1. Why nao iumi shud tinghae long faith wea iumi garem?

FAITH hem spesol samting bat hem no samting wea evriwan garem. (2 Thess. 3:2) Jehovah helpem olketa wea worshipim hem for garem faith. (Rome 12:3; Gal. 5:22) Iumi barava thankiu long Jehovah bikos hem helpem iumi for garem faith!

2, 3. (a) Wanem gud samting nao iumi savve kasem sapos iumi garem faith? (b) Wanem nao olketa kwestin wea bae iumi storyim long disfala study?

² Jehovah givim kam Son bilong hem mekem evriwan wea garem faith long Jesus, God savve forgivim sin bilong olketa. Diswan mekem pipol fit for fren witim Jehovah and olketa fit for kasem laef olowe. (John 6:44, 65; Rome 6:23) Jehovah kaen tumas long iumi! Nomata iumi born sin and fit for dae, Jehovah luksavve iumi fit for duim olketa gudfala samting. (Ps. 103:10) Hem helpem iumi for savve long gud nius abaotem Jesus and sakrifaes bilong hem. Long datfala taem nao iumi start for showimaot faith long Jesus, followim example bilong hem, and  iumi garem hope for laef olowe!—Readim 1 John 4:9, 10.

³ Bat wanem nao faith? Sapos iumi savve long olketa samting wea God duim finis for iumi and olketa samting wea bae hem duim long future, waswe, datwan minim iumi garem faith? Bae iumi storyim wanem moa iumi mas duim for showimaot iumi garem faith.

4. Taem iumi garem faith, wanem nao bae iumi laek for duim?

⁴ Taem iumi garem faith long Jehovah and Jesus, datwan no minim iumi savve nomoa long olketa samting wea tufala duim finis, and olketa samting wea bae tufala duim long future. Bat taem iumi garem faith, bae iumi barava laek obeyim tu wanem tufala laekem iumi for duim. And iumi laekem tumas for helpem olketa narawan for savve long tufala. Aposol Paul sei: “Datfala ‘message wea stap long mouth bilong iu’ hem sei Jesus nao Lord. Sapos iu talemaot datfala message and showimaot iu barava bilivim God mekem hem laef bak, bae iu sev. For man hem raeteous, hem mas showimaot faith long heart bilong hem, and for hem sev, hem mas iusim mouth bilong hem for talemaot datfala message.”—Rome 10:9, 10; 2 Cor. 4:13.

5. Why nao hem important for garem faith, and hao nao iumi savve strongim faith bilong iumi? Storyim example.

⁵ For iumi kasem laef olowe long niu world, iumi mas garem faith and iumi mas gohed strongim faith bilong iumi. Faith hem olsem wanfala plant. For wanfala plant hem grow gud iumi mas gohed for watarem. Bat sapos iumi no watarem gud, bae gogo hem dae. Long sem wei tu, iumi mas waka hard for mekem faith bilong iumi “kamap strong.”—2 Thess. 1:3; Titus 2:2; Luke 22:32; Heb. 3:12.

6. Wanem nao mining bilong faith?

⁶ Bible story abaotem mining bilong faith long Hebrew 11:1. (Readim.) First samting, man wea garem faith hem “sure samting wea hem hope long hem bae kamap tru.” Samfala samting wea iumi hope for kasem hem olketa samting wea God promis for duim long future. Olsem example, iumi barava sure olketa nogud samting bae finis and wanfala niu world bae kamap. Mek-tu samting, man wea garem faith hem garem “kliafala pruv wea showimaot samting wea [hem] hope long hem, hem tru, nomata hem no savve lukim datwan.” Iumi savve Jehovah God, Jesus Christ, olketa angel, and Kingdom olketa stap nomata iumi no lukim olketa. (Heb. 11:3) Wanem nao iumi savve duim for showimaot iumi garem faith long olketa promis bilong God and olketa samting wea iumi no savve lukim? Iumi showimaot datwan long wanem iumi talem and duim.

