1. Lɩmaɣza wena pɩwɛɛ se ɖɩwɛɛnɩ Krɩstʋ mba tisuu yɔɔ?

TISUU kɛ Krɩstʋ ñɩma wɛtʋ kɩbandʋ siŋŋ. Pɩtɩkɛ ɛyaa tɩŋa wɛnɩnɩ tisuu. (2 Tes. 3:2) Ɛlɛ Yehowa haɣ paa ɛ-sɛyʋ weyi “tisuu.” (Roma 12:3; Gal. 5:22) Ye mbʋ, mba pɛwɛnɩ tisuu yɔ, pɩwɛɛ se pawɩlɩ Yehowa pɛ-ɛsɩmɩyɛ.

2, 3. (a) Mba pɛwɛnɩ tisuu yɔ, wazasɩ nzɩ papɩzɩɣ nɛ pehiɣ? (b) Tɔm ndʋ yɔɔ ɖɩkaɣ cosuu lɛɛlɛɛyɔ?

² Yesu Krɩstʋ yɔɔdaa se ɛ-yɔɔ ɛ-Caa tɩŋɩɣna nɛ ɛhɔŋ ɛyaa nɛ ewokini ɛ-cɔlɔ. (Yoh. 6:44, 65) Ye ɛyʋ ɛwɛnɩ tisuu Yesu yɔɔ yɔ, piyeki se pekpeɣ-i ɛ-kɩwɛɛkɩm. Nɛ pɩhaɣ-ɩ waɖɛ se taabalɩyɛ kɩbanɖɛ ɛwɛɛ ɛ nɛ Yehowa pɛ-hɛkʋ taa tam. (Roma 6:23) Ðɩtɩmʋna se Yehowa ɛlabɩ-ɖʋ kʋjɔʋ sɔsɔʋ ŋgʋ, mbʋ pʋyɔɔ yɔ ɖɩkɛ kɩwɛɛkɩm laɖaa nɛ ɖɩmʋnɩ sɩm. (Keɣa 102:10) Ɛlɛ, Yehowa na kɩbandʋ natʋyʋ ɖa-taa. Ɛlabɩ-ɖʋ lootiye nɛ ɛha-ɖʋ waɖɛ se ɖiwelisi laŋhɛzɩyɛ tɔm. Piyeba nɛ ɖɩpaɣzɩ wɛnʋʋ tisuu Yesu yɔɔ nɛ ɖɩwɛɛnɩ lidaʋ  se ɖɩkaɣ caɣʋ wezuu maatɛŋ.—Kalɩ 1 Yohanɛɛsɩ 4:9, 10.

³ Ɛlɛ, ɛbɛ ɖeyi ɖeyi tisuu kɛnaa? Ye ɖɩtɩlɩ wazasɩ nzɩ Ɛsɔ ñɔɔzaa nɛ ɛsɩɩ-ɖʋ cee wayɩ yɔ si-ɖeke yɔ, pʋ-tɔbʋʋ lɛ se ɖɩwɛnɩ tisuu na? Nɛ kɔzɩ kɔzɩ lɛ, hɔɔlɩŋ weyi taa ɖɩpɩzɩɣ nɛ ɖɩwɩlɩ se ɖɩwɛnɩ tisuu?

4. Ɛbɛ yɔɔ ye ɖɩtɩlɩ Ɛsɔ tamaɣ ɖeke yɔ, pɩtɩwɩlɩ se ɖɩwɛnɩ tisuu?

⁴ Ye ɛyʋ ɛtɩlɩ Ɛsɔ tamaɣ ɖeke yɔ, pɩtɩwɩlɩ se ɛwɛnɩ tisuu. Tisuu kɛnɩ ɖoŋ weyi eseɣtiɣ ɛyʋ se ɛla Ɛsɔ sɔɔlɩm yɔ. Ye ɖɩwɛnɩ tisuu Yesu yɔɔ yɔ, piseɣtiɣ-ɖʋ se ɖisusi ɛyaa lalaa laŋhɛzɩyɛ tɔm. Apostoloo Pɔɔlɩ lɩzɩ pɩ-taa se: “Ye ŋyɔɔdɩnɩ ñɔ-nɔɔ se Yesu kɛ Kɩbaɣlʋ, nɛ ŋtisiɣ ña-laŋɩyɛ taa se Ɛsɔ fezi-i sɩm yɔɔ kɔyɔ, ɖɩnɛ ɛlɛ ŋkaɣ ña-ñʋʋ yabʋ. Mbʋ yɔ laŋɩyɛ taa tisuu pɩsɩɣ ɛyʋ siɣsiɣ tʋ nɛ yɔɔdʋʋ nɛ ndomee yakɩ ñʋʋ.”—Roma 10:9, 10; 2 Kɔr. 4:13.

