1. Fa wi leki Kresten musu si bribi?

BRIBI na wan moi fasi di Kresten musu abi. A no ala libisma abi bribi (2 Tes. 3:2). Ma Yehovah gi ibri anbegiman fu en bribi (Rom. 12:3; Gal. 5:22). Ala sma di abi bribi, musu de nanga tangi gi disi.

2, 3. (a) Sortu blesi wan sma kan kisi te a abi bribi? (b) Sortu aksi wi o go luku now?

² Yesus Krestes ben taki: „Nowan sma kan kon na mi, efu a Tata di seni mi kon no e hari en kon” (Yoh. 6:44, 65). Te wi kon bribi na ini Yesus kaba, dan wi kan kisi pardon fu den sondu fu wi. Disi o meki taki wi kan kon de wan mati fu Yehovah fu têgo (Rom. 6:23). San wi du fu kisi a moi blesi disi? A no fu di wi du wan sani, meki wi kisi en. Fu taki en leti, a pai fu ala sondusma na dede (Ps. 103:10). Ma toku Yehovah ben si wan bun na ini wi. Fu di a abi bun-ati, meki a opo wi ati gi a bun nyunsu. Na so wi bigin bribi na ini Yesus èn wi kan abi a howpu fu libi fu têgo.​—Leisi 1 Yohanes 4:9, 10.

 ³ Ma san na bribi? Yu denki taki na te wan sma sabi sortu blesi Gado o gi wi na ini a ten di e kon, dan a abi bribi kaba? Wan moro prenspari aksi na: Fa wi kan sori taki wi abi bribi?

4. Fruklari fu san ede bribi wani taki moro leki fu frustan san Gado o du.

⁴ Bribi no wani taki nomo dati wi e frustan san Gado abi na prakseri. Ma a wani taki moro. Bribi kan gi wan sma a krakti di a abi fanowdu fu du san Gado wani. Te wi e bribi taki Gado kan frulusu sma, wi o wani preiki a bun nyunsu gi trawan. Na apostel Paulus ben taki: „Efu unu e fruteri sma a ’boskopu di de na ini un eigi mofo’ sobun, unu e fruteri taki Yesus na Masra, èn efu unu e bribi na ini un ati taki Gado gi en wan opobaka, dan unu o kisi frulusu. Bika nanga na ati wan sma e bribi èn dati sa meki a tron wan reti-ati sma. Ma nanga a mofo a e fruteri sma taki a e bribi èn dati sa meki taki a o kisi frulusu.”​—Rom. 10:9, 10; 2 Kor. 4:13.

5. Fu san ede bribi prenspari èn san wi kan du fu a no kon swaki? Gi wan eksempre.

⁵ A de krin taki efu wi wani kisi têgo libi na ini a nyun grontapu fu Gado, dan wi musu abi bribi èn wi musu sorgu taki a bribi disi no kon swaki. Wi kan agersi disi nanga wan bromki di abi watra fanowdu. Wan plastiek bromki no abi watra fanowdu. Ma te wi wani taki wan bromki di wi prani e gro moi, dan wi musu gi en watra èn wi musu sorgu en bun. Efu a no e kisi nofo watra, dan a o dede. Na so a de tu nanga a bribi fu wi. Efu wi no e sorgu en bun, dan a o kon swaki èn te fu kaba wi no o abi bribi moro (Luk. 22:32; Hebr. 3:12). Ma efu wi e sorgu a bribi fu wi bun, dan a o tan „gro” èn wi o „abi wan tranga bribi”.​—2 Tes. 1:3; Tit. 2:2.

6. Sortu tu sani Hebrewsma 11:1 e taki fu bribi?

⁶ Na Hebrewsma 11:1 (leisi en) Bijbel e taki san na bribi. (1) Bribi na „te wan sma e fruwakti taki den sani di a e howpu, o kon tru nomonomo”. Den sani di wi „e howpu”, na sani di Gado pramisi taki a o du na ini a ten di e kon. Fu eksempre, a o puru ala ogri di sma e du èn a o tyari wan nyun grontapu kon. (2) Bribi na „a krin buweisi fu sani di de trutru, ma di wi no man si”. Fu eksempre, wi sabi taki Yehovah Gado, Yesus Krestes nanga den engel de trutru èn taki a Kownukondre seti kaba na hemel, aladi wi no man si nowan fu den sani disi (Hebr. 11:3). Fa wi kan sori taki wi abi trutru howpu èn taki wi e bribi den sani di skrifi na ini Gado Wortu, aladi wi no man si den? Wi kan sori disi nanga a fasi fa wi e libi èn nanga den sani di wi e taki noso e du.