7. Wanem nao iumi lanem from example bilong Noah wea showimaot faith? (Lukim piksa long start bilong study.)

⁷ Wanem nao iumi lanem from example bilong Noah wea showimaot faith? Aposol Paul sei “from Noah garem faith, hem showimaot hem fraet long God taem hem wakem wanfala ark for sevem famili bilong hem. Hem duim diswan bihaen God warnim hem abaotem samting wea hem no lukim yet.” (Heb. 11:7) From Noah bilivim wanem Jehovah talem, hem buildim datfala maeti ark. Maet pipol wea stap raonem hem askem hem why hem buildim datfala ark. Iumi savve Noah hem talem olketa why hem duim datwan from Bible sei Noah hem “preach abaotem samting wea raeteous.”  (2 Pet. 2:5) Noah sei God bae distroem pipol wea duim nogud samting. Maet wanem hem talem long pipol hem sem samting wea Jehovah talem long hem. Jehovah sei: “Mi disaed for finisim evri samting wea laef, bikos pipol long earth raf tumas” and “bae mi mekem wanfala flood for finisim evri samting wea laef long earth. Evri samting long earth bae dae.” Then masbi Noah storyim long pipol wanem olketa mas duim mekem olketa no dae long datfala flood. Maet hem talem long olketa sapos olketa laek for laef olketa mas followim wanem Jehovah talem long hem. Jehovah sei: “Iu mas go insaed long ark.”—Gen. 6:13, 17, 18.

8. Aposol James sei man wea garem faith bae duim wanem samting?

⁸ Aposol James tu story abaotem faith. Maet hem raet abaotem diswan no longtaem bihaen aposol Paul raet abaotem faith long olketa Hebrew Christian. James sei: “Hao nao bae iu showim mi faith bilong iu sapos iu no duim gudfala samting? Mi bae showim iu faith bilong mi taem mi duim gudfala samting.” (Jas. 2:18) James sei man wea garem faith hem no biliv nomoa. Olketa demon bilivim God hem stap, bat olketa no garem faith long Jehovah. Olketa strong for againstim Jehovah. (Jas. 2:19, 20) Bat man wea garem faith,  bae hem duim olketa samting wea mekem God hapi. Hem nao samting wea Abraham duim. James sei: “Bihaen dadi bilong iumi Abraham hem putim son bilong hem Isaac long altar for sakrifaesim hem, God ting long hem olsem hem raeteous bikos long gudfala samting wea hem duim. So iu lukim, faith bilong hem showaot long gudfala samting wea hem duim and samting wea hem duim mekem faith bilong hem barava fit nao.” Then James strongim moa datfala point taem hem sei: “Body wea no garem laef hem dae finis. Long sem wei, faith bilong man wea no duim gudfala samting hem dae tu.”—Jas. 2:21-23, 26.

9, 10. Wanem nao hem minim for showimaot faith long Son?

⁹ Winim 30 year bihaen, John raetem Gospel bilong hem and thrifala leta. John tu savve long mining bilong faith olsem olketa nara man wea raetem Bible. Long olketa buk wea John raetem, staka taem hem iusim Greek word wea iumi savve transleitim olsem “showimaot faith.”

¹⁰ Olsem example, John hem sei: “Man wea showimaot faith long Son hem kasem laef olowe. Man wea no obeyim Son bae no kasem laef, bat God bae kros long hem.” (John 3:36) For showimaot faith long Son hem minim iumi mas obeyim Jesus. Staka taem John hem sei for iumi kasem laef olowe iumi mas showimaot faith long Jesus and Dadi bilong hem.—John 3:16; 6:29, 40; 11:25, 26; 14:1, 12.

11. Wanem nao iumi savve duim for showimaot iumi tinghae long Jehovah bikos iumi savve long truth?

¹¹ Jehovah iusim holy spirit bilong hem for helpem iumi for minim olketa tru samting abaotem hem and abaotem Son bilong hem, and holy spirit helpem iumi for garem faith long tufala. (Readim Luke 10:21.) Wanem nao iumi savve duim for showimaot iumi tinghae long Jehovah from hem duim staka samting for iumi? Iumi mas evritaem thankiu long hem for wei wea iumi savve fren witim hem. Iumi fit for duim olsem bikos Jehovah sendem kam Jesus, wea “hem nao Leader bilong faith bilong iumi and wea hem mekem faith bilong iumi perfect.” (Heb. 12:2) And iumi mas gohed for strongim faith bilong iumi long wei for prea and for studyim Bible evritaem.—Eph. 6:18; 1 Pet. 2:2.

12. Wanem nao bae iumi duim sapos iumi garem faith?

¹² Olketa samting wea iumi duim shud showimaot iumi garem faith long olketa promis bilong Jehovah. Olsem example, iumi gohed for preach long pipol abaotem Kingdom bilong God and helpem olketa for kamap disaepol bilong Jesus. And tu, iumi gohed for duim “gudfala samting long evriwan taem iumi garem chance for duim olsem, main wan nao olketa wea garem sem biliv.” (Gal. 6:10) And iumi traem best for ‘lusim olketa oldfala wei’ bilong iumi bikos iumi no laek for duim eni samting wea bae spoelem wei wea iumi fren witim Jehovah.—Col. 3:5, 8-10.

