1. Kufanele sikutsatse njani kukholwa kwebuKhristu?

KUKHOLWA kwebuKhristu kubuntfu lobuhle kakhulu. Akusibo bonkhe bantfu labanekukholwa. (2 Thes. 3:2) Nanobe kunjalo, Jehova unike tonkhe tinceku takhe “kukholwa.” (Rom. 12:3; Gal. 5:22) Bonkhe labatfole lesipho kufanele bakhombise kubonga ngaso.

2, 3. (a) Ngutiphi tibusiso lesingatitfola nangabe sinekukholwa? (b) Ngumiphi imibuto lesitawucoca ngayo kulesihloko?

² Jesu Khristu watsi Babe wakhe losezulwini wenta bantfu basondzele kuye asebentisa iNdvodzana yaKhe. (Joh. 6:44, 65) Kukholwa kuJesu kwenta umuntfu akhone kucolelwa tono takhe. Loku kuvula ematfuba ekutsi sijabulele nebuhlobo lobungapheli naJehova. (Rom. 6:23) Kukhona yini lesikwentile lokusenta sifanelwe ngulesibusiso lesimangalisako? Njengobe sibantfu labanesono, sifanelwe kufa. (Hla. 103:10) Nanobe kunjalo, kukhona lokuhle Jehova lakubona kitsi. Ngenca yemusa wakhe, Jehova usente satemukela tindzaba letimnandzi. Loku kusente sacala kukhombisa  kukholwa kuJesu sinelitsemba lekuphila phakadze.​—Fundza 1 Johane 4:9, 10.

³ Kusho kutsini kukholwa? Kusho kutati ngenhloko yini tibusiso Nkulunkulu lasibekele tona? Ngetulu kwaloko, ngutiphi tindlela lokufanele sikhombise ngato kutsi sinekukholwa?

4. Chaza kutsi kungani kukholwa kusho lokungetulu nje kwesimo sengcondvo.

⁴ Kukholwa kusho lokungetulu nje kwekuyicondza injongo yaNkulunkulu. Ngemandla lashukumisela umuntfu kutsi aphile ngekuvumelana nentsandvo yaNkulunkulu. Umuntfu lonekukholwa endleleni yaNkulunkulu yekusindzisa ushukumiseleka kutsi atjele nalabanye tindzaba letimnandzi. Umphostoli Pawula wachaza watsi: “Nawulimemetela kubantfu ‘lelivi lelisemlonyeni wakho,’ lekutsi Jesu uyiNkhosi, futsi ukholwa enhlitiyweni kutsi Nkulunkulu wamvusa ekufeni, utawusindziswa. Ngobe ngenhlitiyo umuntfu ubonisa kukholwa bese kutsiwa ulungile, kodvwa ngemlomo umuntfu uvuma embikwebantfu bese uyasindziswa.”​—Rom. 10:9, 10; 2 Khor. 4:13.

5. Kungani kukholwa kubalulekile, futsi singakugcina njani kucinile? Niketa sibonelo.

⁵ Kuliciniso kutsi kuze sitfole kuphila lokuphakadze emhlabeni lomusha waNkulunkulu kufanele sibe nekukholwa lokucinile. Kute kukholwa kwetfu kucine, singakufananisa nesihlahla lesidzinga kuniselwa kuze sichubeke siphila. Ngekungafani nesihlahla lesakhiwe ngumuntfu, sihlahla lesiphilako siyashintjashintja. Sihlahla lesiphilako singabuna nangabe singawatfoli emanti nobe sikhule kahle nangabe siwatfola njalo emanti. Nangabe singawatfoli emanti lenele, sihlahla lebesisolo sikhula kahle singagcina sesifile. Kusimo lesifanako nangekukholwa kwetfu. Nako kungabuna kuphindze kufe nangabe kunganakwa. (Luk. 22:32; Heb. 3:12) Nangabe sikunakekela kukholwa kwetfu, kutawuchubeka “kukhula” futsi ‘sitawuphila ekukholweni.’​—2 Thes. 1:3; Thit. 2:2.

