1. Tusemeriire kurora tuta okwikiriza okw’Ekikristaayo?

 OKWIKIRIZA okw’Ekikristaayo guli mulingo ogw’omuhendo. Tibali bantu boona abakwine. (2 Bas. 3:2) Baitu, Yahwe ahaire buli muheereza we ‘endengo y’okwikiriza.’ (Bar. 12:3; Bag. 5:22) Abo boona abakwine basemeriire kwoleka okusiima kw’amaani.

2, 3. (a) Omuntu ow’aine okwikiriza n’asobora kutunga migisa ki? (b) Bikaguzo ki ebiturukwija kubazaaho?

² Yesu Kristo akagamba ngu Ise ow’omu iguru acunda abantu kurabira omu Mwana we. (Yohana 6:44, 65) Kutunga okwiriza omuli Yesu, kisobozesa omuntu kuganyirwa ebibi bye. Hanyuma kiha omuntu omugisa ogw’okutunga enkoragana ey’etahwaho na Yahwe. (Bar. 6:23) Kiki ekitwakozere kurora twatunga omugisa ogu ogw’amaani? Nk’abasiisi, ekintu kyonka ekitusemeriire nukwo kufa. (Zab. 103:10) Baitu Yahwe akarora ngu nitusobora kukora ebirungi. Habw’embabazi ze ezitatusemeriire, akakingura emitima yaitu twamanya amakuru amarungi. Nahabweki, tukatandika kwikiririza omuli Yesu nukwo tutunge obwomeezi obutahwaho.​—Soma 1 Yohana 4:9, 10.

³ Baitu okwikiriza nikyo kiki? Nikigarukira ha kumanya emigisa Ruhanga ey’atutekaniriize? Kandi ekirukukira obukuru, miringo ki eitusobora kwolekamu okwikiriza kwaitu?

4. Soborra habwaki okwikiriza kutarukugarukira ha kumanya.

⁴ Okwikiriza tikurukugarukira ha kumanya ekigendererwa kya Ruhanga. Gali maani agaletera omuntu kukorra ha kigendererwa kya Ruhanga. Kwikiririza omu bintu Ruhanga ataireho kutujuna kireterera omuntu kutebeza abandi amakuru amarungi. Omukwenda Paulo akasoborra ati: “Baitu obworaba oyatuire omu kanwa kawe ngu Yesu nuwe Mukama, kandi oraba oikiriize omu mutima gwawe ngu Ruhanga akamuhumbura omu bafu, olijunwa: Baitu omutima nugwo guikirizisa omuntu hali okuhikirra; kandi akanwa niko kamwatuza hali okujunwa.”​—Bar. 10:9, 10; 2 Kol. 4:13.

5. Habwaki okwikiriza kukuru muno, kandi nitusobora tuta kukwikaza kugumire? Bazaaho ekyokurorraho.

⁵ Nikyeyolekera kimu ngu kusobora kwegondeza omu bwomeezi obutahwaho omu nsi empyaka Ruhanga ey’atutekaniriize, tusemeriire kuba n’okwikiriza kandi tukwikaze kugumire. Nitusobora kulengesaniza kwikaza okwikiriza kwaitu kugumire n’omulingo ekimera kyetaagamu amaizi. Kwahukanaho n’ekimera ekikozerwe, ekimera ekyomeezi kiikara nikihinduka. Ekimera ekyomeezi kyoma habw’okuburwa amaizi rundi kiikara nikikura hab’okugatunga buli kaire. Kakuba ekimera kitatunga amaizi agarukumara, nikimalirra kifiire. Nikyo kimu n’okwikiriza kwaitu. Nikwija kuceka kandi kufe kakuba tukunagiriiza. (Luk. 22:32; Baheb. 3:12) Baitu kakuba twikara nitukurolerra kurungi, nikwija kwikaraho kandi kwikale “nukukanya,” kandi nitwija kwikara ‘twomiire omu kuikiriza.’​—2 Bas. 1:3; Tit 2:2.

