A ta er a klebesei e a chad el mle oldingel er tia el basio a uleker er ngika el buik el kmo, “Kau ngdiak modengei el kmo tia el udoud el kolt a lmuut el chachisois a klungel er a udoud el silber?” Me ngika el kekerei el buik a mlo klikmechur e dilu el kmo, “Ochoi, ak medengei.” Me ngika el chad a lmuut el oker er ngii el kmo, “Engdi, ngera uchul me ke melai a silber el udoud? A omnguu a kolt el udoud e ngchachisois a klungel er a silber el udoud.” Me ngika el buik a ulenger el kmo, “A lsekum ak nguu a kolt el udoud e a rechad a mo diak el loruul er tia el tekoi el loruul er ngii. Kau ke medengei el kmo ngmla mo tela ildisel el udoud el silber a blak chudel?” Me ngika el buik el ngar er tia el cheldecheduch a ulechotii a blekeradel el remeklou el chad a sebechir el suubii. E tiang a dousbech a llomeserreng me a utebengel a tekoi el mo uchul a klungioled.

A bades a melekoi el kmo: “Morekedii a llomeserreng ma utebengel a tekoi. Seikid e ng mo ungil omerolem, e diak le motab ochim.” (Osisechakl 3:21, 23) Me sel bo dodengei el kmo ngera llomeserreng me a utebengel a tekoi e mekera dousbech er ngii er a klengar er kid e ngmo uchul a ulekerreu el kired. Tiang a ngosukid el mo melemolem el oba blakerreng e melemolem el merael el ungil a blekeklel a ‘ochid.’

A llomeserreng me a utebengel a tekoi a kakerous ngii me a klemedengei me a di klaodengei er a tekoi. A chad el oba klemedengei a suub a betok el tekoi e diak lobes. E a chad el ngar er ngii a klaodengei er ngii a sebechel el mtab a omesodel a kakerous el tekoi me a belkul. E a chad el mellomes a rengul a sebechel el ousbech er a klemedengei er ngii me aike el lodengei el tekoi el mo uchul a klungiolel.

El uai tiang, ngsebechel a chad el di chelsel a kedeb el taem, e ngchoiuii a babier el Ngerang Mera el Lolisechakl a Biblia? Me sel losuub er a Biblia, e ngsebechel el mo melemalt a nger er ngii. Ngdirrek el sebechel el kmal mo ungil a nger er ngii sel lebo er aike el miting er a ongdibel. E aikang a olechotel a kmo, ngolengeriakl er a omesiungel. Engdi tiang, ngbelkul a kmo, ngmla mo mellomes a rengul? Ngdiak el uaisei. Alta e ngua tirke el chad el mereched el mo medengei a tekoi. Me nguaisei, engdi sel lousbech er a klaumerang er ngii el ngar er aike el tekoi el loruul, el okiu a klemedengei er ngii, me a utebengel a tekoi, e ngmo olecholt er a llomeserreng. Me a lsekum a tekoi el lolilt el mo meruul a mo ungil, e le ngii el kerekikl el melatk er a tekoi er a uchei er a loruul er ngii, e ngobeketakl el kmo ngmla mo mellomes a rengul.

Ngar er a Mateus 7:24-27, e a Jesus a milsaod er a okesiu er a reteru el chad el ulemekedechor a blai. A ta er tirka el chad a mle “mellomes a rengul,” me ngmillatk aike el tekoi el sebechel el mo duubech, me ngmilekedecherur a blil er a risois. Ngmirruul a tekoi el oltirakl er a klemedengei er ngii. Ngdimlak lomdasu el kmo, ngbeot a cheral a lomekedechor er a blil er a chelechol. Ngbai uleba llomeserreng e millatk er a kemanget el taem er a uchei er a bo lomekedechor er a blil. Me sera lemei a mesisiich el eolt, e ngdimlak le mekesakl a blil. Me a ker a kmo, kede mekerang e mekurulii e omekerreu er tia el llomeserreng el bla denguu?