6. Ngutiphi tindlela letimbili tekukholwa letichazwe kuHebheru 11:1?

⁶ Inchazelo yekukholwa leseBhayibhelini itfolakala kuHebheru 11:1. (Fundza.) Kukholwa kusho tintfo letimbili lesingakhoni kutibona ngemehlo etfu: (1) “Tintfo letetsenjwako”​—loku kufaka ekhatsi tetsembiso letitawugcwaliseka esikhatsini lesitako njengekucedvwa kwebubi emhlabeni kanye nekufika kwemhlaba lomusha. (2) “Tintfo letikhona mbamba letingakabonwa.” KuloMbhalo, ligama lesiGriki lelisetjentisiwe lelihunyushwe ngekutsi “bufakazi bekuciniseka” lisho tintfo letingabonakali lesetsembako kutsi tikhona, njengekutsi ukhona Jehova Nkulunkulu, Jesu Khristu, tingilosi kanye neMbuso wasezulwini. (Heb. 11:3) Singatjengisa njani kutsi kukholwa kwetfu kuyaphila futsi siyatetsemba tintfo lesingakatiboni leto Nkulunkulu lakhuluma ngato eVini lakhe? Singakukhombisa ngemavi nangetento tetfu, lokutintfo letibalulekile, ngobe ngaphandle kwato kukholwa kwetfu kufile.

7. Sibonelo saNowa sisisita njani kuze sicondze kutsi kusho kutsini kuba nekukholwa? (Buka sitfombe lesisekucaleni kwalesihloko.)

⁷ Hebheru 11:7 ukhuluma ngesibonelo sekukholwa kwaNowa lowatsi “ngemuva kwekutfola secwayiso lesivela kuNkulunkulu ngetintfo lebetisengakenteki, wabonisa kumesaba, wakha umkhumbi kuze asindzise umndeni wakhe.” Nowa wakhombisa kukholwa kwakhe ngekwakha umkhumbi lomkhulu. Asingabati kutsi bomakhelwane bakhe bebambuta kutsi kungani akha lobhazabhaza wemkhumbi. Nowa wabindza wangabaphendvuli yini nobe wabatjela kutsi abanake  tindzaba tabo? Cha! Kukholwa kwakhe kwamshukumisela kutsi ashumayele ngesibindzi futsi acwayise bantfu lebebaphila ngesikhatsi sakhe ngesahlulelo saNkulunkulu lebesitawufika. Kungenteka Nowa watjela labantfu emavi lafanako nalawo Jehova lawakhuluma kuye nakatsi: “Sengincume kutsi ngibacedze bonkhe bantfu; ngobe umhlaba ugcwele budlova ngenca yabo . . . Ngitawuletsa zamcolo emhlabeni, utawufika abulale yonkhe inyama lenemoya wekuphila, lengaphansi kwelizulu. Konkhe lokusemhlabeni kutawubhubha.” Nowa wabachazela nendlela labangasindza ngayo ngekutsi aphindze umyalo waNkulunkulu lotsi: “Ngena emkhunjini.” Ngekwenta njalo, Nowa wakhombisa kukholwa kwakhe ngekutsi abe “ngumshumayeli wekulunga.”​—Gen. 6:13, 17, 18; 2 Phet. 2:5.

8. Umfundzi Jakobe waphefumulelwa kutsi achaze ini mayelana nekukholwa sibili?

⁸ Incwadzi yaJakobe kungenteka yabhalwa ngemuva kwekuba umphostoli Pawula abhale inchazelo lephefumulelwe yekutsi kusho kutsini kukholwa. NjengaPawula, Jakobe wachaza kutsi kukholwa sibili kwebuKhristu akusho nje kukholelwa lokutsite, kepha kufaka ekhatsi tento. Wabhala watsi: “Ngikhombise kukholwa kwakho ngaphandle kwemisebenti, mine ngitakukhombisa kukholwa kwami ngemisebenti.” (Jak. 2:18) Jakobe wachubeka wakhombisa umehluko  wekumane nje ukholelwe kulokutsitse kanye nekukukhombisa ngemisebenti. Emadimoni ayakholwa kutsi Nkulunkulu ukhona, kodvwa ete kukholwa sibili. Imisebenti yawo lete kukholwa iphambene nekugcwaliseka kwenjongo yaNkulunkulu. (Jak. 2:19, 20) Kodvwa Jakobe akhuluma ngalenye indvodza yasendvulo lebeyinekukholwa, watsi: “Akuzange yini kutsiwe Abrahama longubabe wetfu ulungile ngemisebenti, ngemuva kwekutsi anikele nga-Isaka indvodzana yakhe elatini? Uyabona-ke kutsi kukholwa kwakhe kwahambisana nemisebenti futsi kwapheleliswa ngayo.” Kute agcizelele kutsi kukholwa kufanele kuboniswe ngemisebenti, Jakobe wachubeka watsi: “Njengobe umtimba ufile nawute umoya, ngalokufananako nekukholwa nakute imisebenti kufile.”​—Jak. 2:21-23, 26.

