Usa ka adlaw, may bisita nga nagpakiana ha bata, “Diri ka ba maaram nga doble an kantidad han bulawan nga sinselyo kay han silber nga sinselyo?” Humiyom an bata ngan nagsiring, “Maaram ako.” “Kay ano man nga an silber nga sinselyo an imo ginpipili?” nagpakiana an bisita. “Kon bulawan nga sinselyo an imo pipilion, doble an kantidad nga imo makukuha!” An bata binaton, “Pero, kon pipilion ko an bulawan nga sinselyo, diri na hira makikig-uyag ha akon. Maaram ka ba kon pira na an akon natirok nga silber nga sinselyo?” An bata hini nga istorya nagpakita hin kalidad nga puydi subaron han mga adulto—an praktikal nga kinaadman.

An Biblia nasiring: “Tipigi an hingpit [o, praktikal] nga kinaadman ngan an katakus ha pagtirotimbang: Dida hito maglalakat ka ha imo dalan ha masarig, ngan an imo tiil diri mahapapakdol.” (Prob. 3:21, 23) Salit an paghibaro kon ano an praktikal nga kinaadman ngan kon paonan-o ito iaaplikar mabulig ha aton nga ‘maglakat ha masarig’ o magpapanalipod ha aton. Nabulig ini nga magin marig-on kita ha espirituwal ngan diri gud ‘mahapakdol an aton tiil.’

An praktikal nga kinaadman iba ha kahibaro ngan ha pagsabot. An tawo nga may kahibaro damu an hinbabaroan nga impormasyon, o kamatuoran. An usa nga may pagsabot maaram han koneksyon han tagsa nga impormasyon. An tawo nga may kinaadman may abilidad nga iaplikar ha praktikal nga paagi an iya nahibabaroan ngan nasasabtan.

Pananglitan, bangin mabasa ngan masabtan han usa nga tawo an libro nga Ano Gud ba an Igintututdo han Biblia? ha halipot la nga panahon. Bangin husto an iya mga baton durante han pag-Bible study ha hiya. Bangin natambong na hiya ha mga katirok ngan mag-opay pa ngani an iya komento. Ito ngatanan nagpapakita nga nag-uuswag hiya ha espirituwal, pero nagpapasabot ba ito nga may-ada na hiya kinaadman? Diri. Bangin madagmit la hiya maghunahuna. Pero kon iaaplikar niya an kamatuoran ngan gagamiton an kahibaro ngan pagsabot ha husto nga paagi, magigin maaramon hiya. Kon mag-opay an resulta han iya mga desisyon tungod kay ginhunahuna niya ito hin maopay, pamatuod ini nga may-ada na hiya praktikal nga kinaadman.

An Mateo 7:24-27 nag-uunabi han ilustrasyon ni Jesus mahitungod han duha nga tawo nga nagtukod han ira tagsa nga balay. An usa iginhuhulagway sugad nga “maaramon.” Tungod kay ginhunahuna niya an posible mahitabo, gintukod niya an iya balay ha bato. Abanse hiya maghunahuna ngan praktikal. Waray hiya mangatadongan nga mas barato o madagmit an pagtukod hin balay ha baras. Ginhuhunahuna niya hin maopay an magigin resulta han iya mga ginbubuhat. Salit han inabot an bagyo, waray maruba an iya balay. Yana an pakiana, Paonan-o kita magkakaada praktikal nga kinaadman ngan paonan-o naton ito matitipigan?

Siyahan, tagda an ginsisiring han Miqueas [Mika] 6:9 (Baraan nga Biblia): “Usa nga kinaadman an kahadlok han [kanan Dios] ngaran.” An kahadlok ha ngaran ni Jehova nagpapasabot hin pagrespeto ha iya. Nangangahulogan ito hin pagkaada matinalahuron nga kahadlok ha  ginrirepresentaran han iya ngaran, pati na han iya mga suruklan. Basi magkaada respeto ha usa nga tawo, kinahanglan mo hibaroan an iya panhunahuna. Hito nga paagi, magkakaada ka pagsarig ha iya ngan mahibabaro tikang ha iya, ngan susubaron mo an iya maopay nga mga desisyon. Kon ginhuhunahuna naton an magigin epekto han aton mga ginbubuhat ha aton relasyon kan Jehova ngan kon nagdidesisyon kita uyon ha iya mga suruklan, nagkakaada kita praktikal nga kinaadman.

Ikaduha, an Proberbios 18:1 nasiring: “Hiya nga nahabubulag namimiling han iya kalugaringon nga tinguha, ngan napupungot patok ha ngatanan nga maopay nga kinaadman.” Kon diri kita magbabantay, mahimo kita mahibulag kan Jehova ngan ha iya katawohan. Basi malikyan ito, kinahanglan kita makig-upod ha mga nahahadlok ha ngaran han Dios ngan narespeto ha iya mga suruklan. Kinahanglan kita magin presente ha Kingdom Hall tubtob nga posible ngan regular nga makig-upod ha kabugtoan ha kongregasyon. Kon aada kita ha mga katirok, kinahanglan naton abrihan an aton hunahuna ngan kasingkasing ngan tugotan nga mapagios kita han aton napapamatian.

Dugang pa, kon isusumat naton kan Jehova an ngatanan nga aton inaabat pinaagi ha pag-ampo, magigin mas duok kita ha iya. (Prob. 3:5, 6) Kon aabrihan naton an aton hunahuna ngan kasingkasing samtang ginbabasa naton an Biblia ngan an mga publikasyon nga igintatagana han organisasyon ni Jehova, abanse naton nga makikita an resulta han aton mga ginbubuhat ngan makakahimo kita hin maaramon nga desisyon. Kinahanglan liwat naton abrihan an aton kasingkasing kon ginsasagdonan kita han hamtong nga kabugtoan.  (Prob. 19:20) Hini nga paagi, diri naton iginsasalikway an praktikal nga kinaadman, lugod ginpaparig-on naton inin importante nga kalidad.