13. Why nao hem important for “garem faith long God”?

¹³ Bible hem sei: “Man wea no garem faith no savve mekem God hapi, bikos man wea worshipim God mas biliv hem stap and biliv hem bae givim gud samting long olketa wea barava lukaotem hem.” (Heb. 11:6) Wanfala “main teaching” long Bible nao hem for olketa tru Christian mas “garem faith long God.” (Heb. 6:1) Bat iumi mas garem tu olketa narafala wei mekem iumi savve gohed fren gud witim Jehovah.—Readim 2 Peter 1:5-7; Jude 20, 21.

14, 15. Storyim wei wea Paul comparem faith witim love.

 ¹⁴ Olketa man wea raetem Bible storyim faith staka taem winim eni narafala wei wea iumi mas garem. So waswe, faith nao hem important long olketa narafala wei hia?

¹⁵ Paul comparem faith witim love. Hem sei: “Faith bilong mi hem mekem mi fit for talem maunten for muv go long nara ples. Bat sapos mi no garem love, samting wea mi duim hem iusles nomoa.” (1 Cor. 13:2) Jesus hem sei law wea “important winim olketa nara law insaed datfala Law wea God givim long Moses,” hem nao for lovem God. (Matt. 22:35-40) Sapos iumi garem love, datwan bae helpem iumi for garem olketa gudfala wei wea bae mekem God hapi. Olsem example, Bible sei man wea garem love hem ‘gohed for bilivim’ evri samting wea God talem long Bible.—1 Cor. 13:4, 7.

16, 17. Wanem nao Bible talem abaotem faith and love? Which wan nao hem nambawan, and why nao olsem?

¹⁶ From faith and love barava important, taem olketa man wea raetem Bible story abaotem faith, staka taem olketa savve story abaotem love tu. Paul encouragem olketa Christian for “werem datfala samting for kavarem chest, wea hem nao faith and love.” (1 Thess. 5:8) Peter story olsem abaotem Jesus: “Nomata iufala no lukim hem enitaem, iufala lovem hem. Nomata iufala no lukim hem distaem tu, iufala showimaot faith long hem.” (1 Pet. 1:8) James sei long olketa anointed Christian: “God chusim olketa wea poor long disfala world for rich long faith and for kasem datfala Kingdom wea hem promis for givim long olketa wea lovem hem.” (Jas. 2:5) John sei law bilong God talem for “iumi mas garem faith long nem bilong Son bilong hem, Jesus Christ, and iumi mas lovem iumi evriwan.”—1 John 3:23.

¹⁷ Paul sei tu: “Faith, hope, and love bae no savve finis. Bat long thrifala samting hia, love nao hem nambawan.” (1 Cor. 13:13) Long future, bae iumi no need for garem faith long olketa promis bilong God abaotem niu world bikos olketa promis hia bae kamap tru nao. Bae iumi garem nambawan laef wea Bible story abaotem. Bat bae iumi evritaem lovem God and lovem olketa narawan. Love wea iumi garem for God and for olketa narawan bae hem barava strong go moa.

18, 19. Wanem nao kamaot from wei wea pipol bilong God garem faith distaem, and hu nao fit for kasem praise for datwan?

¹⁸ Pipol bilong Jehovah garem faith long Kingdom bilong God and olketa sapotim datfala Kingdom. And olketa lovem each other tu. Diswan hem bikos holy spirit bilong God nao leadim olketa long laef bilong olketa. (Gal. 5:22, 23) Wanem nao kamaot from datwan? Winim eit million brata and sista raonem world olketa stap long peace and garem wan mind insaed long olketa kongregeson. Tru nao, Jehovah blessim iumi from iumi garem faith and love!

¹⁹ No eniwan moa savve duim datwan. God nomoa helpem pipol bilong hem for garem wan mind olsem. Hem fitim for hem kasem praise. (Isa. 55:13) Iumi thankiu long God from hem helpem iumi for “garem faith” wea datwan nao bae mekem iumi sev. (Eph. 2:8) Jehovah bae gohed helpem staka pipol for garem faith long hem, and gogo earth bae fulap witim pipol wea perfect, raeteous, and wea hapi for praisem Jehovah for olowe!