A kot, e a Mika 6:9 a kmo: “Ng llomeserreng a doluu er a RUBAK.” A doluu er a Jehovah e ngbelkul a kmo kede mengull er ngii. Me ngbelkul a kmo kede mo oba dmolech el omengull el kirel tia el ngklel el uldimukl er a llechul. Sel doba omengull el mo er a chad e ngbelkul a kmo ngkired el mo medengelii a uldesuel. E seikid e kede mo oumerang er ngii e oukerebai er ngii el kirel aike el ungil el tekoi el leriruul. Me a lsekum e kede kerekikl aike el tekoi el doruul e le ngar er ngii a bo lerellii er a deleongel er kid me a Jehovah er a ngar medad, e dirrek el melilt a tekoi el oltirakl a llechul, e ngmo mellomes a rengud e mo ungil melilt a tekoi.

E a ongerung, e a Osisechakl 18:1 a kmo: “Ngikel diak le ungil el obengterir a re chad a melatk er a di ngii; a ikel lodengei a re bek el chad el kmo ng ungil a di mekngit er ngii.” Me a lsekum e ngdiak de kerekikl, e ngsebeched el mo mengeroid er kid er a Jehovah me a rechedal. Me ngkired el mengoit a taem el teloi er tirke el mengull er a Dios e oltirakl a llechul. Me ngkired el blechoel el mo er a Blil a Ongdibel, e teloi er a Rekristiano. Me sel dengar er a miting, e ngkired el mo ungil lomtab aike el suobel e ngmai el sichedekl er a rengud.

Ngdirrek el kired el meluluuch el mo er a Jehovah el ouchais aike el ngar er a rengud, me bo dekeed er ngii. (Osisechakl 3:5, 6) Me sel bo dungil el omtab aike el dechuiu er a Biblia me a suobel el oltobed a cheldebechelel a Jehovah, e ngsebeched el mo medengelii a tekoi el mo duubech el omerelled a uchul. E seikid e kede mo meruul a tekoi el oltirakl er a klemedengei er kid. Ngdirrek el kired el mo kongei a uleklatk el lomeskid a rudam er kid. (Osisechakl  19:20) E seikid e ngmo diak doltngakl er a ‘llomeserreng me a utebengel a tekoi’ e bai mo melisiich er ngii.

A llomeserreng me a utebengel a tekoi a sebechel el omekerreu er a telungalek. El ua tiang, a Biblia a mengelechel er a rebechiil el redil el mo “mengull er a re becherir” el sechal. (Efesus 5:33) Engdi ngmekerang a bechiil el sechal e nguu a dmolech el omengull er a bechil? A lsekum e ngorrimel me a lechub e ngmekngit a omerellel el mo er a bechil el mengerechir er ngii el mo mengull er ngii, e ngsebechel a bechil el mo mengull er ngii el di telkib el taem. Me alta e ngika el bechil a mo olecholt er a omengull el bedul ngii sel ledak e le ngdiak el soal a mondai. Engdi a ker a kmo, ngmo olecholt er a omengull el bedul ngii er sel taem e lecheroid er ngii? Nglocha diak. Me ngkirel a bechiil el sechal el melatk er a rolel e a bechil a mo sebechel el olecholt er a omengull el mo er ngii er a bek el taem. Me a lsekum e ngmo oubltikerreng e oba klechubechub e ngsebechel el nguu a dmolech el omengull er a bechil. Me nguaisei engdi a bechiil el redil el Kristiano a kirel el olecholt er a omengull er ngii el mo er a bechil el diak lultuil er a kmo ngrredemelel a nguu a omengull er ngii me a lechub e ngdiak.​—Galatia 5:22, 23

A Biblia a dirrek el melekoi el kmo a bechiil el sechal a kirel el mo betik a rengul er a bechil. (Efesus 5:28, 33) Me a bechiil el redil alta e ngomdasu el kmo a lomart er a tekoi el dilubech, e ngmengreos er a chebechiielir alta e a tekoi el dilubech a kirel a bechil el mo medengelii. Me nguaisei, engdi tia el omeruul ngolechotel a llomeserreng? Ngmo uangera uldesuel a bechil a bo lodengei er a uriul? Tiang, ngsmisichii a bltikerreng er ngii el mo er a bechil? Ngulterekokl el mo meringel er ngii el oumerang er a bechil. Engdi a lsekum a bechiil el redil a mesa ungil el taem e subedii el kirel a tekoi el dilubech, e ngulterekokl ngii el bechil el mo dmeu a rengul er ngii e le ngmle melemalt a omerellel. Me a bechiil el redil sel loruul el uaisei e ngrullii a bechil el lmuut el kmal mo betik a rengul er ngii.

