1. Otu na okutala ko ngiini eitaalo lyopaKriste?

EITAALO lyopaKriste olyo uukwatya wu na ondilo, ihe haantu ayehe ye li na. (2 Tes. 3:2) Nonando ongawo, Jehova okwa pa kehe gumwe gwomaalongeli ye ‘eitaalo lya yeleka pamuthika gwe.’ (Rom. 12:3; Gal. 5:22, NW) Kehe ngoka e na eitaalo na kale lela a pandula.

2, 3. (a) Mboka ye na eitaalo otaya ka mona omalaleko nuuyamba geni? (b) Omapulo geni tatu ka kundathana?

² Jesus Kristus okwa ti kutya He gwomegulu oha nanene aantu kuye okupitila mOmwana. (Joh. 6:44, 65) Okukala neitaalo muJesus oshe shi ningitha oshipu, opo aantu ya dhiminwe po omayono gawo. Ohashi tu pe natango ompito yokunyanyukilwa ekwatathano ewanawa naJehova tali kalelele. (Rom. 6:23) Mbela opu na shoka tatu vulu okuninga po, tu mone elaleko nuuyamba ndyoka? Aawe, oshoka tu li aalunde, otwi ilongela owala eso. (Eps. 103:10, OB-1954) Nonando ongawo, Jehova oha mono mo uuwanawa mu tse. Omolwesilohenda lye, okwe tu inyengitha tu pulakene konkundana ombwanawa. Onkee ano, otwa tameke okukala neitaalo muJesus,  tu na momadhiladhilo etegameno lyoku ka mona omwenyo gwaaluhe. — Lesha Johannes 4:9, 10.

³ Eitaalo oshike naanaa? Mbela osha kwatela mo owala okukala tu shi kombinga yaashoka Kalunga te ke tu ningila monakuyiwa? Mbela omomikalo dhini tu na okuulika eitaalo?

4. Yelitha kutya omolwashike eitaalo inaali kwatela mo owala okukala tu shi omalalakano gaKalunga.

⁴ Eitaalo olya kwatela mo oshindji kaashi shi owala okukala tu shi omalalakano gaKalunga. Eitaalo oshinima shi na oonkondo shoka tashi vulu okwiinyengitha omuntu a kale metsokumwe nehalo lyaKalunga. Okukala neitaalo kutya Kalunga ota vulu oku tu hupitha, ohashi tu inyengitha tu uvithile yalwe onkundana ombwanawa. Omuyapostoli Paulus okwa yelitha a ti: “Ngele to hempulula nokana kutya Jesus oye Omuwa, nowi itaala momwenyo gwoye kutya Kalunga okwe mu yumudha kuusi, nena oto hupithwa. Oshoka ngoka i itaala nomwenyo gwe aguhe, ota ningi omuyuuki koshipala shaKalunga, naangoka ta hempulula nokana ke, ota hupithwa.” — Rom. 10:9, 10; 2 Kor. 4:13.

5. Omolwashike eitaalo lya simana, nongiini tatu vulu oku li kaleka lya kola? Shi thaneka.

⁵ Osha yela kutya etegameno lyetu lyoku ka nyanyukilwa omwenyo gwaaluhe muuyuni uupe waKalunga, oli ikolelela kokukala tu na eitaalo noku li kaleka lya kola. Otwa pumbwa okukoleka eitaalo lyetu, ngaashi owala oshimeno sha pumbwa okutekelwa omeya. Oshimeno shoka kaashi shi shoshili ihashi koko, ihe shoka shi na omwenyo ohashi ende tashi koko. Oshimeno shoka shi na omwenyo ohashi ganya, ngele ihashi tekelwa, ihe ngele ohashi mono omeya aluhe, ohashi kala sha hapa nawa. Ngele osha kala ihaashi mono omeya ga gwana, ohashi si po thiluthilu. Sha faathana, eitaalo lyetu otali vulu okuganya nokusa, ngele ihatu li koleke. (Luk. 22:32; Heb. 3:12) Ngele otwa gandja eitulomo keitaalo lyetu, otali ka kala li na omwenyo notali ka tsikila ‘okukoka.’ Otatu ka kala wo tu na “eitaalo” lya kola. — 2 Tes. 1:3; Tit. 2:2.

