«ӘʹВДЕ!» Щара Иса бь wи хәбәри тʹәви кʹӧлфәта хәбәрдьда. Мәсәлә, чахе Иса кʹӧлфәтәк qәнщ кьр, кʹижан кӧ 18 сала qонщьки бу, әwи жерʹа гот: «Әʹвде! Тӧ жь нәхwәшийа хwә аза йи!» (Луqа 13:10-13). Чахе Иса тʹәви дийа хwә хәбәрдьда, әwи һьнге жи әw гьли дьда хәбате. Wәʹде бәре әw гьли гәләк мәʹрифәти бу (Йуһʹн. 19:26; 20:13). Ле һәбу диса хәбәрәк, кӧ һе зедә дьһатә һʹәсабе, нә кӧ тʹәне мәʹрифәти.

Кʹьтеба Пироз һьндава һьнә жьна хәбәрәкә qәнщ у хwәш дьдә хәбате. Иса әw хәбәр готә wе кʹӧлфәте, йа кӧ 12 сала дьчәрчьри чьмки сәр хуне вәбьбу. Пе Qануна Хwәде, әw кʹӧлфәт нәпаqьж дьһатә һʹәсабе, у ләма изьна wе тʹӧнә бу дәсте хwә бьда Иса. У мәрьв дькарьбун бьготана, wәки һʹаләки ӧсада, әwе гәрәке жь мәрьвед дьн башqә буйа (Qан. Кʹаһ. 15:19-27). Ле әw кʹӧлфәт гәләк дьлшкәсти бу, чьмки «әwе гәләки дәсте һʹәкимада кʹьшандьбу у һʹәму һәбука хwә хәрщ кьрьбу, ле тʹӧ чʹарә ле нәбьбу у сәрда һе хьраб бьбу» (Марq. 5:25, 26).

Әw кʹӧлфәт дьзива нав әʹлаләтерʹа дәрбаз бу, пьштева незики Иса бу, у дәсте хwә авитә рʹишийед кʹьнще wи. Һьнге һәма дәрберʹа хун же чʹькийа! У әw кʹӧлфәт фькьри, wәки ида дькарә һәрʹә у тʹӧ кәс wе пенәһʹәсә әwе чь кьр, ле Иса пьрси: «Әw кʹи бу кӧ ль мьн кʹәт?» (Луqа 8:45-47). Әw кʹӧлфәт тьрʹса ләрьзи, һат хwә авитә бәр пʹийе Иса у «һәр тьшт рʹаст гот» (Марq. 5:33).

Иса хwәст wе кʹӧлфәте дьлгәрм кә, сәва әw qәwи бә, у ләма гьлийед ӧса готә wе: «Кәчʹа мьн» (Мәт. 9:22, ИМ). Зандаред Кʹьтеба Пироз дьбежьн, wәки хәбәра Ибрани у Йунани «qиз йан кәчʹ», дькарә бь симболик бе хәбьтандьне чаwа әʹйанкьрьна «qәнщийе у дьлованийе». Иса бәр дьле wеда һат у жерʹа гот: «Баwәрийа тә тӧ qәнщ кьри. Бь хер у сьламәт һәрʹә у жь еша хwә qәнщ бә» (Марq. 5:34).

«Qиза мьн». Wан гьлийа Боwазе дәwләти Рʹутʹа Моwабирʹа гот. Әw жи һʹале нә башда бу, чьмки әwе сәр әʹрде мерәки нәнас щәһе бәрмайи тʹоп дькьр. Ле Боwаз жерʹа гот: «Бьбьһе qиза мьн». У паше әwи Рʹутʹ дьлгәрм кьр wәки әw диса бәрдәwам кә әʹрде wида бәрмайа тʹоп кә. Рʹутʹ жи дәвәрʹуйа чу әʹрде у жь Боwаз пьрси кӧ чьрʹа әw һьндава wе хәрибе, ӧса qәнщ ә. Боwаз щаба пьрса wе да: «Тә чь qәнщи хwәсийа хwәрʹа [жьнәби Наомирʹа] кьрийә, һʹәму кьрьнед тә мьнрʹа гьли кьрьнә. . . . Бьра wәкә кьрьна тә Хӧдан бинә пешийа тә» (Рʹутʹ 2:8-12).

Иса у Боwаз мәсәлед чьqас баш ьн бона рʹуспийа! Щара дӧ рʹуспи дькарьн рʹасти wан кʹӧлфәта бен, кʹижанарʹа ширәта у һеланкьрьна жь Кʹьтеба Пироз лазьм ә. Рʹуспи wе пе Кʹьтеба Пироз wан кʹӧлфәта дьлгәрм кьн у qәwи кьн, һәрге дӧада рʹебәри жь Йaһоwа бьхwазьн у бь дьл щан гӧһ бьдьнә Йaһоwа (Рʹом. 15:4).