1. Twatela kumona ngachilihi lufwelelo lwavaka-Kulishitu?

LUFWELELO lwavaka-Kulishitu lwapwa lwalulemu chikuma. Vatu vamwe kavatwama nalufweleloko. (Teso. 2, 3:2) Chipwe ngocho, Yehova ahana vangamba jenyi mutu himutu “seteko yenyi yalufwelelo.” (Loma 12:3; Ngale. 5:22) Vosena vaze vatwama nalufwelelo vatela kuwahilila.

2, 3. (a) Kutokwa muka vatwama nacho vaze vakwechi lufwelelo? (b) Vihula muka natushimutwila muchihande chino?

² Yesu Kulishitu ambile ngwenyi Ise wamwilu eji kusanyikanga vatu kuhichila muli Mwanenyi. (Yowa. 6:44, 65) Kufwelela Yesu cheji kulingisanga vatu vavakonekele jishili javo. Cheji kulingisanga nawa vatu valivwise kuwaha usoko wamwaza naYehova haya myaka yosena. (Loma 6:23) Hakupwa tuvaka-shili katwetelelele kupwa nakutokwa kanechiko, mwomwo fweto yashili kufwa. (Samu 103:10) Oloze Yehova amwene vyuma vyamwaza muli etu. Ngocho atuhana mujimbu wamwaza halikoji lyenyi lyalinene. Shikaho tweji kufwelelanga Yesu nakutalilila kukayoya haya myaka yosena.—Tangenu Yowano 1, 4:9, 10.

 ³ Uno lufwelelo lwapwa luka? Uno lwapwa kaha kushinganyeka havyuma vyamwaza vize Kalunga mwakatulingila tahi? Kaha mujila muka twatela kusolola lufwelelo lwetu?

4. Lumbununenu omwo lwapwa lufwelelo.

⁴ Lufwelelo kalwalumbununa kutachikiza kaha vyuma ajina Kalungako. Oloze lwapwa ngolo jize najikunyula mutu alinge mwaya muchima waKalunga. Kufwelela ngwetu Kalunga eji kulwilanga vatu nachitulingisa twambulwile vatu mujimbu wamwaza. Kaposetolo Paulu ambile ngwenyi: “Mwomwo kachi nge namuhanjika hatoma kumeso avatu natunwa twenu ngwenu Yesu ikiye Mwata, nakufwelela mumichima yenu ngwenu, Kalunga amusangwile kuvafu, kaha navamilwila. Mwomwo mutu eji kusololanga lufwelelo namuchima wenyi mangana apwenga wakwoloka, oloze eji kuhanjikanga hatoma nakanwa mangana awane ulwilo.”—Loma 10:9, 10; Koli. 2, 4:13.

5. Mwomwo ika lufwelelo lwapwila lwalulemu, kaha tunahase kuluzamisa ngachilihi? Lumbununenu.

⁵ Twatela kupwa nalufwelelo nakuluzamisa, mangana tukapwe nakuyoya chahaya myaka yosena mukaye kakahya kaKalunga. Lufwelelo lwetu lwasakiwa kuluzamisa ngana muze jitemo jasakiwa meya mangana jikole kanawa. Jitemo jakutumba jeji kukolanga nakwalumuka, oloze jamalengeso jeji kupwanga mwomumwe. Jitemo jeji kuzuzanga nge meya auchi, oloze jinahase kutwalaho lika kukola nge kuli lyume. Kaha nge meya nalyume vyauchi, jinahase kuma. Omu mukiko lwapwa nalufwelelo lwetu. Lunahase kuzuza nakuma nge natulusuvilila. (Luka 22:32; Hepe. 3:12) Oloze nge natuluzamisa, kaha lunahase kukola “nakutohwa,” kaha natupwa “vavakangule mulufwelelo.”—Teso. 2, 1:3; Chitu. 2:2.

