ართშა ართ კოჩიქ თე ბაღანას კითხუ: „ვაიჩქუნო, ნამდა თე ოქროშ მონეტა ჟირშა უმოს ძვირ რე ვარჩხილიშ მონეტაშე?“ თე ბაღანას ქელაძიცინ დო უწუ: „ქო, მიჩქუ“. „აბა მუშენ ეჭოფუნქ ვარჩხილიშ მონეტას?“, — კითხ თე კოჩიქ. „ოქროშ მონეტა გეიჭოფუდუკონ, ჟირშა უმოს ფარა გაღვენუდ!“. „ქო მარა, ოქროშ მონეტა გეპჭოფენ, ხალხ მიოტენს ჩქიმწკუმა თე ლაჸაფის“, — უწუ ბაღანაქ. „სი ქოიჩქუნო მუსხი ვარჩხილიშ მონეტაქ მაშაყარუნ“? ბაღანაქ თე არიკის გიმირჩქინ თიცალ სიბრძნე, ნამუთ დიდეფს ხოლო გიმადირთუ.

ბიბლია იჩიებ: „ვემიოდინუა სიბრძნე დო ჭკუა. თე დროს სქან შარას ირიათო უშიშარო გილეშენ იჸი დო მუთუნს ხოლო ვეკახაბარკუქ“ (იგავ. 3:21, 23). მუჟამს მიჩქუნა, მუ რე სიბრძნე დო მუჭო გიმიბრინუათინ, თენა სინამდვილეს დამიცვენა; მიმეხვარებუნა, ვედეფსუსტათ სულიერო დო მანგარო გივორდათ.

სიბრძნე გენესხვავებ რჩქინაშე დო გაგებაშე. რჩქინა უღუნ ფერ კოჩი ირფორმაციას ვარდა ფაქტეფს შაყარანს. გაგება უღუნ ფერ კოჩი ფაქტეფს ართ მაჟირას უკავშირენს. მარა სიბრძნე უღუნ თის შეულებ ცოდნა დო გაგება ართათ გეგმირინუას.

მაგალთო, ნამთინექ შილებე ჩქარას წეკითხას დო ქიგეგას წიგნი „მუს მოგურუანა ბიბლია სინამდვილეს?“. ბიბლიაშ გურაფაშ დროს, თიქ შილებე სწორ პასუხეფი ქიმეჩას, კრებაშ შეხვალამეფშა ხოლო ქიდიჭყას გილულა დო ჯგირ კომენტარეფი გაკეთას. თე ირფელ შილებე ართუცფას თიშ სულიერ პროგრესის ოძირანდას, მარა ნიშნენსო თენა, ნამდა თის სიბრძნე უღუ? თენა გვალო თაშ ვა რე. შილებე თის უბრალოთ სწრაფ აზროვნებაშ უნარ უღუდას. მარა მუჟამსით ჭეშმარიტებას ცხოვრებას გატარენს დო რჩქინას დო გაგებას სწორას გეგმირინუანსინ, ბრძენ იჸუაფ. თინა მუთუნიშ გინოჭყვიდუაშახ წინასწარ ფიქრენს დო თეს ჯგირ შედეგეფ მოჸუნს-და, თენა ოძირანს, ნამდა თის პრაქტიკულ სიბრძნე უღუ.

მათეშ 7:24—27-ს იესოს ჟირ კოჩიშ მაგალით მოჸუნს; თინეფ ცალ-ცალკე აშენენდეს ჸუდეს. თინეფშე ართ მოშინაფილ რე „გონიერო“. თიქ წინასწარ იფიქრ, მუქ შილებედ მოხვადუკონ, ათეშგურშენ ჸუდე კირდეს აშენუ. თინა წოხოლე იჯინედუნ ფერ კოჩ რდუ. თის ვაუფიქრებ, ნამდა ჸუდეს ქვიშას აშენენდუ-და, უმოს ეფი ქუდუდოხოდუდ ვარდა მალას აშენენდ. ჭკვერულ რე, თინა ფიქრენდ მუშ ნაკეთებ საქმექ დიდ ხანს ქუგარზუკო. თაშ ნამდა, მუჟამს ქარ-ბორიაქ გელალუნ, თიშ ჸუდე ვაკოცუმე. ჩქი მუჭო შემლებუნა მიბღათ დო გიმიბრინუათ თე ძვირფას თვისება, მუნერით რე სიბრძნე?