9, 10. Nguyiphi indlela umphostoli Johane lasisita ngayo kuze sicondze kubaluleka kwekukhombisa kukholwa?

⁹ Ngemuva kweminyaka lengetulu kwalengu-30, umphostoli Johane wabhala liVangeli lakhe kanye naletinye tincwadzi letintsatfu. Wayijabulela yini lenchazelo lejulile yekukholwa sibili kwebuKhristu labanye babhali beliBhayibheli labakhuluma ngayo? Johane wasebentisa ligama lesiGriki ngalesinye sikhatsi lelihunyushwa ngekutsi ‘kukholwa.’

¹⁰ Nasi sibonelo: Johane wachaza watsi: “Lokholwa yiNdvodzana utawutfola kuphila lokuphakadze; longayilaleli iNdvodzana ngeke akutfole kuphila, kodvwa lulaka lwaNkulunkulu lusetikwakhe.” (Joh. 3:​36) Kukholwa kwebuKhristu kufaka ekhatsi kulalela imiyalo yaJesu. Etikhatsini letinyenti, Johane abecaphuna emavi aJesu labonisa kutsi kukholwa kusento lesichubekako.​—Joh. 3:16; 6:29, 40; 11:25, 26; 14:1, 12.

11. Singakukhombisa njani kubonga kutsi sesiyalati liciniso?

¹¹ Kufanele simbonge Jehova ngekusebentisa umoya wakhe longcwele kute asembulele emaciniso futsi asisite sikhone kukhombisa kukholwa ngetindzaba letimnandzi. (Fundza Lukha 10:21.) Akukafanele sikhohlwe kumbonga Jehova ngekusidvonsela kuye ngeNdvodzana yakhe, “lenguMmeleli Loyinhloko neMphelelisi wekukholwa kwetfu.” (Heb. 12:2) Kute sikhombise kutsi siyabonga ngalomusa wakhe, kufanele sichubeke sicinisa kukholwa kwetfu ngemthantazo nangekutadisha liVi laNkulunkulu.​—Ef. 6:18; 1 Phet. 2:2.

12. Singakukhombisa njani kukholwa kwetfu?

¹² Kufanele sichubeke sikhombisa kukholwa etetsembisweni taJehova. Loko kufanele sikwente ngetindlela leticacile kulabanye. Nasi sibonelo: Kufanele sichubeke sishumayela ngeMbuso waNkulunkulu futsi sente labanye babe bafundzi. Singaphindze “sente lokuhle kubo bonkhe, ikakhulukati kulabo labahlobene natsi ekukholweni.” (Gal. 6:10) Sisebenta kamatima kute ‘sikhumule buntfu lobudzala kanye nemikhuba yabo,’ kute singayeketsisi etintfweni letiphatselene naNkulunkulu.​—Khol. 3:5, 8-10.

13. Kubaluleke kangakanani “kukholwa kuNkulunkuluʼʼ futsi leni?

¹³ LiBhayibheli litsi: “Ngaphandle kwekukholwa ngeke kwenteke kutsi umuntfu amjabulise Nkulunkulu, ngobe loyo loya kuye kufanele akholwe kutsi ukhona nekutsi ubanika umvuzo labo labamfuna ngekutimisela.” (Heb. 11:6) LiVi laNkulunkulu lichaza “kukholwa kuNkulunkulu” njengencenye ‘lesisekelo’ ledzingekako kunobe ngabe ngubani lofuna kuba ngumKhristu sibili. (Heb. 6:1) Kuleso sisekelo, emaKhristu kufanele “engete buhle ekukholweni [kwawo]” lokungulobunye buntfu lobumcoka “kuze [atigcine] elutsandvweni lwaNkulunkulu.”​—Fundza 2 Phetro 1:5-7; Juda 20, 21.

14, 15. Kungani kuba nelutsandvo kubalulekile kunekumane nje sibe nekukholwa?

 ¹⁴ EmaKristu labhala liBhayibheli agcizelela kubaluleka kwekukholwa ngekutsi abhekisele kuko tikhatsi letinyenti. Kute lobunye buntfu bebuKhristu lokukhulunywa ngabo tikhatsi letinyenti kangaka. Loku kusho kutsi kukholwa ngubona buntfu bebuKhristu lobubalulekile yini?