5. (a) Ɛbɛ yɔɔ tisuu tɔm cɛyaa? (b) Nɛ ɛzɩma ɖɩpɩzɩɣ nɛ ɖɩkpazɩ-pʋ ɖoŋ? Ha kɩɖaʋ nakʋyʋ.

⁵ Pɩwɩlɩɣ kpayɩ kpayɩ se pʋcɔ nɛ ɖɩcaɣ wezuu maatɛŋ ɛjaɖɛ kɩfaɖɛ taa lɛ, pɩwɛɛ se ɖɩwɛɛnɩ tisuu nɛ ɖɩkpazɩɣ-pʋ ɖoŋ. Ðɩpɩzɩɣ nɛ ɖɩkpaɣ ɛzɩma pɩwɛɛ se ɖɩkpazɩ ɖe-tisuu ɖoŋ yɔ nɛ ɖɩmaɣzɩnɩ ɛzɩma pamɩzɩɣ tɩʋ lɩm yɔ. Pʋcɔ nɛ tɩʋ paɣlɩ lɛ, pɩpɔzʋʋ se pamɩzɩɣ-kʋ lɩm paa ɛzɩmtaa. Ɛlɛ ye lɩm ɛɛtalɩɣ-kʋ yɔ, kilou nɛ kɩsɩ. Mbʋ ɖɔɖɔ pɩwɛ tisuu hɔɔlʋʋ taa. Ye ɖɩɩcɔŋnɩ pɩ-yɔɔ yɔ, pɩpɩzɩɣ pɩsɩ. (Luka 22:32; Ebr. 3:12) Ɛlɛ ye ɖɩcɔŋnɩ ɖe-tisuu yɔɔ camɩyɛ yɔ, pɩwɛɣ nɛ ‘pɩkpaɣ ɖoŋ’ nɛ pɩkaɣ yebu nɛ ‘ɖɩka camɩyɛ tisuu taa.’—2 Tes. 1:3; Tiiti 2:2.

6. Ebree 11:1 wɩlɩɣ se ɛbɛ tisuu kɛnaa?

⁶ Ebree 11:1 wɩlɩɣ-ɖʋ mbʋ tisuu kɛnaa yɔ. (Kalɩ Ebree 11:1.) (1) Tisuu kɛ “lidaʋ” ŋgʋ ɖɩwɛnɩ mbʋ ɖɩɖaŋaa yɔ pɩ-yɔɔ yɔ. Pɩ-taa nabʋyʋ lɛ wazasɩ nzɩ Yehowa yɔɔdaa se ɛkaɣ-ɖʋ kɔnʋʋ cee wayɩ yɔ. Ɛyɔɔdaa se ɛkaɣ ɖezuu kañatʋ lakasɩ nɛ ɛkɔnɩ ɛjaɖɛ kɩfaɖɛ, nɛ ɖɩɩpɩtɩɣ se ɛkaɣ labʋ mbʋ. (2) Tisuu kɛ ɖɔɖɔ mbʋ pɩwɛɛ keekee ɛlɛ ‘paanaɣ-pʋ’ yɔ. Mbʋ pɩwɛɛ keekee ɛlɛ paanaɣ-pʋ yɔ pɩ-taa nabʋyʋ lɛ Yehowa, Yesu, Ɛsɔ tiyiyaa nɛ Ɛsɔ Kewiyaɣ. (Ebr. 11:3) Ɛzɩma ɖɩpɩzɩɣ nɛ ɖɩwɩlɩ se ɖɩwɛnɩ lidaʋ nɛ ɖɩɩpɩtɩɣ mbʋ Bibl tɔŋ se pɩwɛɛ, ɛlɛ ɖɩɩnaɣ-pʋ yɔ pɩ-yɔɔ? Pɩwɛɛ se ɖɩtɩŋnɩ ɖe-wezuu caɣʋ, ɖɔ-yɔɔdaɣ nɛ ɖa-lakasɩ yɔɔ nɛ ɖɩwɩlɩ se ɖɩwɛnɩ lidaʋ ŋgʋ.

