Wanday, samwan wea visit kam askem hem: “Waswe, iu savve gold coin hem big selen winim silver coin?” Boy hia smile and sei: “Ia, mi savve.” Man hia ask moa: “So why nao iu tekem silver coin? Sapos iu tekem gold coin bae iu garem staka selen winim silver coin!” Boy hia sei: “Sapos mi tekem gold coin, bae olketa no pleim disfala game witim mi nao. Bat from mi tekem silver coin, mi garem staka silver coin!” Samting wea boy hia duim showimaot hem wise. Iumi tu laek for showimaot iumi wise long samting wea iumi duim.

Bible sei: “Gohed for duim samting wea wise and gohed for garem gudfala tingting. Then bae iu sef taem iu wakabaot, and leg bilong iu bae no bangam eni samting.” (Prov. 3:21, 23) So taem iumi duim samting wea wise, bae iumi stap sef. Datwan bae helpem iumi for gohed gud long spiritual wei, and hem olsem ‘leg bilong iumi no bangam eni samting.’

Wisdom hem difren from savve and wei for minim samting. Man wea savve long wanfala samting hem mas kasem information abaotem datfala samting. Man wea minim samting hem luksavve hao wanfala samting hem join witim nara samting. So man wea hem wise hem iusim savve wea hem garem, witim wei wea hem minim samting for duim gudfala samting.

Olsem example, maet wanfala man wea studyim datfala buk Wanem Nao Really Samting wea Bible Teachim? hem readim and kwiktaem for minim wanem hem studyim. Maet hem savve long stretfala ansa for olketa kwestin. Maet hem start for attendim olketa meeting and givim olketa naes koment tu. Evri samting hia showimaot hem gohed gud long spiritual wei. Bat waswe, datwan minim hem garem wisdom? Maet nomoa. Maet hem man wea kleva. Bat taem hem followim wanem hem lanem, wea minim hem iusim savve wea hem garem and wei for minim samting, datwan showimaot hem start for kamap wise. Sapos hem ting raonem samting firstaem and mekem gudfala disison, datwan showimaot hem duim samting wea wise.

Long Matthew 7:24-27 iumi savve readim tokpiksa bilong Jesus abaotem tufala man wea wakem haos. Wanfala man hem garem “gudfala tingting.” Hem wakem haos antap long ston bikos hem laekem strongfala haos. Man hia duim samting wea wise. Hem no tingse sapos hem wakem haos hia long sandbis, bae datwan no kostim staka selen, and bae hem kwiktaem finisim datfala haos. Hem wise bikos hem ting raonem gud samting wea hem bae kasem sapos hem wakem haos bilong hem antap long ston. So, taem bigfala wind and rain bangam datfala haos, hem no foldaon. Wanem iumi laek for savve nao diswan: Hao nao iumi savve kasem wisdom and gohed for duim wise samting?

First samting, tingim Micah 6:9, wea sei: “Olketa wea barava tinghae long nem bilong [God] duim samting wea wise.” Man wea barava tinghae long nem bilong Jehovah respectim hem and olketa standard bilong hem. For iumi respectim samwan, iumi mas savve firstaem long tingting bilong hem. Then bae iumi trustim hem, lane from hem, and followim example bilong hem. Sapos iumi no laek for mekem Jehovah no hapi, and sapos iumi disaedem samting followim olketa standard bilong hem, datwan showimaot iumi garem wisdom.

Mek-tu samting, Proverbs 18:1 sei: “Man wea no laek for stap witim nara pipol bae hem tingim nomoa wanem hemseleva laekem. Samting wea hem duim hem no wise.” Sapos iumi no careful, maet iumi no laek for fren gud witim Jehovah and pipol bilong hem. Iumi mas evritaem associate witim olketa wea barava tinghae long nem bilong God and followim olketa standard bilong hem. Hem gud for iumi evritaem associate witim olketa brata long Christian kongregeson. Long olketa meeting hem gud for tingting gud raonem olketa samting wea iumi lanem and iusim datwan long laef bilong iumi.

And tu, taem iumi barava story gud long Jehovah long prea, datwan bae helpem iumi for fren gud witim hem. (Prov. 3:5, 6) Taem iumi readim Bible and olketa pablikeson and ting raonem wanem iumi readim, bae iumi luksavve long olketa gudfala samting wea iumi bae kasem sapos iumi followim  wanem iumi lanem. Iumi mas acceptim and tinghae tu long kaonsel wea iumi kasem from olketa mature brata. (Prov. 19:20) Taem iumi duim evri samting hia, datwan showimaot iumi garem wisdom.

