Rogo gu kura uru sa, kura gino sa asana gu kumbagude re nga, “Ya mo mo ainongo ho nga guru nga ga dahabu ru re paru ima kio wakina bara ue kisusi guru nga ga feda ru te?” Gu tooni kumbagude re amomu na ki ya, “Nirengo, mi ima inoho.” Gu gino re ki sanahe nga, “Tipagine du tie mo adia kina guru ti ni nga ga feda? Ka mo di guru nga ga dahabu ru, bakio gu marã nika du bero nika kio wakina bara ue kisusi!” Gu kumbagude re ki ya, “Ono ka mi di guru nga ga dahabu ru, aboro anginga gu mbaro re na mi berewe te. Ya mo mo iningo bange agu amarã nga ga feda ra mi nadungura ra?” Gu tooni kumbagude du pako rogo gu paturẽ re ayugu gu sino sosono aboro naima rengba ka gbia undo ti ni, nga ndikidi tatamana.

Ziazia Kekeapai naya: “Mo ká kuti ndikidi tatamana na sia pa pai; ka si nigó nga bangiro ya. Si du mo atá rogo gamo apai ni bandabanda ro, ka nduro akóta nga ya.” (Snz. 3:21, 23) Sidu, pa ino ani guhe nga “ndikidi tatamana” na wai ka mangapai kutini nakoda gaani pa bata. Gipai re naundo rani ka ani kotonga rogo toro yo ya, kini banda ‘ndurani’ si ru nyanyaki.

Ndikidi tatamana kia ti inohe gbiati giarogopai yo. Gu boro du na inohe, ni ima ino agu arengo du tipa pai. Gu boro du na giarogopai yo, ni rengbe arengba ka bi gu ngbaya du dagba agu arengo re na agu akuraha. Gu boro du na tatamana, ni rengbe ka koda inohe gbiati giarogopai yo na ki mangisunge na ni rogo mangimangipai yo.

Ni kpiapai, boro ima rengba ka geda gu buku nga Gini Apai Nzunzu Ziazia Kekeapai Ayugoho? vuru wiri guru regbo yo na ki girogoyo. Ti gu regbo ni awirika Ziazia Kekeapai, ni ima rengba kaa fu akaragapai ni ruruhe. Ni ima rengba ka tona ndu tipa adunguratise na kini fuku wene akaragapai ti aregboho. Agi apai re dunduko rengbe ka yugoho nga ni nasona kumbatayo rogo toro yo, ono ya mo si nayugo gupai nga ni ima du na tatamana? Anga wo duhe nzunzu te. Si rengbe kadu nga ni nga gu boro nagiarogopai yo ni ipo. Ono tie, ho ni amanga agu apai ni nga ga rengo rogo mangimangipai yo, kini mangisunge na inohe gbiati giarogopai yo ngba wene gene, gure nga ni nada ni ira tatamana. Ka si du nga gani adiaberã nika du na diabese, kini yugu gupai nga ni aima ngera kumbatayo wenengai, si nika duadu ziazia nga ni nayugo ndikidi tatamana.

Rogo Matayo 7:24-27 Yesu apeke akpiapai yo tipa akumba ue naameke gayo abambu. Ko afura tipa gu kura ko ya ko angia “boro tatamana.” Ko aberẽ kumbatayo tipa gupai narengbe ka manga, si ki sako ko dua gako bambu rii mbia yo. Ko angere ku mbatayo na ko ki mangipai. Ko aasakanga pai berãko yo nga dua bambu rii ngume yo du genoho kusende watadu rengbe sungehe ka nyasa ni ipo te. Mbiko tatamana, ko aberẽ kumbatayo tipa gupai rengbe ka manga mbiko gako mangaapai. Sidu, ho bavugumo aye ni, si aagbarasanga gako bambu te. Sidu, gu sanahe nakura nga, Wai du rengbe  ani ka gbia gi nyanyakipa sino nga ndikidi tatamana re na ki bandaha?

