1. Paonan-o naton sadang tagdon an aton pagtoo?

AN PAGTOO birilhon gud nga kalidad. Diri ngatanan nga tawo may-ada hito. (2 Tes. 3:2) Pero gintagan ni Jehova an tagsa niya nga magsiringba hin pagtoo. (Roma 12:3; Gal. 5:22) Sadang gud magin mapasalamaton an ngatanan nga may-ada hito.

2, 3. (a) Ano nga mga bendisyon an malalaoman hadton nagpapakita hin pagtoo? (b) Ano nga mga pakiana an aton hihisgotan?

² Hi Jesu-Kristo nagsiring nga iginpapahirani han iya langitnon nga Amay an mga tawo ha Iya pinaagi han Iya Anak. (Juan 6:44, 65) Adton natoo kan Jesus napapasaylo han iya mga sala, ngan tungod hini, mahimo hiya magkaada duok nga relasyon kan Jehova ha waray kataposan. (Roma 6:23) May-ada ba kita ginbuhat basi magin takos hito? Sugad nga mga makasasala, kamatayon la an angay ha aton. (Sal. 103:10) Pero nakita ni Jehova nga may potensyal kita nga magbuhat hin maopay. Tungod han iya diri-matupngan nga pagkabuotan, ginbuligan kita niya nga mahibaro han maopay nga sumat. Salit nagtikang kita pagpakita hin pagtoo kan Jesus ngan nagkaada paglaom  nga mabuhi ha waray kataposan.—Basaha an 1 Juan 4:9, 10.

³ Pero ano gud ba an pagtoo? Nagtutudlok la ba ito ha paghibaro ha mga saad han Dios? Ngan ha ano nga mga paagi maipapakita naton an aton pagtoo?

4. Isaysay kon kay ano nga an pagtoo diri la nag-uupod han hunahuna.

⁴ An pagtoo nag-uupod diri la ha pagkaada kahibaro ha katuyoan han Dios. Usa ito nga makusog nga pwersa nga nagpapagios ha usa nga magbuhat uyon ha kaburut-on han Dios. An pagtoo ha paagi han Dios ha pagtalwas ha katawohan nagpapagios ha tumuroo nga ipasamwak an maopay nga sumat. Hi apostol Pablo nagsiring: “Kon dayag nga ipasamwak mo ito nga ‘pulong ha imo baba’ nga hi Jesus an Ginoo, ngan magpakita ka hin kinasingkasing nga pagtoo nga ginbanhaw hiya han Dios, matatalwas ka. Kay pinaagi han kasingkasing an usa nagpapakita hin pagtoo para ha katadongan, kondi pinaagi han baba an usa dayag nga nagpapahayag para ha katalwasan.”—Roma 10:9, 10; 2 Cor. 4:13.

5. Kay ano nga importante gud an pagtoo, ngan paonan-o naton ito matitipigan nga marig-on? Iilustrar.

⁵ Matin-aw nga an aton paglaom nga mabuhi ha waray kataposan ha bag-o nga kalibotan han Dios nakadepende ha aton pagkaada pagtoo ngan ha pagtipig hito nga marig-on. An pagtipig han pagtoo nga marig-on maipapariho ha pag-ataman ha tanom. Diri pariho ha artipisyal nga tanom, an buhi nga tanom nagbabag-o. Puydi ito malaya kon diri aatamanon, pero padayon ito nga magtutubo kon pirme sasaribohan. Bisan an mahimsog nga tanom hinay-hinay nga mamamatay kon waray igo nga tubig. Sugad liwat hito an mahitatabo ha aton pagtoo; hinay-hinay ito nga mamamatay kon papabay-an. (Luc. 22:32; Heb. 3:12) Pero kon aatamanon naton ito, padayon ito nga ‘magtutubo,’ ngan magigin “mahimsog.”—2 Tes. 1:3; Tito 2:2.