Wisdom savve protectim famili. Olsem example, Bible hem talem waef for “barava respectim” hasband. (Eph. 5:33) Wanem nao hasband savve duim for mekem waef respectim hem? Sapos hem trae forcem waef for respectim hem, bae hem respectim hem nomoa taem hem stap mekem tufala no raoa. Bat waswe, bae hem respectim hasband taem hem no stap? Maet nomoa nao. Hasband shud tingim wanem hem mas duim for mekem waef evritaem respectim hem. Sapos hem kaen and showimaot love, hem bae isi for waef respectim hem. Nomata olsem, Christian waef shud respectim hasband nomata hem garem gudfala wei or nomoa.—Gal. 5:22, 23.

Bible sei tu, hasband mas lovem waef. (Eph. 5:28, 33) Maet waef haedem from hasband samting wea hasband garem raet for savve long hem bikos hem fraet nogud hasband bae no lovem hem. Bat waswe, datwan showimaot hem duim samting wea wise? Hasband bae ting hao long waef taem hem faendaot abaotem datwan? Waswe, datwan bae strongim love wea hem garem for waef? Maet datwan bae mekem hem no isi for hem. Bat sapos waef explainim firstaem samting wea happen long hasband bilong hem, maet hasband tinghae long wei wea waef honest for talem hem. Datwan bae strongim love wea hem garem for waef.

Olketa pikinini shud obeyim parents and parents shud stretem olketa followim samting wea Jehovah talem. (Eph. 6:1, 4) Waswe, diswan minim parents bae mekem wanfala list wea talem wanem pikinini savve duim and wanem hem shud no duim, or panis wea pikinini bae kasem sapos hem no obey? Nomoa. Dadi and mami wea wise bae helpem pikinini for minim why hem mas obey.

Olsem example, tingim sapos pikinini talem samting wea no showimaot respect long parents. Wei for tok raf or kwiktaem panisim hem savve mekem pikinini shame or mekem hem no laek for story long tufala. And tu, long heart bilong hem, maet hem feel nogud and no laek fren witim tufala.

Parents wea wise bae ting raonem hao tufala bae stretem and trainim pikinini and hao datwan bae affectim hem long future. Parents shud no kwiktaem disciplinem pikinini bikos pikinini mekem olketa feel shame. Maet olketa savve story long kaenfala wei witim pikinini seleva and explainim hao Jehovah laekem hem for respectim tufala, mekem hem kasem gud samting for olowe. Then taem pikinini showimaot respect long parents hem bae luksavve hem respectim Jehovah tu. (Eph. 6: 2, 3) Wei for kaen olsem savve kasem heart bilong pikinini. Hem bae luksavve parents lovem and tingim hem, wea datwan bae strongim wei wea hem respectim tufala. Long future, taem important samting kamap, datwan bae mekem pikinini willing for askem help from tufala.

Maet samfala parents fraet for stretem pikinini nogud hem feel nogud. Bat wanem nao bae kamaot from datwan taem pikinini hem big? Waswe, bae pikinini fraet long Jehovah and luksavve hem wise for followim olketa standard bilong Jehovah? Waswe, bae hem story gud long Jehovah taem hem needim help?—Prov.13:1; 29:21.

Man wea savve tumas for wakem karving mas tingim firstaem wanem nao bae hem wakem. Hem semsem tu witim parents. Parents wea wise bae waka hard for lanem olketa standard bilong Jehovah firstaem and followim datwan. Diswan showimaot tufala barava tinghae long nem bilong God. Taem tufala iusim olketa samting wea Jehovah and organization bilong hem provaedem, datwan bae helpem tufala for duim samting wea wise and bae tufala strongim famili bilong tufala.

Evriday iumi mekem olketa disison wea savve affectim iumi long full laef bilong iumi. Winim wei for disaedem samting kwiktaem, hem gud for tingting gud firstaem. Tingim samting wea bae kamaot from datwan long future. Lukaotem direction from Jehovah and kasem gud samting from wisdom bilong hem. Sapos iumi duim olsem, datwan showimaot iumi duim samting wea wise, and datwan mekem iumi kasem laef.—Prov. 3:21, 22.