Wan dei wan sma aksi a boi: „Yu no sabi taki a gowtu sensi warti tu tron moro a solfruwan?” A boi lafu, dan a piki en: „Iya, mi sabi.” Dan fu san ede yu e teki a solfru sensi?”, a sma aksi en. „Efu yu e teki a gowtuwan, dan yu o abi tu tron so furu moni!” A boi taigi en: „Ma efu mi teki a gowtu sensi, dan sma no o gi mi moni moro. Yu sabi omeni solfru sensi mi abi kaba?” A tori fu a boi disi e sori taki a ben koni. Furu bigisma ben o kisi furu wini efu den ben koni leki a boi disi.

Bijbel e taki: „Tan poti prakseri na koni nanga frustan. . . . Dan ogri no o miti yu èn nowan sani o de na yu pasi di o meki yu naki yu futu” (Odo 3:21, 23). Sobun, te wi sabi san na koni èn wi sabi fa fu gebroiki en, dan dati kan kibri wi gi ogri. Wi bribi no o kon swaki èn noiti sani o de di o meki wi naki futu.

Koni a no a srefi leki sabi nanga frustan. Wan sma di abi sabi e leri ala sortu sani esi-esi. Wan sma di abi frustan kan si krin fa den sani di a leri abi fu du nanga makandra. Ma wan sma di abi koni, sabi fa fu gebroiki den sani di a leri èn di a kon frustan.

Fu eksempre, na ini wan syatu pisi ten wan sma di e studeri Bijbel kan leisi èn frustan a buku San Bijbel e leri wi trutru? Te a e studeri, a kan gi den yoisti piki. Kande a e bigin go na den konmakandra èn a e gi moi piki srefi. Ala den sani disi kan sori taki a e go na fesi, ma disi wani taki dati a abi koni kaba? Dati no abi fu de so. Kande na leri a man leri sani esi-esi nomo. Ma te a e du san a leri fu Bijbel, sobun te a e gebroiki den sani di a kon sabi èn di a kon frustan, dan a e kon koni. Efu den bosroiti di a e teki, abi bun bakapisi gi en fu di a ben denki bun fosi, dan a e sori taki a koni.

Luku wan agersitori na Mateyus 7:24-27 pe Yesus fruteri fu tu man di ben bow wan oso. A tori e taki dati wan fu den ben de „wan koni man”. Fu di a denki bun san ben kan pasa, meki a bow en oso na tapu ston-gron. A seti sani na fesi èn a sori taki a koni. A no ben denki taki te a ben o bow en oso na tapu santi, dan dati ben o moro bunkopu noso moro esi. Fu di a ben koni, meki a ben denki san ben kan pasa. Sobun, di wan bigi winti wai, na oso fu en no fadon. Na aksi di wi kan poti now na: Fa wi kan kisi koni leki a man disi èn fa wi kan tan gebroiki a koni disi ala ten baka?

Luku fosi san Mika 6:9 e taki: „Den koni sma o lespeki [Gado] nen.” Sobun, ala ten wan konisma o hori a nen fu Yehovah na prakseri èn a o pruberi fu du san Gado e aksi fu en. Fu man lespeki wan  sma, wi musu pruberi fu kon sabi fa a e denki. Dan wi o man frutrow na en tapu, wi o man leri wan sani fu en èn wi o abi bun bakapisi neleki en. Te wi e prakseri fa den sani di wi e du now, kan abi krakti tapu a matifasi di wi abi nanga Yehovah èn wi e teki bosroiti di e kruderi nanga a wani fu en, dan wi o kon koni.

Luku tu san Odo 18:1 e taki: „Wan sma di no e moksi nanga trawan o prakseri en eigi lostu nomo. A o tegu gi koni.” Te wi no e luku bun, dan wi kan pori a matifasi di wi abi nanga Yehovah èn nanga a pipel fu en. Efu wi no wani taki disi pasa nanga wi, dan wi musu bumui nanga sma di e lespeki Gado nen nanga den wet fu en. Wi musu meki ala muiti fu go na den konmakandra so taki wi kan de nanga den brada nanga sisa fu wi. Te wi de na den konmakandra, wi musu opo wi ati nanga wi frustan so taki den sani di wi e yere, kan abi krakti na wi tapu.

Boiti dati, te wi e fruteri Yehovah san de na tapu wi ati, wi o kon moro krosibei na en (Odo 3:5, 6). Te wi e leisi Bijbel nanga den buku di Yehovah en organisâsi e gi wi, wi musu opo wi ati nanga wi frustan. Dan wi o man si sortu bakapisi den sani di wi e du kan abi èn dati o yepi fu man teki koni bosroiti. Wi musu opo wi ati tu gi a rai di lepi brada e gi wi (Odo 19:20). Dan wi no o „tegu gi koni”, ma wi o lobi a fasi disi.