პირველ რიგის, ქობძირათ მუ ჭარ მიქაშ 6:9-ს: „ბრძენს აშკურინე [ღორონთიშ] სახელშა“. მოშკურუდან ღორონთიშ სახელშა, თენა ნიშნენს, მიღუდან თიშ პატიცემა. პატიცემაშა მიშურს, მიფშინუათ  თიშ სახელ დო გეფთვალისწინათ თიშ მითითებეფი. მითინიშ პატიცემა გეგმირჩქინენ, ოკო გიჩქუდას, მუს ფიქრენს თინა შხვადოშხვა საკითხშენ. თეშ უკულ შეილებუ მიენდე თის, თიშე დიგურუე დო თიშნერ წარმატებულქ იჸუე. მუჟამს ქოფიფქრენთ, მუჭო იმოქმედენს ჩქინ ნაკეთებ საქმე იეჰოვაწკუმა ურთიერთობაშა დო მუდგას გინოპჭყვიდუნთინ თინა გერსხილ ქორე თიშ ნორმეფშა-და, ჩქი მიბღენთ სიბრძნეს.

მაჟირა, იგავეფიშ 18:1 იჩიებ: „ხვალე დოსქილადირ კოჩი მუშ გურიშ აზრიშ შესრულებას ოცადუ; თინა ირნერ სიბრძნეშ წინააღმდეგ მეურს“. კურცხას რდათ, ნამდა ვედეთხუათ იეჰოვას დო თიშ ხალხის. ჩქინ დუდიწკუმა ხვალე ვადოფსკიდათინ, მოსაჭირუნა გეგმოფრთათ დრო თინეფწკუმა ურთიერთობაშო, მიდგას ღორონთიშ სახელშა ოშკურ დო მეჸუნს თიშ ნორმეფს. ჩქი სამეფო დარბაზის ოკო ვორდათ დო მიღუდან ურთიერთობა კრებაშ წევრეფწკუმა. კრებაშ შეხვალამეფს ვორეთინ, ჩქინ გონება დო გურს ქიმეფჩათ ოკო საშვალება ქიშმეხუან, მუდგას თექ თქუანა.

თეწკუმა ართო, მუჟამს იეჰოვას ლოცვაშ დროს გურს გეგნუფაჩუნთინ, ჩქი უმოსო დევეახლოვებუთ თის (იგავ. 3:5, 6). ბიბლიაშ დო ჩქინ ლიტერატურაშ კითხირიშ დროს გურს გომწყუნთ დო გონებას საშვალებას ქიმეფჩანათ თის ჯგირო ქინვანჭათინ, ჩქი ქიმუვოჭირინუანთ ბრელ ხანს იგრძელებუნ ფერ შედეგეფს. ჩქი გურ ოკო გომწყათ, ჯიმალეფ რჩევეფს მარზენან თი დროს ხოლო (იგავ. 19:20). თიშ მანგიორო, ნამდა სიბრძნეშენ ვარია ფთქუათინ,  ჩქი უმოსო გენიბღანთ გურშა თე მნიშვნელოვან თვისებას.

სიბრძნეს შეულებ დეცვას ჩქინ ოჯახი. მაგალთო, ბიბლია ოგურუანს ოსურეფს დიდ პატი ცან მუნეფიშ ქომონჯეფს (ეფეს. 5:33). მუჭო შეულებ ქომონჯის პატიცემა დემსახურას? თინა პატიცემას ჸინჩას ქითხინს-და, თეს მოკლე-ვადიან შედეგ მაჸუნუ. კონფლიქტის დუდ არიდასინ თიშენ, ოსურქ შილებე პატიცემა გეგმირჩქინას, ქომონჯ თექ რენ თი დროს. მარა გეგმირჩქინანსო თინა პატიცემას ქომონჯ თექ ვა რენ თი დროს? ალბათ უმოსო მოსალოდნელ რე, ნამდა თენა თაშ ვეჸი. ქომონჯიქ ოკო დეფიქრას, მუ მოუღანს თიცალ შედეგეფს, ნამუთ დიდ ხანს გეგრძელებ. თინა შურიშ ნაყოფის გეგმირჩქინანს დო ოსურს ჸოროფათ დო ჯგირო ქიმექციებ-და, დემსახურენს დიდ პატიცემას. მარა მუშო ოკო რაგად, ქრისტიან ოსურქ იშენით ოკო ცას ქომონჯის პატი, თიშ უმკუჯინუო, იმსახურენს დო ვარ თეს (გალ. 5:22, 23).

ბიბლია თის ხოლო იჩიებ, ნამდა ქომონჯის უჸორდას ოკო მუშ ოსური (ეფეს. 5:28, 33). ქომონჯიშ ჸოროფა ვემიოდინუასინ თიშენ, ოსურქ შილებე დოუფულას თიცალ მუდგარენ, ნამუთ თის ოკო უჩქუდას. სინამდვილეს ქორენო თენა ბრძნულ საქციელი? მარა უკულ ქომონჯ თეს ქიგეგენსინ, მუ იჸუაფ თეშ შედეგი? ქეჸოროფებუნო უმოსო? საეგებიო რე. ათეშგურშენ ოსურქ მოხუჯურ დრო ოკო გეგშაგორას, ნამდა მშვიდას ქუდურაგადუას; მოსალოდნელ რე, ნამდა ქომონჯი დაფასენს თეცალ ალალ საქციელს დო უმოსო ქეჸოროფებ მუშ ოსური.

