1. Не ’ууӕндундзийнадӕмӕ цӕхуӕн цӕстӕй гъӕуама кӕсӕн?

ӔУУӔНДУНДЗИЙНАДӔ алкӕмӕ нӕййес (2 Фес. 3:2). Фал Йеговӕ ӕ лӕггадгӕнгутӕй алкӕмӕндӕр ӕууӕндундзийнадӕ равардта (Ром. 12:3; Гал. 5:22). Ӕма си уой туххӕй мах хъӕбӕр боз ан!

2, 3. а) Ӕууӕндундзийнадӕ нӕмӕ ке ес, е нин ци пайда хӕссуй? б) Цӕхуӕн фарстатӕмӕ ӕркӕсдзиан?

² Йеговӕ ӕ хъазар фурт Йесо Киристей равардта, цӕмӕй ибӕл кадӕриддӕр ӕууӕндуй, уонӕн сӕ тӕрегъӕдтӕ хатиргонд ӕрцӕуонцӕ. Уотемӕй адӕнӕн фӕззиндтӕй фадуат, цӕмӕй Йегови ӕмбӕлттӕ исуонцӕ ӕма ӕносмӕ цӕронцӕ (Иоан. 6:44, 65; Ром. 6:23). Куд фӕлмӕнзӕрдӕ Хуцау ӕй Йеговӕ! Кӕд тӕрегъӕдгунтӕ ан ӕма мӕлӕти аккаг ан, уӕддӕр Йеговӕ уидта, нӕ бон хуарзӕрдӕмӕ раййевун ке ӕй (Пс. 103:10). Е ’стур хуарзӕнхи фӕрци хуарз хабар фегъустан. Ӕма Киристей нивондбӕл ке баууӕндтан, уой фӕрци нин ес ӕносон царди нифс. (Бакӕсӕ 1 Иоанни 4:9, 10.)

 ³ Фал ма ӕууӕндундзийнади туххӕй нӕ бон никкидӕр ци ӕй базонун? Хуцау мах туххӕй ци искодта, удта ма никкидӕр ци искӕндзӕй, уой ке зонӕн, е цума уобӕл дзорӕг ӕй, ӕма нӕмӕ ӕууӕндундзийнадӕ ес? Мадта ӕркӕсӕн, ӕууӕндундзийнадӕ ма цӕхуӕн гъуддӕгтӕй бӕрӕг фӕууй, уомӕ.

4. Ӕууӕндундзийнадӕ нӕмӕ ке ес, е цӕмӕй бӕрӕг уодзӕй?

⁴ Хуцауи фӕндон цӕй медӕги ӕй, уой ке зонӕн, е уобӕл дзорӕг нӕма ’й, ӕма нӕмӕ ӕууӕндундзийнадӕ ес. Ӕууӕндундзийнадӕ нӕмӕ ку уа, уӕд нӕ зӕрдӕй фӕнддзӕй, Хуцауи фӕндонмӕ гӕсгӕ цӕрун. Хуцау адӕни Киристей нивонди фӕрци ке ервӕзун кӕнуй, уобӕл ку ’ууӕндӕн, уӕд еци хуарз хабар иннетӕн дӕр дзордзиан. Апостол Павел загъта: «Кӕд, „де ’взагбӕл ци дзурд ес“, гъома Йесо нӕ Хецау ке ӕй, уой ӕргом дзорис ӕма ’й Хуцау мӕрдтӕй ке райгас кодта, уобӕл зӕрдӕй ӕууӕндис, уӕд фӕййервӕздзӕнӕ. Уомӕн ӕма адӕймаг зӕрдӕй ку ’ууӕнда, уӕд нимад ӕрцӕудзӕй растгӕнӕгбӕл, е ’ууӕндундзийнади туххӕй ӕргом ку дзора, удта фӕййервӕздзӕй» (Ром. 10:9, 10; 2 Кор. 4:13).

5. Ӕууӕндундзийнадӕ ӕхсидзгӕ цӕмӕн ӕй ӕма ци гъӕуама кӕнӕн, цӕмӕй нин федар уа? Ӕрхӕссӕ цӕветтон.