7. Fa na eksempre fu Noa e yepi wi fu frustan san bribi wani taki? (Luku a prenki na a bigin fu na artikel.)

⁷ Luku san Hebrewsma 11:7 e taki fu a bribi fu Noa: „A ben e lespeki Gado èn a bow wan ark fu frulusu en osofamiri, baka di Gado warskow en gi sani di a no ben si ete.” Di Noa ben e bow a bigi ark, a sori taki a abi bribi. Wi kan de seiker taki sma ben e aksi en fu san ede a ben e bow so wan bigi sani. Yu denki Noa tapu en mofo noso taki a taigi den fu no bumui? A no du dati kwetikweti! Fu di a ben abi bribi, meki a no ben frede fu preiki gi den èn fu warskow den taki Gado ben o strafu ogrisma. Kande Noa ben e taigi sma omeni leisi san Yehovah  taigi en: „Mi bosroiti fu pori ala libisma, fu di den meki taki grontapu kon lai nanga ogridu. . . . Mi o tyari wan bigi frudu kon na heri grontapu fu pori ala libisani di abi libikrakti. Ala libisani na grontapu o dede.” A musu fu de taki Noa fruteri den sma tu san den musu du fu kisi frulusu. Gado ben taki: „Yu musu go na ini na ark.” Sobun, Noa sori bribi tu fu di a ben de „wan preikiman fu retidu”.​—Gen. 6:13, 17, 18; 2 Petr. 2:5.

8. Fa a disipel Yakobus sori san na trutru bribi?

⁸ Kande Yakobus skrifi a brifi fu en syatu baka di na apostel Paulus skrifi san bribi wani taki. Neleki Paulus, na so Yakobus ben sori tu taki a no sari gi wan Kresten fu taki nomo dati a e bribi, ma a musu du wan sani fu sori a bribi dati. Yakobus e taki: „Sori mi a bribi fu yu sondro fu du wan sani, dan mi o du sani fu sori yu a bribi fu mi” (Yak. 2:18). Yakobus e sori moro fara fu san ede a no sari fu taki nomo dati wi abi bribi. Ogri yeye e bribi tu taki Gado de, ma den sani di den e du no e sori taki den e bribi na ini Yehovah. Na presi fu dati, den e gens Gado fu di den no wani taki a e du san a abi na prakseri (Yak. 2:19, 20). Ma baka  dati Yakobus e taki fu wan man di ben de tra fasi fu di a ben abi trutru bribi. A e taki: „Wi tata Abraham ben tyari en manpikin Isak leki ofrandi na tapu na altari. Baka di a du disi, Gado taki dati a de wan reti-ati sma fu den sani di a du, a no so? Yu e si taki a no bribi nomo a ben abi, ma taki a ben e du sani tu fu sori a bribi fu en. Na den sani di a du, meki taki a ben man sori a bribi fu en dorodoro.” Fu sori moro fara taki a prenspari fu du sani fu sori a bribi fu wi, Yakobus e taki: „Neleki fa a skin dede te wan sma no e bro moro, na so bribi na wan dede sani te wan sma no e du sani fu sori a bribi fu en.”​—Yak. 2:21-23, 26.

9, 10. Fa na apostel Yohanes e yepi wi fu kon frustan o prenspari a de fu abi bribi?

⁹ Moro leki 30 yari baka dati, na apostel Yohanes skrifi na evangelie fu en nanga ete dri brifi. A ben e frustan san den tra Bijbel skrifiman ben e taki fu trutru bribi? Moro leki iniwan tra Bijbel skrifiman, Yohanes e gebroiki a Griki wortu di den e vertaal nanga „bribi”.

¹⁰ Yohanes e taki fu eksempre: „A sma di e bribi na ini a Manpikin, e kisi têgo libi. A sma di no e gi yesi na a Manpikin, no sa kisi libi, ma a bigi atibron fu Gado e tan na en tapu” (Yoh. 3:36). Te wan Kresten abi bribi, dan a musu gi yesi na san Yesus taki. Yesus ben sori o prenspari a de fu abi bribi ala ten. Furu leisi Yohanes skrifi fu den sani disi di Yesus taki.​—Yoh. 3:16; 6:29, 40; 11:25, 26; 14:1, 12.

11. Fa wi kan sori taki wi abi warderi gi den tru tori di Gado leri wi?

¹¹ Wi breiti taki Yehovah gebroiki en santa yeye fu sori wi den tru tori fu Bijbel èn fu yepi wi fu bribi na ini a bun nyunsu! (Leisi Lukas 10:21.) Wi musu taki Yehovah tangi ala ten taki a hari wi kon na en nanga yepi fu en Manpikin, „a Moro Prenspari Fesiman fu wi bribi èn a sma di meki a bribi fu wi kon bun dorodoro” (Hebr. 12:2). Wi kan sori warderi gi a bun-ati fu Gado, te wi e tan begi en èn e studeri a Wortu fu en fu tranga a bribi fu wi.​—Ef. 6:18; 1 Petr. 2:2.

12. Fa wi kan sori taki wi abi bribi?

¹² Wi musu tan sori bribi na ini den pramisi fu Yehovah. Fa wi kan du disi? We, wi musu preiki a bun nyunsu fu Gado Kownukondre èn wi musu meki sma tron disipel. Boiti dati, wi musu tan „du bun gi ala sma, ma spesrutu gi den wan di abi a srefi bribi leki wi” (Gal. 6:10). Wi musu meki muiti tu fu ’kenki a fasi fa wi ben de fosi èn tapu nanga den sani di wi ben e du’. Na so fasi wi no o meki nowan sani swaki a bribi fu wi.​—Kol. 3:5, 8-10.

