1. ¿Mbaʼépa jajapo vaʼerã entéro jaadoráva Jehovápe?

NAENTÉROI ningo ojerovia Ñandejárare (2 Tes. 3:2). Péro Jehová oipytyvõ entéro umi oadorávape chupe ojerovia hag̃ua hese (Rom. 12:3; Gál. 5:22). Upévare, jaagradese vaʼerã chupe ñanepytyvõ haguére jareko hag̃ua fe.

2, 3. a) ¿Mbaʼépa jahupyty jajerovia rupi? b) ¿Mbaʼépa ñambohováita ko artíkulope?

² Jehová oheja vaʼekue Itaʼýra ohayhuetéva omano, ikatu hag̃uáicha oñeperdona ipekádo entéro umi ojeroviávape Jesúsre. Avei haʼekuéra ikatúta oñemoag̃ui Jehováre ha oiko opa ára g̃uarã (Juan 6:44, 65; Rom. 6:23). ¡Ajépa imbaʼeporãite Jehová! Ñande ningo pekadór ha ñamerese ñamano, upéicharõ jepe haʼe ohecha vaʼekue ñanderehe ikatuha jajapo heta mbaʼe porã (Sal. 103:10). Jehová ñanepytyvõ kuri ñaaprende hag̃ua umi marandu porã oñeʼẽva Jesúsre ha isakrifísiore. Ñañepyrũrõ guare jajerovia Jesúsre ha jasegi iñehémplo, jajerovia avei ikatutaha jaiko pára siémpre (elee 1 Juan 4:9, 10).

 ³ Péro, ¿mbaʼépa heʼise jarekoha fe? Oimérõ jaikuaa umi mbaʼe Ñandejára ojapo vaʼekue ñanderehehápe ha umi mbaʼe ojapótava amo gotyove, ¿heʼisépa upéva jajeroviamaha? Nahániri. Jahechamína mbaʼépa jajapove vaʼerã.

4. ¿Mbaʼépa jajapóta jajeroviáramo ñande pyʼaite guive?

⁴ Jajeroviáramo Jehováre ha Jesúsre, nañañekontentamoʼãi jaikuaánteramo umi mbaʼe haʼekuéra ojapo vaʼekue ha ojapótava ñanderehehápe. Upéva rangue, ñande pyʼaite guive jaikóta haʼekuéra oipotaháicha, ha ñaipytyvõta ótrope oikuaa hag̃ua avei chupekuéra. Apóstol Pablo heʼi vaʼekue: “Remombeʼúramo opavave renondépe ‘pe marandu oĩva nde jurúpe’; upéva hína Jesús haʼeha ñande Ruvicha, ha nde pyʼapýpe rejeroviáramo Ñandejára omopuʼã hague chupe omanóva apytégui, upéicharõ rejesalváta. Ñanderekojoja hag̃ua jajerovia vaʼerã ñande pyʼapýpe, ha jajesalva hag̃ua jaiporu vaʼerã ñande juru ñamombeʼu hag̃ua pe marandu” (Rom. 10:9, 10; 2 Cor. 4:13).

5. ¿Mbaʼérepa iñimportánte jajerovia Jehováre? Emoĩ peteĩ ehémplo emyesakã hag̃ua mbaʼépa jajapo vaʼerã jasegi hag̃ua jajerovia.

⁵ Jaikoséramo opa ára g̃uarã pe múndo pyahúpe, jajerovia vaʼerã Jehováre ha ñañehaʼãmbaite vaʼerã ani hag̃ua mbaʼeve omokangy ñande fe. Pe fe ningo ikatu ñambojoja peteĩ plántare. Ikatu hag̃uáicha peteĩ plánta hogue vérde asy ha okakuaa porã, tekotevẽ jarrega meme. Ndajajapóiramo upéicha, hoguemanombáta ha ipirúta. Péicha avei, ñañehaʼãmbaite vaʼerã jasegi hag̃ua jajerovia Ñandejárare (Tito 2:2; 2 Tes. 1:3; Luc. 22:32; Heb. 3:12).

6. ¿Mbaʼépa heʼise pe fe según Hebreos 11:1?