6. Okwikiriza nikusobororwa omu miringo ki ebiri omu Abaheburaniya 11:1?

⁶ Omulingo Baibuli ebazaaho okwikiriza nigusangwa omu Abaheburaniya 11:1. (Soma.) Okwikiriza kuteeka omutima ha bintu bibiri ebitutasobora kurora: (1) “Ebinihizibwa”​—binu nibitwarramu ebintu ebyaraganiziibwe ngu nibiija kubaho omu busumi bw’omu maiso baitu tibikabaireho nk’okumaraho obubi n’okwija kw’ensi empyaka. (2) “Ebitarukurorwa.” Ha murundi gunu, ekigambo ky’Oruyonaani ekihindurwa “kurukumanyisa” nikimanyisa “obwakaiso oburukugumya” ebintu ebiroho kwo baitu bitarukurorwa nk’okubaho kwa Yahwe Ruhanga, Yesu Kristo, bamalaika hamu n’emirimo ey’erukukorwa Obukama bw’omu iguru. (Baheb. 11:3) Nitukigumya tuta ngu okunihira kwaitu kugumire kandi ngu nitwikiririza omu bintu ebitarukurorwa ebirukubazibwaho omu Kigambo kya Ruhanga? Kurabira omu bigambo byaitu n’ebikorwa byaitu​—habwokuba kakuba tutakwoleka omu mulingo ogu nikuba kutahikiriire.

7. Ekyokurorraho kya Nuha nikitukonyera kita kwetegereza amakuru g’okwikiriza? (Rora ekisisani ekya ha kutandika.)

⁷ Abaheburaniya 11:7 nihabazaaho okwikiriza kwa Nuha ngu, “obuyahabuirwe Ruhanga ebigambo ebikaba bitakabonekere, obuyatinire kurungi, akabaija obwato obwokujuna enjuye.” Nuha akooleka okwikiriza kwe kurabira omu kwombeka eryato erikooto muno. Hataroho kugurukyagurukya, abataahi bakamukaguza habwaki akaba n’ayombeka eryato eri erikooto muno. Nuha akaculeera rundi akabagambira ngu tikirukubakwataho? Tunukwo yakozere! Okwikiriza kwe kukamuletera kubatebeza n’obumanzi n’okubatererra ngu ekiro kya Yahwe eky’omusango nikiija. Nikisobora kuba ngu Nuha akaikara n’agarukamu ebigambo Yahwe wenyini ebiyamugambiire ati: “Empero ya byona ebinyina omubiri ehikire omu maiso gange; baitu ensi iijuire iraro habwabyo . . . Ndireta okusandara kwamaizi ha nsi, okuhwerekereza byona ebinyina omubiri ebirumu orwoya rwobwomezi hansi yiguru; ebintu byona ebiri omu nsi birifa.” Ekindi, hataroho kugurukyagurukya Nuha akasoborra abantu omulingo barakizaamu obwomeezi bwabo obu n’agarukamu ekiragiro kya Ruhanga ati: “Olitaha omu bwato.” Nahabweki, Nuha akeyongera kwoleka okwikiriza kwe kurabira omu kuba “omudumi wokuhikirra.”​—Kub. 6:13, 17, 18; 2 Pet. 2:5.

8. Yakobo akaterekerezebwa omwoyo ogurukwera kusoborra ata okwikiriza okw’Ekikristaayo okw’amananu?

⁸ Ebbaruha ya Yakobo n’esobora kuba yahandiikirwe hanyuma y’obwire buke Paulo ahandiikire n’asoborra okwikiriza. Kusisanaho na Paulo, Yakobo akasoborra ngu okwikiriza okw’Ekikristaayo okw’amanu tikurukugarukira ha kwikiriza ekintu; nikutwarramu ebikorwa. Yakobo akahandiika ati; “Nyoleka okuikiriza kwawe hatali okukora, nanyowe obwokukora kwange ndakwoleka okuikiriza kwange.” (Yak. 2:18) Yakobo agumizaamu kwoleka embaganiza hagati y’okwikirizabwikiriza n’okwoleka okwikiriza omu bikorwa. Badaimoni baikiriza ngu Ruhanga aroho, baitu tibaine okwikiriza kyonyini. Oihireho habw’okutaba n’okwikiriza, ebibakora biba nibihakaniza okuhikirizibwa kw’ebigendererwa bya Ruhanga. (Yak. 2:19, 20) Kwahukanaho, Yakobo abazaaho omusaija ondi owaira ayayolekere okwikiriza. Akaguza ati: “Iburahimu isenkuru itwe ataihibweho omusango obwokukora? Baitu akaherayo isaka omwanawe ha kyoto. Oboine ngu okuikiriza kukakora hamu nokukorakwe, kandi obwokukora okuikiriza kukahikirizibwa.” Hanyuma kusobora kugumya ensonga ngu okwikiriza kusemeriire kwolekwa omu bikorwa, Yakobo ayongera agamba ati: “Baitu nkomubiri hataloho mwoyo okuguba gufire, nukwo nokuikiriza hataloho okukora kuba kufire.”​—Yak. 2:21-23, 26.