7. Ɛzɩma tɩyɛ Noa kɩɖaʋ sɩɣnɩ-ɖʋ se ɖɩnɩɩ tisuu tɔbʋʋ? (Cɔnɩ kiɖe tɛɛ kɩlɛmʋʋ.)

⁷ Ebree 11:7 yɔɔdʋʋ Noa tisuu tɔm. Mayaɣ ŋga kɔtɔŋ se: “Tisuu yɔɔ yɔɔ Ɛsɔ heyi Noa ndʋ tɩtɩtɩɩnata yɔ,  sɔɔndʋ kpa-ɩ nɛ ɛsaɣ mɛlɛ se ɛyabɩnɩ ɛ-hɔʋ ñʋʋ.” Noa saɣ aɖakaɣ nɛ ɛwɩlɩ se ɛwɛnɩ tisuu. Pɩtʋʋ fɛyɩ se ɛ-cɔlɔ mba kaapɔzɩ-ɩ se ɛbɛ yɔɔ ɛwɛɛ nɛ ɛsakɩ aɖakaɣ sɔsɔɔ ŋga. Ðɩɩpɩtɩɣ se Noa taasu tamɩyɛ nɛ ɖɩɩpɩtɩɣ ɖɔɖɔ se etaaheyi-wɛ se panɩɩnɩ pa-ñɩndʋ. E-tisuu kaayeba nɛ ɛlɩzɩ aseɣɖe nɛ abalɩtʋ nɛ ɛpaɣ ɛ-alɩwaatʋ taa mba se Ɛsɔ kɔŋ kañatʋ tɩnaa nɩŋgbaŋʋʋ hɔm. Pɩtɩla yɔ, tɔm ndʋ Yehowa kaaheyi Noa yɔ, ndʋ ɖeyi ɖeyi Noa susi-wɛ. Yehowa kaaheyi-i se: “Tomnaɣ kpeekpe tɛmtʋ talaa, mɛntɛm man-taa nɛ tʋ, mbʋ yɔ kañatʋ suni tɛtʋ ɖo ɛyaa yɔɔ . . . Mɔnkɔŋ labʋ nɛ lɩm wadɩ tɛtʋ yɔɔ, se mankʋ hadɛ cɩnɛ paa  tomnaɣ ŋga kɛwɛnɩ wezuu tɛ fezuu yɔ: Mbʋ mbʋ pɩwɛ tɛtʋ yɔɔ yɔ, pɩwɛɛ se pɩsɩ.” Pʋtɔma ɖɔɖɔ yɔ, Noa kaaheyi-wɛ mbʋ ɖeyi ɖeyi pɩɩwɛɛ se pala nɛ pehiɣ ñʋʋ yabʋ yɔ. Ɛtɔzɩ-wɛ se pɔɖɔ paɣtʋ ndʋ Yehowa ɖʋ-ɩ yɔ tɩ-yɔɔ. Yehowa kaaheyi-i se: “Ŋkaɣ sʋʋ mɛlɛ taa.” Hɔɔlʋʋ kʋnɛ kɩ-taa ɖɔɖɔ lɛ, Noa tasɩ wɩlʋʋ se ɛwɛnɩ tisuu, mbʋ pʋyɔɔ yɔ esusi ɛyaa “siɣsiɣ tɔm.”—Kiɖe 6:13, 17, 18; 2 Pɩy. 2:5.