⁶ La Biblia omyesakã mbaʼépa heʼise pe fe (elee Hebreos 11:1). Primero, heʼise “jagueroviaha pyʼamokõiʼỹre oikotaha katuete umi mbaʼe ñahaʼarõva”. Ñande ningo ñahaʼarõ oñekumpli umi mbaʼe Ñandejára opromete vaʼekue. Avei ñaime segúro opataha entéro mbaʼe vai ha jaikotaha peteĩ paraísope. Segundo, pe fe heʼise “jaikuaa porãha añeteha umi mbaʼe jagueroviáva, ndajahecháiramo jepe umíva”. Por ehémplo, ñande ndajahechái Jehovápe, Jesucrístope, umi ánhelpe, ni pe Rréino oĩva yvágape, péro jaikuaa porã oexistiha (Heb. 11:3). Upéicharõ, ¿mbaʼéichapa ikatu jahechauka jajeroviaha Ñandejára promesakuérare ha umi mbaʼe ndajahecháivare? Ikatu jahechauka upéva jaiko lájare, umi mbaʼe jaʼévare ha avei umi mbaʼe jajapóvare.

7. ¿Mbaʼéichapa Noé ehémplo ñanepytyvõ ñantende hag̃ua mbaʼépa heʼise pe fe? (Ehecha pe taʼanga oĩva iñepyrũme).

⁷ Noé ehémplo ñanepytyvõ ñantende hag̃ua mbaʼépa heʼise pe fe. Apóstol Pablo heʼi: “Ñandejára oavisa vaʼekue Noépe oikotaha umi mbaʼe ojehechaʼỹva gueteri, ha Noé ojerovia rupi, okyhyje Ñandejáragui ha ojapo pe árka osalva hag̃ua hogayguakuérape” (Hech. 11:7). Noé ojerovia rupi Jehováre, ojapo peteĩ árka tuichaitereíva. Oime vaʼerã ivesinokuéra oporandu chupe maʼerãpa ojapo upe árka. Ñande jaikuaa porã haʼe nokirirĩri hague, pórke la Biblia heʼi Noé haʼe hague “peteĩ kuimbaʼe opredikáva umi mbaʼe hekopeguáva” (2 Ped. 2:5). Noé omombeʼu umi héntepe Ñandejára oguerutaha peteĩ ama guasu ohundi hag̃ua umi iñañávape. Oime vaʼerã Noé oavisa umi héntepe Jehová  heʼi hagueichaite chupe. Ñandejára heʼi kuri: “Adesidíma ahunditaha opa mbaʼe oikovévape, henyhẽma rupi ko yvy umi hembiapo vaívagui”. Ha heʼi avei: “Che aguerúta hína peteĩ Dilúvio ha ahundipaitéta entéro mbaʼe oikovéva ko yvy ape ári. Opa mbaʼe oĩva ko yvy ári oñehundipaitéta”. Upéi, Noé katuete heʼíne raʼe umi héntepe mbaʼépa ojapo vaʼerã hikuái ojesalva hag̃ua. Jehová heʼi kuri Noépe: “Reike vaʼerã pe árkape” (Gén. 6:13, 17, 18, TNM).

8. ¿Mbaʼépa heʼi Santiago pe fe rehe?

⁸ Disípulo Santiago oñeʼẽ avei pe fe rehe. Oime vaʼerã ojapo upéva apóstol Pablo oskrivi riremi ikárta umi kristiáno hebréope. Santiago heʼi: “¿Mbaʼéicha piko rehechaukáta rejeroviaha nderejapóiramo tembiapo iporãva? Che ahechaukáta ndéve che jerovia che rembiapo porã rupive” (Sant. 2:18). Santiago heʼi jarekoséramo fe, ndahaʼéi jakreétanteva Ñandejára oexistiha. Umi demónio jepe oikuaa porã Ñandejára oexistiha, péro ndojeroviái hese. Haʼekuéra opuʼã guei Jehováre (Sant. 2:19, 20). Peteĩ persóna orekóva fe ningo ojapose umi mbaʼe Ñandejára oguerohorýva. Abrahán ojapo vaʼekue upéva.  Santiago heʼi hese: “Ñande ru Abrahán oikuaveʼẽ itaʼýra Isaácpe pe altár ári, ha Ñandejára heʼi hese hekojojaha ohecha rire hembiapokue. Nde rehecha haʼe ohechauka hague ijerovia hembiapo rupive, ha hembiapo rupi ojerovia hekoitépe”. Upéi Santiago heʼi avei reiete jaʼetaha jarekoha fe, ndajahechaukáiramo umi mbaʼe jajapóvare. Haʼe heʼi: “Ñande rete omano ndajarrespiráiramo, upéicha avei ñande jerovia omano hína ndajajapóiramo tembiapo iporãva” (Sant. 2:21-23, 26).