9, 10. Omukwenda Yohana n’atukonyera ata kwetegereza omugaso gw’okwoleka okwikiriza?

⁹ Hanyuma y’okurabaho emyaka erukuhingura asatu, omukwenda Yohanna akahandiika Enjiri ye hamu n’ebbaruha isatu. Akasiima habw’amakuru g’okwikiriza okw’Ekikristaayo okw’amananu agaali g’olekerwe abahandiiki ba Baibuli abandi? Yohana akakozesa ekigambo eky’Oruyonaani obwire obumu ekihindurwa “kwoleka okwikiriza omu bikorwa.”

¹⁰ Nk’ekyokurorraho, Yohana akasoborra ati: “Anyakuikiriza Omwana, ayina obwomezi obutahwaho; baitu ataikiriize Mwana talibona bwomezi, baitu ekiniga kya Ruhanga kiikaire haluwe.” (Yoh. 3:36) Okwikiriza okw’Ekikrisaayo kutwarramu kworobera ebiragiro bya Yesu. Yohana yakiraga kujuliza ebigambo bya Yesu abirukwoleka ngu kwoleka okwikiriza kiri kintu ekiikara nikigumizaamu.​—Yoh. 3:16; 6:29, 40; 11:25, 26; 14:1, 12.

11. Nitusobora tuta kwoleka okusiima habw’okumanya amananu?

¹¹ Mali katusemeriire kusiima ngu Yahwe akakozesa omwoyo gwe ogurukwera kutwoleka amananu n’okutuletera kwoleka okwikiriza omu makuru amarungi! (Soma Luka 10:21.) Titusemeriire kuleka kusiima Yahwe habw’okutucunda kutwiriza hali uwe kurabira omu Mwana we anyakuli “omukozi wokuikiriza kwaitu.” (Baheb. 12:2) Kwoleka ngu nitusiima habw’embabazi nk’ezi ezitatusemeriire, tusemeriire kwikara nitugumya okwikiriza kwaitu kurabira omu kusaba n’okwesomesa Ekigambo kya Ruhanga.​—Bef. 6:18; 1 Pet. 2:2.

12. Miringo ki eitusemeriire kwolekamu okwikiriza kwaitu?

¹² Tusemeriire kwikara nitwikiririza omu mirago ya Yahwe. Kinu tusemeriire kukikora omu miringo ey’erukweyoleka hali abandi. Nk’ekyokurorraho, twikale nitutebezaaho Obukama bwa Ruhanga n’okwejumbira omu mulimo ogw’okufoora abantu abegeswa. Ekindi twikale ‘nitukora kurungi abantu bona, kandi nokukira, abo abomunju yokuikiriza.’ (Bag. 6:10) Ekindi, tukole n’amaani ‘okujura omuntu owaira n’engeso ze,’ n’okweriinda ekintu kyona ekisobora kutucekya omu by’omwoyo.​—Bak. 3:5, 8-10.

13. ‘Okwikiriza Ruhanga’ kukuru kwingana nkaha, kulengesaniziibwe na ki kandi habwaki?

¹³ Baibuli egamba ngu; “Hataloho okuikiriza tikisoboka okumusimwa: baitu anyakuija hali Ruhanga, kimuhikiriire okuikiriza ati aloho, kandi ati ahera abo abanyakumuserra.” (Baheb. 11:6.) Ekigambo kya Ruhanga kibazaaho ‘okwikiriza Ruhanga’ nk’ekicweka ky’omusingi omuntu ekyarukwetaaga kufooka n’okwikara ali Mukristaayo. (Baheb. 6:1) Ha musingi ogu, nuho Abakristaayo basemeriire kusigikirra kukurakuraniza emiringo endi emirungi nukwo ‘berindirege omu kugonza kwa Ruhanga.’​—Soma 2 Petero 1:5-7; Yud. 20, 21.

14, 15. Okugonza n’okwikiriza nikiha ekirukukira obukuru?

¹⁴ Abakristaayo abaahandiikire Baibuli bakateeka muno amaani ha bukuru bw’okwikiriza kurabira omu kukubazaaho emirundi nyingi. Busaho mulingo gundi ogw’Ekristaayo ogurukubazibwaho muno nk’okwikiriza. Baitu kinu nikimanyisa ngu okwikiriza nugwo mulingo okurukirayo obukuru?