8. Suwe Yakubu yɔɔdɩ tisuu yɔɔ?

⁸ Yakubu ɖɔɖɔ yɔɔdɩ mbʋ tisuu kɛnaa yɔ ɛ-takayaɣ taa. Nɛ pʋtɔma yɔ, apostoloo Pɔɔlɩ ma Ebree mba takayaɣ nɛ pitileɖi lɛ Yakubu ma ɛ-ñɩŋga. Ɛzɩ Pɔɔlɩ yɔ, Yakubu lɩzɩ pɩ-taa se ye ɖɩtɩlɩ Ɛsɔ tamaɣ ɖeke yɔ, pɩtɩwɩlɩ se ɖɩwɛnɩ tisuu. Ɛlɛ pɩpɔzʋʋ se ɖɩtɩŋnɩ ɖa-lakasɩ yɔɔ nɛ ɖɩwɩlɩ se ɖɩwɛnɩ tisuu. Ɛmawa se: “Ña yɔ, ŋwɛnɩ tisuu, ɛlɛ camɩyɛ lakasɩ fɛyɩ; ma yɔ, camɩyɛ lakasɩ mawɩlɩɣnɩ-ŋ men-tisuu.” (Yak. 2:18) Yakubu wobi pɩ-yɔɔ nɛ ɛwɩlɩ se lakasɩ taa panaɣna se ɛyʋ wɛnɩ tisuu. Ɛyɔɔdaa se aleewaa tisiɣ se Ɛsɔ wɛɛ, ɛlɛ pɛfɛyɩnɩ tisuu siŋŋ, mbʋ pʋyɔɔ yɔ mbʋ palakɩ  yɔ, pɩkaɖɩɣnɩ Yehowa tamaɣ. (Yak. 2:19, 20) Ɛlɛ Yakubu yɔɔdɩ ɖɔɖɔ caanaʋ taa ɛyʋ siɣsiɣ tʋ nɔɔyʋ tɔm se ɛɛwɛnɩ tisuu siŋŋ. Ɛpɔzaa se: “Ða-caa Abraham tɩpɩsɩ siɣsiɣ tʋ tʋma kɩbana yɔɔ, kɩyakʋ ŋgʋ ɛla ɛ-pɩyalʋ Izaakɩ kɩlaʋ yɔ? Ña-maɣmaɣ ŋnaɣ: tisuu sɩɣaɣnɩ-ɩ tʋma kɩbana labʋ nɛ tʋma ana a-yɔɔ yɔɔ e-tisuu kpaɣaɣ ɖoŋ.” Pʋwayɩ, ɛñɩnaɣ se ɛwɩlɩ se lakasɩ taa panaɣna se ɛyʋ wɛnɩ tisuu siŋŋ lɛ, ɛtasɩ yɔɔdʋʋ se: “Ðɔɖɔ ɛzɩ ciyam ɛfɛyɩ tomnaɣ taa kɔyɔ, kasɩba yɔ, mbʋ tisuu ɛɛlakɩ tʋma kɩbana yɔ, pɩsɩba.”—Yak. 2:21-23, 26.

9, 10. Ɛzɩma tɩyɛ apostoloo Yohanɛɛsɩ sɩnɩ-ɖʋ nɛ ɖɩna se pɩcɛyaa se ɖɩwɛɛnɩ tisuu?

⁹ Pɩlabɩ pɩnzɩ ɛzɩ 30 mbʋ yɔ pʋwayɩ lɛ, apostoloo Yohanɛɛsɩ ma ɛ-tɛ Evaŋgilim nɛ takayɩsɩ naadozo lɛɛsɩ. Ɛzɩ tɔm ndʋ ɛyɔɔdɩ tisuu yɔɔ yɔ, tɩlabɩ nɔɔ kʋɖʋmaɣ nɛ Bibl mayaa lalaa na? Ɛɛɛ. Ɛlabɩnɩ tʋmɩyɛ Ebree tɔm piye nɖɩ pɛɖɛzaa se ɖɩwɛɛnɩ tisuu yɔ tam sakɩyɛ ɛ-takayɩsɩ taa.

¹⁰ Ðɩna kɩɖaŋ nɩɩyɩ. Yohanɛɛsɩ mawa se: “Weyi etisiɣ Pɩyalʋ yɔɔ yɔ, ɛwɛnɩ tamtam wezuu, weyi eetisiɣ Pɩyalʋ yɔɔ yɔ, ɛɛkaɣ hiɣu wezuu, Ɛsɔ kɔʋ-ɩ nɛ pana pɩŋŋ.” (Yoh. 3:36) Ye ɖɩñaŋ Yesu paɣtʋ yɔ, ɖɩwɩlɩɣ se ɖɩwɛnɩ tisuu. Yesu yɔɔdɩ tisuu tɔm tam sakɩyɛ Yohanɛɛsɩ Evaŋgilim taa nɛ ɛwɩlɩ se pʋcɔ nɛ ɖɩwɛɛnɩ tisuu lɛ, pɩpɔzʋʋ se ɖɩwɛɛ pana ñaɣʋ yɔɔ tam.—Yoh. 3:16; 6:29,40; 11:25, 26; 14:1, 12.

