1. Keristani abidadama be edena bamona ita laloa be namo?

ISEDA Keristani abidadama be mai anina bada karana ta. Unai kara be taunimanima ibounai ese idia abia gauna lasi. (2 Tes. 3:2) To, Iehova ese ena hesiai taudia ta ta dekenai abidadama ia henia. (Roma 12:3; Gal. 5:22) Unai abidadama idia abia taudia ibounai idia moale be namo.

2, 3. (a) Mai ena abidadama tauna ese dahaka hahenamo ia abia diba? (b) Edena henanadai do ita herevalaidia?

² Iseda guba Tamana be Iena Natuna amo ia sibona dekenai taunimanima ia veria mai. Unai dainai bema ta be Iesu ia abidadama henia, Dirava ese iena kara dika ia gwauatao diba. Bona unai ese dala do ia kehoa Iehova ia tura henia hanaihanai totona. (Ioa. 6:44, 65; Roma 6:23) Dahaka ita karaia dainai, unai hahenamo namona ita abia? Ita be kara dika taudia dainai, ita abia davana be mase. (Sal. 103:10) To Iehova ia diba ita be mai anina bada gaudia ita karaia diba. Unai dainai ita dekenai iena hebogahisi hereadaena ia hahedinaraia, bona iseda kudouna ia kehoa sivarai namona ita abia dae totona. Bena Iesu ita abidadama henia  matamaia bona mauri hanaihanai ita abia diba.​—1 Ioane 4:9, 10 duahia.

³ To abidadama be dahaka? Ia be vaira nega ai Dirava ese ita dekenai do ia henia gau namodia lalohadailaia karana ta sibona, a? Bona edena dala ai abidadama ita hahedinaraia be mai anina bada?

4. Dahaka dainai abidadama be ita lalohadailaia karana ta sibona lasi?

⁴ Abidadama ena anina be Dirava ena ura ita lalopararalaia sibona lasi. To ia be mai ena siahu, ta ena lalona ia veria diba Dirava ena ura hegeregerena ia kara totona. Bema ta be Dirava ese taunimanima ia hamauria dalana ia abidadama henia, do ia ura ma haida dekenai sivarai namona ia harorolaia. Aposetolo Paulo ia gwau: “Bema taunimanima vairanai ‘emu uduna amo’ oi gwauraia hedinarai Iesu be Lohiabada, bona emu kudouna ai oi abidadama Dirava ese ia be mase amo ia hatorea isi lou, oi be do oi mauri. Badina tau ta be ena kudouna ai ia abidadama neganai, ia be kara maoromaoro tauna ai ia lao, to ena uduna amo unai abidadama ia gwauraia hedinarai neganai, ia be hahemauri do ia abia.”​—Roma 10:9, 10; 2 Kor. 4:13.

5. Dahaka dainai abidadama be mai anina bada, bona edena dala ai ita hagoadaia diba? Haheitalai gwauraia.

⁵ Momokani, Dirava ena tanobada matamatana ai mauri hanaihanai ita moalelaia totona, namona be ita abidadama bona unai abidadama ita dogoatao auka. Iseda abidadama ita naria namonamo karana be flaoaflaoa naria karana ida ita hahegeregerea diba. Flaoaflaoa ia tubu namonamo totona, ranu ia abia be namo. Ia be flaoaflaoa koikoina bamona lasi. Bema ranu amo flaoaflaoa ita dairia lasi o bema tano be ia kaukau, flaoaflaoa be do ia kakoro bona mase. Iseda abidadama danu be unai bamona. Bema ita naria namonamo lasi, ia mase diba. (Luka 22:32; Heb. 3:12) To bema iseda abidadama ita naria namonamo, do ia goada bona “bada ia lao,” bona iseda ‘abidadama lalonai do ita gini goada.’​—2 Tes. 1:3; Tito 2:2.