6. Ano an duha nga aspekto han pagtoo nga iginhuhulagway ha Hebreo 11:1?

⁶ Iginhuhulagway han Hebreo 11:1 kon ano an pagtoo. (Basaha.) An pagtoo may duha nga aspekto nga diri naton nakikita: (1) “An ginlalaoman”—mahimo ini mag-upod ha iginsaad nga mga panhitabo nga matutuman ha tidaraon, sugad han pagtapos han ngatanan nga karaotan ngan han tiarabot nga bag-o nga kalibotan. (2) “An gintotoohan bisan kon diri nakikita”—mahimo ini mag-upod ha mga kamatuoran nga diri nakikita, sugad han pag-eksister ni Jehova nga Dios, ni Jesu-Kristo, han mga anghel, ngan han mga ginbubuhat han langitnon nga Ginhadian. (Heb. 11:3) Paonan-o naton mapapamatud-an nga buhi an aton paglaom ngan natoo kita ha mga butang nga diri nakikita nga ginsisiring han Biblia? Pinaagi han aton mga pulong ngan buhat; kon waray ito waray pulos an aton pagtoo.

7. Paonan-o an ehemplo ni Noe nabulig ha aton nga masabtan kon ano an nahiuupod ha pagkaada pagtoo? (Kitaa an retrato ha tinikangan hini nga artikulo.)

⁷ Ginpapabug-atan han Hebreo 11:7 an pagtoo ni Noe nga “katapos hiya pahamangnoan han Dios mahitungod han mga butang nga waray pa makita,” “nagpakita hiya hin kahadlok ha Dios ngan naghimo hin arka basi matalwas an iya panimalay.” Iginpakita ni Noe an iya pagtoo pinaagi ha paghimo han daku hinduro nga arka. Sigurado nga ginpinakianhan hiya han iya mga amyaw kon kay ano nga naghihimo hiya hito nga arka. Humilom la ba hi Noe o ginsidngan niya hira nga diri manginlabot? Waray gud! An iya pagtoo nagpagios ha iya nga maisugon nga magsangyaw ngan magpahamangno ha mga tawo mahitungod ha tiarabot nga paghukom  han Dios. Posible nga iginsumat ni Noe ha mga tawo an ginsiring mismo ha iya ni Jehova: ‘An katapusan han ngatanan nga unud inabut ha akon atubangan kay an tuna puno hin panraugdaug tumikang ha ira. Magpapadara ako hin lunop ha bawbaw han tuna basi poohon an ngatanan nga unud nga may kinabuhi ha ilarum han langit; an ngatanan nga butang nga hahani ha tuna mapatay.’ Sigurado nga iginsaysay liwat ni Noe ha mga tawo kon ano la an paagi basi matalwas; ginsumatan niya hira han sugo han Dios: ‘Sakub ha arka.’ Hini nga paagi, iginpakita liwat ni Noe an iya pagtoo pinaagi ha pagin “parasangyaw han katadongan.”—Gen. 6:13, 17, 18; 2 Ped. 2:5.

8. Ano an iginsaysay ni Santiago may kalabotan ha kahulogan han tinuod nga pagtoo?

⁸ An surat ni Santiago posible nga ginhimo waray pag-iha katapos isurat ni apostol Pablo an mahitungod ha pagtoo. Pariho kan Pablo, iginsaysay ni Santiago nga an tinuod nga pagtoo diri kay basta la pagtoo, nagkikinahanglan ito hin buhat. Hi Santiago nagsiring: “Ipakita ha akon an imo pagtoo nga waray mga buhat, ngan ipapakita ko ha imo an akon pagtoo pinaagi han akon mga buhat.” (San. 2:18) Dugang nga iginpatin-aw ni Santiago an kaibahan han natoo la ngan han nagpapakita hin tinuod nga pagtoo. Hiya nagsiring nga an mga demonyo natoo nga may Dios, pero waray hira tinuod nga pagtoo.  Ngani, nangangalimbasog hira nga pugngan an katumanan han katuyoan han Dios. (San. 2:19, 20) Ha kabaliktaran, gin-unabi ni Santiago an ehemplo han usa nga may pagtoo, hiya nagpakiana: “Diri ba hi Abraham nga aton amay iginpahayag nga matadong pinaagi han mga buhat katapos niya ighalad ha halaran hi Isaac nga iya anak? Maaram ka nga nagkakauyon an iya pagtoo ngan an iya mga buhat, ngan an iya pagtoo nagin perpekto pinaagi han iya mga buhat.” Ngan basi pabug-atan nga an pagtoo kinahanglan ipakita ha mga buhat, hi Santiago nagsiring: “Sugad la nga an lawas nga waray espiritu patay, an pagtoo liwat nga waray mga buhat patay.”—San. 2:21-23, 26.