ბაღანეფქ ოკო დემორჩილან მუნეფიშ მშობლეფს დო მშობლეფქ იეჰოვაშ მოსაწონო ოკო მორდან თინეფ (ეფეს. 6:1, 4). ნიშნენსო თენა თის, ნამდა მშობლეფქ წესეფიშ სია ოკო დუდგინან ბაღანეფს? ბაღანებშო დასაბაღ ვა რე ხვალე თიშ რჩქინა, მუ წესეფ აფუნა მშობლეფს დოდგინელ ვარდა მუ შემთხვევას დესაჯებუნა თინეფ. სიბრძნე ოხვარ მშობლეფს, ქუგაგებაფუან ბაღანეფს, მუშენ რე ჯგირ მორჩილება.

მაგალთო, ბაღანა უპატიცემუოთ ურაგად მშობელს. თე დროს გაღიზიანებულ მშობელქ შილებე ქუდუღაჭალუას ვარდა დასაჯას ბაღანა. მარა თეცალ საქციელ დამცირენს ბაღანას დო თიქ შილებე ხონარ შურო ვეკიღას, გურ ქიმიჸონას დო უმოსო დეშორას მშობლეფს.

ბრძენ მშობლეფ ფიქრენა რდუალაშ მუნერ მეთოდეფ გიმირინუან დო მუჭო იმოქმედენს თენა ბაღანეფწკუმა ვიშო-ვიშო. მშობლეფქ ხეთე ვეგეღიზიანან დო ვადასაჯან ოკო ბაღანა. ბაღანაწკუმა ორაგადეთ მშვიდ დო მითინ ვარენ ფერ დრო გეგშაგორით დო გეუნწყით, ნამდა იეჰოვა ელუ თიშე, პატი ცას მშობლეფს კინ მუშ საჯგირობუოთ. მუჟამს მშობლეფს პატის ქოცენსინ, თინა ქიმეხვადუ, ნამდა იეჰოვას ხოლო ცენს პატის (ეფეს. 6:2, 3). თეცალ მერინა შეხებუ ბაღანაშ გურს. თინა გინაფლენს, ნამდა მშობლეფ მთელ გურით ისოფუნა თიშო დო მეტ პატიცემას გეგმირჩქინანს. მუჟამსით სერიოზულ საკითხეფიშ წოხოლე ქიგედირთუნან, ბაღანეფს ვაგუჭირდუნა ქოთხუან მშობლეფს მოხვარა.

ნამთინე მშობელს ოშკურ, ვაწყინებაფუას ბაღანას, ათეშგურშენ დუდს არიდენს, ნამდა შენიშვნა ქიმეჩას. მარა მუ შედეგ მაჸუნუ თეს, მუჟამს ბაღანა მირდუნ? ქაღვენუნო თის იეჰოვაშ შიში დო ქესმებუდასინო, ნამდა იეჰოვაშ მითითებეფიშ მეჸუნა ბრძნულ რე? გურს გოუნწუნსო დო ქუმურჩქილუანსო იეჰოვას, დო ვარ დეშორებ თის? (იგავ. 13:1; 29:21).

ჯგირ მოქანდაკე წინასწარ გეგმენს, მუ ფორმაშ ქანდაკება გიშათოლას. თინა უცბას ვეგშათოლუნს თის, თიშ გურშენ, ნამდა საუჯგუშოქ გეგშართასი. თეგვარო, მშობლეფ ხოლო ბრელ დროს გიმურთუნა გურაფას დო გიმირინუანა იეჰოვაშ ნორმეფს. თეთ ოძირანა, ნამდა თიშ სახელიშ შიში უღუნა. თინეფ დუდს ვარიდანა იეჰოვას დო თიშ ორგანიზაციას დო თეთ უმოსო აშინა სიბრძნე, ნამუსით მუნეფიშ ოჯახიშ საჯგირობუოთ გიმირინუანა.

ჩქი ირ დღას მაფუნა თიცალ საკითხეფ გინაჭყვიდირალ, ნამუქით შილებე წანეფიშ უკულ იმოქმედას ჩქინ ცხოვრებას. ათეშგურშენ უცფას დო ემოციურ ფონს ვეგნობჭყვიდათ ოკო მუთუნ. უჯგუშ იჸუაფ ჯგირო ქუგუჩათ გურ, მუქ შილებე მაჸუნას, მუდგას გინობჭყვიდუნთინ თის. მიაჸუნით იეჰოვაშ ხემძღვანელობას დო გეგმირინეთ სიბრძნე, ნამუთ ღორონთშე მოურს. თეგვარო ბრძნულო მიქციებუთ დო თენა სიცოცხლეს ქუმოიღანა (იგავ. 3:21, 22).