6. Aahebeli 11:1 oya hokolola eitaalo momikalo mbali dhini?

⁶ Shoka Ombiimbeli tayi popi kombinga yeitaalo otashi adhika mAahebeli 11:1. (Lesha) Eitaalo olya kwatela mo iinima iyali mbyoka itaatu vulu oku yi mona: (1) ‘Iinima mbyoka twa tegamena.’ Shika osha kwatela mo iinima mbyoka yu uvanekwa kutya otayi ka ningwa, ihe inayi gwanithwa natango, ngaashi uuyuni uupe nosho wo okuhulithwa po kuukolokoshi awuhe. (2) ‘Iinima mbyoka itaatu vulu oku yi mona ngashingeyi.’ Moshikalimo shika, oshitya shOshigreka shoka sha tolokwa ‘okukala neinekelo lya kola’ nenge nuumbangi, otashi ti “okukala nuushili” miinima mbyoka inaatu mona. Iinima mbyoka ongaashi Jehova Kalunga, Jesus Kristus, aayengeli nosho wo iilonga mbyoka tayi longwa kUukwaniilwa womegulu. (Heb. 11:3, NW) Ongiini tatu vulu okuulika kutya etegameno lyetu olyoshili nonokutya otwi itaala miinima mbyoka kaatu wete, ya popiwa mOohapu dhaKalunga? Otatu vulu oku shi ulika okupitila moohapu nomiilonga yetu, oshoka ngele hasho, eitaalo lyetu olyowaleelela.

7. Oshiholelwa shaNoa otashi tu kwathele ngiini tu uve ko kutya okukala neitaalo otashi ti shike? (Tala kethano lyopetameko.)

⁷ Aahebeli 11:7 oya popya kombinga yeitaalo lyaNoa ngoka ‘u uvu ko omalondodho gaKalunga taga popi iinima mbyoka tayi ke ya, ye ina vula oku yi mona. Noa okwa vulika kuKalunga e ta tungu onguluwato, moka a hupile pamwe naanegumbo lye.’ Noa oku ulike eitaalo lye mokutunga onguluwato onenenene. Kapu na omalimbililo, aantu oya li haye mu pula kutya omolwashike ta tungu  oshinima oshinenenene ngawo. Mbela Noa okwa li ha kala a mwena nenge okwa li he ya lombwele kutya kayi shi iilonga yawo? Aawe! Eitaalo lye olye mu inyengitha a gandje uunzapo nuulaadhi nokulondodha aantu kombinga yesiku ndyoka Kalunga ta ka hanagula po uuyuni. Otashi vulika Noa a kala nokulombwela aantu lwiikando oohapu ndhoka a lombwelwa kuJehova, ndhoka tadhi ti: ‘Onda tokola ndi hulithe po aantu ayehe, oshoka uuyuni owu udha iilonga yawo iiwinayi. Otandi ka tuma eyelu kombanda yevi, li yonagule po omufudho aguhe. Shaa shoka shi na omwenyo kombanda yevi, otashi si.’ Natango, Noa okwa li a lombwele aantu kutya opo ya vule oku ka hupa, ongele owala taya vulika koshipango shaKalunga ‘shokuya monguluwato.’ Onkee ano, Noa oku ulike eitaalo lye mokukala “omuuvithi guuyuuki.” — Gen. 6:13, 17, 18; 2 Pet. 2:5.

8. Omulongwa Jakob okwa li a nwethwa mo a nyole shike kombinga yeityo lyeitaalo lyashili?

⁸ Ontumwafo yaJakob otashi vulika ya li ya nyolwa konima yethimbo efupi, sho omuyapostoli Paulus a nwethwa mo a nyole kombinga yeitaalo. Ngaashi Paulus, Jakob okwa yelitha kutya eitaalo lyashili olya kwatela mo wo iilonga. Jakob okwa nyola a ti: “Ulukila ndje, nkene omuntu ta vulu okukala e na eitaalo lyaa na iilonga. Ngame otandi ku ulukile  wo eitaalo lyandje tali holoka miilonga.” (Jak. 2:18) Jakob okwa tsikile okuyelitha eyooloko pokati kokukala neitaalo noku li ulika miilonga. Oompwidhuli odhi itaala kutya Kalunga oko e li, ihe kadhi na eitaalo lyashili. Pehala lyaashono, ohadhi longo shoka shi li ompinge nomalalakano gaKalunga. (Jak. 2:19, 20) Mepingathano naashoka, Jakob okwa popi kombinga yaalumentu yopethimbo lyonale, mboka ya li ye na eitaalo nokwa pula a ti: “Tatekulu Abraham okwa ningi ngiini omuyuuki koshipala shaKalunga? Osha zi miilonga ye, sho a ka yamba omwana Isak koshiyambelo. U wete ko ano? Eitaalo lye niilonga ye oya longele kumwe; eitaalo lye olya hololwa nawa kiilonga ye.” Opo a tse omuthindo kutya eitaalo oli na okuulikwa miilonga, Jakob okwa gwedha ko a ti: “Ngaashi naanaa omuntu ngele ke na omufudho, ta talwa a sa, osho wo neitaalo lyaa na iilonga, olya sa.” — Jak. 2:21-23, 26.

