JESUSQA warmiswan parlashaspa wakin kutis nej: “Warmi”, nispa. Sutʼincharinapaj, 18 watastaña kʼunpullaña purej warmita sanoyachishaspa, nerqa: “Warmi, onqoyniykimanta kacharisqaña kanki”, nispa (Luc. 13:10-13). Jesusqa mamanta parlapashaspa ajinallatataj nerqa, ajinatataj ñaupa tiempopi parlaj kanku (Juan 19:26; 20:13). Jinapis aswan sumaj palabra kaj.

Bibliaqa wakin warmismanta parlaspa, uj sumaj kʼacha palabrata oqharin. Jesustaj chay palabrata oqharerqa, 12 watastaña yawar apaywan onqosqa warmiwan parlashaspa. Chay warmeqa mana allintachu ruwarqa Jesusman qayllaykuspa, imaraykuchus Leyman jina chʼichipaj qhawaspa karqa, manataj waj runasman qayllaykunanchu karqa (Lev. 15:19-27). Jinapis chay warmeqa may llakisqa kasharqa. “Unaytaña ñakʼarerqa jampejkunawan jampichikuspa, tukuy kapuyninta tukuchinankama, manataj imaynapi sanoyakuyta aterqachu; astawanraj chullchusharqa” (Mar. 5:25, 26).

Chay warmeqa mana reparachikuspalla, ashkha runas kasharqanku chayman qayllaykorqa. Jesusmantaj wasa ladonmanta chimpaykorqa, ropanpa kantuntataj llankharerqa. Yawar apaynintaj chay rato chʼakiporqa. Chay warmeqa ni piwan reparachikunanta yuyarqa. Jesustajrí nerqa: “Pitaj llankhaykuwanri?”, nispa (Luc. 8:45-47). Chay warmeqa mancharisqa kasharqa, kharkatisharqataj. Jesuspa “ñawpaqenman qonqoriykukuspataj, imachus paypi ruwakusqanta willarqa” (Mar. 5:33).

Jesusqa payta sonqochananpaj kʼachamanta nerqa: “Sonqochakuy, wawáy”, nispa (Mat. 9:22). Bibliamanta yachaj runas nisqankuman jina, hebreo, griego parlaypi “wawáy” nisqa palabraqa kʼachamanta parlanapaj oqharikoj. Chantá Jesús nillarqataj: “Wawáy, creesqaykirayku salvasqa kanki. Kunanqa sonqo tiyaykusqa ripuy; onqoyniykimanta sanoyasqaña kanki”, nispa (Mar. 5:34).

Qhapaj runa israelita Boozpis, Moab jallpʼamanta Rutwan parlashaspa “wawáy” nillarqataj. Rutqa mancharisqa kasharqa, imaraykuchus mana rejsisqan runaj chajrasninpi chajmakusharqa. Booztaj nerqa: “Uyariway, wawáy”, nispa. Chantá nillarqataj chajrasninpi chajmakunallantapuni. Ruttaj “pampakama kʼumuykuspa, Boozta taporqa: Imaraykutaj noqata khuyakuwanki, [...] forastera kashajtiypis?”, nispa. Boozqa astawan sonqochananpaj nerqa: “Suegraykiwan imatachus ruwasqaykita yachani [...]. Dios pagarapusuchun chay ruwasqaykimanta”, nispa (Rut 2:8-12).

Ancianosqa Jesusmanta, Boozmanta ima mayta yachakunkuman. Wakin kutisqa iskay ancianos uj hermanawan parlarinku Diospa Palabranwan yanapanankupaj, kallpachanankupaj ima. Paykunaqa Diosmanta mañakuspa, hermanaj nisqantataj uyarispa, Bibliawan sonqochayta, kallpachayta ima atenqanku (Rom. 15:4).