⁵ Бӕрӕг ӕй, цӕмӕй Хуцауи нӕуӕг дуйней ӕносон цардӕй исхайгин уӕн, уой туххӕй нӕмӕ гъӕуама уа ӕууӕндундзийнадӕ ӕма ’й гъӕуй федар кӕнун. Ӕууӕндундзийнадӕ рабарӕн ес дидинӕги хӕццӕ. Дидинӕгӕн дон ку нӕ фагӕ кӕна, уӕд бахускъӕ уодзӕй. Донӕфсес ку уа, уӕдта уодзӕй федар ӕма ирӕздзӕй. Уотӕ не ’ууӕндундзийнадӕ дӕр, цӕмӕй «федарӕй-федардӕр» кӕна ӕма «ӕнӕнез» уа, уой туххӕй имӕ дзӕбӕх зелун гъӕуй (Тит. 2:2, феп.; 2 Фес. 1:3; Лук. 22:32; Дзиуит. 3:12).

6. Ӕууӕндундзийнадӕ ци ӕй, е Дзиуиттӕгтӕмӕ 11:1 цӕхуӕн дууӕ гъуддагемӕй ӕвдист цӕуй?

⁶ Ӕууӕндундзийнадӕ ци ӕй, уой туххӕй Библий финст ес Дзиуиттӕгтӕмӕ 11:1. (Ба ’й кӕсӕ.) Е баст ӕй, цӕстӕй фӕууинӕн ке нӕййес, дууӕ уӕхӕн гъуддаги хӕццӕ. 1) Ӕууӕндундзийнадӕ ӕй, «адӕймаг цӕмӕ ӕнгъӕлмӕ кӕсуй, уомӕй ин федар нифс ку уа», е. Еци федар нифсмӕ хауй, Хуцау нин федӕни зӕрдӕ цӕмӕй ӕвӕруй, е. Зӕгъӕн, мах ӕй зонӕн, фуддзийнадӕн кӕрон ке ӕрцӕудзӕй ӕма нӕуӕг дуйне ке уодзӕй. 2) Ӕууӕндундзийнадӕ ӕй, адӕймаг «бӕлвурдгӕнӕнти фӕрци ку зона, цӕстӕй ци нӕ уинуй, етӕ ӕцӕгӕйдӕр ке ’нцӕ», е. Зӕгъӕн, мах ӕй зонӕн, Йеговӕ Хуцау, Йесо Киристе, изӕдтӕ ӕма уӕларвон Паддзахадӕ ӕцӕгӕйдӕр ке ’нцӕ, кӕд сӕ цӕстӕй фӕууинӕн нӕййес, уӕддӕр (Дзиуит. 11:3). Цума нӕ бон куд ӕй бавдесун, Хуцауи зӕрдӕвӕрдтӕбӕл, удта цӕстӕй фӕууинӕн ке нӕййес, уонӕбӕл ӕцӕгӕйдӕр ке ӕууӕндӕн? Е бӕрӕг уодзӕй нӕ дзурдтӕй ӕма нӕ гъуддӕгтӕй.

7. Ноййи цӕветтон нин куд ӕвдесуй, ӕууӕндундзийнадӕ ци ӕй, уой? (Кӕсӕ хузӕмӕ статьяй райдайӕни.)