11. Ɛzɩma ɖɩpɩzɩɣ nɛ ɖɩwɩlɩ se ɖa-taa wɛ leleŋ se ɖɩtɩlɩ toovenim?

¹¹ Pɩcɛyaa se ɖɩwɛɛnɩ ɛsɩmɩyɛ kpem se Yehowa tɩŋnɩ e-fezuu kiɖeɖeu yɔɔ nɛ eyele nɛ ɖɩtɩlɩ toovenim nɛ ɖɩwɛɛnɩ tisuu ɛ nɛ ɛ-Pɩyalʋ pɔ-yɔɔ. (Kalɩ Luka 10:21.) Pɩwɛɛ se ɖɩsɛɣ Yehowa tam se ɛlabaɣ lɛ, mbʋ pʋyɔɔ yɔ ɛtɩŋnɩ ɛ-Pɩyalʋ Yesu, ‘ɖe-tisuu ñʋʋdʋ weyi ɛlakɩ-pʋ se pɩkpa ɖoŋ yɔ’ ɛ-yɔɔ nɛ ɛhɔm-ɖʋ se ɖɩñɔtɩnɩ-ɩ. (Ebr. 12:2) Pɩsa nɛ ɖɩwɩlɩ se ɖa-taa wɛ leleŋ nɛ lootiye nɖɩ Yehowa labɩ-ɖʋ yɔ lɛ, pɩwɛɛ se ɖiwolo pɩ-yɔɔ nɛ ɖɩtɩŋnɩ adɩma nɛ Bibl kpɛlɩkʋʋ yɔɔ nɛ ɖɩkpazɩ ɖe-tisuu ɖoŋ.—Efɛz. 6:18; 1 Pɩy. 2:2.

12. Hɔɔlɩŋ weyi taa ɖɩpɩzɩɣ nɛ ɖɩwɩlɩ se ɖɩwɛnɩ tisuu?

¹² Pɩwɛɛ se ɖɩtɩŋnɩ ɖa-lakasɩ yɔɔ nɛ ɖɩwɩlɩ paa ɛzɩmtaa se ɖɩwɛnɩ tisuu Yehowa lidaʋ tɔm yɔɔ. Pɩwɛɛ se ɖiwolo Kewiyaɣ laŋhɛzɩyɛ tɔm susuu yɔɔ nɛ ɖɩla kpɛlɩkɩyaa. Pɩwɛɛ ɖɔɖɔ se ɖɩlakɩ “camɩyɛ ɛyaa kpeekpe, pɩkɩlɩnɩ mba pɛkɛ koobiya tisuu taa yɔ.” (Gal. 6:10) Pɩtasɩ lɛ, pɩwɛɛ se ɖɩñaɣ pana nɛ ɖɩlɔ “ɛyʋ kɩbɩnʋ” lakasɩ nzɩ sɩpɩzɩɣ nɛ sɩcamɩ-ɖʋ fezuu taa yɔ.—Kol. 3:5, 8-10.

13. Ɛbɛ yɔɔ pɩcɛyaa se ɖɩwɛɛnɩ tisuu Ɛsɔ yɔɔ?

¹³ Bibl yɔɔdʋʋ se: “Tisuu ɛfɛyɩ kɔyɔ, pɩɩsaŋ [Ɛsɔ] ɖenuu. Mbʋ yɔ weyi ɛñɔtʋʋnɩ Ɛsɔ yɔ, pʋmʋnɩ-ɩ se etisi se ɛwɛɛ, nɛ ɛhɛyɩɣ mba pañɩnɩɣ-ɩ yɔ.” (Ebr. 11:6) Bibl wɩlɩɣ se pɩcɛyaa se ɖɩwɛɛnɩ tisuu siŋŋ pʋcɔ nɛ ɖɩpɩsɩ toovenim Krɩstʋ mba. (Ebr. 6:1) Pɩtasɩnɩ tisuu mbʋ ɖɩwɛna yɔ lɛ, pɩwɛɛ se ɖɩwɛɛnɩ wɛtʋ kɩbandʋ lɛɛtʋ nɛ pɩsɩnɩ-ɖʋ nɛ ‘ɖɩɖɔkɩ ɖa-tɩ kpam Ɛsɔ sɔɔlɩm taa.’—Kalɩ 2 Pɩyɛɛrɩ 1:5-7; Yud. 20, 21.