¹⁵ Paulo obw’akaba n’alengesaniza okwikiriza n’okugonza, akahandiika ati: “Obundaba nyina okuikiriza kwona okuihaho ensozi, kunu ntanyina kugonza, tindi kintu.” (1 Kol. 13:2) Yesu akooleka obukuru bw’omulingo ogw’okugonza Ruhanga obuyagarukiremu ekikaguzo ekirukugamba: “Ekiragiro ekikuru omu biragiro kiraha?” (Mat. 22:35-40) Okugonza kutwarramu emiringo yoona emikuru ey’Ekikristaayo otwaliremu n’okwikiriza. Baibuli egamba ngu “Okugonza . . . nukuikiriza byona.” Kwikiririza omu bintu Ruhanga yagambire omu Kigambo kye eky’amananu.​—1 Kol. 13:4, 7.

16, 17. Okwikiriza n’okugonza nibibazibwaho bita hamu omu byahandiikirwe, baitu nikiha ekirukukira kandi habwaki?

¹⁶ Habwokuba okwikiriza n’okugonza bikuru, Abakristaayo abahandiikire Baibuli bakabazaaho hamu emiringo enu emirundi nyingi omu rukarra nurwo rumu. Paulo akatererra ab’oruganda ‘kujwara ekya ha kifuba eky’okuikiriza eky’okugonza.’ (1 Bas. 5:8) Petero akahandiika ati: “N’obumuraaba mutarukumurora [Yesu], nimumugonza. N’obumuraaba mutarukumurora hati, nimumwikiriza.” (1 Pet. 1:8), “NWT.” Yakobo akakaguza bagenzi be abaseeserweho amagita ati: “Ruhanga atakomemu abanaku abensi okuba abaguda obwokuikiriza? Nabagwetwa abobukama obuyaraganiize abo abanyakumugonza?” (Yak. 2:5) Yohana akahandiika ati: “Kinu nikyo kiragiro kya [Ruhanga]: itwe tuikirize ibara Lyomwanawe Yesu Kristo, kandi tugonzanganege.”​—1 Yoh. 3:23.

¹⁷ N’obukiraaba ngu okuikiriza nikwetaagwa, ebintu ebituletera kuba n’omulingo gunu nibiija kuhwaho obutulirora okuhikirizibwa kw’emirago ya Ruhanga, n’okunihira kwaitu okw’Ekikristaayo obukulihikirizibwa. Baitu obw’etaago bw’okukurakuraniza okugonza hali Ruhanga n’omutaahi tikulihwaho. Enu niyo ensonga habwaki Paulo akahandiika ati: “Kandi hati bunu haikaireho okuikiriza, okunihira, okugonza, nibyo bisatu; baitu ekirukukira hali ebi, kugonza.”​—1 Kol. 13:13.

18, 19. Kintu ki ekirukwoleka okwikiriza kw’amaani ekiturukurora kasumi kanu kandi n’oha asemeriire kukugizibwa?

¹⁸ Kasumi kanu, abantu ba Yahwe baikaire nibooleka okwikiriza omu Bukama bwa Ruhanga obugumiibwe. Kinu kirugirwemu kukurakurana kw’orugonjo orurungi orw’eby’omwoyo orunyakurumu abantu ebarukuhingura obukaikuru munaana. Kiri kiikaro ekijwiremu ekyana ekiretwa omwoyo gwa Ruhanga ogurukwera. (Bag. 5:22, 23) Mali kinu kanikyoleka okwikiriza okw’Ekikristaayo okw’amananu n’okugonza okw’amaani!

¹⁹ Busaho muntu ow’asobora kuhikiriza ekintu kinu. Ruhanga waitu nuwe asoboire kukihikiriza. Omulimo gunu ogurukuhuniiriza guleetiire ibara lya Yahwe kumanywa, n’okuba akokurorraho ak’ebiro byona akatalihwaho. (Is. 55:13) Mali kiri “kisembo kya Ruhanga” itwe ‘junwa kurabira omu kwikiriza.’ (Bef. 2:8) Orugonjo rwaitu orw’eby’omwoyo nirwija kugumizaamu nirukura kandi nirweyongera kusemera kuhikya ensi yoona obw’eriijura abantu abahikiriire, kandi abasemeriirwe abalikugiza ibara lya Yahwe ebiro n’ebiro. Leka twikale nitwikiririza omu mirago ya Yahwe!