“MFATI.” Lena yindlela Jesu lebekayisebentisa nakakhuluma nebantfu besifazane. Nasi sibonelo, ngesikhatsi elapha umfati lobekakhubateke iminyaka lengu-18, asagobene futsi angasakhoni nekuma acondze, Jesu watsi kuye: “Mfati, sewukhululiwe ekuguleni kwakho.” (Luk. 13:10-13) Jesu wayisebentisa lendlela lena yekukhuluma ngisho nangesikhatsi akhuluma namake wakhe. Lendlela yekukhuluma beyivamile ngetikhatsi tekubhalwa kweliBhayibheli futsi bekuyindlela lehloniphekile yekukhuluma. (Joh. 19:26; 20:13) Kodvwa bekunalenye indlela yekukhuluma lebeyihloniphekile.

LiBhayibheli lisebentisa ligama lelinemusa nalikhuluma ngalabanye bafati. Jesu walisebentisa leligama nakakhuluma nalomunye umfati lobesekabe nesifo sekopha iminyaka lengu-12. Indlela lenta ngayo lomfati nakaya kuJesu beyingavumelani neMtsetfo waNkulunkulu, lobewutsi umuntfu losesimeni sakhe ungcolile. Labanye bantfu bangase batsi lomfati bekufanele angasondzeli lapho kunebantfu khona ngenca yesimo sakhe. (Lev. 15:19-27) Kodvwa lomfati bekaludzinga lusito. Empeleni, “abesahambe bodokotela labanyenti, futsi loko bekumcindzetela kakhulu. Abesasebentise konkhe labenako kodvwa angasitakali, kunaloko kugula kwakuya embili.”​—Mak. 5:25, 26.

Lomfati wabhidla sicumbi sebantfu, wafike watsintsa ingubo yaJesu. Lesifo sekopha saphela ngaleso sikhatsi! Bekacabanga kutsi bekatawuvele anyamalale bangakamboni, kodvwa Jesu wabuta watsi: “Ngubani lolongitsintsile?” (Luk. 8:45-47) Nakakuva loku, lomfati weta kuJesu etfukile wafike waguca embikwakhe “wase umtjela lonkhe liciniso.”​—Mak. 5:33.

Kuze Jesu amente akhululeke, watsi kuye: “Mani sibindzi ndvodzakati.” (Mat. 9:22) Labanye bafundzi beliBhayibheli, batsi leligama lelitsi “ndvodzakati” ngesiHebheru nangesiGriki lingasetjentiswa kuze lichaze indlela lenemusa. Jesu wachubeka wamcinisekisa lomfati ngekutsi atsi: “Kukholwa kwakho kukuphilisile. Hamba kahle, ngobe sewuphilile ekuguleni kwakho.”​—Mak. 5:34.

“Ndvodzakati.” Bowazi lobekayindvodza lengum-Israyeli nalenjingile walisebentisa leligama nakakhuluma naRuthe umMowabi. Ruthe naye bekatibukela phansi ngenca yekutsi bekakhwimita ibhali ensimini yendvodza langayati. Bowazi watsi kuye: “Lalela-ke, ndvodzakati yami.” Wase ucela Ruthe kutsi achubeke nekukhwimita emasimini akhe. Ruthe wakhotsamisa buso bakhe embikwaBowazi futsi wambuta kutsi kungani abe nemusa longaka kuye abe awetive. Bowazi wamphendvula watsi: “Sebangitjele konkhe lokwentele unyokotala [Nawomi] . . . Shangatsi Simakadze angakunika umvuzo ngaloku lose ukwentile.”​—Rut. 2:8-12.

Jesu naBowazi batibonelo letinhle letingalingiswa ngemadvodza lamadzala ebandleni! Ngalesinye sikhatsi, emadvodza lamadzala ebandleni kungadzingeka kutsi akhutsate dzadze asebentisa liVi laNkulunkulu. Ngemuva kwekuthantaza kuJehova kanye nekulalelisisa lodzadze njengobe akhuluma, lamadvodza lamadzala angakhona kumniketa sicinisekiso sekutsi Jehova uyamtsandza futsi amdvudvute asebentisa liVi laNkulunkulu.​—Rom. 15:4.