Koni kan kibri osofamiri. Fu eksempre, Bijbel e gi wan wefi a rai fu abi „bigi lespeki” gi en masra (Ef. 5:33). Fa wan masra kan meki en wefi kisi bigi lespeki gi en? Efu a e dwengi en wefi noso a e taki grofu nanga en, dan kande a o gersi leki en wefi e lespeki en. Fu di a no wani problema nanga en masra, a o arki en masra te den de makandra. Ma yu denki taki a o lespeki en masra te a no de nanga en? Kande a no o du dati. Dati meki a masra musu luku san a kan du fu meki en wefi lespeki en ala ten. Efu a abi den fasi fu Gado yeye, dan a o sori lobi nanga switifasi èn en wefi o sori bigi lespeki gi en. A no de fu taki dati wan Kresten wefi musu sori lespeki gi en masra, awinsi fa a masra e libi nanga en.​—Gal. 5:22, 23.

Bijbel e taki tu dati wan masra musu lobi en wefi (Ef. 5:28, 33). Son leisi a e pasa taki wan wefi no e fruteri en masra ala sani, aladi a masra abi a reti fu sabi den sani dati. Kande a e du en fu di a wani taki en masra tan lobi en. Ma yu denki taki a wefi e sori koni te a e du disi? Te en masra kon yere san pasa, dan san o de a bakapisi? A o lobi en wefi moro? Kande a o moro muilek gi en fu du dati. Ma te a wefi e suku wan bun ten fu taki nanga en masra fu tori di no switi so kande, dan a kan taki en masra o breiti taki a no kibri sani gi en èn a o kon lobi en moro.

Pikin musu gi yesi na papa nanga mama èn den musu kisi leri soleki fa Yehovah wani (Ef. 6:1, 4). Ma disi wani taki dati papa nanga mama musu gi pikin wan langa lijst nanga sani di den mag du noso no mag du? Pikin no musu sabi nomo san den mag du noso no mag du noso sortu strafu den o kisi te den du wan ogri. Wan koni papa nanga mama o yepi en pikin fu kon frustan fu san ede a musu gi yesi.

Kon meki wi taki dati wan pikin no e sori lespeki te a e taki nanga en papa nanga mama. Te den ben o bari en noso strafu en sondro fu denki fosi, dan kande a pikin o syen noso a no o wani taki nanga den moro. A kan taki en ati e bron so te taki a no o fruteri en papa nanga mama noti moro.

Te papa nanga mama abi koni, dan den o denki fosi fa den o strafu den pikin èn sortu wini den o kisi fu disi. A no fu di papa nanga mama e syen taki a pikin taki so nanga den, meki den musu strafu en wantewante. Kande yu kan taki nanga a pikin te yu de yu wawan nanga en. Sori lobi nanga switifasi te yu e fruteri en taki Yehovah wani taki a musu lespeki en papa nanga mama so taki sani go bun nanga en fu ala ten. Dan a pikin o si taki te a e lespeki en papa nanga mama, a e gi Yehovah grani tu (Ef. 6:2, 3). Te yu e taki nanga a pikin na a fasi disi, dan disi kan naki en ati. A o si taki en papa nanga mama lobi en èn a o kisi moro lespeki gi den. Èn te wan problema miti en, a no o frede fu go suku yepi na en papa nanga mama.

Fu di son papa nanga mama no wani hati a firi fu a pikin, meki den no e strafu en. Ma san o pasa te a kon moro owru? Yu denki taki a o lespeki Yehovah èn taki a o si en leki wan koni sani fu du san Gado e aksi fu wi? A o opo en ati nanga en frustan gi den leri fu Yehovah, noso a o tapu en yesi gi den leri disi?​—Odo 13:1; 29:21.

Wan sma di e meki moimoi sani nanga udu, e denki na fesi fa a o meki a sani. A no o koti sani puru somaar soso fu di a denki taki a sani o kon moro moi. Dati meki papa nanga mama di koni, e teki den ten fu leri san Yehovah wani èn den e du den sani dati tu. Na so den e sori taki den e lespeki a nen fu en. Te den e meki muiti fu tan bun nanga Yehovah èn nanga en organisâsi, dan den o kon koni èn den o man sabi fa fu gebroiki a koni disi fu tranga a bribi fu den osofamiri.

Ibri dei wi musu teki bosroiti di kan kenki wi heri libi. No teki esi-esi bosroiti sondro fu denki fosi sortu bakapisi dati kan abi. Prakseri san kan pasa èn fa dati kan kenki wi heri libi. Suku yepi na Yehovah èn gebroiki a koni di a gi yu. Dan wi o man sori taki wi e tan poti prakseri na koni èn dati o gi wi libi.​—Odo 3:21, 22.