YESU yange una lamen a ior mba ve lu nomso ga yô, ashighe kpishi a er tom a ishember i “kwase” la. Ikyav i tesen yô, shighe u lu wanger kwase ugen u gba iwan, gôvur ngwenee je kuma anyom 18 la, a akaa ér: “Kwase, i war u sha angev ou ve.” (Luka 13:10-13) Shighe u Yesu lu lamen a ngô na la je kpa, er tom a ishember ne. Sha ayange a tsuaa la, ior nengen ishember ne ér ka gbenda u nan kwase icivir. (Yoh. 19:26; 20:13) Kpa ishember igen gema lu, i inja i i hemba di u nan kwase icivir tseegh tsô la.

Ishember i kundu kundu man i tesen mhôônom igen ngi i Bibilo i er tom a mi u ôron kwagh u kasev mbagenev yô. Yesu yange er tom a ishember ne shighe u lu lamen a kwase ugen u haa awambe anyom 12 la. Kwase ne yange per Tindi u Aôndo sha gbenda u za ikyua a Yesu la, sha ci u Tindi la kaa ér kwase u haan awambe er un nahan nan ngu wang ga. Yange gba u ma palegh mbagenev sha ci u mlu na ne. (Lev. 15:19-27) Kpa kwagh ugen lu u una er ga. Jighilii yô, kwase ne “ya ican sha ikyev i mbatwerev imôngo, a vihi akaa a na cii, nahan kpaa lu un kposo ga, lu zan un a za hemen.”—Mar. 5:25, 26.

Tsô kwase ne nyôr ken ikpelaior, kar ken ijime i Yesu, za bende mka ikyondo na ave. Fese nahan imbor i awambe na la maa tôndo! Kwase ne hen ér Yesu una fa ga, kpa Yesu pine ér: “Ka anti nan bende Mo?” (Luka 8:45-47) Tsô kwase u lu cian shi gbidyen ikyarikyase iyol ne va gba sha ishigh ki Yesu, maa “ôr Un kwagh la sha mimi cii.”—Mar. 5:33.

Er Yesu soo ér ishima i gba kwase la shimi yô, a kaa a na kundu kundu ér: “Wankwase, taver ishima.” (Mat. 9:22) Sha kwagh u mbatimen sha akaa a ken Bibilo ve kaa yô, ishember i ken zwa Heberu man i ken zwa Grika i i gem ishember i “wankwase” la, inja i i̱ jighilii yô, ka u eren a kwase “kundu kundu shin tesen nan mhôônom.” Shi Yesu er kwagh ugen sha u seer nan kwase la vangertiôr. A kaa ér: “Jighjigh wou u nan war u ve; yem bem bem, angev ou mbu̱ bee u.”—Mar. 5:34.

Ornyar ugen ken Iserael, u i yilan un ér Boashi la kpa, yange yila Rutu, kwase u ken Mbamoabi la, sha ishember i ‘wankwase’ la. Rutu kpa yange kwagh hemba un sha ci u lu yaren twar u shair ken sule u or u fa un ga yô. Boashi kaa ér: “Ungwa ase, wan wam [u] kwase.” Maa a kaa a Rutu ér a za hemen u yaren twar ken sule na. Tsô Rutu gure, wa ityough inya, pine Boashi er i hii ve un lu shir hen tar na, man a we un ikyo yum yô. Boashi gema ôr kwagh u seer nan Rutu vangertiôr yô. A kaa ér: “I pasem kwagh u u er a ngô u nomou [Naomi kwasecôghol] la wanger wanger . . . Yô, TER A̱ er a we dedoo sha aeren a ou la.”—Rutu 2:8-12.

Yesu man Boashi ve ver mbatamen mba ken tiônnongo ikyav i dedoo kpen kpen! Ashighe agen alaghga mbatamen uhar vea tema a Kwasekristu, u i gbe u a taver nan ishima shi a na nan iwasen ken Ruamabera yô. Aluer mbatamen mbara vande sônon Yehova ér a tese ve kwagh u vea er shi ve kegh ato a anmgbian u kwase la zulee yô, vea hemba fan er vea sur nan ishima ken Mkaanem ma Aôndo shi vea wase nan nana hemba lun a vangertiôr yô.—Rom. 15:4.