13. (a) O prenspari a de fu sori „bribi na ini Gado”? (b) Nanga san Bijbel e agersi bribi èn fu san ede?

¹³ Bijbel e taki: „Sondro bribi wan sma no kan prisiri Gado, fu di a sma di e anbegi Gado musu bribi taki a de trutru èn taki a e pai den wan di e suku en fayafaya” (Hebr. 11:6). Bijbel e sori tu taki „bribi na ini Gado”, na wan fu den fosi sani di tru Kresten musu kon abi èn a e agersi bribi nanga wan fondamenti fu wan oso (Hebr. 6:1). Te a fondamenti disi seti kaba, sobun te wi kon abi bribi, dan wi musu meki muiti fu kon abi tra moi fasi tu. ’Te wi e du dati, dan Gado o tan lobi wi.’​—Leisi 2 Petrus 1:5-7; Yud. 20, 21.

14, 15. Aladi a prenspari fu abi bribi, fu san ede a moro prenspari fu abi lobi?

 ¹⁴ Den skrifiman fu den Kresten Griki Buku fu Bijbel sori o prenspari a de fu abi bribi èn dati meki den taki hondrohondro leisi fu a fasi disi. Fu nowan tra fasi den taki so furu leki bribi. Ma disi wani taki dati bribi na a moro prenspari fasi di wan Kresten musu abi?

¹⁵ Te Paulus e agersi bribi nanga lobi, a e taki: „Awinsi mi abi so wan tranga bribi taki mi man opo bergi poti na wan tra presi, ma mi no abi lobi, dan toku mi no de noti” (1 Kor. 13:2). Di wan man ben aksi Yesus san na a moro bigi komando na ini a Wet, dan Yesus sori en o prenspari a de fu lobi Gado (Mat. 22:35-40) Lobi e yepi wi fu sori bribi nanga den tra fasi di Kresten musu abi. Bijbel e taki dati ’lobi e bribi ala sani’. A e bribi ala sani di skrifi na ini Gado wortu.​—1 Kor. 13:4, 7.

16, 17. (a) Te Bijbel skrifiman e taki fu bribi, dan sortu fasi den e kari tu? (b) Sortuwan fu den fasi disi moro prenspari èn fu san ede?

¹⁶ Fu di bribi nanga lobi prenspari, meki furu leisi te den Bijbel skrifiman e taki fu bribi, den e kari lobi tu. Luku den eksempre disi. Paulus ben gi den Kresten brada fu en deki-ati fu ’meki bribi nanga lobi de leki wan sani di den e weri fu kibri a borsu fu den’ (1 Tes. 5:8). Petrus ben skrifi: „Noiti unu no si Krestes, ma toku unu lobi en. Unu no e si en nownow, ma toku unu e bribi na ini en” (1 Petr. 1:8). Yakobus ben aksi den salfu brada fu en: „Gado ben teki den wan di den sma fu a grontapu disi e si leki pôti sma, dan a meki den tron sma di gudu fu di den abi bribi èn a meki den tron sma tu di o kisi a kownukondre di a pramisi den wan di lobi en, a no so?” (Yak. 2:5) Yohanes ben skrifi: „Gado ben taigi wi taki wi musu bribi na ini a nen fu en Manpikin Yesus Krestes èn taki wi musu lobi makandra.”​—1 Yoh. 3:23.

¹⁷ Aladi bribi prenspari, toku wan ten o kon taki a no o de fanowdu moro. Fu san ede? Fu di ala den pramisi fu Gado di wi e howpu na tapu, o kon tru na ini a ten di e kon. Ma ala ten wi o abi fu tan sori lobi gi Gado èn gi tra sma. Dati meki Paulus ben skrifi: „Den dri sani disi o tan: bribi, howpu, nanga lobi. Ma a moro prenspariwan fu den na lobi.”​—1 Kor. 13:13.

18, 19. Sortu moi sani e pasa fu di wi e sori bribi na ini a ten disi èn suma musu kisi a grani fu dati?

¹⁸ Yehovah en pipel na ini a ten disi, sori bribi na ini Gado Kownukondre. Disi meki taki na heri grontapu den e libi leki wán famiri fu moro leki aiti milyun brada nanga sisa. Den alamala e sori den fasi fu Gado yeye (Gal. 5:22, 23). Iya, disi na a moro moi sani di e pasa te tru Kresten e sori bribi nanga lobi.

¹⁹ Nowan libisma man du a sani disi nanga en eigi krakti. Na a Gado fu wi nomo man kisi a grani. Sobun, „Yehovah e kisi biginen” fu ala ten (Yes. 55:13). Iya, wi breiti taki Gado seti sani gi wi so taki wi kan ’kisi frulusu fu di wi abi bribi’ (Ef. 2:8). Yehovah o tan yepi moro nanga moro sma fu kon dini en teleki heri grontapu furu nanga reti-ati libisma di no abi sondu èn di de koloku. Dan fu ala ten den alamala o prèise a nen fu Yehovah. Sobun, meki wi tan sori bribi na ini den pramisi fu Yehovah!