1. Warom mise mer Yeehoowa tanke tas tee uns heleft klaape hon?

 TE KLAAPE is een kwaliteet woo fiil weyert hot, awer net al hon tiise kwaliteet. (2 The. 3:2) Awer Yeehoowa kept fer ale sayn tiiner een “moos klaape”. (Rom. 12:3; Kal. 5:22) Meyer wole imer petanklich sin tsu Yeehoowa wayl tee uns heleft tiise kwaliteet hon.

2, 3. (a) Was fer seechen kriin ti layt woo klaape hon? (b) Was fer frooche wëre in tiise artikel keantwort?

² Torich Yeesus, ruuft Kot ti layt woo een eerlich hërts hon. (Yoo. 6:44, 65) Un wën ti mënxe aan fange tsu klaape aan Yeesus, khene se iire sinte fertsayert kriin. Tas macht te weech uf tas se khene Kot sayn fraaynte sin fer imer. (Rom. 6:23) Tas is ploos weeche Yeehoowa tas mer khene tiise seechen kriin. Wayl mer sinter sin, hët mer te toot fertiint. (Psal. 103:10) Awer Yeehoowa hot kesiin was mer mache khene, tee hot kesiin tas mer khene kuute tinge mache. Weeche sayn kroos kuutheet, hot tee kemacht tas ti kuute notisye unser hërts aan kekrif hon. Tan hon mer aan kefang tsu klaape aan Yeesus un ti hofnung hon fer leepe fer imer. (Lees 1 Yoohan 4:9, 10.)

³ Was is klaape? Meecht tas ploos sin wise was Kot fer uns ferxprecht? Un, noch mee wichtiche, was tsaycht tas mer klaape hon?

4. Warom hot te klaape mim hërts tsu tuun, un net ploos wise was Kot im tsukhunft mache wërt?

⁴ Klaape hon is fiil mee wii ploos wise was Kot im tsukhunft mache wërt. Te klaape is een xtark kraft woo macht tas te mënx wil mache Kot sayne wile; tas hot mim hërts tsu tuun. Te klaape macht aach tas te mënx wil anere in lërne iwich ti kuute notisye. Te aphostel Phaul hot kesaat: “Wëns tuu mit tayn maul puuplix aus leye tuust tas Yeesus Hër is, un in tayn hërts klaape host tas Kot iim fon te toote uf keruuft hot, wërst tuu keret. Wayl mim hërts iipe mer klaape fer ti kerechtichkheet, awer mit tëm maul kepe mer een puuplix ausxprechung fer ti retung.” (Rom. 10:9, 10; 2 Kor. 4:13)

5. (a) Warom is es wichtich klaape hon? (b) Uf was fer aat is te klaape wii een plants?

⁵ Tas is natiirlich tas fer eewich leepe hon in Kot sayn naye welt, mise mer een xtarke klaape hon. Te klaape is wii een plants. Een plants prauch waser. Tëm noo wii mer se uf phast, khan ti plants weeliche orer xeen un xtark plaype. Wën se net kenuuch waser kriit, khan soo kaar een plants woo kesunt waar, kaput keen. Uf ti selwich aat, wën mer unser klaape net uf phase, wërt tee ferweeliche un ferkeen. (Luk. 22:32; Hep. 3:12) Meyer mise unser teel mache tas unser klaape foran “wakst”, soo wëre mer “kesunt im klaape” plaype. (2 The. 1:3; Tit. 2:2)