A rengalek a kirir el olengesenges er a redemerir me a rederrir e mo oltirakl a omellach er a Jehovah. (Efesus 6:1, 4) Me tia ngbelkul a kmo, a ruungalek a kirir el luchesii a kemanget el babier el mesaod aike el kirir me aike el diak el kirir el meruul? Ngar er ngii a lmuut el bebil er a tekoi el kirir el mo medengei el diak di le kirir el medengei a llach er a blai me a belsel sel bo lak loltirakl. A ruungalek el oba llomeserreng a ngosuir a ngalek el mo medengelii a uchul me ngkirel el olengesenges.

Ka molatk, oleko ngalek a mengedecheduch er a delal el diak a olechotel a omengull er ngii. E a lsekum a delal a mo mekngit a ngerel me a lechub e ngdi mereched el kulebsengii, e ngsebechel el rullii el mo merur me a lechub e ngdi mo lmuk. Engdi, ngar er a chelsel a rengul e ngsebechel el di kesib a rengul el rullii me ngmo diak a ungil rolel a cheldecheduch er a delongelel ngii me a rechad er a blil.

A ruungalek el oba llomeserreng a blechoel el omdasu er a rolel a lollach er a rengelekir me sel mo uchul a klungiolir er a ngar mederir el klebesei. Me ngdiak el kirir el di mellach el ua lomekrur tir. Me ngungil sel di bo el tir el tang e losmechokl er tir el oba delemedemek me a bltikerreng, e lesodii el kmo a Jehovah a mengerechir er tir el mo mengull er a redemerir me a rederrir me bo el sebechel el nguu a diak a ulebengelel el klengar. Me a ngalek sel lochotii el kmo ngmengull er a delal me a demal, e ngmo mtebengii el kmo ngmengebkall er a Jehovah. (Efesus 6:2, 3) Ngokiu tiang e ngsebechel el rutechii a rengul a ngalek. Ngsebechel el mo medengei el kmo a delal me a demal a kmal omekerreu er ngii me ngmo olecholt a omengull er ngii el mo er tir. Seikid e ngmo sebechir a rengalek el olengit a ngesou sel leduubech a meklou a ultutelel el tekoi er a uriul.

A rebebil el oungalek a locha mo mekngit a uldesuir sel letemall a rengrir a rengelekir, a uchul me te bai diak losmechokl er tir. Engdi, ngera mo duubech sel lorael el mo klou a ngalek? Ngmo meluu er a Jehovah e mo oba llomeserreng e kongei a llechul a Dios? Ngmo kongei el mekengii a rengul me a uldesuel el mo er a Jehovah? Me a lechub e ngbai mo cheroid er a Jehovah?​—Osisechakl 13:1; 29:21.

A chad er a omelasech a mdesuii sel soal el bo lolasech er ngii. Me ngsebechel el mo ungil dosechii a klebokel el delsechelel. Me a ruungalek el oba llomeserreng a mengoit er a klou el taem el mesuub el kirel a Jehovah e oltaut a llechul e meluu er Ngii. E sel loruul el uaisei e nglmuut el medechel a llomeserreng er tir me ngmo sebechir el ngosuir a telungalek er tir me ngdiak el bo lecheroid er a Jehovah me a cheldebechelel.

Ngbek el sils e kede mo chelebangel a omelilt el sebechel ngar er ngii a bo lerellii er a klengar er kid. Me bo dungil el melatk a tekoi er a uchei er a doruul me bo luchul a omelisiich. Mosiik a ulekrael er a Jehovah e moltirakl er a llomeserreng er Ngii. E sel moruul el uaisei e ke mo oba llomeserreng, e dirrek el mo uchul a diak a ulebengelel el klengar.​—Osisechakl 3:21, 22.