Bambatapai nga, Mika 6:9 naya: “Ndikidi tatamana nga ka gunde ti [rimo Mbori].” Gunde ti rimo Yekova nayugo gupai nga ka irisa ko. Si nayugo gupai nga kadu na irisa tipa gupai rimoko aru kubaha, kodihe na gako arugute. Tipa ka irisa boro, si naida mo ini gani aberã. Fuani tie, mo ki rengbe ka kido kuti ni na ki wirikipai be ni, na ka wirika kadu na diabese wakina ni. Ka ani aberãpa gu sangbanapai rengbe gaani mangaapai kadu na ni kurii gaani pagume na Yekova, na ka ani moi mburu gaani adiaberã rii gako arugute, gure nga ani nagbia ndikidi tatamana.

Uepai nga, Asanza 18:1 naya: “Gu ni nakpara tini nagbata kina gu pai ni akpi nyemu he, ka zinga kuti gu bawenepai nga ga sarangbanga dunduko.” Ka ani adunga na rubangirise ya, ani ima rengba ka kpara tirani ti Yekova gbiati gako aboro. Tipa gupai nga ka ani kparanga tirani ya, si naida ani naadia regbo na agu aboro nagunde ti rimo Mbori na kini irisi gako arugute. Ani nitirani si aida ani du kina Bambu Kindo yo tipa kaa kodatirani na gu dungurati nga ga aKristano dedede. Ho du ani ni badunguratise yo, si naida ani zaki berãrani yo na ngbadurani yo tipa ka mbu gupai i agumbaha yo si mangi ariapai na ani.

Kurapai berewe nga, ka ani peke agu apai du ngbadurani yo fu Yekova rogo kparakpee yo, ani nika mbeda na ko. (Snz. 3:5, 6) Ho ani azaka berãrani na ngbadurani ni ka geda Ziazia Kekeapai gbiati agu awaraga ga Yekova riigbu akusaha, si nasa rani ani bi mboimboi gupai rengbe ka manga kumbatayo mbiko gaani mangaapai na ani ki rengbe ka mangapai ringbisihe kutini.  Si naida ani zaki ngbaduraniyo a tipa agu arugute nyanyaki awirina afuhe. (Snz. 19:20) Fuo gure, kuba gupai nga ani ‘zingi kuti gu bawenepai nga ga sarangbanga dunduko’ du nga ka zinga kuti ndikidi tatamana, ani nika nyakasa gi nyanyakipa sino re.

Ndikidi tatamana rengbe arengba ka undo aborokporo. Ni kpiapai, Ziazia Kekeapai nangarasa diakumba nga ri “nigunde agunde” ti kumbari. (Ef. 5:33) Wai du rengbe kumba ka gbia gu dudunguro irisa nga ga diako? Ka ko aidaha ngbaome watadu na zinga, gu sangbanapai rengbe ko ka gbiaha rengbe kadu tipa kina wiri guru regbo. Tipa ka zanga kpakaraapai, dia ngbatunga gu kumba re rengbe ka fu bete irisa fuko kinaho du ko ni. Ono wa vura duhe wo, ya mo si rengbe ka sari ri irisiko ho adunga ko ni ya? Si nawira wa si arengbanga ka manga te. Si naida ko ini gupai rengbe ka ye na nyenye sangbanapai. Ka si du nga ko nayugo zuzu toro, kidu na nyemuse gbiati weneringise, ko gbia dudunguro irisa agbia beri. Rengo ngaha nga, si naida gu diakumba nga Kristano yugu irisa fu kumbari singia ko rẽ tipaha watadu ko arẽnga te.​—Gara. 5:22, 23.

Ziazia Kekeapai nape gupai a nga si naida kumbakudee kpinyemu diako. (Ef. 5:28, 33) Diakumba rengbe ka oka agu apai ti kumbari angbanga ya ono du ko adu na rengo tipa ka inoho mbiko gupai nga ri naida ko kpinyemuri. Ono ya mo gure nzunzu nayugo ndikidi tatamana? Ka ko kuru bara gupai kusa i aoko ho tiko re, sangbanaha nika ngia gine? Ya mo si asako ko kpinyemu ri gbe? Gure ima rengba kadu ni mbumbuhe fuko. Kuba gure, ka si du nga ri nika gbia wene regbo ka peka agu apai fuko angbanga re ya zezeredi, si nawira wa kumbari nika duadu na ngbarago mbiko ri nagumba rengo. Sidu tie, gako nyemuse tipa ri nika sonakumbatayo.

