Iyange igen yô, orvannya ugen pine wan la ér, “U fa er sule u zenaria la a hembe lun a inja a u azurfa la i kom kwa har gaa?” Wan la se teghelee, maa kaa ér, “Een, m fa.” Nahan orvannya la pine un ér, “U fa, man er nan ve u ngohol sule u azurfa laa? U fa er wea ngohol sule u zenaria la yô, ma u zough a inyaregh ma ki hembe inyaregh ki sule u azurfa la kwa har gaa?” Wan la gema kaa ér, “Kpa aluer m ngohol sule u zenaria la yô, ior mban vea de u eren ishor ne a mo. U fa er m ngohol usule mba azurfa hegen ve te ijar kpa?” Icanwan u i er kwagh na ken kwaghhir ne la, yange tese ieren i mbaganden kpa vea fatyô u henen kwagh ker yô. Ieren shon yô, ka kwaghfan u mimi.

Bibilo kaa ér: “Waan kwaghfan u mimi ikyo man m-er u sha inja kpaa, nahan ú za sha gbenda wou doo doo, nguhar wou kpaa ua kema kera ga.” (Anz. 3:21, 23) Nahan, aluer se fa kwagh u a lu “kwaghfan u mimi” la, man er se er tom a mi la yô, kwagh la una kura se. Kwagh ne ka a wase se se palegh u nôngon gbev ken jijingi, shi se sôghor “nguhar” her gbang.

Kwaghfan u mimi kaha a mfe man mkav. Or u nan lu a mfe yô, ka nan fa akaa kposo kposo. Or u nan lu a mkav di ka nan fa er akaa a nan lu a mfe sha mi la, a gbe a zough yô. Or u lun a kwaghfan di ka nan fatyô u tôôn mfe u nan la maghen sha mkav u nan la, maa nan er tom a mi sha gbenda u injaa.

Ikyav i tesen yô, alaghga or a fatyô u tôôn shighe cuku tseegh ôron shi kaven kwagh u takerada u Bibilo Tese Ér Nyi Jimi? u er la. Alaghga nana na mlumun vough, shighe u i lu henen Bibilo a nan ken takerada ne yô. Adooga nana hii u zan mbamkombo mba tiônnongo, shi nan mbamlumun mba doon je kpaa. Akaa ne cii aa tese ér nan ngu vesen ken jijingi, kpa kwagh ne tese ér nan zua a kwaghfana? Ka nahan keng ga. Alaghga nan ngu or u kôron kwagh fele di tsô. Nahan kpa, ka nana dondo kwagh u mimi u nan hen la, sha u eren tom a mfe man mkav u nan la sha gbenda u injaa yô, nan ngu zuan a kwaghfan. Aluer kwagh u injaa due ken akaa a nan tsough u eren la, u tesen ér nan vande gbidyen kwar sha mi tsembelee yô, tese wang je ér nan ngu a kwaghfan u mimi.

Mateu 7:24-27 ôr injakwagh i Yesu i sha kwagh u iorov uhar mba hanmô ve nan maa iyough la. I pase kwagh u or môm la ér lu “orfankwagh.” Er yange gbidye kwar, fa kwagh u alaghga una va er ken hemen yô, a maa iyough na sha vande. Lu or u nengen a kwagh ken ica, nahan eren kwagh sha kwaghfan. Yange ma hen ér a hemba lun un fele shi a hemba taver un ishe ga u maan iyough na sha waarawa, kpa hen nahan ga. Yange er kwagh sha kwaghfan, a hen sha kwagh u una va due ken kwagh u un tsough u eren la ken hemen yô. Nahan zum ahumbeura va ta sha iyough la kpa, i gba ga. Kpa mpin u i doo u se pine hegen yô, ka un ne: Se er nan ve se zua a kwaghfan u mimi u a lu ieren i doon tsung la, shi se wa un ikyo?