9, 10. ¿Mbaʼépa jajapo vaʼerã jahechauka hag̃ua jajeroviaha Jesúsre?

⁹ Mas de 30 áño Santiago oñeʼẽ rire pe fére, apóstol Juan oskrivi pe evanhélio de Juan ha umi mbohapy kárta. Haʼe ningo ontende porã avei mbaʼépa heʼise pe fe. Heta vése oipuru pe palávra griéga guaraníme ojetradusíva “jajerovia”.

¹⁰ Por ehémplo, Juan heʼi kuri: “Ojeroviáva pe Taʼýrare ohupytýta jeikove opaveʼỹva, pe naiñeʼẽrendúiva pe Taʼýrape katu ndohupytymoʼãi jeikove opaveʼỹva, ha Ñandejára pochy rendy opytáta hiʼári” (Juan 3:36). Jahechauka hag̃ua jajeroviaha pe Taʼýrare tekotevẽ ñaneñeʼẽrendu chupe. Jaleévo opa umi mbaʼe Juan oskrivi vaʼekue, jahechakuaáta pyʼỹinte Jesús omboʼe hague jasegi vaʼerãha jajerovia (Juan 3:16; 6:29, 40; 11:25, 26; 14:1, 12).

11. ¿Mbaʼéichapa ikatu jaagradese Jehovápe opermiti haguére ñandéve jaikuaa chupe ha Itaʼýrape?

¹¹ Jehová ñanepytyvõ ijespíritu sánto rupive jaikuaa porã hag̃ua chupe ha Itaʼýrape, ha avei jajerovia hag̃ua hesekuéra (elee Lucas 10:21). ¿Mbaʼéichapa ikatu jaagradese Jehovápe upévare? Ñamombaʼe vaʼerã pe amista jarekóva hendive Jesús rupive, “pe Mburuvicha ñanepytyvõva jajerovia hag̃ua hekoitépe” (Heb. 12:2). Avei ñañehaʼã vaʼerã jajeroviave. Upearã siémpre ñañemboʼe vaʼerã Jehovápe ha jastudia Iñeʼẽ (Efes. 6:18; 1 Ped. 2:2).

12. ¿Mbaʼépa jajapóta jajeroviárõ añetehápe Ñandejárare?

¹² Ñane rembiapóre ojekuaáta jajeroviápa añetehápe Jehová promesakuérare. Por ehémplo, ñañeʼẽta umi héntepe Ñandejára Rréinore ha ñaipytyvõta chupekuéra omoirũ hag̃ua avei Jesúspe. Upéicharõ, “jajapo memékena iporãva opavave rehehápe, péro koʼýte ñane ermanokuéra rehehápe” (Gál. 6:10). Ñañehaʼã vaʼerã jaipeʼaite ñande “reko tuja” ha umi mbaʼe jajapo vaʼekue yma, pórke ndajaipotái Jehová ipochy ñanderehe (Col. 3:5, 8-10).

13. a) ¿Mbaʼérepa iñimportánte jajerovia Ñandejárare? b) ¿Mbaʼépa heʼi avei Ñandejára Ñeʼẽ pe jeroviáre?

¹³ La Bíbliape heʼi: “Ndajajeroviáirõ, Ñandejára ni mbaʼevéicharõ nañandeguerohorymoʼãi; pe oñemoag̃uíva hese oguerovia vaʼerã haʼe añetehápe oikoveha ha omyengovia porãha umi oñehaʼãvape ipyʼaite guive ojapo hembipota” (Heb. 11:6). Ñandejára Ñeʼẽ heʼi avei pe fe iñimportantetereiha ñañemoag̃ui hag̃ua Jehováre, haʼete voi pe simiénto oikotevẽva kristianokuéra oservi porã hag̃ua chupe (Heb. 6:1). Péro ndahaʼéi jajerovia haguérente oikótamava ñandehegui Ñandejára amígo, tekotevẽ avei jajapo ambue mbaʼe (elee 2 Pedro 1:5-7; Jud. 20, 21).

14, 15. ¿Mbaʼépa iñimportanteve: pe mborayhu térãpa pe fe, ha mbaʼérepa?

¹⁴ Umi eskritór bíblico omensionave pe fe umi ótra kualidágui. Péro, ¿heʼisépa  upéva pe fe haʼeha pe kualida iñimportantevéva oreko vaʼerã peteĩ kristiáno? Jahechamína upéva.