9, 10. Omuyapostoli Johannes okwe tu kwathele ngiini tu uve ko esimano lyokukala neitaalo?

⁹ Konima yomimvo dhi vulithe 30, omuyapostoli Johannes okwa nyola Evaangeli lye noontumwafo ndatu. Mbela okwa li u uvite ko eityo lyeitaalo lyashili ndyoka aanyoli yOmbiimbeli ooyakwawo ya li ya nwethwa mo ya nyole kombinga yalyo? Eeno, oshoka Johannes oye a longitha unene oshityalonga shOshigreka shoka omathimbo gamwe hashi tolokwa ‘okukala neitaalo,’ e vulithe aanyoli ooyakwawo yOmbiimbeli.

¹⁰ Pashiholelwa, omuyapostoli Johannes okwa popi a ti: “Oongoka i itaala Omwana, oku na omwenyo gwaaluhe, ihe ngoka itaa vulika kOmwana, ita ka mona omwenyo, ihe ondjahi yaKalunga otayi kala kombanda ye.” (Joh. 3:36) Eitaalo lyopaKriste olya kwatela mo okuvulika kiipango yaJesus. Johannes okwa li a totha olundji oohapu dhaJesus ndhoka tadhi ulike kutya eitaalo oshinima sha pumbwa okukala tashi koko. — Joh. 3:16; 6:29, 40; 11:25, 26; 14:1, 12.

11. Ongiini tatu vulu okuulika olupandu lwetu, sho twa tseya oshili?

¹¹ Inatu pandula tuu sho twa tseya kutya Jehova okwa longitha ombepo ye ondjapuki, e tu hololele oshili noku tu kwathela tu kale neitaalo monkundana ombwanawa! (Lesha Lukas 10:21) Natu tsikile okupandula Jehova, sho e tu nanena kuye okupitila mOmwana ngoka e li “omutameki nomugwanithi gweitaalo” lyetu. (Heb. 12:2, OB-1954) Opo tu ulike olupandu lwetu omolwesilohenda ndyoka, otu na okutsikila okukoleka eitaalo lyetu okupitila megalikano nomokukonakona Oohapu dhaKalunga. — Ef. 6:18; 1 Pet. 2:2.

12. Omomikalo dhini tu na okuulika eitaalo?

¹² Otu na okutsikila okukala neitaalo momauvaneko gaJehova. Shika otu na oku shi ninga momukalo ngoka gwi iwitikile kuyalwe. Pashiholelwa, otatu tsikile okuuvitha kombinga yUukwaniilwa waKalunga nokuninga aantu aalongwa. Shimwe ishewe, “natu ningileni kehe gumwe uuwanawa, ihe unene tuu mboka tu li nayo meitaalo limwe.” (Gal. 6:10) Natu longe wo nuudhiginini ‘tu ihule omuntu gwetu omukulu pamwe nomikalo dhe,’ mokukotokela kehe shoka tashi vulu oku tu nkundipaleka pambepo. — Kol. 3:5, 8-10.

13. ‘Eitaalo okwiitaala Kalunga’ olya simana shi thike peni, notali yelekanithwa nashike nomolwashike?

¹³ Ombiimbeli otayi ti: “Kape na ngoka ta hokiwa kuKalunga, ngele ke na eitaalo. Oshoka ngoka te ya kuKalunga, oku na okukala i itaala kutya Kalunga oko e li nota futu ayehe mboka taye mu kongo.” (Heb. 11:6) Oohapu dhaKalunga otadhi popi kutya ‘eitaalo okwiitaala Kalunga’ olyo ‘ekankameno’ ndyoka kehe gumwe a pumbwa okukala e na, opo a ninge noku kale Omukriste gwashili. (Heb. 6:1, OB-1954) Aakriste oya pumbwa okugwedha ko ‘keitaalo lyawo’ omaukwatya galwe ga simana, opo yi “ikaleke mohole yaKalunga.”  — Lesha 2 Petrus 1:5-7; Jud. 20, 21.

14, 15. Omolwashike ohole ya simana yi vule eitaalo?

¹⁴ Aanyoli yOmalonyolo gOshigreka oya tsu omuthindo esimano lyeitaalo mokupopya lwiikando oyindji kombinga yalyo. Kapu na uukwatya wulwe wopaKriste wa tumbulwa lwiikando oyindji ngaashi eitaalo. Mbela shika osha hala okutya eitaalo olyo uukwatya wopaKriste wa simanenena?