¹⁵ Pawula wacatsanisa kukholwa nelutsandvo ngekutsi abhale atsi: Nangabe “nginako konkhe kukholwa kangangekutsi ngingasiphula tintsaba, kodvwa ngibe ngite lutsandvo, ngisuke ngingasilutfo.” (1 Khor. 13:2) Jesu wagcizelela kubaluleka kwelutsandvo ngaNkulunkulu nakaphendvula lombuto lotsi: “Ngumuphi umtsetfo lomkhulu eMtsetfweni waMosi?” (Mat. 22:35-40) Lutsandvo lubuntfu lobubalulekile bebuKhristu, lobufaka ekhatsi kukholwa. LiBhayibheli litsi: “Lutsandvo lukholwa ngito tonkhe tintfo.” Lunekukholwa etintfweni Nkulunkulu latishilo eVini lakhe leliliciniso.​—1 Khor. 13:4, 7.

16, 17. Kukholwa nelutsandvo kuvela kanye kanye njani eBhayibhelini, kepha ngubuphi buntfu lobubaluleke kakhulu kunalobunye futsi leni?

¹⁶ Ngesizatfu sekutsi lutsandvo kanye nekukholwa kubalulekile, emaKhristu labhala liBhayibheli akhuluma ngako tikhatsi letinyenti, futsi lamagama avame kuvela kanyakanye, ikakhulukati emishweni. Pawula weluleka emaKhristu labekanye nawo kutsi “afake sivikelo sesifuba lesikukholwa nelutsandvo.” (1 Thes. 5:8) Phetro wabhala watsi: “Nanobe ningakake nambona [Jesu], niyamtsandza. Nanobe ningamboni kwanyalo, niyakholwa kuye.” (1 Phet. 1:8) Jakobe wabuta emaKhristu lagcotjiwe labekanye nawo kutsi: “Nkulunkulu akazange yini akhetse labo labaphuyile ngekwembono walelive kutsi banjinge ekukholweni baphindze babe tindlalifa teMbuso lawetsembisa labo labamtsandzako?” (Jak. 2:5) Johane wabhala watsi: “Ngulona-ke umyalo [waNkulunkulu], kutsi sibe nekukholwa egameni leNdvodzana yakhe Jesu Khristu siphindze sitsandzane.”​—1 Joh. 3:23.

¹⁷ Nanobe kukholwa kubalulekile, bumcoka balobuntfu butawuphela nasibona kugcwaliseka kwetetsembiso taNkulunkulu futsi sesiphila phakadze. Kepha sidzingo sekutsi sikhule elutsandvweni ngaNkulunkulu nangabomakhelwane betfu angeke siphele. Kungako Pawula abhala watsi: “Kodvwa nyalo kusele lokutsatfu: Kukholwa, litsemba, nelutsandvo; kepha lokukhulu kuko konkhe lutsandvo.”​—1 Khor. 13:13.

18, 19. Ngusiphi sibonelo lesikhulu sekukholwa lesisibonako lamuhla futsi ngubani lokufanele advunyiswe ngaloko?

¹⁸ Lamuhla tinceku taJehova tikhombisa kukholwa kwato ngaphansi kweMbuso waNkulunkulu. Umphumela waloko kube kwandza kwekuthula kubantfu baNkulunkulu labangetulu kwetigidzi letisiphohlongo emhlabeni wonkhe. Labantfu baphuphuma titselo temoya waNkulunkulu. (Gal. 5:22, 23) Loku kuwachaza kahle emandla ekukholwa kweliciniso kanye nelutsandvo lwebuKhristu.

¹⁹ Kute umuntfu longatidvumisa yena ngaloku. Loku ngumsebenti waNkulunkulu wetfu. Lomsebenti lomuhle uletsa “sikhumbuto sekudvumisa Simakadze, kube sibonakaliso saphakadze, lesingeke sibhujiswe.” (Isa. 55:13) Ecinisweni, “kusipho saNkulunkulu” kutsi “sisindzisiwe ngesizatfu sekukholwa” kwetfu. (Ef. 2:8) Kuthula kwebantfu baNkulunkulu kutawuchubeka kukhula kuze kube ngulapho umhlaba ugcwala bantfu labete sono, labalungile nalabajabulako futsi nalabadvumisa ligama laJehova phakadze. Ngako asichubeke sikhombisa kukholwa kwetfu etetsembisweni taJehova!