6. Mukanda WavaHepeleu 11:1 walumbununa ngachilihi omu lwapwa lufwelelo?

⁶ Mbimbiliya yalumbununa omwo lwapwa lufwelelo hali WavaHepeleu 11:1. (Tangenu.) Lufwelelo lwazama havyuma vivali vize katweshi kumona namesoko: (1) “Vyuma vize twatalilila.” Vyapwa vyuma vize vatushika vize kanda visoloke vyakufwana nge, kufumisako upi wosena nakuneha kaye kakahya. (2) “Vyuma vivene vize katwamweneko.” Lizu lyachiHelase Iize valumuna ngwavo ‘unjiho wakusolola hatoma’ lyalumbununa ‘unjiho wakutamo’ wavyuma vize katweshi kumona namesoko vyakufwana nge Yehova Kalunga, Yesu Kulishitu, navangelo, navyuma unakulinga Wangana wamwilu. (Hepe. 11:3) Tunahase kusolola ngachilihi ngwetu vyuma twatalilila vyapwa vyamuchano, kaha nawa ngwetu twafwelela muvyuma vize vasoneka muMazu aKalunga vize katwamona namesoko? Tunahase kuvisolola muhanjikiso namuvilinga vyetu, oloze nge natuhona kulinga ngocho kaha lufwelelo lwetu kalweshi kuzamako.

7. Uno chakutalilaho chaNowa chatukafwa ngachilihi tutachikize omwo chalumbunukila kusolola lufwelelo? (Talenu muvwimbimbi wakulivanga.)

⁷ Mukanda WavaHepeleu 11:7 walumbununa lufwelelo lwaNowa omu, “alingile hanatambula lyehi mazu akumuhuhumuna kuli Kalunga havyuma vyapwile kanda vachivimone, evwile Kalunga woma, kaha asongele wato mangana alwile vaze vakuzuvo yenyi.” Nowa asolwele lufwelelo lwenyi hakutunga wato waunene. Atela vatu alihachile navo vamuhulishilenga avalweze ovyo apwile nakutungila wato kana. Uno Nowa aholele kaha kulu chipwe kuvafutulula tahi? Nduma. Lufwelelo lwenyi lwamukafwile ambulule nakumika nakulwezako vakwavo vyakusopesa chaKalunga.  Nowa alwezelenga vakwavo mazu aze amulwezele Yehova ngwenyi: “Ngunajinyi kunongesa vakwechi mijimba vosena, mwomwo vatu vanazalisa hamavu hosena naulyanyi lika . . . Nangukatuma livaji hamavu nakunongesa vakwechi mijimba vosena vaze vali nakuhwima chakuyoya mwishi yalilu. Vyuma vili hamavu vyosena navikanonga.” Nowa avalumbunwinyine nawa vyuma vatelele kulinga mangana vakayovoke hakuvalweza mazu aze ahanjikile Kalunga ngwenyi: ‘Ukengila muwato.’ Shikaho Nowa asolwele lufwelelo lwenyi hakupwa “muka-kwambulula kwoloka.”—Kupu. 6:13, 17, 18; Petu. 2, 2:5.

8. Kambaji Yakova vamuhwiminyinyine ahanjike vyuma muka kutalisa kulufwelelo lwamuchano lwavaka-Kulishitu?

⁸ Mukanda waYakova vausonekele omu Paulu akumishile kusoneka mazu vamuhwiminyinyine akulumbununa lufwelelo. Ngana mwaPaulu, Yakova alumbunwine ngwenyi lufwelelo lwavaka-Kulishitu vamuchano kalwalumbununa kaha kufwelelako, oloze lwalumbununa kulusolola namuvilinga vyetu. Yakova asonekele ngwenyi: “Ngulweze lufwelelo lwove lwakuzeneka vilinga, kahami nangukulweza lufwelelo lwami havilinga vyami.” (Yako. 2:18) Yakova alumbunwine hatoma chihandwa chatwama hakufwelela nakusolola lufwelelo. Vandemone  vatachikiza ngwavo Kalunga kwatwama, oloze kavatwama nalufwelelo lwamuchanoko. Ngocho, kavafwelela vyuma vize ajina kutesamo Kalungako. (Yako. 2:19, 20) Yakova ahanjikile kutalisa kumutu umwe wakushishika wakushikulu ngwenyi: “Kutala kakuluka yetu Apalahama kavamuvulukile kupwa wakwoloka havilinga vyenyi omu alingile hanahane lyehi mwanenyi Isaka halijiko lyakulumbilako nyi? Unamono jino ngwove lufwelelo lwenyi lwapwile lwalukangule hamwe navilinga vyenyi, kaha lufwelelo lwenyi lwakupukile navilinga vyenyi.” Hakusaka kulumbununa ngwenyi lufwelelo lwatela kusoloka muvilinga, Yakova ambile nawa ngwenyi: “Nganomu mujimba wakuzeneka shipilitu unapu wakufwa, ngocho nalufwelelo lwakuzeneka vilinga nawa lunapu lwakufwa.”—Yako. 2:21-23, 26.