¹⁵ Pablo oñeʼẽ vaʼekue pe fe ha pe mborayhúre, ha heʼi: “Che jerovia imbaretéramo jepe amomýi hag̃ua umi sérro, péro ndaporohayhúi, che ndahaʼéi mbaʼevete” (1 Cor. 13:2). Ha Jesús heʼi vaʼekue jahayhu vaʼerãha Jehovápe, ha heʼi péva haʼeha “pe mandamiénto tuichavéva oĩva pe Léipe” (Mat. 22:35-40). Pe mborayhu ñanepytyvõ jareko hag̃ua hetave kualida Ñandejára oguerohorýva. Por ehémplo, la Biblia heʼi pe mborayhu ogueroviaha opa mbaʼe. Upéicharõ, pe mborayhu ñanepytyvõ jaguerovia hag̃ua opa mbaʼe Ñandejára oskrivika vaʼekue Iñeʼẽme (1 Cor. 13:4, 7).

16, 17. a) ¿Mbaʼéichapa la Biblia ohechauka iñimportanteha jajerovia ha japorohayhu? b) ¿Mbaʼépa hína pe kualida iñimportantevéva, ha mbaʼérepa?

¹⁶ Heta vése umi eskritór bíblico oñeʼẽ jave pe mborayhúre omensiona avei pe fe. Upéva ohechauka la Bíbliape iñimportantetereiha koʼã mokõi kualida. Por ehémplo, Pablo omokyreʼỹ vaʼekue umi kristiánope omoʼã hag̃ua ipytiʼa “jerovia ha mborayhúpe” (1 Tes. 5:8). Pedro oñeʼẽ vaʼekue Jesúsre ha heʼi: “Ndapehecháiramo jepe Crístope arakaʼeve, peẽ pehayhu chupe. Napemañáiramo jepe hese koʼág̃a, pejerovia hese” (1 Ped. 1:8). Santiago katu heʼi umi kristiáno unhídope: “¿Ñandejára piko ndoiporavói umi imboriahúva ko múndope g̃uarã ikatu hag̃uáicha ijerovia mbarete hikuái, ha oike pe Rréino haʼe opromete vaʼekuépe umi ohayhúvape chupe?” (Sant. 2:5). Ha Juan heʼi Ñandejára omanda hague jajerovia vaʼerãha “Itaʼýra Jesucristo rérare, ha jajoayhu vaʼerã haʼe omanda haguéicha ñandéve” (1 Juan 3:23).

¹⁷ Péro Pablo avei heʼi: “Koʼág̃a opyta koʼã mbohapy mbaʼe: jerovia, esperánsa ha mborayhu; ha pe tuichavéva koʼãvagui haʼe hína mborayhu” (1 Cor. 13:13). ¿Mbaʼérepa Pablo heʼi iñimportanteveha pe mborayhu? Pórke koʼẽrõite natekotevẽmoʼãvéima jajerovia Jehová promesakuérare oñeʼẽva pe múndo pyahúre. Upérõ g̃uarã jaikótama peteĩ paraísope, la Biblia opromete haguéicha. Péro siémpre tekotevẽta jahayhu Ñandejárape ha ñande rapichápe. Ha amáske ohasa pe tiémpo jahayhuvéta chupekuéra.

18, 19. ¿Mbaʼe iporãvapa ohupyty Jehová puévlo ojerovia rupi hese, ha mávapepa jaagradese vaʼerã upévare?

¹⁸ Ñane tiémpope, Jehová puévlo oheja pe espíritu sánto ogia chupekuéra. Upéicha rupi, ojerovia Irréinore ha oñemoĩ ifavórpe, ha avei ohechauka hikuái ojoayhuha (Gál. 5:22, 23). Heta mbaʼe porã ningo ikatu jahupyty jajerovia ha jajoayhúramo. Jahecháma voi mbaʼéichapa ko yvy tuichakuére ñaiméma mas de ocho millón ermáno ha ermána ñaiméva unído, ha jaikóva pyʼaguapýpe kongregasiónpe.

¹⁹ Jehová ñanepytyvõ rupi añoite ningo ikatu ñaime unído, ha upévare haʼe omerese ñambotuicha chupe (Is. 55:13). Jaagradeseterei Ñandejárape omeʼẽ haguére ñandéve pe oportunida jajesalva hag̃ua jajerovia rupi (Efes. 2:8). Jehová osegíta oipytyvõ hetaiteve persónape okonfia hag̃ua hese. Og̃uahẽta hína pe día ko yvy henyhẽtaha yvypóra perfékto ha hekojojávagui, ha entéronte vyʼápe ombotuicháta Jehovápe opa ára g̃uarã.