6. Tëm noo Hepreeyer 11:1, was fer tswaay tinge hon mit klaape tsu tuun?

⁶ Ti Piipel saat was te klaape is in Hepreeyer 11:1. (Lees.) Tëm noo tiise tekst, hot te klaape tsu tuun mit tswaay tinge woo mer khene net siin: (1) “tas was mer hofe” un (2) “wërklichkheete woo ma net siit”. “Tas was mer hofe” hot tsu tuun mit was Kot ferxproch hot fer te tsukhunft, awer woo noch net pasiirt is, soo wii tas ën fon te xlechtichkheet un ti nay welt. Ti “wërklichkheete woo ma net siit” sin tinge orer mënxe woo mer net siin khene, awer woo toch eksistiire, soo wii Yeehoowa, Yeesus, ti engele un te Raych im himel. (Hep. 11:3) Ale tëm mer khene tiise wërklichkheete net siin, hon mer ti “taytlich pewaysung” tas se eksistiire. Tas kreekixe wort iwersetst “taytlich pewaysung” in Hepreeyer 11:1 khan aach iwersetst wëre “een tsayche woo sicherheet kept”. Wii tsayche mer tas unser hofnung lepeentich is un tas mer klaape aan ti tinge woo mer net siin woo ti Piipel triwer xprecht? Torich unser wërter un aktsyoone; oone tii weyer unser klaape net komplët.

7. Wii heleft Noee sayn payxpiil uns ferxteen was te klaape petayt? (Kuk tas pilt am aanfang fom artikel.)

⁷ Hepreeyer 11:7 xprecht iwich te klaape woo Noee pewayst hot. Phaul saat tas Noee, “noo eyer fon Kot awisiirt kep is fon tings woo noch net kesiin waare, [hot] tiif respëkt tsu Kot ketsaycht un een arich kepaut fer ti retung fer sayn familye”. Noee hot sayne klaape pewayst wii eyer een kroos arich kepaut hot. Kans sicher, hon Noee sayn nochpere iim kefroot warom eyer ti kroos aarwayt mache teet. Meecht Noee ruych keplip sin orer meecht tee kesaat hon fer ti mënxe sich um iire aychne leepe khimere? Sicher net! Weeche sayne klaape, hot tee mit koraaj kepreeticht fer ti mënxe un hot kesaat tas Kot teet hatich een ën pringe torich een sintfluut. Tas is meechlich tas tee oft mools kenau kesaat hot was Yeehoowa iim kesaat hot: “Ich hon pexlos ti kans mënxheet tsum ën se pringe, wayl ti eyert weeche tëne fol wyolënts is; . . . Un ich tuun een sintfluut fon waser iwer ti eyert pringe, fer aans ën pringe yeete kriatuer unichm himel woo leepe hot.” Un noch, sicher hot Noee aus keleet tas ti mënxe khente sich ploos rete wën se in ti arich rin keengte, soo wii Kot kexikt hot. Soo, hot Noee sayne klaape pewayst wayl eyer een “preeticher fon kerechtichkheet” waar. (Xee. 6:13, 17, 18; 2 Phe. 2:5)

8. Was hot Tyako kexproch iwich te woere klaape?

⁸ Tyako hot aach iwich te klaape kexproch. Tas is meechlich tas tee sayne priif kexrip hot een khorts tsayt tëm noo Phaul sayne priif tsu ti hepreeyer kexrip hot. Un, soo wii Phaul, hot Tyako aus keleet tas te woere klaape is mee wii ploos aan etwas klaape, tas hot tsu tuun mit etwas mache. Tee hot kexrip: “Tsaycht fer mich tayn klaape oone aarwayt, un ich tuun mayn klaape torich mayn aarwayt tsayche.” (Tya. 2:18) Fer kans taytlich ti unerxiit tsayche unich ploos aan etwas klaape un te klaape pewayse, hot Tyako kexproch iwich was mit te temoone pasiirt. Tii klaape tas Kot eksistiirt, awer meecht tëne iire een woere klaape sin? Sicher net. In woerheet, tii mache ales was se khene fer tas Kot sayn ferxpreche sich net erfiile sole. (Tya. 2:19, 20) Noochte hot Tyako tas ferklaycht mit Apraham sayn payxpiil: “Waar net Apraham, unser fater, kerecht kenënt torich sayn aarwayt, noo eyer Isak, sayne soon, ufm altar keopfert hot? Mërk tas tëm sayne klaape hot mit sayn aarwayt kexaft un tas tëm sayne klaape hot sich perfekt kemacht torich sayn aarwayt.” Tan, fer kenau tsayche tas te klaape oone aarwayt khee weyert hot, hot Tyako kesaat: “Yaa, wii te khërper oone kayst toot is, soo is aach te klaape oone aarwayt toot.” (Tya. 2:21-23, 26)

9, 10. Wii heleft te aphostel Yoohan uns ferxteen tas es wichtich is klaape iipe?