6. Heberu 11:1 ese edena dala rua ai abidadama ia herevalaia?

⁶ Heberu 11:1 ai, (duahia) abidadama ena anina ia noho. Abidadama be ita itaia lasi gaudia rua ia herevalaia: (1) “Oi naria noho gauna”​—unai be Dirava ena gwauhamata hegeregerena vaira negai do idia vara gaudia, bona idia do vara lasi, hegeregere kara dika ibounai do idia ore bona tanobada matamata do ia vara. (2) “Oi abia dae gaudia be momokani, ena be unai gaudia oi itaia lasi”​—unai gaudia be idia noho momokani, to iseda matana amo ita itaia lasi, hegeregere Iehova Dirava, Iesu Keriso, aneru, bona guba Basileia ena gaukara idauidau. (Heb. 11:3) Edena dala ai ita hamomokania iseda helaro be ia goada bona Baibel ese ia herevalaia gaudia ita abia dae, ena be ita itadia lasi? Iseda hereva bona kara amo unai ita hamomokania diba, bema unai ita karaia lasi, iseda abidadama be anina lasi.

7. Abidadama kara dekenai, Noa ena haheitalai ese edena dala ai ita ia durua? (Laulau ginigunana herevalaia.)

⁷ Heberu 11:7 ese Noa ena abidadama ia herevalaia, ia gwau: “Dirava ese do idia vara gaudia be ia dekenai ia hadibaia murinai, ia ese Dirava gari henia karana ia hahedinaraia bona ena ruma bese hamauria totona lagatoi ta ia karaia.” Noa be lagatoi badana ia haginia neganai, ia ese abidadama ia hahedinaraia. Unai lagatoi badana ia haginia dainai, reana ena dekena taudia idia henanadai. Noa be gau ta ia hereva lasi eiava ia hamaorodia ia karaia gauna dainai ia do idia herevalaia lasi, a? Lasi! Iena abidadama dainai, mai gari lasi ida ia haroro bona ena  dekena taudia dekenai Dirava ese taunimanima do ia hahemaoro henia negana ia herevalaia. Noa ese idia dekenai Iehova ena hereva ia gwauraia, ia gwau: “Mauri gaudia ibounai do lau haorea, badina tanobada be edia kara dika dekenai ia honu momokani. . . . Lau be abata bada herea tanobada dekenai do lau siaia, mauri gaudia ibounai do lau haorea. Gau ibounai tanobada dekenai do idia mase ore.” Danu, Noa ese idia dekenai edia roho mauri dalana ia gwauraia. Dirava ena hahegani be inai: “Lagatoi lalonai do oi guia.” Unai dala amo Noa ese ena abidadama ia hahedinaraia. Oibe, ia ese “kara maoromaoro ia harorolaia.”​—Gen. 6:13, 17, 18; 2 Pet. 2:5.

8. Iamesi ese edena dala ai Keristani abidadama ia herevalaia?

⁸ Aposetolo Paulo ese abidadama karana ia herevalaia, bena nega sisina murinai, Iamesi ese ena revareva ia torea. Paulo hegeregerena, Iamesi ese ia hahedinaraia Keristani abidadama be gau ta oi abia dae karana sibona lasi, ia be mai ena kara danu be namo. Iamesi ia gwau: “Vadaeni lau dekenai emu abidadama oi hahedinaraia, to kara lasi, bona lau ese egu kara amo egu abidadama do lau hahedinaraia.” (Iam. 2:18) Bena Iamesi ese gau ta oi abia dae karana bona emu abidadama hahedinaraia karana edia idau ia herevalaia. Demoni idia abia dae Dirava ia noho, to edia abidadama be  momokani lasi. Unai dainai, idia ese Dirava ena ura ia guguru dalana idia koua. (Iam. 2:19, 20) Ena idau hahedinaraia totona, Iamesi ese idaunegai ia noho abidadama tauna ma ta ia herevalaia, ia gwau: “Iseda tamana Aberahamo ese ena natuna Isako be boubou patana latanai ia bouboulaia murinai, iena kara dainai Dirava ese ia gwauraia maoromaoro, ani? Vadaeni oi diba, Aberahamo ena abidadama be ena kara ida ia gaukara hebou bona ena kara amo ena abidadama ia hanamoa momokani.” Bena ia hahedinaraia abidadama be iseda kara amo ita hahedinaraia be namo, ia gwau: “Bema tauanina be mai ena mauri lasi, ia be mase gauna, unai hegeregere abidadama mai ena kara lasi be mase gauna.”​—Iam. 2:21-23, 26.

