“MUMBANDA.” Mpinji yikwawu, ichi dichadiña nakutenayi Yesu ambanda. Chakutalilahu, hampinji yokileñayi muntu wadiña chifwayi hadi yaaka 18, wahosheli nindi: “Eyi mumbanda, wufwayi weyi wunakusubuki dehi.” (Luka 13:10-13) Yesu wazatishileña iyi nhoshelu hakutena mama yindi, muloña yamwekesheleña kalemesha kumpinji yakunyima. (Yow. 19:26; 20:13) Ilaña kudi izu dikwawu dabadikili kumwekesha kalemesha hohu.

Bayibolu yazatishaña izu damwekeshaña luwi niwushona neyi yinakutena ambanda amakwawu. Yesu wadizatishili hampinji yahosheleñayi namumbanda wapwekeleña mashi hadi yaaka 12. Njila yayililimu kudi Yesu ayikanishili muNshimbi jaNzambi, yahosheleña nawu muntu wadiña chochu wadiña wamajilu. Antu amakwawu ahoshaña nawu wateleleli kushakama kwakankawindi muloña wachikatu chindi. (Lev. 15:19-27) Ilaña wadiña nakudinkaku. “Henohu wamona dehi kukala nayuma yayivulu yanamoniyi kudi ayimbuki amavulu, namanishi dehi yuma yindi yejima to-o, kuditiyaku nihanti nehi, yosweja nikusweja.”—Maku 5:25, 26.

Iwu mumbanda wahitili mwizaza mukuswamujoka, wayili kudi Yesu nakukwata kunzombu yehina dindi. Washikeneni dakuleka kupweka mashi. Iwu mumbanda wamweneña nindi akumumona wanyi, ilaña Yesu wehwili nindi: “Anankunki kudinyi?” (Luka 8:45-47) Chatiyiliyi awa mazu, watiyili woma nawa wazalili nakufukama kudi Yesu ‘nakumuleja nsañu yejima.’—Maku 5:33.

Hakwila nawu yabuli kumutiyisha woma, Yesu wamulejeli munjila yaluwi nindi: ‘Mwanami, bayi wakamaku!’ (Mat. 9:22) Antu adiza chikupu Bayibolu ahoshaña nawu izu dachiHeberu niGiriki dakwila nawu ‘mwana,’ dinateli kumwekesha “luwi niwushona.” Yesu watwalekelihu kuhosha nindi: “Kukuhwelela kweyi kunakukoleshi dehi; yaña nakuwunda, musoñu weyi wukufumi.”—Maku 5:34.

“Mwanami.” Ichi dichamuteneniwu Luti wakuMowabi kudi iyala waheta Bowazi kaIsarela. Iwu mumbanda niyena wadimweneña kubula kulema muloña wadiña nakunonojola bali mwituña damuntu wabulayi kwiluka. Bowazi wamulejeli nindi: ‘Tiyaku, mwanami.’ Wamulejeli Luti kunonojola mumaha indi. Luti wafukamini kudi Bowazi nakumwihula chaletesheli yamutiyili luwi, ñiinza. Bowazi wamwakwilli nindi: “Ananleji dehi to-o mwejima muwuneli namuku weyi [Nyawomi nfwila] . . . Yehova akufweti namudimu weyi.”—Luti 2:8-12.

Aeluda akwaKristu atela kulondela cheliliyi Yesu niBowazi. Mpinji yikwawu, aeluda ayedi anateli kubulakana namuhela mukwaKristu wunakukeñeka wukwashu nikukoleshewa kwamuNsona. Hanyima yakulomba wukwashu waYehova nikutiyilila nakanañachima chinakuhoshayi muhela, aeluda atela kumukolesha nikumukendeja Nezu daNzambi.—Rom. 15:4.