Ka letšatši le lengwe, monna yo a bego a etile o ile a botšiša mošemane yoo gore: “Na ga o tsebe gore tšhelete ya tšhipi ya gauta e reka dilo tše dintši go feta ya silifera?” Mošemane yoo o ile a araba a myemyela a re: “Ee, ke a tseba.” Ke moka moeng yoo a botšiša gore: “Bjale go re’ng o tšea tšhelete ya tšhipi ya silifera? Ge o ka tšea ya gauta, o tla ba o tšere yeo e rekago dilo tše dintši go feta ya silifera!” Mošemane yoo o ile a re: “Eupša ge nka tšea tšhelete ya gauta, batho ba ka se sa raloka papadi ye le nna. Na o a tseba gore ke šetše ke kgobokeditše ditšhelete tše kae tša silifera?” Mošemane wa nonwaneng ye o be a na le seka seo se ka holago batho ba bagolo, e lego bohlale.

Beibele e re: “Lota bohlale le tlhaologanyo. Ka gona o tla sepela o šireletšegile tseleng ya gago le leoto la gago le ka se kgopše ke selo.” (Die. 3:21, 23) Ka gona go tseba seo “bohlale” bo lego sona le go bo diriša go tla re šireletša. Se se re thuša gore re se ke ra aroga therešong, bja dira gore “leoto” la rena le se ke la aroga tseleng.

Bohlale bo fapane le tsebo le kwešišo. Motho o ba le tsebo ka morago ga gore a ithute. Ke moka o ba le kwešišo ka morago ga gore a bone kamoo tsebo yeo e šomago ka gona. Mafelelong, o bontšha bohlale ge a kopanya tsebo yeo le kwešišo gomme a di šomiša.

Ka mohlala, motho a ka fetša kapela puku ya Ke Eng Seo ge e le Gabotse Beibele e se Rutago? gomme a e kwešiša. Nakong ya thuto, a ka araba dikarabo gabotse. A ka thoma go ba gona dibokeng le go araba. Dilo tše ka moka di ka bontšha gore o tšwela pele gabotse moyeng. Eupša na seo se ra gore o na le bohlale? Aowa. A ka no ba a kgona go ithuta ka lebelo. Lega go le bjalo, ge a diriša seo a ithutago sona, a diriša tsebo le kwešišo ka tsela e nepagetšego, o ba bohlale. Ge e ba diphetho tša gagwe di atlega gomme di bontšha gore o naganišišitše e sa le pele, go ba molaleng gore o hweditše bohlale.

Mateo 7:24-27 e bolela ka papišo ya Jesu ya banna ba babedi bao ba agilego dintlo. Yo mongwe wa banna bao o hlaloswa e le yo a nago le “temogo.” Ka ge monna yo a ile a naganišiša e sa le pele ka seo se ka diregago, o ile a aga ntlo ya gagwe godimo ga leswika. O be a bonela dilo pele e bile a le bohlale. Ga se a ka a ipotša gore ge a ka aga ntlo santeng o tla fetša kapela goba a ka se šomiše tšhelete e ntši. Ka bohlale, o ile a nagana ka dikotsi tšeo di ka tšwelelago ge nako e dutše e eya. Ka gona ge ledimo le etla, ntlo ya gagwe e ile ya se we. Bjale potšišo ke gore: Ka ge bohlale bo le bohlokwa, re ka bo hwetša bjang le go dula re na le bjona?

Sa mathomo, ela hloko gore Mika 6:9 e re: “Motho wa bohlale bjo bo holago o tla boifa leina la  [Modimo].” Go boifa leina la Jehofa go bolela go mo hlompha. Go bolela go hlompha seo leina la gagwe le se emelago, go akaretša le ditekanyetšo tša gagwe. E le gore o hlomphe motho, o swanetše go tseba seo a se naganago. Ke moka o ka mmota le go ithuta go yena, wa mo ekiša. Ge e ba re tshwenyega ka ditlamorago tša ditiro tša rena tswalanong ya rena le Jehofa gomme re dira diphetho ka go dumelelana le ditekanyetšo tša gagwe, re tla ba le bohlale.

Sa bobedi, Diema 18:1 e re: “Yo a ipeago lekatana o tsoma kganyogo ya gagwe ya boithati; o gana bohlale ka moka.” Ge e ba re sa hlokomele, re ka ikaroganya le Jehofa le batho ba gagwe. E le gore re pheme seo, re swanetše go fetša nako le batho bao ba boifago leina la Modimo le go hlompha ditekanyetšo tša gagwe. Re swanetše go ba gona Holong ya Mmušo ge maemo a dumela, re dule re sepela le phuthego. Ge re le dibokeng, re swanetše go bula menagano le dipelo tša rena gomme re dumelele seo se rutwago se re kgoma pelo.

Go oketša moo, ge e ba re tšhollela Jehofa sa mafahleng ka thapelo, re tla mmatamela. (Die. 3:5, 6) Ge re bula menagano ya rena le dipelo tša rena ge re bala Beibele le dikgatišo tše di tšweletšwago ke mokgatlo wa Jehofa, re kgona go bona e sa le pele ditlamorago tša ditiro tša rena gomme ra dira se se nepagetšego. Le gona re swanetše go amogela keletšo yeo re e newago ke bana babo rena bao ba godilego moyeng. (Die. 19:20) Ge re ka dira dilo tšeo, re tla ba bohlale le go feta, go e na le go ‘gana bohlale ka moka.’