9, 10. Uno kaposetolo Yowano atukafwa ngachilihi tutachikize omwo chalema kusolola lufwelelo?

⁹ Omu mwahichile myaka yakuhambakana 30, kaposetolo Yowano asonekele Mukanda waMujimbu Wamwaza waYowano namikanda yeka yitatu. Kutala naikiye etavilile vyuma valumbunwine vakwavo vaka-kusoneka Mbimbiliya kutalisa kulufwelelo lwamuchano tahi? Yowano ikiye kaha azachishile chikuma lizu lyachiHelase lize valumuna shimbi jimwe ngwavo ‘kufwelela.’

¹⁰ Yowano asonekele ngwenyi: “Ou mwafwelela Mwana ali nakuyoya chahaya myaka yosena, ou mwalikanga kuli Mwana keshi kukamona kuyoyako, oloze utenu waKalunga naupwa hali ikiye.” (Yowa. 3:36) Vaka-Kulishitu veji kusololanga nawa lufwelelo hakwononoka kujishimbi jaYesu. Yowano ahanjikilenga mazu aYesu aze alumbununa nge twatela kusolola lufwelelo lwola lwosena.—Yowa. 3:16; 6:29, 40; 11:25, 26; 14:1, 12.

11. Tunahase kusolola ngachilihi kusakwilila chetu hakutachikiza muchano?

¹¹ Chikupu vene twatela kusakwilila Yehova hakuzachisa shipilitu yenyi yajila yitukafwe tutachikize muchano nakwitavila mujimbu wamwaza. (Tangenu Luka 10:21.) Twatela kutwalaho lika kusakwilila Yehova hakutukafwa tupandame kuli ikiye kuhichila muli Mwanenyi uze apwa “Twamina Wamunene, Muka-kukupwisa lufwelelo lwetu.” (Hepe. 12:2) Twatela kutwalaho kuzamisa lufwelelo lwetu hakulombanga nakulinangulanga Mazu aKalunga mangana tusolole kusakwilila chetu halikoji lyenyi lyalinene.—Efwe. 6:18; Petu. 1, 2:2.

12. Mujila muka tunahase kusolola lufwelelo lwetu?

¹² Twatela kutwalaho lika kufwelela jishiko jaYehova. Twatela kulinga ngocho kuzachisa jijila jize najisoloka hatoma kuvakwetu. Chakutalilaho, tweji kwambululanga vyaWangana waKalunga nakwazana mumulimo wakunangula vatu vapwenga tumbaji. Kaha nawa tweji kulinganga “vyuma vyamwaza kuli vosena, chikumanyi kuli vaze twalikata navo mulufwelelo.” (Ngale. 6:10) Tweji kuzatanga nawa nangolo ‘tuzule mutu wamwaka navilinga vyenyi,’ mangana tulihende kuvyuma vize vinahase kutuzeyesa kushipilitu.—Kolo. 3:5, 8-10.

13. ‘Kufwelela Kalunga’ chalema ngachilihi, kaha vachifwanyisa kuka, kaha mwomwo ika?

¹³ Mbimbiliya yamba ngwayo: “Chakuzeneka lufwelelo, chachikalu kumwivwisa Kalunga kuwaha, mwomwo weshowo mwapandama kuli Kalunga, atela kwitavila ngwenyi kwatwama, kaha nawa ngwenyi ikiye apwa muka-kufweta vaze vali nakumutondatonda chikuma.” (Hepe. 11:6) Mazu aKalunga alumbununa ngwawo ‘kufwelela Kalunga’ chikiko chuma chatete vatela kupwa nacho vaka-Kulishitu vamuchano. Kaha vachifwanyisa kuchihela chakutungilaho zuvo. (Hepe. 6:1) Chihela kana chikiko nachikafwa vaka-Kulishitu ‘vahakile  kulufwelelo lwavo’ vilinga vyeka vyavilemu ‘mangana vatwamenga muzangi yaKalunga.’—Tangenu WaPetulu 2, 1:5-7; Yuta 20, 21.

14, 15. Lufwelelo lwalema ngachilihi?

¹⁴ Vaka-Kulishitu vaze vasonekele Mbimbiliya vahanjikile hakulema chalufwelelo hakuluvuluka mapapa kakavulu. Lufwelelo valuvuluka chikuma havilinga vatela kupwa navyo vaka-Kulishitu. Uno echi chalumbununa nge lufwelelo lukiko kaha lwapwa lwalulemu kuli vaka-Kulishitu tahi?