Kwagh u hiihii yô, nenge ase kwagh u Mika 6:9 a kaa ne, ér: ‘U cian iti i Aôndo yô, ka [kwaghfan] u mimi.’ Mcie u cian iti i Yehova la ka u nan un icivir. Gba u se lu a icivir sha hanma kwagh u iti na i til sha mi la cii a ishima yase i môm, shi se kuran atindi a na kpaa. Cii man u lu a icivir sha or yô, gba u u fa gbenda u nan henen kwagh la. Ka nahan ve u fatyô u suur sha a nan shi henen kwagh hen a nan, shi zan ikyura er nan nahan ye. Aluer se mba henen sha gbenda u ieren yase ia fatyô u benden a ikyar i se ye a Yehova la ken hemen, shi aluer akaa a se tsough u eren la cii har sha atindi a na yô, tese je ér se mba zuan a kwaghfan u mimi.

Kwagh u sha uhar yô, Anzaakaa 18:1 kaa ér: “Or u nan dugh iyol i nan kposo yô, ka isharen i nan iyol i nan, nan keren ye, nahan nan mough num a kwaghfan u mimi cii.” Aluer se wa ikyo ga yô, se hingir u lun paleghaa a Yehova kua ior nav. Sea soo u lun paleghaa a Yehova kua ior nav ga yô, gba u se luun vea mba ve cie iti na shi ve kor atindi a na la. Gba u se zaan hen Iyou i Tartor, se za kohol imôngo a anmgbianev mba ken tiônnongo hanma shighe, aluer gba sha mi yô. Shighe u se ze mbamkombo yô, gba u se bugh ishima yase sha er kwagh u i lu ôron la una er tom ken a vese yô.

Kwagh ugen yô, aluer se mba pasen Yehova kwagh u a lu se ken ishima yô, se hemba lun kôôsôô a na. (Anz. 3:5, 6) Aluer se bugh ishima yase shighe u se lu ôron Bibilo kua ityakerada i nongo u Yehova u gber la yô, se nôngo u fan kwagh u una fatyô u va duen ken ieren yase la, nahan eren kwagh u i doo u se er yô. Shi gba u se bugh ishima yase shighe u anmgbianev mba ve vie la ve we se kwagh yô. (Anz. 19:20) Sha nahan  yô, se kera “mough num a kwaghfan u mimi” ga, kpa se lu hemban taver ieren i hange hange ne ken a vese.

Kwaghfan u mimi una fatyô u kuran icombor. Ikyav i tesen yô, Bibilo wa kwase kwagh ér nana “cia” nom u nan. (Ef. 5:33) Nom nana er nan ve kwase u nan una naan nan iciviri? Aluer nom ngu kighir kwase na shin zôhôn a na ér a naan un icivir yô, una zua a icivir la, kpa ia lu i mimi ga. Er kwase u nan la a soo u palegh ayôôso yô, alaghga una wa nan nom la icivir shighe u a lu her yô. Nahan kpa, aluer nom la ngu her ga nahan, shi kwase na la una na un icivir ken ijime na kpa? A shi nan kpa una na un i ga. Gba u nom la una hen sha kwagh u una fatyô u va duen ken kwagh u a tsough u eren la. Aluer a tese ér un ngu a ityamegh ki jijingi kira, sha u tesen kwase na dooshima shi lun a na sar sar yô, una kuma u kwase na una na un icivir. Nahan cii kpa, gba u Kwasekristu nana naan nom u nan icivir, aluer nan kuma u a na nan i, shin nan kuma ga je kpaa.—Gal. 5:22, 23.

Shi Bibilo kaa ér gba u nom nana soo kwase u nan. (Ef. 5:28, 33) Alaghga kwase nana lu nôngon ér nana doo nom u nan ishima, nahan nana hen ér hemba doon u nana yer nom u nan a akaa a nan nenge ér aa doo nom u nan ga, man a gema a lu akaa a i doo u nom u nan ma a fe kwagh sha mi yô. Kpa jighilii yô, ieren ne i tese kwaghfan u mimi kpa? Aluer nom la va mase fan kwagh u yange i yer un a mi la nahan, ka nyi ia due kere? Una hemba soon kwase na hen shighe nee? A taver un tsô. Kpa aluer kwase la ker shighe u vough pase nom na akaa a a doo nom na ga la kundu kundu yô, a shi nan kpa, nom u nan una wuese nan sha ieren i nan i mimi la. Nahan, nana seer doon nom u nan ishima.