⁷ Ноййи хабарӕй ӕууӕндундзийнади туххӕй нӕ бон ци ӕй базонун? Апостол Павел загъта: «Хуцау Ноййи, нурма цӕстӕй фӕууинӕн ци н’ адтӕй, уони туххӕй ку бафӕдзахста, уӕд имӕ е ’ууӕндундзийнади фӕрци разиндтӕй Хуцауи тас, ӕма исаразта науӕ ӕ бийнонти фӕййервӕзун кӕнунмӕ» (Дзиуит. 11:7). Ной баууӕндтӕй, Хуцау ин цидӕриддӕр загъта, уобӕл, ӕма устур науӕ кӕнун райдӕдта. Адӕн ӕй, ӕвӕдзи, фарстонцӕ, ами ци кӕнунмӕ гъавис, зӕгъгӕ. Ӕма син ӕй Ной дӕр куд нӕ радзурдтайдӕ! Библи куд зӕгъуй, уомӕ гӕсгӕ Ной адтӕй «рӕстдзийнадӕ игъосунгӕнӕг» (2 Пет. 2:5). Ной адӕни фӕдзахста,  Хуцау зӕнхӕбӕл Дони хъиамӕт ӕруадзуйнаг ке ӕй ӕма лӕгъуз адӕни ке фесафдзӕй. Ӕвӕдзи син дзурдта, Йеговӕ ин ци дзурдтӕ загъта, уони: «Ӕз ӕй уинун, адӕни се ’гасей дӕр ке гъӕуй фесафун, уомӕн ӕма зӕнхӕ уони туххӕй байдзаг ӕй фудмиутӕй. [...] Ӕз зӕнхӕбӕл рауадздзӕн дони хъиамӕт ӕма фесафдзӕн, арви бунмӕ уодӕгасӕй цидӕриддӕр ес, уони. Зӕнхӕбӕл цидӕриддӕр ес,– еугурӕйдӕр рамӕлдзӕнцӕ». Ной гъӕуама адӕнӕн балӕдӕрун кодтайдӕ, цӕмӕй фӕййервӕзонцӕ, уой туххӕй сӕ науӕмӕ бацӕун ке гъудӕй, Йеговӕ куд бафӕдзахста, уотӕ (Райд. 6:13, 17, 18).

8. Иаков ӕууӕндундзийнади туххӕй ци загъта?

⁸ Петур дзиуиттӕгтӕмӕ ку ниффинста, уой фӕсте Иаков дӕр финста, ӕууӕндундзийнадӕ ци ӕй, уой туххӕй: «Бавдесӕ мин де ’ууӕндундзийнадӕ ӕнӕ гъуддӕгтӕй, ӕз ба дин ме ’ууӕндундзийнадӕ бавдесдзӕн мӕ гъуддӕгтӕй» (Иак. 2:18). Иаков ӕй балӕдӕрун кодта, ӕцӕг ӕууӕндундзийнадӕ ӕма уотид цӕбӕлдӕр ӕууӕндун, еу ке нӕй. Сайтӕнттӕ дӕр ӕууӕндунцӕ, Хуцау ке ес, уобӕл, фал сӕмӕ ӕцӕг ӕууӕндундзийнадӕ нӕййес, ӕма ӕ нихмӕ дӕр уой туххӕй рацудӕнцӕ (Иак. 2:19, 20). Фал ӕцӕг ӕууӕндундзийнадӕ  кӕмӕ ес, е ба фӕййархайуй, цӕмӕй ӕ гъуддӕгтӕй Хуцауи зӕрдӕ рохс кӕна. Авраам гъе уӕхӕн адӕймаг адтӕй. Иаков загъта: «Нӕ фиддӕл Авраам растгӕнӕгбӕл нимад ӕ гъуддӕгти фӕрци не ’рцудӕй, ӕ фурт Исакки нивондхӕссӕнбӕл ку ӕрӕвардта, уӕд? Дӕхуӕдӕг ӕй уинис, е ’ууӕндундзийнадӕ ӕма ӕ гъуддӕгтӕ фӕрсӕй-фарсмӕ ке цудӕнцӕ ӕма ӕ гъуддӕгтӕй е ’ууӕндундзийнадӕ кӕронмӕ фӕлтӕрд ке ’рцудӕй» (Иак. 2:21–23, 26). Иаков ма баханхӕ кодта, ӕууӕндундзийнадӕ ӕнӕ гъуддӕгтӕй ке неци ӕй, уой ӕма загъта: «Бауӕр ӕнӕ уолӕфтӕй мард куд ӕй, уотӕ ӕууӕндундзийнадӕ дӕр ӕнӕ гъуддӕгтӕй мард ӕй» (Иак. 2:21–23, 26).