An praktikal nga kinaadman nagpapanalipod han pamilya. Pananglitan, gin-aaghat han Biblia an asawa nga magkaada “daku nga respeto” ha iya bana. (Efe. 5:33) Paonan-o makakarawat han bana an daku nga respeto? Kon pipiriton o may pagkamadarahog nga ig-iinsister niya ha iya asawa nga respetuhon hiya, temporaryo la an magigin resulta hito. Bangin respetuhon hiya han iya asawa kon presente hiya basi la malikyan an samok. Pero kumusta man kon waray hiya? Posible nga diri hiya respetuhon han iya asawa. Salit kinahanglan hunahunaon han bana kon ano an magigin resulta han iya mga desisyon. Kon ipapakita niya an bunga han espiritu, sugad han pagin mahigugmaon ngan buotan, makakarawat niya an daku nga respeto han iya asawa. Syempre, sadang respetuhon han asawa an iya bana takos man hiya hito o diri.—Gal. 5:22, 23.

An Biblia nasiring liwat nga sadang higugmaon han bana an iya asawa. (Efe. 5:28, 33) Basi padayon nga higugmaon han iya bana, bangin mangatadongan an asawa nga mas maopay nga diri isumat ha iya bana an diri maopay nga mga butang bisan kon may katungod an iya bana nga mahibaro hito. Pero nagpapakita ba ito hin praktikal nga kinaadman? Ha urhi, kon mahibaroan ito han bana, ano an magigin resulta? Mas hihigugmaon ba niya hiya? Diri gud. Lugod, kon isusumat niya ito ha iya bana ha husto nga panahon ngan ha kalmado nga paagi, aapresyaron gud han bana an iya pagin tangkod. Sugad nga resulta, mas hihigugmaon niya hiya.

Sadang sugton han mga anak an ira mga kag-anak ngan magpadisiplina uyon ha mga suruklan ni Jehova. (Efe. 6:1, 4) Nagpapasabot ba ini nga kinahanglan tagan an kabataan hin listahan han mga surundon? Labaw pa an ginkikinahanglan han kabataan kay ha paghibaro la han mga surundon ha balay o han sirot kon makasala hira. An mga kag-anak nga may praktikal nga kinaadman nangangalimbasog nga buligan an ira anak nga masabtan kon kay ano nga sadang hiya sumugot.

Pananglitan, ano man kon waray respeto nga nagyakan an usa nga bata ha iya kag-anak? Kon iisgan o sisirotan dayon an bata, bangin maalohan hiya ngan mapiritan nga humilom. Pero bangin magdumot hiya, ngan tungod hito magpahirayo an iya kasingkasing ha iya mga kag-anak.

An mga kag-anak nga may praktikal nga kinaadman maghuhunahuna kon paonan-o nira didisiplinahon an ira mga anak ngan kon ano an magigin epekto hito ha ira mga anak ha tidaraon. An mga kag-anak diri sadang magreak dayon tungod kay naalohan hira. Mahimo nira kaistoryahon an ira anak ha pribado ngan isaysay ha iya nga naglalaom hi Jehova nga rirespetuhon niya an iya mga kag-anak para ha iya waray kataposan nga kapulsanan. Maopay nga buhaton ini han mga kag-anak ha kalmado ngan mahigugmaon nga paagi. Kon gintatahod han anak an iya mga kag-anak, masasantop niya nga gintatahod niya hi Jehova. (Efe. 6:2, 3) Inin buotan nga pagdisiplina mahimo makabantad ha kasingkasing han bata. Aabaton niya nga hinigugma gud hiya han iya mga kag-anak, salit mas rirespetuhon niya hira. Ngan kon may bumangon nga seryoso nga problema, magigin masayon ha iya nga mangaro hin bulig ha iya mga kag-anak.

May mga kag-anak nga nahahadlok nga mapasubo an ira anak, salit nadiri hira nga disiplinahon an ira anak. Pero kumusta man kon magin adulto na hiya? Mahahadlok ba hiya kan Jehova ngan huhunahunaon nga maaramon an pagsunod ha mga suruklan han Dios? Maruruyag ba hiya nga abrihan an iya kasingkasing ngan hunahuna ha mga sagdon ni Jehova o mabulag ha Iya?—Prob. 13:1; 29:21.

An maopay nga eskultor abanse nga nagpaplano kon ano an iya karuyag pormahon. Diri hiya basta la nga nagtitigib ngan naglalaom han maopay nga resulta. An mga kag-anak nga may praktikal nga kinaadman naggagahin hin panahon nga hibaroan ngan iaplikar an mga suruklan ni Jehova. Hito nga paagi, iginpapakita nira nga nahahadlok hira ha iya ngaran. Pinaagi ha diri pagbulag kan Jehova ngan ha iya organisasyon, nagkakaada hira praktikal nga kinaadman ngan ginagamit ito basi maparig-on an ira pamilya.

Kada adlaw, naghihimo kita hin mga desisyon nga makakaapekto ha aton ha tidaraon. Imbes nga magreak dayon ngan maghimo hin dinalidali nga desisyon, kay ano nga diri mamalandong anay? Hunahunaa hin maopay an magigin mga resulta hito. Pagpagiya kan Jehova ngan iaplikar an diosnon nga kinaadman. Hito nga paagi, matitipigan naton an praktikal nga kinaadman, ngan maghahatag ito ha aton hin kinabuhi.—Prob. 3:21, 22.