¹⁵ Paulu asonekele chihandwa chatwama halufwelelo nazangi ngwenyi: “Nge nguli nalufwelelo lwakuhasa kunungulula jipili, oloze kangweshi nazangiko, kaha nguwamokomoko.” (Koli. 1, 13:2) Yesu ahanjikile hakulema chakuzanga Kalunga omu akumbulwile chihula chakwamba ngwavo: “Lushimbi muka lwapwa lwalulemu haJishimbi josena?” (Mateu 22:35-40) Zangi yahambakana vilinga vyosena vyavaka-Kulishitu kuhakilako vene nalufwelelo. Mbimbiliya yamba ngwayo, “zangi” yeji ‘kwitavilanga vyuma vyosena.’ Yatwama nalufwelelo muvyuma vyosena ahanjika Kalunga muMazu enyi amuchano.—Koli. 1, 13:4, 7.

16, 17. Uno lufwelelo nazangi vavisoneka ngachilihi muVisoneka, oloze chuma muka chapwa chachilemu, kaha mwomwo ika?

¹⁶ Hakuwana nge lufwelelo nazangi vyapwa vyavilemu, ngocho vaka-Kulishitu vaze vasonekele Mbimbiliya vazachishilenga kakavulu awa mazu mumikuku. Paulu akolezezele vandumbwenyi ngwenyi vatela ‘kuvwala chipwiko chakukinga hatulo chalufwelelo nazangi.’ (Teso. 1, 5:8) Kaha Petulu asonekele ngwenyi: “Numba tuhu [Yesu] kamwamumweneko, oloze munamuzange. Numba tuhu oholili kamweshi nakumumonako, oloze munamufwelela.” (Petu. 1, 1:8) Yakova ahulishile vandumbwenyi vavawahisa ngwenyi: “Kumana Kalunga kasakwile vaka-kuhutwa mukaye mangana vapwenga valuheto kulufwelelo nakupwa nawa vaswana vakuswana Wangana uze ashikile vaze vamuzangako nyi?” (Yako. 2:5) Kaha nawa Yowano asonekele ngwenyi: “Elu lukiko lushimbi [lwaKalunga] ngwenyi: tufwelele lijina lyaMwanenyi Yesu Kulishitu, ngwenyi tulizangenga navakwetu.”—Yowa. 1, 3:23.

¹⁷ Numba tuhu lufwelelo lwapwa lwalulemu, oloze nalukakuma omu jishiko jaKalunga najikatesamo nakumona kutesamo chavyuma twatalilila. Oloze kuzanga Kalunga nakuzanga vakwetu kacheshi kukakumako. Shikaho Paulu asonekelele ngwenyi: “Oholyapwa kunalitulu vyuma vitatu: lufwelelo, nalutalililo, nazangi. Oloze zangi yikiko yinahambakana vyosena evi.”—Koli. 1, 13:13.

18, 19. Unjiho muka uze unakusolola lufwelelo lwamuchano makumbi ano, kaha iya twatela kwalisa?

¹⁸ Makumbi ano, vatu jaYehova vanafwelelanga vyuma unakulinga Wangana waKalunga. Echi chinalingisa kupwenga palachise yakushipilitu mukaye kosena yize yili navatu vakuheta ku 8 miliyoni. Yapwa chihela chize chatwama navatu vaze veji kusololanga mihako yashipilitu yaKalunga. (Ngale. 5:22, 23) Chikupu vene, ou hiunjiho wakusolola hatoma zangi nalufwelelo lwavaka-Kulishitu vamuchano.

¹⁹ Katwatela kwalisa vatu havyuma kaneviko mwomwo Kalunga ikiye eji kutuhanangavyo. Eyi milimo yamwaza ‘yinakufumakanyisa Yehova, nakupwa chinjikizo chahaya myaka yosena chize kacheshi kukanongako.’ (Isa. 55:13) Chikupu vene, vanatulwili “kuhichila mulufwelelo,” mwomwo ‘yawana waKalunga.’ (Efwe. 2:8) Palachise yakushipilitu nayitohwelako lika nakufukila palanga nomu hamavu hosena nahakazala navatu vakukupuka, vakwoloka, vakuwahilila vaze navakalisanga lijina lyaYehova. Shikaho tutwalenuho lika kufwelela jishiko jaYehova.