⁹ Mee wii 30 yoer tëm noo, hot te aphostel Yoohan sayn Ewankeelye un tray priife kexrip. Soo wii ti anere Piipel xrayper, hot tee ferxtan was te woere klaape is. Mee wii ti anere Piipel xrayper, hot Yoohan tas kreekix wort woo iwersetst wërt “klaape iipe” penutst.

¹⁰ Tsum payxpiil, Yoohan hot aus keleet: “Weer klaape aan te Soon iipt, hot eewiches leepe. Weer te Soon net aan heert, tuut tas leepe net siin, awer Kot sayn wuut playpt iwer tëm.” (Yoohan 3:36) Te woere klaape hot tsu tuun mit Yeesus sayn kepoote aan heere. In Yoohan sayn Ewankeelye, siit mer tas Yeesus oft mools kesaat hot tas mer mise klaape iipe orer pewayse. Torich Yeesus sayn wërter, khene mer ferxteen tas “klaape iipe” is etwas woo imer foran kemacht mus wëre. (Yoo. 3:16; 6:29, 40; 11:25, 26; 14:1, 12)

11. Wii khene mer tsayche tas mer petanklich sin tsu Yeehoowa?

¹¹ Meyer fraye uns tas Yeehoowa sayn hayliche kayst penutst hot fer uns helfe ti woerheet khëne lërne un uns helfe klaape aan ti kuute notisye. (Lees Lukas 10:21.) Tas is imer wichtich Yeehoowa tanke tas tee uns keruuf hot torich sayne Soon, woo “te Haupste Mitler fon unser klaape is un tee woo unser klaape komplët macht”. (Hep. 12:2) Wii khene mer tsayche tas mer petanklich sin tsu Yeehoowa weeche sayn kroos kuutheet? Meyer mise foran unser klaape ferxtërke torich tas kepeet un ti Piipel xtutiire. (Ëfe. 6:18; 1 Phe. 2:2).

12. Wii pewayse mer tas mer klaape aan Yeehoowa sayn ferxpreche?

¹² Unser aktsyoone mise tsayche tas mer klaape aan Yeehoowa sayn ferxpreche. Tsum payxpiil, mer tuun foran preetiche iwich Kot sayn Raych un teel mache in ti aarwayt fer tisipele mache. Un noch, mer mache foran “tas kuute fer al, awer haupstseechlich fer tii woo tsu unser klaapes familye keheere”. (Kal. 6:10) Mer xtrenge uns aan fer ti “alt personaliteet un sayn kewoonheete aus tuun” un mer mache ales was meechlich is fer unser fraayntxaft mit Yeehoowa xitse. (Kol. 3:5, 8-10).

13. (a) Wii wichtich is es “aan Kot klaape”? (b) Was saat ti Piipel was te klaape is? Warom?

¹³ Ti Piipel saat “oone klaape is es unmeechlich Kot kefale, wayl weer ticht pay Kot khomt, mus klaape tas eyer eksistiirt un tas eyer peloont tii woo tëm ërnstlich suuche”. (Hep. 11:6) Ti Piipel tsaycht tas aan “Kot klaape” is teel fom “funtament” woo neetich is fer een woere krist wëre un net noo lose se sin. (Hep. 6:1) Uf tiise funtament, mise ti kriste truf paue noch anere wichtiche kwaliteete ‘tas se sich in Kot sayn liip hale.’ (Lees 2 Pheeter 1:5-7; Yuu. 20, 21)

14, 15. Wii wichtich is te klaape in ferklaychung mit te liip?

¹⁴ Ti Piipel xrayper hon hunert mools iwich te klaape kexrip fer tsayche wii wichtich tiise kwaliteet is. Khee aner kwaliteet is soo oft kenënt woer. Meecht tas petayte tas te klaape is ti haupst kwaliteet woo een krist mus hon?