9, 10. Ioane ese edena dala ai ia hahedinaraia abidadama be mai anina bada?

⁹ Lagani 30 mai kahana murinai, aposetolo Ioane ese ena Evanelia bukana bona revareva toi ia torea. Baibel toretore taudia ma haida ese Keristani abidadama ena anina idia herevalaia neganai, unai ia abia dae, a? Baibel toretore taudia ma haida bamona, Ioane ese ia gaukaralaia Grik herevana be nega haida idia hahanaia “abidadama.”

¹⁰ Hegeregere, Ioane ia gwau: “Natuna ia abidadama henia tauna be mauri hanaihanai do ia abia, to Natuna ia kamonai henia lasi tauna be mauri do ia itaia lasi, to Dirava ena badu be ia latanai ia noho.” (Ioa. 3:36) Keristani abidadama ena anina ma ta be Iesu ena hahegani do ita badinaia. Nega momo Ioane ese Iesu ena hereva ia gwauraia, unai amo ia hahedinaraia abidadama be hanaihanai do ita hahedinaraia karana ta.​—Ioa. 3:16; 6:29, 40; 11:25, 26; 14:1, 12.

11. Hereva momokani ita diba dainai, dahaka ita karaia be namo?

¹¹ Ita moale badina Iehova ese ena lauma helaga amo hereva momokani be ita dekenai ia hahedinaraia, bona ita ia durua sivarai namona ita abidadama henia totona! (Luka 10:21 duahia.) Namona be hanaihanai Iehova ita tanikiu henia, badina iena Natuna, “iseda abidadama ia Gunalaia Tauna bona ia Hagugurua Tauna, Iesu,” amo ita ia veria ia kahirakahira ita lao totona. (Heb. 12:2) Dirava ese ia hahedinaraia hebogahisi hereadaena dainai, ita ura hanaihanai guriguri bona Dirava ena Hereva stadilaia karana amo iseda abidadama ita hagoadaia.​—Efe. 6:18; 1 Pet. 2:2.

12. Edena dala ai iseda abidadama ita hahedinaraia diba?

¹² Namona be Iehova ena gwauhamata ita abidadama henidia noho. Bona namona be taunimanima ese unai idia itaia. Hegeregere, Dirava ena Basileia ita harorolaia bona hahediba taudia halaoa gaukara ita durua. Danu, “gau badana be iseda abidadama tamona tadikaka bona taihu dekenai, kara namo ita hahedinaraia” noho. (Gal. 6:10) Bona ita gaukara goada “mauri gunana mai ena kara idauidau do [ita] kokia,” unai amo iseda abidadama idia hamanokaia karadia amo sibona ita gimaia diba.​—Kol. 3:5, 8-10.

13. Dahaka dainai “Dirava abidadama henia karana” be mai anina bada, bona ia be dahaka ida ita hahegeregerea diba, bona dahaka dainai?

¹³ Baibel ia gwau: “Bema tau ta be abidadama lasi, ia ese Dirava ia hamoalea diba lasi, badina Dirava kahirakahira ia lao tauna ia abia dae be namo Dirava be ia noho bona Dirava ese mai momokani ida ia idia tahua taudia edia davana do ia henia.” (Heb. 11:6) Danu, Baibel ese ia hahedinaraia, bema ta ia ura Keristani tauna ai ia lao, namona be “Dirava abidadama henia karana” ia hahedinaraia, bena ia ese abidadama be ruma ta ena badina ida ia hahegeregerea. (Heb. 6:1) Keristani taudia ese “abidadama  sibona lasi,” to mai anina bada kara ma haida do idia hahedinaraia danu, “unai amo Dirava ena lalokau lalonai do [idia] noho.”​—2 Petero 1:5-7 duahia; Iuda 20, 21.

14, 15. Abidadama sibona lasi, to dahaka dainai lalokau ita hahedinaraia be mai anina bada?

¹⁴ Keristani Grik Toretoredia idia torea taudia ese abidadama be nega handred momo idia gaukaralaia. Keristani kara ma haida be unai bamona lasi. Unai ese ia hahedinaraia Keristani kara ma haida amo abidadama be mai anina bada, a?