9, 10. Paonan-o kita ginbubuligan ni apostol Juan nga masabtan nga importante gud nga ipakita naton an aton pagtoo?

⁹ Paglabay hin sobra tulo ka dekada, iginsurat ni apostol Juan an iya Ebanghelyo ngan an iya tulo nga surat. Nasabtan ba niya an pagkaimportante han bug-os nga kahulogan han tinuod nga pagtoo nga iginsaysay han iba pa nga mga parasurat han Biblia? Kon ikukompara ha iba nga mga parasurat, mas damu ka beses nga gin-gamit ni Juan an Griego nga berbo nga usahay iginhuhubad nga “magpakita hin pagtoo.”

¹⁰ Pananglitan, hi Juan nagsiring: “An nagpapakita hin pagtoo ha Anak may kinabuhi nga waray kataposan; an diri nasugot ha Anak diri magkakaada hin kinabuhi, kondi padayon nga kangangalasan hiya han Dios.” (Juan 3:36) An pagtoo han mga Kristiano nag-uupod ha pagsunod ha mga sugo ni Jesus. Hi Juan agsob magkotar han mga pulong ni Jesus nga nagpapabug-at nga an pagpakita hin pagtoo usa nga nagpapadayon nga proseso.—Juan 3:16; 6:29, 40; 11:25, 26; 14:1, 12.

11. Paonan-o naton maipapakita nga mapasalamaton kita nga hinbaroan naton an kamatuoran?

¹¹ Mapasalamaton gud kita nga ginagamit ni Jehova an iya baraan nga espiritu basi hibaroan naton an kamatuoran ngan buligan kita nga maipakita an aton pagtoo ha maopay nga sumat! (Basaha an Lucas 10:21.) Diri gud kita sadang umundang ha pagpasalamat kan Jehova nga iginpahirani kita niya ha iya pinaagi han iya Anak, “an Lider ngan Maghiringpit han aton pagtoo.” (Heb. 12:2) Basi maipakita naton an aton apresasyon ha Iya diri-matupngan nga pagkabuotan, kinahanglan padayon naton nga parig-unon an aton pagtoo pinaagi ha pag-ampo ngan pag-aram ha Pulong han Dios.—Efe. 6:18; 1 Ped. 2:2.

12. Ha ano nga mga paagi maipapakita naton an aton pagtoo?

¹² Kinahanglan naton padayon nga ipakita an aton pagtoo ha mga saad ni Jehova, ngan sadang ito makita han iba. Pananglitan, padayon kita nga nakikigbahin ha pagsangyaw han Ginhadian han Dios ngan ha paghimo hin mga disipulo. Padayon liwat naton nga ginbubuhat kon ano “an maopay ha ngatanan, pero labi na gud ha mga kapariho naton hin pagtoo.” (Gal. 6:10) Ngan nangangalimbasog kita nga ‘hukason an daan nga personalidad pati an mga buhat hito’ ngan ginlilikyan naton an bisan ano nga magpapaluya han aton espirituwalidad.—Col. 3:5, 8-10.

13. Mationan-o kaimportante an “pagtoo ha Dios,” ngan ha ano ito iginpariho, ngan kay ano?

¹³ An Biblia nasiring: “Kon waray pagtoo imposible nga mapalipay gud an Dios, kay an nadaop ha iya kinahanglan tumoo nga buhi hiya ngan hiya an nagbabalos ha mga sinsero nga nag-aalagad ha iya.” (Heb. 11:6) Iginhuhulagway han Biblia an “pagtoo ha Dios” sugad nga bahin han “pundasyon” nga ginkikinahanglan basi an usa magin tinuod nga Kristiano ngan magpabilin ha kamatuoran. (Heb. 6:1) Kinahanglan liwat ‘idugang ha pagtoo’ han mga Kristiano an iba pa nga importante nga mga kalidad  “basi magpabilin [hira] ha gugma han Dios.”—Basaha an 2 Pedro 1:5-7; Jud. 20, 21.

14, 15. Kay ano nga mas importante an pagkaada gugma kay han pagkaada pagtoo?

¹⁴ Ginpabug-atan han mga parasurat han Kristiano Griego nga Kasuratan an pagkaimportante han pagtoo pinaagi ha pag-unabi hito hin ginatos ka beses ha ira mga sinurat. Ito nga kalidad an pinakaagsob unabihon. Nangangahulogan ba ini nga an pagtoo amo an pinakaimportante nga kalidad han mga Kristiano?