Bohlale bo ka šireletša malapa. Ka mohlala, Beibele e eletša mosadi gore a ‘hlomphe monna wa gagwe ka mo go tseneletšego.’ (Baef. 5:33) Monna a ka dira’ng gore mosadi wa gagwe a mo hlomphe ka mo go tseneletšego? Ge e ba a gapeletša mosadi gore a mo hlomphe, tlhompho yeo e tla ba ya nakwana. Mosadi wa monna yo bjalo a ka mmontšha tlhompho ge feela a le gona mo kgauswi, go no phema dintwa. Lega go le bjalo, na o tla mo hlompha ge a se gona mo kgauswi? Gantši go ka se be bjalo. Monna o swanetše go naganela pele. Ge e ba a bonagatša dika tše di enywago ke moya, a rata mosadi wa gagwe e bile a le botho, gona mosadi wa gagwe o tla mo hlompha ka mo go tseneletšego. Ke therešo gore mosadi wa Mokriste o swanetše go bontšha monna wa gagwe tlhompho go sa šetšwe gore e mo swanetše goba ga se ya mo swanela.​—Bagal. 5:22, 23.

Le gona Beibele e re monna a rate mosadi wa gagwe. (Baef. 5:28, 33) Mosadi a ka nyaka go dula a ratwa ke monna wa gagwe ka go utela monna wa gagwe dilo tše di sa kgahlišego tše a di dirilego, tšeo monna a nago le tshwanelo ya go di tseba. Eupša na seo se bontšha bohlale? Ge monna a ka tseba diphiri tšeo, go tlo direga’ng? Na o sa tlo mo rata kudu? Seo se ka mo thatafalela. Eupša ge mosadi a ka hwetša nako e botse ya go hlalosetša monna wa gagwe ka boleta diphiri tšeo, gantši monna wa gagwe o tla leboga go botega ga mosadi wa gagwe. Ka gona, o tla mo rata kudu le go feta.

Bana ba swanetše go kwa batswadi ba bona le go laiwa go ya ka ditsela tša Jehofa. (Baef. 6:1, 4) Na se se bolela gore batswadi ba swanetše go beela bana ba bona melao e mentši ya dilo tšeo ba swanetšego go di dira le tšeo ba sa swanelago go di dira? Ga se gwa lekana gore batswadi ba botše bana ba bona melao ya ka gae le dikotlo tša go se latele melao yeo. Batswadi ba bohlale ba thuša ngwana wa bona go kwešiša lebaka leo a swanetšego go kwa.

Ka mohlala, a re re ngwana o bolela le yo mongwe wa batswadi ba gagwe ka lenyatšo. Go mo omanya goba go mo otla o sa galefile go ka swabiša ngwana goba gwa mo dira gore a se sa go bolediša. Go oketša moo, ka pelong a ka ba a kgopišegile, e lego seo se ka mo dirago gore a le hloye.

Batswadi ba bohlale ba tlo nagana ka tsela yeo ba layago bana ba bona le kamoo seo se tlago go kgoma bana ba bona nakong e tlago. Batswadi ga se ba swanela go kitimela go laya ngwana feela ka gobane a ba lešitše dihlong. Mohlomongwe ge ba le noši, ba ka boledišana le ngwana wa bona ka boleta le ka lerato, ba mo hlalosetša gore Jehofa o letetše gore a ba hlomphe e le gore dilo di tle di mo sepelele gabotse. Ke moka ge ngwana a bontšha gore o hlompha batswadi ba gagwe, o tla lemoga gore o hlompha Jehofa. (Baef. 6:2, 3) Go laya ngwana ka tsela ye go tla kgoma pelo ya gagwe. O tla bona gore batswadi ba gagwe ba a mo rata, gomme a ba hlompha le go feta. Se se bulela ngwana sebaka sa gore a tle a kgopele thušo go batswadi ba gagwe ge a ka ba le bothata nakong e tlago.

Batswadi ba bangwe ga ba phošolle ngwana wa bona ka ge ba nagana gore ba tla mo kweša bohloko. Eupša go tlo direga’ng ge ngwana yoo a dutše a gola? Na o tla boifa Jehofa le go lemoga bohlale bja go phela ka melao ya Gagwe? Na o tla kgona go ba le tswalano le Jehofa, goba na o tlo tlogela therešo?​—Die. 13:1; 29:21.

Mmetli yo a nago le bokgoni o nagana e sa le pele ka selo seo a nyakago go se betla. Ga a no betlabetla gabedi gararo gomme a letela gore go tšwelele selo se sebotse. Ka mo go swanago, batswadi ba bohlale ba fetša diiri tše dintši ba ithuta ditekanyetšo tša Jehofa le go di diriša, ka go re’alo ba kgona go boifa leina la gagwe. Ka go se dulele kgole le Jehofa le mokgatlo wa gagwe, ba hwetša bohlale gomme ba bo diriša go tiiša malapa a bona.

Letšatši le letšatši, re swanelwa ke go dira diphetho tšeo di tlago go kgoma maphelo a rena mengwageng e tlago. Go e na le go dira diphetho ka lebelo o sa nagane, emanyana ke moka o ipotšiše dipotšišo. Naganišiša ka mafelelo a diphetho tša gago. Kgopela Jehofa gore a go hlahle gomme o diriše bohlale bja gagwe. Ge o ka dira bjalo, o tla ba o lotile bohlale gomme o tla hwetša bophelo.​—Die. 3:21, 22.