14, 15. Ɛbɛ yɔɔ pɩcɛyaa se ɖɩtaawɛɛnɩ tisuu ɖeke, ɛlɛ ɖɩwɛɛnɩ sɔɔlɩm ɖɔɖɔ?

¹⁴ Bibl mayaa mba pama Grɛɛkɩ masɩ  yɔ, pɔyɔɔdɩ tisuu tɔm tam sakɩyɛ nɛ pɩwɩlɩɣ se pɩkɛ wɛtʋ kɩbandʋ ndʋ tɩ-tɔm cɛyaa yɔ. Pɔyɔɔdɩ tisuu tɔm nɛ pɩkɩlɩ wɛtʋ kɩbandʋ lɛɛtʋ ndʋ pɩwɛɛ se Krɩstʋ tʋ ɛwɛɛna yɔ. Ɛlɛ pʋ-tɔbʋʋ lɛ se tisuu kɛnɩ Krɩstʋ ñɩma wɛtʋ kɩbandʋ sɔsɔtʋ yaa we?

¹⁵ Pɔɔlɩ wɩlaɣ ɛzɩma sɔɔlɩm tɔm cɛyaa nɛ pɩkɩlɩ tisuu yɔ lɛ, ɛtɔ se: “Paa mɛwɛnɩ tisuu sɔsɔm nɛ mɛnkɛzɩɣ pʋŋ lona, ye mɛnfɛyɩnɩ sɔɔlɩm kɔyɔ, mantɩkɛ pʋyʋ.” (1 Kɔr. 13:2) Yesu wɩlaa ɖɔɖɔ se sɔɔlɩm tɔm kɩlɩnɩ cɛyʋʋ. Pʋyɔɔ ɛyɔɔdaa se ‘paɣtʋ taa lɛ, ndʋ tɩkɩlaa’ yɔ lɛ se ɖɩsɔɔlɩ Ɛsɔ. (Mat. 22:35-40) Sɔɔlɩm sɩɣnɩ-ɖʋ se ɖɩwɛɛnɩ tisuu nɛ wɛtʋ kɩbandʋ lɛɛtʋ ndʋ tɩkɛdɩɣnɩ Ɛsɔ yɔ. Bibl yɔɔdʋʋ se sɔɔlɩm ‘tisiɣ pɩtɩŋa.’ Ye mbʋ, sɔɔlɩm sɩɣnɩ-ɖʋ se ɖitisi tɔm ndʋ payɩ tɩwɛ Bibl taa yɔ tɩ-yɔɔ.—1 Kɔr. 13:4, 7.

16, 17. (a) Ɛzɩma palabɩnɩ tʋmɩyɛ tɔm pee sɔɔlɩm nɛ tisuu Bibl taa? (b) Sɔɔlɩm nɛ tisuu pɛ-hɛkʋ taa lɛ, ɛbɛ tɔm kɩlɩ cɛyʋʋ? (c) Nɛ ɛbɛ yɔɔ?

¹⁶ Ɛzɩma tisuu nɛ sɔɔlɩm tɔm cɛyaa yɔ, piyeba nɛ Bibl mayaa mba pama Grɛɛkɩ masɩ yɔ, pɛkpɛndɩ tɔm pee ana a-naalɛ tɔm loyisi taa tam sakɩyɛ. Pɔɔlɩ seɣti e-koobiya se ‘papaa tisuu nɛ sɔɔlɩm tɔŋ.’ (1 Tes. 5:8) Pɩyɛɛrɩ mawa se: “Ɩtɩna-ɩ, ɛlɛ ɩsɔɔlɩ-ɩ:  ɩtɩtɩɩnatɩ-ɩ, ɛlɛ itisiɣ ɛ-yɔɔ.” (1 Pɩy. 1:8) Yakubu pɔzɩ e-koobiya patam numwaa se: “Ɛsɔ tɩlɩzɩnɩ mba pɛkɛ kʋñɔndɩnaa ɛjaɖɛ ɛzɩdaa yɔ, se pɛkɛ tisuu ñɩm tɩnaa nɛ Kewiyaɣ tɔɔyaa, ŋga eɖuwaa se ɛcɛlɩɣ mba pɔsɔɔlʋʋ-ɩ yɔ?” (Yak. 2:5) Yohanɛɛsɩ mawa se: “[Ɛsɔ] paɣtʋ yɔ se: ɖitisi ɛ-pɩyalʋ Yesu Krɩstʋ yɔɔ nɛ ɖɩsɔɔlɩ ɖama ɛzɩ ɛɖʋʋ-ɖʋ paɣtʋ yɔ.”—1 Yoh. 3:23.