¹⁵ Igintanding ni Pablo an pagtoo ngan gugma. Hiya nagsurat: “Bisan kon may marig-on nga pagtoo ako basi makabalhin hin mga bukid, pero waray ako gugma, waray ako pulos.” (1 Cor. 13:2) Ginpabug-atan ni Jesus nga importante gud an gugma ha Dios han ginbaton niya an pakiana nga, “Ano an pinakaimportante nga sugo ha Balaud?” (Mat. 22:35-40) An gugma nag-uupod hin damu nga importante nga kalidad han mga Kristiano, upod na an pagtoo. An Biblia nasiring: “An gugma . . . natuod han ngatanan nga butang.” Salit nabulig ito ha aton nga magkaada pagtoo ha ngatanan nga ginsisiring han Dios ha iya Pulong.—1 Cor. 13:4, 7.

16, 17. Paonan-o ginpapabug-atan han Kasuratan an pagtoo ngan gugma, ngan hain hito an pinakaimportante, ngan kay ano?

¹⁶ Tungod han pagkaimportante han pagtoo ngan gugma, pariho ini ginpapabug-atan hin damu ka beses han mga parasurat han Kristiano Griego nga Kasuratan, ngan kasagaran na nga gin-uunabi ito nga magkaupod. Gin-aghat ni Pablo an mga Kristiano nga ‘isul-ot an kutamaya han pagtoo ngan gugma.’ (1 Tes. 5:8) Hi Pedro nagsurat: “Bisan kon waray pa gud niyo [hi Jesus] makita, hinigugma niyo hiya. Bisan kon diri niyo hiya nakikita yana, nagpapakita kamo hin pagtoo ha iya.” (1 Ped. 1:8) Hi Santiago nagpakiana ha iya igkasi-dinihogan nga kabugtoan: “Diri ba an mga pobre ha paghunahuna han kalibotan amo an ginpili han Dios nga magin riko ha pagtoo ngan manurunod han Ginhadian nga iya iginsaad ha mga nahigugma ha iya?” (San. 2:5) Hi Juan nagsurat: “Ini an [kanan Dios] sugo, nga tumoo kita ha ngaran han iya Anak nga hi Jesu-Kristo ngan higugmaon naton an usa kag usa.”—1 Juan 3:23.

¹⁷ Bisan kon importante an pagtoo, may aspekto hito nga mawawara kon matuman na an mga saad han Dios ngan makarawat na naton an aton ginlalaoman sugad nga mga Kristiano. Pero an gugma ha Dios ngan ha aton igkasi-tawo diri matatapos; ngani, kinahanglan ito padayon nga patuboon. Tungod hini, hi Pablo nagsurat: “Pero yana, an pagtoo, paglaom, ngan gugma magpapadayon. Kondi an pinakaimportante hini nga tulo amo an gugma.”—1 Cor. 13:13.

18, 19. Ano an marig-on nga ebidensya han pagtoo nga aton nakikita yana, ngan hin-o an takos dayawon tungod hito?

¹⁸ Yana, an katawohan ni Jehova nagpapakita gud hin pagtoo ha naestablisar nga Ginhadian han Dios. Tungod hini, nag-uuswag an bug-os-kalibotan nga espirituwal nga paraiso nga napapahimulosan han sobra walo ka milyon nga tawo. Usa ito nga kahimtang diin nakikita gud an bunga han espiritu han Dios. (Gal. 5:22, 23) Marig-on gud ito nga ebidensya han tinuod nga pagtoo ngan gugma han mga Kristiano!

¹⁹ Waray gud tawo nga makakahimo hito kondi an Dios la. Inin urusahon nga buhat naghahatag hin kadayawan ha ngaran ni Jehova, “usa nga tigaman nga dayon nga diri makukuha.” (Isa. 55:13) Oo, ‘regalo han Dios’ nga ‘matalwas kita tungod han pagtoo.’ (Efe. 2:8) An aton espirituwal nga paraiso padayon nga mag-uuswag tubtob nga mapuno an tuna hin perpekto, magtadong, ngan maglipayon nga tawo nga maghahatag hin kadayawan ha ngaran ni Jehova ha waray kataposan. Hinaot padayon nga ipakita naton an aton pagtoo ha mga saad ni Jehova!