LWOLA lumwe Yesu asanyikilenga mapwevo ngwenyi, “Ove pwevo.” Chakutalilaho, omu apwile nakuka pwevo umwe uze azembamine hamyaka 18, Yesu ambile ngwenyi: “Ove pwevo, unasokoka kukuviza chove.” (Luka 13:10-13) Likumbi limwe Yesu asanyikile naye wakumusema mujila kaneyi, mwomwo halwola kana kavachimwenenga nge hikasautuko. (Yowa. 19:26; 20:13) Kwapwile nawa hanjikiso yikwavo yamwaza yize vazachishilenga vatu.

Mbimbiliya yazachisa mazu eka amwaza alikoji hakuvuluka mapwevo vamwe. Yesu azachishile mazu kana omu ahanjikile napwevo uze apwile namusongo wakuhita manyinga hamyaka 12. Ou pwevo ahokwele jishimbi jaKalunga hakupandama kuli Yesu, mwomwo Jishimbi jambile ngwajo mutu avijilenga musongo kana apwile namajilo. Kaha atelele kutwama kwauka wenyi. (Levi 15:19-27) Oloze asakile vamuke. “Ou pwevo ayanjiwile chikuma hakumuka kuli vimbuke vavavulu, kaha nawa amanyishile vikumba vyenyi vyosena, oloze kahindukileko. Musongo wapwile nakuya nakumutekeleka lika.”—Mako 5:25, 26.

Ou pwevo aselukile muvatu, kaha ejile kunyima yaYesu nakukwata kujizombo jauvwalo wenyi wahelu. Hahaze vene aze manyinga alitwaminyine kuhita. Ashinganyekele ngwenyi kaveshi kumutachikizako, oloze Yesu ahulishile ngwenyi: “Iya nangukwate?” (Luka 8:45-47) Ngocho evwile woma nakuputuka kulichikimina, kaha alimbilile hamavu kumeso aYesu “nakumulweza muchano wosena.”—Mako 5:33.

Oloze Yesu amukolezezele ngwenyi: “Ove mwanami, likolezeze.” (Mateu 9:22) Vatu valinangula chikuma Mbimbiliya vamba ngwavo, hanjikiso yachiHepeleu nachiHelase yakwamba ngwavo “ove mwanami” yapwa yalikoji nakukokweza. Yesu amufwelelesele nawa ngwenyi: “Lufwelelo lwove lunakuhindula. Yakonga mukuunda, likangule kumusongo wove waupi.”—Mako 5:34.

Mazu akwamba ngwavo “ove mwanami” akiko azachishile kaIsalele waluheto Mbowaze hakuvuluka Lute uze apwile kaMowave. Lute nayikiye apwile nakwivwa woma nasonyi mwomwo apwile nakuhuhulula mbale muwande wamutu uze katachikijileko. Oloze Mbowaze amulwezele ngwenyi: “Ove mwanami, ivwilila.” Kaha alwezele Lute atwaleho kuhuhulula muwande wenyi. Lute afukamine hamavu kumeso aMbowaze nakumwihula ovyo amusolwelele likoji okunyi apwile wakulifuchi lyeka. Mbowaze amukumbulwile nakumukolezeza cheka ngwenyi: “Vanangulweze mujimbu wavyuma vyosena unalingi kuli nokowenu [tuliwe Nowemi] . . . Yehova akufwete havyuma vyamwaza unalingi.”—Lute 2:8-12.

Yesu naMbowaze vahana chakutalilaho chamwaza vakulwane vavaka-Kulishitu. Lwola lumwe, vakulwane vavali vanahase kutambukila pwevo muka-Kulishitu uze anakusakiwa kumukafwa nakumukolezeza naVisoneka. Hakulomba Yehova avatwaminyine nakwivwilila kanawa vyuma mwavalweza ou ndumbwetu, vakulwane navamukolezeza nakumuvendejeka kuzachisa Mazu aKalunga.—Loma 15:4.