Si naida agude irisi avunguyo na i kini fu arugute fuyo ringbisihe kuti ga Yekova agene. (Ef. 6:1, 4) Ya mo gipai re nayugoho nga si naida avunguagude rũndiko tipa agu apai dunduko si aida i mangihe na gu si aidanga i mangihe ya? Badungu apai si akodaha angianga kina ino agu andiko sa si aida i irisihe watadu gu mbusa rengbe yo ka gbiaha ka i basasangba ya. Gu vungugude du na ndikidi tatamana naundo wirini u ini gu ndupai si aida u gisangba ti ni.

Ni kpiapai, ani ya nga gude fura fu boro sa dagba avunguru yo zanga na irisa. Ka fura furu gbegberẽ watadu ka fu mbusa furu kinaho rengbe ka ba zee tiru watadu ka sa ru ka u furanga ya. Ono wa vura duhe wo, u ima rengba ka kpipai ku ngbadu ru yo, na si rengbe ka saru ka u mbedinga na avunguru ya.

Agu avunguagude du na ndikidi tatamana, i naberãkurii gu gene i afu mbusa fu awiriyo ngbaha na gu sangbanapai rengbehe kadu na ni kuriyo kumbatayo. Si aidanga avunguagude zingi kuti awiriyo ni ipo mbiko gu zee gbia yo te. Isoke i ima rengba ka sakapai na gu gude re zezeredi ho du u ni nisa ru, ki saki gupai furu nga Yekova naida u irisi avunguru tipa kina ga u nyenye undo. Fuani tie, ho gude nikaa yugo irisa ni fu avunguru, u nika inoho nga u nairiso Yekova. (Ef. 6:2, 3) Ngbatunga wene gene wa gure ima rengba ka zio ngbadu gude yo. U rengbe ka bi wai avunguru angera fuoru nzunzu na ga u irisa tipa yo kini sono kina kumbatayo. Si rengbe ka saha taata furu u sana avunguru tipa undo ho nyanyakipa pai nika kura ni kusa.

Kura avunguagude aidanga ka pe gupai rengbe ka ba gberãrago ti awiriyo te, sidu, i aidanga ka fu rugute fuyo te. Ono wa vura duhe wo, ginipai rengbe ka manga ka si du nga gu gude re sono? Ya mo u agunde ti Yekova na ki ini gu wenepai du ti pekafuo ga Mbori arugute? Ya mo u aza ngbadu ru yo na berã ru yo fu Yekova watadu u nika kpara tiru kusayo rogo toro yo?​—Snz. 13:1; 29:21.

Wene bambakadiahe naberã kumbatayo mbata tipa guhe ni aida ka mbakadaha. Ni atona nga kina mbakadimbakadihe gbua kidu na gu maabangirise nga si nika ngba angba te. Agu avunguagude du na ndikidi tatamana nadia regbo kaa wirika ga Yekova arugute na kini mangihe, rogo gi gene re, i kini gunde ti rimoko. Pa zanga yo kparatiyo ti Yekova gbiati gako riigbu, nasa yo i gbia ndikidi tatamana na i ki mangisunge na ni ka nyakasa gayo aborokporo.

Aʹuru dunduko ani agbiatirani na agu adiaberã rengbe ka manga ariapai na gaani raka tipa dungu agarã. Kuba gupai nga ka mangapai ni kina boro ipo na ki mangi gbarakagbaraka diaberã, anga si ni wenepai ka ru mbata ka berã te? Mo berẽ dudunguro kurii gu sangbanapai rengbe ka ye kumbatayo. Mo gbata ga Yekova arugute na ki mangipai kuti gako tatamana. Ngba gu gene re, ani nika banda ndikidi tatamana na si nika fu unga furani.​—Snz. 3:21, 22.