Gba u mbayev vea ungwan imo i mbamaren vev shi gba u a yese ve sha akaawan a Yehova. (Ef. 6:1, 4) Kwagh ne tese ér gba u mbamaren vea wa wanye atindi kpete kpete sha kwagh u nana er shin nana er ga yôô? Gba u wanye nana fa atindi a hen ya shin tsaha u nana zua a mi zum u nan er kwagh shami ga la tseegh tsô ga. Gba u ormaren u nan lu a kwaghfan u mimi la, nana wase wan u nan nana kav er i hii ve i gbe u nana ungwan imo i ormaren u nan yô.

Ikyav i tesen yô, tôô ase wer wanye lam a ormaren u nan sha ilyahan. Aluer ormaren la zôhô shin tsaha wan la gaegh yô, alaghga nana hee wan la, shin nana na wan la nana kera lam ga. Nahan kpa, alaghga shin ishima i nan yô, kwagh la una doo nan ga, nahan nana hingir u lun paleghaa a mbamaren mba nan.

Mbamaren mba ve lu a kwaghfan u mimi yô, ka ve hen sha gbenda u ve lu tsahan mbayev vev la, kua er tsaha shon ua bende a mbayev mban ken hemen la kpaa. Doo u mbamaren vea er kwagh gaegh sha ci u mbayev vev na ve va ahenge yum ga. Alaghga vea luun tswen vea wan ve yô, vea fatyô u pasen wan la kundu kundu man sha dooshima ér Yehova soo ér wan la a naan mbamaren nav icivir sha er a kpe un iyol gbem sha won yô. Nahan zum u wanye la nan ne mbamaren mba nan icivir yô, nana mase kaven ér ka Yehova je nan ne un icivir ye. (Ef. 6:2, 3) Gbenda u tsahan wanye u ngun ne ua fatyô u benden a ishima i nan kpen kpen. Ka nan nenge ér mbamaren mba nan wa nan ikyo, nahan nan seer nan ve icivir. Kwagh ka una luun nahan yô, shighe u kwagh a va ze wanye la iyol kpa, nan ker iwasen hen mbamaren mba nan.

Alaghga mbamaren mbagenev vea soo u eren kwagh u vihin wan ve ishima ker ga, nahan u kôôm ve kpa vea soo ga. Kpa zum u wanye la nana gande kera yô, ka nyi ia due kere? Nana cia Yehova shi nana fa er u kuran atindi a na i lu kwaghfan kpa? Nana bugh ishima i nan sha u ungwan imo i Yehova shinii, nana hingir u lun paleghaa a naa?—Anz. 13:1; 29:21.

Orgbankwagh ka nan vande henen sha kwagh u nan soo u gban la. Nan gbe gban kwagh haan kera dang dang tsô, maa henen ér kwagh u injaa una due ker ga. Mbamaren mba ve lu a kwaghfan u mimi yô, ka ve na shighe kpishi u henen shi kuran atindi a Yehova, nahan cian iti na. Er ve til paleghaa a Yehova man nongo na ga yô, kwagh la ka a na ve zua a kwaghfan u mimi u vea wase tsombor ve a mi yô.

Hanma iyange ka i gba u se tsua akaa a se er, a a fatyô u benden a uuma asev anyom kpishi ken hemen yô. De kaan imo shin tsuan kwagh u u soo u eren la gaegh ga, kpa vande gbidyen kwar sha mi zulee. Hen sha kwagh u una va due ken akaa a u soo u tsuan la. Ker kwaghwan hen Yehova shi er tom a kwaghfan na la. Aluer se er nahan yô, se lu wan kwaghfan u mimi la ikyo, nahan una na se uma.—Anz. 3:21, 22.