¹⁷ Tisuu tɔm cɛyaa. Ɛlɛ alɩwaatʋ ndʋ lidaʋ tɔm ndʋ Ɛsɔ yɔɔdaa yɔ tɩkaɣ labʋ yɔ, pɩɩkaɣ tasʋʋ cɛyʋʋ se ɖɩwɛɛnɩ tisuu. Ɛlɛ, pɩkaɣ pɔzʋʋ se ɖiwolo pɩ-yɔɔ nɛ ɖɩsɔɔlɩ Ɛsɔ nɛ ɖo-koobiya tam. Pʋyɔɔ Pɔɔlɩ mawa se: “Tisuu, lidaʋ nɛ sɔɔlɩm wɛ pɩ-naadozo, ɛlɛ mbʋ pɩkpaɖɩ pɩ-hɛkʋ taa yɔ, mbʋ lɛ sɔɔlɩm.”—1 Kɔr. 13:13.

18, 19. (a) Ɛzɩma Ɛsɔ sɛyaa wɛnɩ tisuu sɔnɔ yɔ, pee wena pɩlʋlaa?

¹⁸ Sɔnɔ, Yehowa sɛyaa wɩlaa se pɛwɛnɩ tisuu siŋŋ Ɛsɔ Kewiyaɣ yɔɔ. Piyeba nɛ fezuu taa paradisuu ŋgʋ kɩwɛ ɛjaɖɛ kpeekpe yɔɔ yɔ, kɩwɛɛ ɖeu nɛ pɩkɩlɩ. Nɛ ɛyaa ɛzɩ miiliyɔɔwaa lutozo mbʋ yɔ wɛnɩ kɩ-taa nɛ pɔsɔɔlɩ ɖama, mbʋ pʋyɔɔ yɔ peyeki se fezuu kiɖeɖeu eɖiyi-wɛ. (Gal. 5:22, 23) Pɩwɩlɩɣ kaɣlaa se tisuu nɛ sɔɔlɩm pɛkɛ wɛtʋ kɩbandʋ siŋŋ.

¹⁹ Nɔɔyʋ ɛɛpɩzɩɣ nɛ ɛtɔ se e-ɖoŋ taa pɩtɩŋnaa nɛ wɛtʋ kɩbandʋ ndʋ tɩwɛɛ. Yehowa ɖoŋ taa pɩlabɩ mbʋ. Nɔɔ kʋɖʋmaɣ ŋga kɛwɛ Yehowa sɛyaa hɛkʋ taa yɔ, keyeki se ‘pasa Yehowa nɛ tamtam mayaɣ ŋga kaakaɣ mʋʋʋ yɔ.’ (Iza. 55:13) Ðɩwɛnɩ ɛsɩmɩyɛ siŋŋ se Ɛsɔ labɩ-ɖʋ “kʋjɔʋ” se ɛya ‘ɖa-ñʋʋ’ pɩtɩŋnɩ ɖe-tisuu yɔɔ. (Efɛz. 2:8) Fezuu taa paradisuu ŋgʋ kɩ-taa ɖɩwɛɛ yɔ, kɩkaɣ wobu pɩ-yɔɔ nɛ kɩpaɣlɩ nɛ kiɖe nɛ pɩkɩlɩ nɛ pɩkɔɔ pɩtalɩ alɩwaatʋ ndʋ tɛtʋ kpeekpe pɩsɩ paradisuu yɔ. Pʋbʋ taa lɛ, ɛyaa kaɣ talʋʋ pilim, pɛwɛɛ siɣsiɣ nɛ pɛwɛɛ koboyaɣ taa nɛ pasa Yehowa tam. Tɛtɛ pɩla mbʋ nɛ ɖiwolo pɩ-yɔɔ nɛ ɖɩwɛɛnɩ tisuu Yehowa lidaʋ tɔm yɔɔ.