“BII.” Ontan so impanawag nen Jesus ed saray bibii nensaman. Singa bilang, nen pinaabig to so bii ya 18 taon lan abukot, inkuan to: “Bii, nibulos ka lad sakit mo.” (Luc. 13:10-13) Ontan met so impanawag to nen mitotongtong ed ina to, tan ipapasen itan ya marespeto ed saman ya panaon. Balet wala ni sakey ya salita ya mas pakapatnagay panagrespeto.

“Ana’ko.” Inusar na Biblia iyan salita a pakanengnengay aro tan konsiderasyon ed bibii. Inusar itan nen Jesus nen kakatongtongen toy sakey ya bii ya 12 taon lan manpaparala. Nen inmasingger may bii ed si Jesus, akontra toy Ganggan na Dios ya mangibabagan say biin ontan so kondisyon to et marutak tan kaukolan ton arawiay arum lapud sakit to. (Lev. 15:19-27) Pero desperado la. Diad tua, “dakel lay dinalan ton irap ed lima na saray managtambal tan naupot lay amin a kaykayarian to, balet ag-inmabig noagta lalon linmoor.”—Mar. 5:25, 26.

Agnampalikas ya akiseksekan ed saray totoo imay bii, dinmalan ed beneg tan inegnaan toy saloy na kawes nen Jesus. Tinmundan tampol so pampaparala to! Say abaloan to et agnaimano, balet nantepet si Jesus: “Siopay aniwit ed siak?” (Luc. 8:45-47) Kanian ataktakot tan manggiwgiw so bii ya dinmakmomo ed arapan nen Jesus “tan impatua to so amin.”—Mar. 5:33.

Pian onkalma so bii, maaron imbaga nen Jesus: “Manpakpel ka, ana’ko!” (Mat. 9:22) Base ed saray iskolar na Biblia, say Hebreo tan Griegon salita parad “ana’ko” et nauusar pian ipanengneng so “kaabigan tan malasakit.” Pian mas napaseguroan so bii, imbaga nen Jesus: “Pinaabig ka na pananisiam. La ka, niwala komon ed sikay kareenan, tan onabig ka lad makapairap a sakit mo.”—Mar. 5:34.

Ana’ko met so impanawag na mayaman ya Israelitan si Boaz ed Moabitan si Ruth. Napapagaan si Ruth ta mantutudtor na sebada ed daralusan na lakin agto kabat. Balet imbaga nen Boaz: “Dengel mo ak, ana’ko.” Insan to imbagad si Ruth ya mantudtor labat ed daralusan to. Kanian tinmuek si Ruth ed si Boaz tan tinepetan to no akin ya imamalasakit toy sakey ya dayo. Pian lalon napaseguroan, oniay imbaga nen Boaz: “Nadngelan koy amin a ginawam parad katulangan mo [say balo ya si Noemi] . . . Komon ta bendisyonan nen Jehova so gagawaen mo.”—Ruth 2:8-12.

Talagan maong ya alimbawa si Jesus tan Boaz ed saray elder! No maminsan, nepeg ya katongtongen na duaran elder so sakey ya sister a mankaukolan na tulong tan panamaseseg manlapud Biblia. Kayari ran manpikasi parad panangigiya nen Jehova tan ondengel a maong ed ibaga na agi ra, sarag dan paseguroan tan ligliwaen manlapud Salita To.—Roma 15:4.