¹⁵ Wii Phaul ti klaape ferklaycht hot mit ti liip, hot te kexrip: “Wën ich hon soo een xtarke klaape, tas ich khan ti përiche fon een plats tsu een aner tuun, awer khee liip hon, tan sin ich kaar niks.” (1 Kor. 13:2) Wii se Yeesus kefroot hon was fer eens weyer te kreeste kepoot im kesets, too hot tee keantwort tas weyer Kot liipe. (Mat. 22:35-40) Fiil anere kwaliteete hon tsu tuun mit te liip, tsum payxpiil, te klaape. Ti Piipel saat tas “ti liip . . . klaap aan ales”. Soo, heleft ti liip uns klaape aan ales was Kot saat woo im sayn Wort, ti Piipel, xteet. (1 Kor. 13:4, 7)

16, 17. (a) Te klaape un ti liip sin oft mools mit samer kenënt in ti Piipel. Kep payxpiile. (b) Was fer een fon tiise kwaliteete is ti kreest? Warom?

¹⁶ Klaape un liip sin wichtiche kwaliteete. In ti Piipel, tiise kwaliteete sin oft mools mit samer kenënt. Tsum payxpiil, Phaul hot sayn priiter uf kemuut fer penutse “ti prust xilt fon klaape un liip”. (1 The. 5:8) Wii Pheeter iwich Yeesus kexproch hot, hot tee kexrip: “Opwool iir tee nii kesiin hot, tuut iir tee liipe. Opwool iir tee yets net siit, tuut iir klaape aan tëm iipe.” (1 Phe. 1:8) Tyako hot sayn kesalpte priiter kefroot: “Is net woer tas Kot raus kesuucht hot tii, woo fer ti welt aarm sin, fer raych sin in te klaape un ërpere fom Raych, woo tee ferxproch hot fer tëne woo Eyer liipt?” (Tya. 2:5) Yoohan hot kexrip: “Tas is sayn kepoot: meyer sole aan tëm naame fon sayn soon Yeesus Kristus klaape un eene te anere liipe.” (1 Yoohan 3:23)

¹⁷ Meyer hon kesiin tas te klaape aarich wichtich is. Awer mer khene saan tas etliche teele fom klaape wëre ferkeen. Wii soo? Im tsukhunft, prayche mer net mee klaape aan was Kot ferxprecht wayl tas wërt am pasiire sin. Awer ti liip playpt fer imer, wayl mer mise imer Kot un unser priiter liipe. Tes weeche, hot Phaul kexrip: “Awer yets, plaype tiise tray: te klaape, ti hofnung un ti liip; awer te kreeste fon tëne is ti liip.” (1 Kor. 13:13)

18, 19. (a) Wii tsaycht Yeehoowa sayn folek tas se klaape aan Kot sayn Raych? (b) Weer hot tas recht fer keloopt wëre weeche te kaystlich paratiis?

¹⁸ Hayt, tsaycht Yeehoowa sayn folek tas se klaape aan Kot sayn Raych. Mee wii 8 milyoone layt leepe in friit un eenichkheet, als wën se xon im paratiis weyere, wayl se pewayse ti kwaliteete fon Kot sayn kayst. (Kal. 5:22, 23) Tas is was mer nëne kaystlich paratiis. Tas is wunerlich siin was te woere klaape un ti liip mache khene!

¹⁹ Weer hot tas recht fer keloopt wëre tes weeche? Eene mënx? Nee; tiise kaystlich paratiis is ploos meechlich weeche unser Kot. Te resultaat ‘pringt eere tsu Yeehoowa’ un “tas wërt sin een eewiche tsayche, woo nii ferkeen wërt”. (Isa. 55:13) Yeehoowa wil tas mer sole “keret wëre torich te klaape”, un mer sin petanklich tsu tiise xeen “kexenk fon Kot”. (Ëfe. 2:8) Unser kaystlich paratiis tuut foran wakse un wërt yeetes mool xeene pis ti kans eyert fol mit perfekte, rechte un frooe mënxe wërt sin, woo Yeehoowa loope fer imer. Tan, wole mer foran pewayse tas mer klaape aan Yeehoowa sayn ferxpreche!