali wudi maana alala wakwashaña mwanindi kulonda yeluki chikuletesha yovwahili.

Chakutalilahu, twili netu mwana nahoshi nakasawuntu kudi nvwali yindi wamumbanda hela weyala. Kuzuwa hela kunyakala kumubabesha chakadi kutoñojokahu kunateli kumutiyisha nsonyi mwana hela kumuletesha yamweni. Kubombelahu, wukuhilila mukachi kamuchima chakwila wukutachika kuchiina anvwali jindi.

Anvwali adi namaana alala akutoñojoka njila yakumubabeshelamu mwanawu nawa chumichi chikamukwasha mwana kumbidi. Anvwali hiyatela kunyakashana nakuzuwila mwanawu muloña nayitiyishi nsonyiku. Hadaha anateli kumutambika mwanawu kumbadi nakuhanjeka nindi mukuwunda nimukukeña, nakumulumbulwila nawu Yehova wakeñaña nindi yovwahileña anvwali kulonda yakekali nankisu haya nyaaka. Kuhiñahu, neyi mwaana yamwekesha nindi nakwovwahila anvwali jindi, wukwiluka nindi nakulemesha Yehova. (Efwes. 6:2, 3) Kuhanjeka muniyi njila kunateli kumushika mwana hamuchima. Wukwiluka nindi anvwali jindi amwakamena nawa wukutwalekahu kuyilemesha. Chumichi chikukwasha mwana kutemukila kudi anvwali kulonda amukwashi neyi wudi nakukala.

Anvwali amakwawu atiyaña kutama hadaha neyi aneñesha anyanawu, dichi alekaña kuyifumba. Hela chochu, chumanyi chikamwekena neyi mwana nakuli? Komana wakamutiyaña Yehova woma nikwiluka kuwaha kwafumaña mukulondela yuma yakeñañayi Nzambi? Komana wakenzununaña muchima windi niyitoñojoka yindi kudi Yehova, tahindi wakadambula yomweni kuspiritu?—Yish. 13:1; 29:21.

Mukwakubaza wamuwahi, watoñojokaña chadimu chuma chinakukeña kubazayi. Bayi neyi wakuminaña hohu dakufumisha yibalabala nakukuhwelela kubazamu chuma chachiwahiku. Anvwali adi namaana alala ekalaña nampinji yakudiza nikwila yuma yakeñayi Yehova, dikwila nawu kutiya ijina dindi woma. Neyi akubula kudambula aweni kudi Yehova nikuloñesha kwindi, akwikala namaana alala nikuyizatisha kukwasha chisaka chawu.

Hefuku-hefuku, twekalaña nayuma yayivulu yakufuukula yinateli kutukwasha muchihandilu chetu chakumbidi hela nehi. Chatela munyakaleña kwakula nikufuukulahu swayi, kwila muhudikila nakutoñojokahu nehi? Ilukenu chikupu yuma yikafumamu. Keñenu wunlomboli waYehova nawa zatishenu maanindi awuNzambi. Neyi tukwila mwenimu, tukuhemba maana alala nawa akatwinka wumi.—Yish. 3:21, 22.