¹⁵ Paulus okwa li a yelekanitha eitaalo nohole, a ti: “Nando ondi kale ndi na eitaalo tali vulu okudhikula po oondundu, ihe kandi na ohole, ongame oshinima showala.” (1 Kor. 13:2) Jesus okwa tsu omuthindo ohole yokuhola Kalunga kutya oyo uukwatya wa simana wu vule omaukwatya agehe, sho a yamukula epulo ndyoka tali ti: “Oshipango oshinene shomompango oshini po?” (Mat. 22:35-40) Ohole oya kwatela mo omaukwatya ogendji ga simana, ngoka Omukriste e na okukala e na, mwa kwatelwa eitaalo. Ombiimbeli otayi ti kutya ohole “otayi itaale.” Ohole ohayi itaale miinima mbyoka Kalunga e tu lombwela mOohapu dhe. — 1 Kor. 13:4, 7.

16, 17. Eitaalo nohole oya tsuwa ngiini omuthindo mOmanyolo, noshini po sha simana shi vule oshikwawo nomolwashike?

¹⁶ Molwaashoka eitaalo nohole oya simana, aanyoli yOmbiimbeli oya tsu omuthindo omaukwatya ngaka lwiikando oyindji, moku ga longitha metumbulo limwe. Paulus okwa kumagidha aamwahe ‘ya zale eitaalo nohole ongehuuyanza.’ (1 Tes. 5:8) Petrus okwe tu kumagidha tu kale tu hole Jesus notu mu itaale, sho a nyola a ti: “Oongoka mu mu hole, nando inamu mu mona; omwe mu itaala, nando kamu mu wete ngashingeyi.” (1 Pet. 1:8) Omulongwa Jakob okwa lombwele aamwahe aagwayekwa a ti: “Kalunga okwa hogolola oohepele yomuuyuni mbuka, ya ninge aayamba yomeitaalo noya ka pewe Oshilongo shoka e shi uvanekela mboka ye mu hole.” (Jak. 2:5) Omuyapostoli Johannes okwa nyola a ti: “Oshipango [shaKalunga] osho shika kutya tse otwi itaala edhina lyOmwana Jesus Kristus notu holathane.” — 1 Joh. 3:23.

¹⁷ Nonando eitaalo olya simana, itatu ka pumbwa we okukala neitaalo momauvaneko gaKalunga monakuyiwa, oshoka otaga ka gwanithwa po niinima mbyoka twa tegamena otayi ka ninga yoshili. Ihe ohole yokuhola Kalunga nosho wo aantu ooyakwetu otayi ka tsikila sigo aluhe. Onkee ano, Paulus okwa nyola a ti: “Ihe ngashingeyi otaku kala mbika itatu: eitaalo, etegameno nohole, ihe oshinima oshinene kwaayihe mbika osho ohole.” — 1 Kor. 13:13

18, 19. Oshike shoka tu wete kunena, shi li po omolweitaalo, nolye tu na okupandula?

¹⁸ Pethimbo lyetu, oshigwana shaJehova osha kala nokuulika eitaalo mUukwaniilwa we, mboka wa dhikwa po nale. Oshizemo oshini? Ngashingeyi oparadisa yetu yopambepo muuyuni awuhe oya thikama po maantu ya hangana, ya konda poomiliyona hetatu. Iiyimati yopambepo oyo tayi dhana onkandangala moparadisa ndjoka. (Gal. 5:22, 23) Shono oshi li euliko kutya Aakriste yashili oye na eitaalo nohole.

¹⁹ Kalunga oye owala ta vulu okuhanganitha aantu moparadisa yopambepo. Oshilonga shika oshikumithi “otashi ka ningila Omuwa esimano, endhindhiliko lyaaluhe ndyoka itaali ka dhimwa po nando.” (Jes. 55:13) Onkee ano, oye owala twa gwana okupandula. Odhoshili kutya oshi li “omagano gaKalunga,” sho ‘twa hupithwa keitaalo, omolwesilohenda lye.’ (Ef. 2:8, yelekanitha OB-1954.) Omwaalu gwaantu mboka ye li moparadisa yopambepo otagu indjipala notagu humu komeho neendelelo sigo oosho evi alihe tali ku udha aantu aayuuki, ya gwanenena noya nyanyukwa taya tanga edhina lyaJehova sigo aluhe. Onkee ano, natu tsikileni okukala neitaalo momauvaneko gaJehova!