9, 10. Фуртбӕл ке ӕууӕндӕн, уой нӕ бон куд ӕй гъуддӕгтӕй ӕвдесун?

⁹ Уобӕл дӕс ӕма инсӕй анземӕй фулдӕр ку рацудӕй, уӕд апостол Иоанн ниффинста ӕ Евангели ӕма е ’ртӕ финстӕги. Библий иннӕ финсгути хузӕн ӕй Иоанн дӕр хуарз лӕдӕрдтӕй, ӕууӕндундзийнадӕ ци ӕй, уой. Иоанни финстӕгути арӕх рамбӕлуй еу грекъаг дзурд, ӕ нисанеуӕг ӕй «ӕууӕндун» кенӕ «ӕууӕндундзийнадӕ гъуддагӕй ӕвдесун».

¹⁰ Иоанн финста: «Фуртбӕл ка ’ууӕндуй, е исхайгин уодзӕй ӕносон цардӕй, Фуртмӕ ка нӕ игъосуй, е ба цард нӕ фӕууиндзӕй, фал ӕй Хуцауи маст баййафдзӕй» (Иоан. 3:36). Йесой фӕдзӕхститӕмӕ ку игъосӕн, уӕд нӕ гъуддӕгтӕй бӕрӕг уодзӕй, ке ибӕл ӕууӕндӕн, е. Иоанн куд финста, уомӕ гӕсгӕ Йесо арӕх дзурдта, ӕууӕндундзийнадӕ гъуддӕгтӕй ӕвдесун ке гъӕуй, уой туххӕй (Иоан. 3:16; 6:29, 40; 11:25, 26; 14:1, 12).

11. Йеговӕ нин рӕстдзийнадӕ ке базонун кодта, уой туххӕй си боз ке ан, е цӕмӕй бӕрӕг уодзӕй?

¹¹ Йегови сугъдӕг хъаури фӕрци нин рӕстдзийнадӕ райгон ӕй ӕма хуарз хабарбӕл баууӕндтан. (Бакӕсӕ Лукай 10:21.) Уой туххӕй си боз куд гъӕуама ма уӕн! Мах ин алкӕддӕр арфӕ кӕндзиан, еци фадуат нин ке равардта, цӕмӕй имӕ хӕстӕг кӕнӕн, «Сӕйраг Разамонӕг ӕма нин не ’ууӕндундзийнадӕ алцӕмӕй ӕнхӕст ка кӕнуй», уой фӕрци, гъома Киристей фӕрци (Дзиуит. 12:2). Йеговӕй боз ке ан, е бӕрӕг уодзӕй, ку имӕ ковӕн ӕма ин ӕ Дзурд ку ахур кӕнӕн, уомӕй. Уотемӕй не ’ууӕндундзийнадӕ дӕр федар кӕндзӕй (Еф. 6:18; 1 Пет. 2:2).

12. Ӕууӕндундзийнадӕ цӕхуӕн гъуддӕгтӕй бӕрӕг уодзӕй?

¹² Гъӕуама нӕ гъуддӕгтӕй алкӕддӕр бӕрӕг уа, Йегови зӕрдӕвӕрдтӕбӕл федарӕй ке ӕууӕндӕн, е. Зӕгъӕн, гъӕуама адӕнӕн игъосун кӕнӕн Хуцауи Паддзахади туххӕй ӕма син ӕнхус кӕнӕн, цӕмӕй Йесой ахуркӕнуйнӕгтӕ исуонцӕ. Уомӕй уӕлдай ма гъӕуама «алкӕмӕндӕр хуарздзийнадӕ кӕнӕн, уӕлдайдӕр ба, ӕууӕндундзийнади фӕрци еу бийнонтӕ ке хӕццӕ ан, уонӕн» (Гал. 6:10). Удта ма гъӕуама архайӕн, цӕмӕй нӕ «зӕронд уодигъӕдӕ ӕ миути хӕццӕ ниууадзӕн», уомӕн ӕма нӕ нӕ фӕндуй, цӕмӕй Хуцауӕй раидард уӕн (Кол. 3:5, 8–10).