¹⁵ Paulo ese abidadama be lalokau ida ia hahegeregerea, ia gwau: “Bema egu abidadama bada dainai, ororo be gabu ta amo gabu ma ta dekenai lau atoa diba, to lau dekenai lalokau be lasi, lau be anina lasi.” (1 Kor. 13:2) Taravatu diba momo tauna ese Iesu ia nanadaia: “Taravatu dekenai, edena taravatu be hereadae?” Iesu ese ena haere amo ia hahedinaraia, Dirava lalokau henia karana be mai anina bada. (Mat. 22:35-40) Lalokau ese Keristani karadia momo ia durua, abidadama danu. Baibel ia gwau: “Lalokau be . . . gau ibounai ia abidadama henia.” Oibe, Dirava ese iena Hereva ai ia gwauraia gaudia ibounai ia abidadama henia.​—1 Kor. 13:4, 7.

16, 17. Edena dala ai Baibel ese abidadama bona lalokau ia herevalaia, to edena be hereadae, bona dahaka dainai?

¹⁶ Abidadama bona lalokau be mai anina bada dainai, Keristani Baibel toretore taudia ese unai kara rua be nega momo idia gaukaralaia hebou. Paulo ese ena tadikaka ia hagoadadia, ‘abidadama bona lalokau be edia kemena ena auri dabua bamona idia hahedokilaia.’ (1 Tes. 5:8) Petero ia gwau: “Ena be nega ta Keriso umui itaia lasi, to ia umui lalokau henia. Bona ena be hari ia umui itaia lasi, to ia umui abidadama henia.” (1 Pet. 1:8) Iamesi be ena horoa tadikaka dekenai ia gwau: “Dirava ese inai tanobada ena ogogami taudia ia abia hidi, edia abidadama dekenai do idia taga totona. Danu Dirava ese idia ia abia hidi basileia do idia abia, unai be ia idia lalokau henia taudia dekenai ia gwauhamatalaia.” (Iam. 2:5) Ioane ia gwau: “[Dirava ena] taravatu be inai, iena Natuna Iesu Keriso ena ladana ita abidadama henia, bona ita lalokau heheni.”​—1 Ioa. 3:23.

¹⁷ Ena be abidadama be mai anina bada, to vaira nega ai, Dirava ena gwauhamata tanobada matamata totona ita abidadama henia be anina lasi, badina unai gwauhamata be do ia guguru vadaeni. To, Dirava bona iseda dekena taudia lalokau henia karana be do ia ore diba lasi. Unai dainai Paulo ia gwau: “To inai gaudia toi, abidadama, helaro, bona lalokau be do idia noho, to idia amo hereadaena be lalokau.”​—1 Kor. 13:13.

18, 19. Hari dahaka ia vara noho, bona hanamoa be daika ese ia abia be namo?

¹⁸ Iseda nega ai, Iehova ena taunimanima be Dirava ena Basileia idia abidadama henia. Unai dainai tanobada hegegemadai Iehova ena orea taudia be milioni 8 mai kahana. Idia ibounai ese Dirava ena lauma ena huahua idia hahedinaraia. (Gal. 5:22, 23) Unai ese Keristani abidadama bona lalokau korikorina ia hahedinaraia!

¹⁹ Taunimanima ta ena hekwarahi dainai unai ia vara lasi. To, iseda Dirava dainai unai ia vara. Unai be “do ia noho hanaihanai ena toa ta do ia lao, vadaeni umui itaia negadia ibounai, lau Lohiabada ese lau karaia vadaeni gaudia do umui laloa.” (Isa. 55:13) Oibe, “Dirava ena harihari gauna” be “abidadama amo hahemauri” do ita abia. (Efe. 2:8) Iseda tanobada hegegemadai oreana be do ia tubu noho ela bona tanobada ibounai be goevadae, kara maoromaoro, bona moale taudia amo do ia honu, bona idia ese Iehova ena ladana do idia hanamoa ela bona hanaihanai. Namona be Iehova ena gwauhamata idauidau ita abidadama henia noho!