13. Хуцаубӕл ӕууӕндун ци нисан кӕнуй? Уой туххӕй Библи ци зӕгъуй ӕма цӕмӕн?

¹³ Библи зӕгъуй: «Ӕнӕ ӕууӕндундзийнадӕй ба Хуцауи зӕрдӕ барохс кӕнӕн нӕййес, уомӕн ӕма Хуцауӕн ковӕг адӕймаг гъӕуама ӕууӕнда, Хуцау ке ес ӕма ’й зӕрдиагӕй ка агоруй, уонӕн ке арфӕ кӕнуй» (Дзиуит. 11:6). Библи куд зӕгъуй, уомӕ гӕсгӕ ӕцӕг киристон гъӕуама «Хуцаубӕл ӕууӕнда». Е ӕй не ’ууӕндундзийнади «бундорӕн» ӕ еу хай (Дзиуит. 6:1). Фал цӕмӕй Йеговӕмӕ хӕстӕг уӕн, уой туххӕй ма нӕ гъӕуй ӕндӕр ӕхсидзгӕ менеугутӕ дӕр. (Бакӕсӕ 2 Петури 1:5–7; Иуд. 20, 21.)

14, 15. Ӕууӕндундзийнадӕй уӕлдай ма нӕмӕ уарзондзийнадӕ дӕр цӕмӕн гъӕуама уа?

 ¹⁴ Киристон Грекъаг Финстити ӕууӕндундзийнади туххӕй иннӕ менеугутӕй арӕхдӕр финст ес. Мадта уӕд е тӕккӕ ӕхсидзгӕдӕр менеуӕг ӕй?

¹⁵ Павел ӕууӕндундзийнадӕ рабарста уарзондзийнади хӕццӕ ӕма ниффинста: «Уӕхӕн ӕууӕндундзийнадӕ мӕмӕ ку уа, ӕма мӕ бон уодзӕй хуӕнхтӕ дӕр еу рауӕнӕй исесун ӕма сӕ ӕндӕр рауӕн ӕрӕвӕрун, фал мӕмӕ уарзондзийнадӕ ку нӕ уа, уӕд ӕз неци дӕн» (1 Кор. 13:2). Киристе куд загъта, уомӕ гӕсгӕ «Закъони фӕдзӕхститӕй тӕккӕ сӕйрагдӕр» ӕй Хуцауи уарзун (Матф. 22:35–40). Уарзондзийнади фӕрци нӕ уодигъӕди ирӕздзӕй, Хуцауи зӕрдӕмӕ ка цӕуй, ӕндӕр уӕхӕн менеугутӕ дӕр. Зӕгъӕн, Библий финст ес, уарзондзийнадӕ «алцӕбӕлдӕр ӕууӕндуй», зӕгъгӕ. Уӕхӕн уарзондзийнади фӕрци ӕууӕндӕн, Йеговӕ нин Библий цидӕриддӕр дзоруй, уобӕл (1 Кор. 13:4, 7).

16, 17. Библи ӕууӕндундзийнадӕ ӕма уарзондзийнади туххӕй ци зӕгъуй? Еци дууӕ менеуӕгемӕй устурдӕр кӕци ӕй ӕма цӕмӕн?

¹⁶ Ӕууӕндундзийнадӕ дӕр ӕма уарзондзийнадӕ дӕр ӕхсидзгӕ менеугутӕ ’нцӕ, ӕма Киристон Грекъаг Финстити сӕ дууей туххӕй дӕр дзурд арӕх фӕццӕуй. Павел ӕнсувӕрти разӕнгард кодта, зӕгъгӕ, «нӕ уӕле дарӕн ӕууӕндундзийнади ӕма уарзондзийнади ’згъӕрхӕдонӕ» (1 Фес. 5:8). Петур дӕр финста: «Сумах кӕд Киристей уингӕ дӕр некӕд фӕккодтайтӕ, уӕддӕр ӕй уарзетӕ. Ӕма ’й кӕд нуртӕккӕ дӕр нӕ уинетӕ, уӕддӕр ибӕл ӕууӕндетӕ» (1 Пет. 1:8). Иаков ба исӕрст киристӕнттӕмӕ уӕхӕн фарста равардта: «Хуцау, дуйней цӕсти мӕгур ка ӕй, уони нӕ равзурста, цӕмӕй ӕууӕндундзийнадӕй гъӕздуг уонцӕ ӕма ’й ка уарзуй, уонӕн зӕрдӕ кӕмӕй байвардта, еци паддзахадӕ бунӕн райсонцӕ?» (Иак. 2:5). Иоанн ба финста: «[Хуцауи] фӕдзӕхст ба ӕй уӕхӕн: гъӕуама ӕууӕндӕн ӕ Фурт Йесо Киристебӕл ӕма кӕрӕдзей уарзӕн» (1 Иоан. 3:23).

¹⁷ Фал апостол Павел ба уотӕ загъта: «Аци ӕртӕ уодзӕнцӕ: ӕууӕндундзийнадӕ, нифс ӕма уарзондзийнадӕ. Фал си ӕгасемӕй ӕхсидзгӕдӕр ӕй уарзондзийнадӕ» (1 Кор. 13:13). Хуцау нин зӕрдӕ цӕмӕй ӕвӕруй, уобӕл нӕ федӕни ӕууӕндун нӕбал гъӕудзӕй, уомӕн ӕма ӕ зӕрдӕвӕрдтӕ еугурӕйдӕр исӕнхӕст уодзӕнцӕ. Е уодзӕй, Библи ке кой кӕнуй, еци дессаги цард. Фал Хуцауи ӕма адӕни уарзун ба нӕ алкӕддӕр гъӕудзӕй. Зӕгъӕн ес, ӕма сӕмӕ ӕности дӕргъи нӕ уарзт хъӕбӕрӕй-хъӕбӕрдӕр кӕндзӕй.

18, 19. Хуцауи адӕнмӕ ӕууӕндундзийнадӕ ке ес, уой фӕрци кӕрӕдзей хӕццӕ куд цӕрунцӕ, ӕма уой туххӕй кади аккаг ка ӕй?

¹⁸ Абони Йегови адӕн гъуддагӕй ӕвдесунцӕ, Хуцауи Паддзахадӕбӕл ке ӕууӕндунцӕ. Хуцауи сугъдӕг хъаури разамундмӕ гӕсгӕ сӕ цард ке аразунцӕ, уой фӕрци ӕгас дуйнебӕл дӕр аст милиуанӕй фулдӕр Ӕвдесӕнтӕ кӕрӕдзей хӕццӕ фӕрнӕй цӕрунцӕ ӕма кӕрӕдзей дӕр уарзунцӕ (Гал. 5:22, 23). Бӕрӕг ӕй, ӕууӕндундзийнадӕн ӕма уарзондзийнадӕн устур хъаурӕ ке ес!

¹⁹ Еци еудзийнадӕ нин Хуцауи фӕрци ес. Уой туххӕй хъӕбӕр устур кади аккаг ӕй (Ис. 55:13). Мах си ӕцӕгӕйдӕр боз ан, уӕхӕн фадуат нин ке ес, цӕмӕй фӕййервӕзӕн «ӕууӕндундзийнади рӕуаги» (Еф. 2:8). Йеговӕ идарддӕр дӕр фулдӕр адӕнӕн ӕнхус кӕндзӕй, цӕмӕй сӕмӕ ӕууӕндундзийнадӕ уа. Ӕма нӕуӕг дуйне ку ралӕууа, уӕд ӕгас зӕнхӕбӕл дӕр цӕрдзӕй ӕнхӕст, амондгун ӕма раст адӕн, ӕма Йегови ӕносмӕ кадгин кӕндзӕнцӕ. Гъӕйдӕ мадта нӕ гъуддӕгтӕй алкӕддӕр бӕрӕг уӕд, Йегови зӕрдӕвӕрдтӕбӕл ке ӕууӕндӕн, е!